1-2. Khu sevbini sighelo nyo pwale hi gu naso gasi gu yeyedza lihaladzo nyo tumbege ga vambe?

HI NA ni sighelo nya sadi nya gu hi yeyedza lihaladzo nyo tumbege ga vambe. Khu sevbini sighelo sakona? Wona edzi mavingu nyo khaguri nya Bhibhiliya ma hi phasago khidzo gu hlamula giwudziso gegi. “Wuhindzi ni gutumbega u nga hambani naso! . . . Khu guralo, u na mana gukatega ni mapimo nya yadi mbeli ga Nungungulu ni ga vathu.” “Muthu nya wadi a gu nengedzisa hefemulo waye.” “Uye a landrisago ndzila nya gululame ni wuhindzi, a na mana guvbanya.” — Mav. 3:3, 4; 11:17; 21:21.

² Mavingu yaya ma gu hi ninga sighelo nya sadi nya gu hi yeyedza lihaladzo nyo tumbege. Gupheya, tepo hi yeyedzago lihaladzo nyo tumbege ha gu khala vathu nya lisima ga Nungungulu. Nya wuvili, tepo hi yeyedzago lihaladzo nyo tumbege ha gu hakha silo nya sadi olu. Khu giyeyedzo, ha gu gira wupari nya mba vbeya ni vambe. Nya wuraru, ha gu yeyedza lihaladzo nyo tumbege hi na hakha silo nya sadi mindru wa tshigu gu pata ni womi nya mba vbeya. Khu lisine, hi na ni sighelo nyo pwale nya gu engise gileletelo gya Jehovha gi gu khigyo: “Nonedzani wuwadi ni wuhindzi, moyo ni moyo a na pwele wuhindzi ndriyaye.” — Zak. 7:9.

3. Khu sevbini siwudziso si na hlamudwago avba nya ndrima yeyi?

³ Avba nya ndrima yeyi hi na wona mihlamulo nya 4 siwudziso. Nyo pheye, hi yede gu yeyedza lihaladzo nyo tumbege ga mani? Nya wuvili, ginani egi libhuku la Rute li hi hevbudzago  maningano ni lihaladzo nyo tumbege? Nya wuraru, hi nga yeyedza kharini lihaladzo nyo tumbege muhuno? Nya wuna, vale va yeyedzago lihaladzo nyo tumbege va gu wuyedwa kharini?

4. Hi nga pimedzeya kharini Jehovha? (Marko 10:29, 30)

⁴ Ndrima yi vbindridego yi hi phaside gu pwisisa gu khethu Jehovha a gu yeyedza lihaladzo nyo tumbege basi ga vale va mu haladzago ni gu mu thumeya. (Dhan. 9:4) Ethu ha gu vbweta gu pimedzeya “giyeyedzo gya Nungungulu kha nga sanana nya sigodwa.” (Efes. 5:1) Khu kharato, hi yede gu yeyedza lihaladzo nyo tumbege ga vandriyathu libandlani. — Leri Marko 10:29, 30.

5-6. Guya khu mawonelo nya vathu sa gu thula ginani “gutumbega”?

⁵ Khu lisine, kha wu kanakani gu khuwe tepo hi yago hi pwisisa gu khethu sa gu thula ginani gu yeyedza lihaladzo nyo tumbege, sa gu hi gira hi li yeyedza ga vandriyathu. Gasi hi pwisisa gwadi gu khethu ginani lihaladzo nyo tumbege, hongoleni hi wona guhambana gu gomogo avba nya likhalelo leli ni esi vathu va si pwisisago maningano ni lito “gutumbega.” Wona giyeyedzo nyo khaguri.

 ⁶ Ga vathu nya vangi, muthu a thumago khu tepo nya yingi avba nya komponi nyo khaguri, a gu wonwa kha nga githumi nyo tumbege. Ganiolu, ambari gi gu na ni myaga nya yingi na gi gu thuma avba nya komponi yile, si nga gira na gi si vati vathangeyi vagyo. Si nga gira gambe nasiri tepo yatshavbo gi dzumeleyanago ni milayo ya avba nya komponi. Githumi gegi kha gi yi goli komponi yeyi, ganiolu gi ngu tsaka khu gu manega ni thumo ni gu hakha dzitsapawu. Igyo gi na simama gu thuma vbale kala gi reformari mwendro kala gi mana thumo nya tshukwana.

7-8. (a) Ginani gi kutsago muthu gu yeyedza lihaladzo nyo tumbege? (b) Khu ginani hi na bhulago khu mavhesi nyo khaguri ya avba nya libhuku la Rute?

⁷ Gu hambana gu gomogo avba nya gutumbega gu khumbugwago avba nya  ndrimana 6 ni lihaladzo nyo tumbege gomo avba nya egi gi kutsago muthu gu yeyedza makhalelo yaya yamavili. Khu ginani sithumi sa Nungungulu sa dziteponi nya Bhibhiliya si yeyedzidego lihaladzo nyo tumbege? Ava va yeyedzago lihaladzo nyo tumbege kha va giri isoso khu gu gurumedzwa, ganiolu khu gu dzina. Wona giyeyedzo gya Dhavhidhe. Uye a di gu dziti gu khuye Sawule, papayi wa Jonatane a di gu vbweta gu mu songa. Ambari ulolo, monyo wa Dhavhidhe wu mu kutside gu yeyedza lihaladzo nyo tumbege ga pari yaye nya yikhongolo Jonatane. Myaga hwane nya gu ba Jonatane a fude, Dhavhidhe simamide gu yeyedza lihaladzo nyo tumbege ga gyanana gya Jonatane Mefibhoseti.— 1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Ethu hi nga hevbula silo nya singi maningano ni lihaladzo nyo tumbege khu gu hi hevbula mavhesi nyo khaguri avba nya libhuku la Rute. Sihevbudzo muni maningano ni lihaladzo nyo tumbege hi si manago avba nya vathu va khumbugwago avba nya libhuku leli? Hi nga si thumisa kharini sihevbudzo sesi libandlani gwathu? *

9. Khu ginani Nowemi a nga pimisa gu khuye Jehovha a di gu mu digide?

⁹ Ga libhuku la Rute hi ngu hevbula khu matimo ya Nowemi, ngadzamwane waye Rute ni Bhowazi, a gu nongo wa mwama wa Nowemi a nga ba a gola Nungungulu. Khu kotani nya ndzala yi nga ba yi romo Israyeli, Nowemi,  mwama waye ni sanana sawe sasivili va di fuluga va hongola Mowabhi. Na vari Mowabhi, mwama wa Nowemi a difa. Sanana saye sasivili si di tshadha. Ganiolu, egi gi si tsakisigo khu gu aniso si difa. (Rute 1:3-5; 2:1) Satshavbo sigaradzo sesi si giride gu Nowemi a vbeya ngudzu tshivba. Uye vbede ngudzu tshivba nyo bwe a pimisa gu khuye Jehovha a di mu digide. Wona egi a ganedego maningano ni edzi a nga ba adzipwa khidzo. Uye a di khuye: “Gyandza gya PFHUMU Nungungulu gi nyi bweledzede hwane.” “Mune nya Tshivba Yatshavbo a nyi woniside mihimbo.” Uye a di ganeya gambe gu khuye: “PFHUMU Nungungulu a nyi dzudzugide, ni mune nya Dzitshivba a nyi thede wuvi nya wukhongolo.” — Rute 1:13, 20, 21.

10. Ginani egi Jehovha a giridego tepo a ngapwa esi Nowemi a nga ganeya?

¹⁰ Ginani egi Jehovha a giridego khesi Nowemi a nga ganeya? Uye kha diga gu phasa Nowemi. Wulangani nya isoso, uye a di mu pweya wusiwana. Jehovha a ngu pwisisa gu khuye “dzitshanisa dza gu khunguvanyisa ni vagengeli.” (Muh. 7:7) Ganiolu, Nowemi a di gu vbweta giphaso gasi gu pwisisa gu khuye Jehovha a diri vbafuvbi gwaye. Jehovha a mu phaside kharini? (1 Sam. 2:8) Uye a kutside Rute gu yeyedza lihaladzo nyo tumbege ga Nowemi. Rute a di dzi emisede gu yeyedza lihaladzo nyo tumbege ga Nowemi, nigu khu wuwadi a mu phaside gu mba vbeya tshivba ni gu dziti gu khuye Jehovha a di gu mu haladza. Ginani hi gi hevbulago khu giyeyedzo gya Rute?

11. Khu ginani vandriyathu va dzi garadzeyago gu phasa ava va vbedego tshivba?

¹¹ Lihaladzo nyo tumbege la gu hi kutsa gu phasa vale va vbedego tshivba. Gu fana ni Rute a simamidego ni Nowemi, vandriyathu muhuno va ngu dzi garadza gasi gu phasa ava va vbedego tshivba libandlani. Avo va gu gira isoso kholu va ngu haladza vandriyawe nigu va ngu dzina gu gira satshavbo va si kodzago gasi gu va phasa. (Mav. 12:25; 24:10) Isoso si ngu pwanana ni wusingalagadzi wa mupostoli Pawulo a nga khuye: “Tiyiselani ava va rerekago, sayisani vadwali, mu hunisela vatshavbo.” — 1 Tes. 5:14.

12. Gu tala nya dzitepo khu yevbini ndziya nya yadi nya gu phase muthu libandlani a vbedego tshivba?

¹² Gutala nya dzitepo, ndziya nya yadi nya gu phase muthu a vbedego tshivba, khu gu mu engiseya gwadi hi bwe hi mu tiyisegisa gu khethu hi ngu mu haladza. Jehovha a ngu tsaka ngudzu khu vale va yeyedzago wuwadi ni gu khatala khu sithumi saye. (Ndzi. 41:1) Mavingu 19:17 wari khuye: “Uye a phasago gisiwana a gu fiyarisa PFHUMU Nungungulu, Uye a na mu bweledzela wuwadi waye.”

13. Esi Rute a hungidego gu gira si di hambanide ni esi sa Orifa khu ndziya muni nigu Rute yeyedzide kharini lihaladzo nyo tumbege? (Wona foto ya avba nya kapa)

¹³ Hi nga pwisisa gwadi gu khethu ginani lihaladzo nyo tumbege khu gu wona esi si giregidego ni Nowemi tepo mwama waye ni sanana saye va ngafa. Tepo Nowemi a nga dziti gu khuye Jehovha “kategiside vathu vaye, khu gu va  ninga guhodza nya gungi,” uye a di hunga gu khuga khu Mowabhi a bweleya tigoni gwaye. (Rute 1:6) Vagandzamwane va Nowemi vavavili va di mu bangaladza. Na vari ndziyani, Nowemi ganede guraru gu khuye va di yede gu bweleya Mowabhi. Ginani gi giregidego? Matimo ma gu tshamuseya gu khayo: “Orifa a di khuga a bhejari nasale waye, a hongola; khu guralo, Rute a di simama gu mu bangaladza.” (Rute 1:7-14) Khu gu ba Orifa a hungide gu bweleya Mowabhi, a di gu gira esi Nowemi a nga ba a mu embede. Ganiolu, Rute giride nya singi gu vbindra esi a embedwego khu Nowemi. Uye a di gu tshulegide gu bweleya gaya, ganiolu khu gu kutswa khu lihaladzo nyo tumbege, uye a di hunga gu simama ni Nowemi gasi gu mu phasa. (Rute 1:16, 17) Rute a di hunga gu simama ni Nowemi nasiri khu gu gurumedzwa, ganiolu khu gu dzina. Esi Rute a hungidego gu gira giyeyedzo nya lihaladzo nyo tumbege. Ginani hi gi hevbulago khesi Rute a giridego?

14. (a) Vandriyathu nya vangi muhuno, va gu pimedzeya kharini giyeyedzo gya Rute? (b) Guya khu Vahebheru 13:16, hi nga tsakisa kharini Nungungulu?

¹⁴ Lihaladzo nyo tumbege la gu hi kutsa gu gira nya singi gasi gu phasa vambe. Kha nga gale, vandriyathu nya vangi muhuno va ngu hunga gu yeyedza lihaladzo nyo tumbege ga vandriyawe ambari na va si vati. Khu giyeyedzo, tepo va dzitigo gu khavo gu dugelede mhango nya tumbunugo, avo va gu dzegeya gu gira gilogyo gasi gu phasa. A gu tshuka ndriyathu nyo khaguri libandlani a hamuga dzitsapawu, nya mba hweya avo va gu vbwetedzeya dzindziya nya gu mu phase. Gu fana ni vandriyathu va lizana myaga nyo pheye va Makedhoniya, vandriyathu vava va gu dzi garadzeya gu gira nya singi. Avo va gu thumisa tepo yawe ni dzithomba dzawe gasi gu phasa vandriyathu va tshanganago ni gigaradzo nyo hamuge dzitsapawu. (2 Kor. 8:3) Jehovha a ngu tsaka ngudzu tepo a va wonago na va gu yeyedza lihaladzo nyo tumbege. — Leri Vahebheru 13:16.

15-16. Rute kha tsukula khu ndziya muni?

¹⁵ Hi nga hevbula silo nya lisima khu gu gevisisa matimo nya Bhibhiliya ya Rute ni Nowemi. Hongoleni hi wona silo nyo khaguri hi nga si hevbulago.

¹⁶ U nga tsukuli. Tepo Rute a nga dzi emiseya gu bangaladza nasale waye kala Judha, gupheyani Nowemi a di bomba, ganiolu Rute kha tsukula gu mu phasa. Isoso si reside handro muni? Bhibhiliya yari khiyo: “Nowemi, na wonide gukhuye ngadzamwane waye, a dzi emisede guhongola naye, a di degula a si regeri gambe khiso.” — Rute 1:15-18.

17. Ginani gi na hi phasago gu mba dzegeya gu tsukula?

¹⁷ Ginani hi gi hevbulago? Gu phasa vandriyathu va vbedego tshivba so lomba gu laphisa monyo. Ganiolu, isoso kha si yeli gu hi gira hi va tsukula. Adzina ndriyathu nya nyamayi a ngu vbweta giphaso. * Ambari gupheyani a gu bomba giphaso gyathu, lihaladzo nyo tumbege li na hi kutsa gu simama hi mu phasa. (Gal. 6:2) Hi ngu dziti gu khethu khu gu gimbiya nya tepo uye a na hi diga hi mu phasa ni gu mu thaveleya.

18. Ginani adzina gi gorosidego Rute?

¹⁸ U nga gorogi. Tepo Nowemi ni Rute va nga vboha Bhetlehema, Nowemi a diya manana ni vavhizinyu vaye va gale. Uye a di va embeya gu khuye: “Nyi khugide nyi na tade, aholu PFHUMU Nungungulu a nyi wuyiside na nyiri liphanga.” (Rute 1:21) Nga dundrugeya khedzi Rute a dzipwidego khidzo tepo a ngapwa malito yaya. Rute giride satshavbo a nga si kodza  gasi gu phasa Nowemi. Khu giyeyedzo, uye a lide naye, a mu thavelede nigu a gimbide matshigu nya mangi naye. Ambari olu Rute a giridego satshavbo soso, Nowemi a di khuye: “PFHUMU Nungungulu a nyi wuyiside na nyiri liphanga.” Esi Nowemi a ganedego si di gira gu khatshi kha nga ba a ninga lisima giphaso a nga ba a ningwa khu Rute. Tepo Nowemi a nga ganeya malito yaya, Rute a diri vbafuvbi gwaye. Nga dundrugeya edzi si mu vbisidego khidzo Rute tepo a ngapwa malito yaya! Ambari ulolo, uye simamide ni Nowemi.

19. Ginani gi na hi phasago gu simama gu phasa ndriyathu a vbedego tshivba?

¹⁹ Ginani hi gi hevbulago? Si nga gira ndriyathu nya nyamayi a vbedego tshivba a ganeya silo si nga hi gorosago ambari na hi gu gira satshavbo hi si kodzago gasi gu mu phasa. Ganiolu, ethu kha hi yeli gu goroga. Hi yede gu phasa ndriyathu hi bwe hi lomba Jehovha gasi a hi phasa gu mana ndziya nya gu mu thaveleye.— Mav. 17:17.

20. Rute a si kodzide kharini gu mana tshivba nya gu simame gu phasa Nowemi?

²⁰ Tiyisa ava va vbwetago giphaso. Rute a di yeyedzide lihaladzo nyo tumbege ga Nowemi, ganiolu anuye a di gu vbweta gu tiyiswa. Khu kharato, Jehovha kutside Bhowazi gu mu tiyisa. Bhowazi a di embeya Rute khuye: “PFHUMU Nungungulu a na gu bweledzele mithumo yago, u hakha tshatshazelo nya yikhongolo khu ga PFHUMU Nungungulu wa Israyeli, Uye u dzudego vbavbatshi nya dzimbapi dzaye gasi guta mana wuthavelo.” Malito yaya nya gu mbure ma thavelede Rute. Uye a di embeya Bhowazi gu khuye: “U nyi tangadziside, u ganede monyoni ga githumi gyago ambari nyi si gu moyo nya githumi gyago.” (Rute 2:12, 13) Bhowazi tiyiside Rute tepo a nga ba a vbweta giphaso nigu isoso si mu ningide tshivba nya gu simame a phasa Nowemi.

21. Guya khu Isaya 32:1, 2, ginani egi madhota ma girago?

²¹ Ginani hi gi hevbulago? Vale va yeyedzago  lihaladzo nyo tumbege ga vambe dzimbe dzitepo anavo va ngu vbweta gu tiyiswa. Bhowazi zundzide Rute tepo a nga wona edzi a phasidego khidzo Nowemi. Muhuno gambe, madhota ma ngu zundza vandriyathu libandlani tepo ma wonago edzi va dzi garadzeyago khidzo gu phasa vambe. Tepo va zundzwago va ngu mana tshivba nya gu simame va phasa vambe. — Leri Isaya 32:1, 2.

22-23. Nowemi vbindrugedzide kharini mapimiselo yaye nigu khu ginani? (Ndzimo 136:23, 26)

²² Hwane nya tepo nyo khaguri, Bhowazi ningide Rute ni Nowemi silo nya singi nya gu hodze. (Rute 2:14-18) Ginani egi Noweni a giridego hwane nya gu ba Bhowazi a mu ningide silo sesi? Uye a di khuye: “A na kategiswe khu PFHUMU Nungungulu, [oyu a giredego] wuhindzi ga avo va vbanyago ni vafudego.” (Rute 2:20a) Khu lisine, Nowemi a vbindrugedzide ngudzu mapimiselo yaye. Gupheyani tepo a nga ba apwa wuvi a di gu ganede gu khuye: “PFHUMU Nungungulu a nyi dzudzugide,” ganiolu na tsakide uye a di khuye: ‘Jehovha kha diga gu yeyedza lihaladzo nyo tumbege.’ Khu ginani Nowemi a nga vbindrugedza mapimiselo yaye?

²³ Khu gu hegisa Nowemi pwisiside gu khuye Jehovha gima kha mu diga. Jehovha thumiside Rute gasi gu phasa Nowemi avba nya liendro laye nyo bweleye Judha. (Rute 1:16) Nowemi pwisiside gambe gu khuye Jehovha thumiside Bhowazi gasi gu phasa uye ni Rute. (Rute 2:19, 20b) Si nga gira Nowemi na pimiside gu khuye: ‘Nyi ngu wona gu kheni Jehovha gima kha nyi diga. A diri ni eni tepo yatshavbo.’ (Leri Ndzimo 136:23, 26.) Kholu Rute ni Bhowazi va nga ne gu mu diga, guvbindrugedza ga Nowemi gu reside gutsaka nya gukhongolo ngudzu ga avo va vararu.

24. Khu ginani hi vbwetago gu simama gu yeyedza lihaladzo nyo tumbege ga vandriyathu?

²⁴ Libhuku la Rute li hi hevbudzide ginani maningano ni lihaladzo nyo tumbege? Lihaladzo nyo tumbege la gu hi kutsa gu mba vbiredzeya gu tsukula vandriyathu va tshanganago ni sigaradzo. Isoso sa gu hi kutsa gambe gu gira nya singi gasi gu va phasa. Madhota ma yede gu tiyisa ni gu zundza ava va yeyedzago lihaladzo nyo tumbege ga vambe. Ethu hi ngu tsaka tepo hi wonago vandriyathu va vbedego tshivba na va gu pheledza gu mana litsako ni tshivba nya gu thumeye Jehovha. (Mith. 20:35) Khu gevbini gighelo nya lisima gi hi girago hi simama gu yeyedza lihaladzo nyo tumbege? Khu gu ha gu vbweta gu pimedzeya ni gu tsakisa Jehovha oyu ‘a tadego khu lihaladzo nyo tumbege.’— Ekiso. 34:6; Ndzi. 33:22.