1. Jehovha a gu hi kutsa gu gira ginani?

LIHALADZO nyo tumbege gilo nya lisima ngudzu ga Jehovha. (Hos. 6:6) Uye a gu vbweta gu khuye hi li wona khu ndziya ya yimweyo. Khu gu thumisa Muprofeti Mikeya, Nungungulu a gu hi kutsa gu yeyedza “lihaladzo nyo tumbege.” (Mik. 6:8) Ganiolu, gupheya hi yede guti gu khethu ginani lihaladzo nyo tumbege.

2. Ginani lihaladzo nyo tumbege?

² Ginani lihaladzo nyo tumbege? Lito “lihaladzo nyo tumbege” li ngu khumbugwa 230 nya ugo ni gu vbindra umo nya Tradução do Novo Mundo da Bíblia Sagrada. Lo tshamuseya ginani? “Muthu nyo khaguri a gu ba a ri ni lihaladzo nyo tumbege a gu haladza ngudzu mumbe muthu nigu a gu simama gu mu haladza a bwe a khala vbafuvbi gwaye. Gu tala nya dzitepo, lihaladzo nyo tumbege la gu thumiswa gasi gu yeyedza lihaladzo eli Nungungulu a gu nalo khu vathu, ganiolu lihaladzo leli gambe li ngu yeyedzwa khu vathu.” Jehovha giyeyedzo nya gyadi avba nya gu yeyedze lihaladzo nyo tumbege. Avba nya ndrima yeyi, hi na wona edzi Jehovha a yeyedzago khidzo lihaladzo nyo tumbege ga vathu. Ga ndrima yi landreyago hi na wona edzi sithumi sa Nungungulu si nga pimedzeyago khidzo Jehovha khu gu si yeyedzana lihaladzo nyo tumbege.

3. Ginani egi Jehovha a embedego Mosi maningano naye?

³ Hwanenyana nya gu ba Vaisrayeli va dugide khu Egipito, Jehovha embede Mosi silo nyo khaguri maningano ni lina laye ni makhalelo yaye. Uye a di khuye: “[Jehovha, Jehovha,] Nungungulu nya wuhindzi ni pwela wusiwana; A hwelago gu goroga, A tadego khu wuwadi ni gutumbega, wuhindzi waye wu thaphelago kala ga gitugulwana nya likhumi mazana, A tsetselelago guvivba, guyeyisa  ni gughoha.” (Ekiso. 34:6, 7) Khu malito yaya nyo mbure, Jehovha embede Mosi gilo nya lisima ngudzu maningano ni lihaladzo laye nyo tumbege. Khu gevbini gilo gyakone?

4-5. (a) Ginani egi Jehovha a ganedego khuye mune? (b) Khu sevbini siwudziso hi na bhulago khiso?

⁴ Jehovha yeyedzide gu khuye mwalo lihaladzo nyo tumbege basi, ganiolu “tade khu lihaladzo nyo tumbege.” Malito yaya ma ngu khumbugwa 6 nya ugo ni guvbindra umo nya Bhibhiliya. (Mite. 14:18; Neh. 9:17; Ndzi. 86:15; 103:8; Joy. 2:13; Jona 4:2) Dzitepo dzatshavbo malito yaya ma gu thula basi Jehovha nasiri vathu. Si ngu pwala gu ba Bhibhiliya yi ganeya gu khiyo Jehovha tade khu lihaladzo nyo tumbege. Khu ndziya yoyo, hi ngu si kodza gu wona gu khethu lihaladzo nya gutumbe gilo nya lisima gwaye. * Khiso si nga gira Pfhumu Dhavhidhe a ganeya gu khuye: “PFHUMU Nungungulu, Iihaladzo Iago Iomo ndzadzini . . . Oh, PFHUMU Nungungulu, IihaIadzo Iago Ii ngu tsakisa ngudzu! Khu magireIo yoyo, mutsani nya mambapi yago va nguta sihala umo vathu.” (Ndzi. 36:5, 7) Nya nga Dhavhidhe, anethu hi ngu wona lihaladzo nyo tumbege la Nungungulu kha nga gilo nya lisima?

⁵ Gasi gu pwisisa gwadi gu khethu ginani lihaladzo nyo tumbege, hongoleni wona siwudziso sivili. Jehovha a gu yeyedza lihaladzo nyo tumbege ga vamani? Nigu ho phasega kharini tepo Jehovha a hi yeyedzago lihaladzo laye nyo tumbege?

6. Jehovha a gu yeyedza lihaladzo nyo tumbege ga vamani?

⁶ Jehovha a gu yeyedza lihaladzo nyo tumbege ga vamani? Bhibhiliya ya gu hi embeya gu khiyo ethu hi nga gola silo nya singi nya nga “wulimi,” “vbinyu ni mafura,” “gu kawukwa,” “guti.” Esi silo nyo khaguri basi. (2 Dzik. 26:10; Mav. 12:1; 21:17; 29:3) Kha si kodzegi gu yeyedza lihaladzo nyo tumbege ga silo, ganiolu hi nga li yeyedza basi ga vathu. Ganiolu, Jehovha kha yeyedzi lihaladzo laye nyo tumbege ni ga wevbini muthu. Uye a gu yeyedza basi lihaladzo laye nyo tumbege ga vale va gu na ni wupari nyo tiye naye. Nungungulu wathu a ngu tumbega ga dzipari dzaye. Nungungulu wathu a na ni makungo nya gu samadzise khu moyo ni moyo nya sithumi saye nigu uye gima kha na nga diga gu si haladza.

7. Jehovha yeyedzide kharini lihaladzo ga vathu vatshavbo?

⁷ Jehovha yeyedzide lihaladzo ga vatshavbo vathu. Jesu embede mwama moyo nya gu pwane khu Nikodhemo gu khuye: “Kholu Nungungulu haladzide ngudzu litigo gu kala a ningela Mwanaye wa moyo, gasi ni wevbi a khodwago gwaye a si  mbembi, aholu a mane guvbanya nya gupindruge” — Joh. 3:1, 16; Mat. 5:44, 45.

8-9. (a) Khu ginani Jehovha a yeyedzago lihaladzo nyo tumbege ga sithumi saye? (b) Ginani hi na gi wonago olu?

⁸ Kha nga si ganedwego gupheyani, Jehovha a ngu yeyedza basi lihaladzo laye nyo tumbege ga sithumi saye, a gu vale va gu na ni wupari nyo tiye naye. Hi nga si wona isoso avba nya esi Pfhumu Dhavhidhe ni muprofeti Dhaniyeli va ganedego. Khu giyeyedzo Dhavhidhe a di khuye: “Thawuludza wuwadi wago ga vale va gutigo.” “Wuhindzi wa PFHUMU Nungungulu, wu ngu simama kala gupindruga ga vale va mu ningago githawo.” Nigu Dhaniyeli a di khuye: “Oh! Pfhumu! Nungungulu nya khongolo nya guthavisege, khu lihaladzo Iago nya gutumbege, u vegedzago gidzumeledzwano ni avo va gu golago ni gu vegedza milayo yago.” (Ndzi. 36:10; 103:17; Dhan. 9:4) Guya khu mavhesi yaya nya Bhibhiliya, Jehovha a gu yeyedza lihaladzo laye nyo tumbege ga sithumi saye kholu iso si ngu muti, si ngu mu ninga githawo, si ngu mu haladza nigu si ngu vegedza milayo yaye. Jehovha a gu yeyedza lihaladzo laye nyo tumbege ga vakhozeyi vaye nya lisine basi.

⁹ Na hi nga si pheyi gu mu thumeya, Jehovha a di gu hi yeyedza lihaladzo eli a yeyedzago ga vathu vatshavbo. (Ndzi. 104:14) Ganiolu, gu khugeya hi nga khala vakhozeyi vaye, Jehovha a gu hi yeyedza lihaladzo laye nyo tumbege. Khu kharato, Jehovha a gu tumbisa sithumi saye khuye: “Lihaladzo nyi gu nalo nago, gima kha li na duga avbo gwago.” (Isa. 54:10) Dhavhidhe a ngu ma seketeya malito yaya kholu uye a di khuye: “PFHUMU Nungungulu a dzi hathede oyu a khodwago gwaye.” (Ndzi. 4:3) Kha nga olu Jehovha a hi pharago khu ndziya nyo hathege, isoso sa gu hi kutsa gu gira ginani? Muembi nya dzindzimo lovide khuye: “Oyu a gengedego a ngu thela kota khu silo sesi, a pimisa gwadi lihaladzo la PFHUMU Nungungulu.” (Ndzi. 107:43) Wusingalagadzi wowu wa guta khiyo ga Jehovha, khu kharato hi na wona dzindziya dziraru edzi Jehovha a yeyedzago khidzo lihaladzo laye nyo tumbege ni edzi hi phasegago khidzo khu lihaladzo laye nyo tumbege.

10. Ha gu phasega kharini khu gu dziti gu khethu lihaladzo nyo tumbege la Nungungulu li ngu simama kala gupindruga? (Ndzimo 31:7)

¹⁰ Lihaladzo nyo tumbege la Nungungulu li ngu simama kala gupindruga. Mahungu yaya nya lisima maningano ni lihaladzo nyo tumbege ma ngu khumbugwa 26 nya ugo umo ga Ndzimo 136.  Livhesi nyo pheye lari khilo: “Aleluya! Bongani PFHUMU Nungungulu kholu khwadi, kholu lihaladzo laye li ngu simama kala gupindruga.” (Ndzi. 136:1) Ga livhesi 2 kala 26 gu ngu tshingiswa malito yaya: “Lihaladzo laye li ngu simama kala gupindruga.” Tepo hi hevbulago mavhesi yaya hi ngu samadziswa ngudzu khu wona dzindziya nyo hambanehambane edzi Jehovha a yeyedzago khidzo lihaladzo laye nyo tumbege. Nigu uye kha digi gu gira isoso. Gu tshingiswa nya malito ma gu khayo: “Lihaladzo laye li na simama kala gupindruga” sa gu hi gira hi tiyisega gu khethu lihaladzo la Nungungulu khu vathu vaye gima kha li na nga vbindrugedza. Si ngu tsakisa guti gu khethu Jehovha kha tsukuli nya mu tsukuli sithumi saye. Wulangani nya isoso, tepo uye a pheyago gu yeyedza lihaladzo ga muthu a mu thumeyago uye kha mu digi, ngudzungudzu ga dzitepo nyo garadze. Ha gu wuyedwa kharini? Guti gu khethu Jehovha a ngu hi haladza si ngu hi ninga litsako ni tshivba hi yi vbwetago gasi gu emisana ni sigaradzo sathu hi bwe hi simama gu mu thumeya. — Leri Ndzimo 31:7.

11. Guya khu Ndzimo 86:5, ginani gi kutsago Jehovha gu divaleya?

¹¹ Lihaladzo nyo tumbege la Nungungulu la gu hi kutsa gudivaleya vambe. Jehovha a ngu si kodza gu wona tepo gighohi gi dzi layago gi bwe gi ema gu gira silo nya guvivbe. Ga siemo sesi, lihaladzo nyo tumbege la gu hi kutsa gu divaleya vambe. Dhavhidhe a di khuye Jehovha “kha hi tsayisi gupima khu sighoho sathu, gambe kha hi bweledzeli gukhedza khu guvivba gwathu.” (Ndzi. 103:8-11) Dhavhidhe wonide edzi si vbisago khidzo gu manega ni livhalo li dzipwago nandru. Ganiolu, uye a di gu dziti gu khuye Jehovha a dzi emisede gu “tsetseleya.” Ginani gi kutsago Jehovha gu divaleya? Hlamulo womo omu ga Ndzimo 86:5 (Leri.) Kha nga a ganedego Pfhumu Dhavhidhe avba nya nombelo waye, Jehovha a gu divaleya kholu lihaladzo laye nyo tumbege khu vatshavbo va mu lombago gu divaledwa likhongolo.

12-13. Ginani gi na hi phasago ha gu ba hi dzipwa nandru khu sighoho hi giridego gale?

¹² Tepo hi ghohago, khyadi ngudzu ha gu dzipwa nandru. Isoso si na hi phasa gu dzilaya hi bwe hi vbindrugedza mavbanyelo nya mba yadi. Ganiolu, simbe sithumi sa Nungungulu si ngu dzipwa nandru khu kotani nya sighoho si giridego gale. Avo vo pimisa gukhavo Jehovha gima kha na nga va divaleya ambari na va dzi layide  kharini. U di nga tshuka u dzipwa khu ndziya yeyi? Abari gu ina, dundruga gu khuwe Nungungulu tepo yatshavbo a dzi emisede gu yeyedza lihaladzo laye nyo tumbege ga sithumi saye.

¹³ Ha gu wuyedwa kharini? Ambari olu hi nga mba vbeleya, hi nga mana gutsaka khu gu thumeya Jehovha na hi ri ni livhalo li agidego. Isoso so kodzega kholu “novba wa Kristo, Mwamana waye, wu ngu handza sighoho sathu satshavbo.” (1 Joh. 1:7) Wa gu ba u vbede tshivba khu kotani nya gu mba vbeleya gwago, dundruga gu khuwe Jehovha a dzi emisede gu gu divaleya wa gu ba u dzi layide. Wona edzi Dhavhidhe a pwananisidego khidzo lihaladzo nyo tumbege ni gu divaleya. Uye a di khuye: “Kha nga idzo ndzadzini a gu hwindzo ni mafuni, kharati nilo lihaladzo laye likhongolo ga vale va mu ningago githawo. Kha nga idzo Khugadambo gu gu hwindzo ni Muhwadambo, kharato nugo a ngu ndreyisa vbakari gwathu sighoho sathu.” (Ndzi. 103:11, 12) Somo guagani gu khiso Jehovha a dzi emisede “gu hi divaleya.” — Isa. 55:7.

14. Dhavhidhe tshamusede kharini edzi lihaladzo nyo tumbege la Nungungulu li hi vhikeyago khidzo?

¹⁴ Lihaladzo nyo tumbege la Nungungulu li ngu hi vhikeya khu liphuvboni. Dhavhidhe a di gombeya ga Jehovha khuye: “Uwe u wuthavelo wangu; u ngu nyi vbulugisa sigaradzoni, nyi gire nyipwa basi dzindzimo nya gupale. . . . lihaladzo la gu furumedza avo va tumbago PFHUMU Nungungulu.” (Ndzi. 32:7, 10) Dziteponi nya Bhibhiliya, madhoropa ma di gu randredwe khu dzimuru gasi gu vhikeya vathu ga valala vawe. Khu ndziya nyo fane, lihaladzo nyo tumbege la Jehovha la gu fana ni muru wu hi vhikeyago ga satshavbo si nga vegago mhangoni wupari wathu ni Jehovha. Gu diga isoso, lihaladzo nyo tumbege la Jehovha la gu mu kutsa gu hi ndrindredzeya iyo gwaye.— Jer. 31:3.

15. Khu gwevbini gupwanana gu guromo avba nya lihaladzo nyo tumbege la Jehovha ni wuthavelo ni likhokhola?

¹⁵ Dhavhidhe thumiside gimbe gifananiso gasi gu yeyedza edzi vathu va Nungungulu va vhikedwago khidzo. Uye lovide gu khuye: “U muvhikeli wangu, ni wuthavelo wangu, uwe khuwe Nungungulu nya gutumbege u nyi haladzago.” Dhavhidhe a di ganeya gambe gu khuye: “Uye khuye mutangadzisi, likhokhola ni wuthavelo wangu; khuye mudzegisi ni muvhikeli wangu nya gu mu tumbe, khuye a nyi ningago tshivba nya gufumele wathu.” (Ndzi. 59:17; 144:2) Khu ginani Dhavhidhe a nga fananisa lihaladzo nyo tumbege la Jehovha ni wuthavelo ni li khokhola? Gani ho vbanya hayini, Jehovha o tumbisa gu khuye na hi ngari sithumi saye, a na vhikeya wupari wathu naye. Gitumbiso gegi hi ngu gi mana gambe umo ga Ndzimo 91. Mulovi nya dzindzimo lovide gu khuye: “A na rungudza PFHUMU Nungungulu, khuye: Uwe Nungungulu wangu, u wuthavelo wangu, u likhokhola langu.” (Ndzi. 91:1-3, 9, 14) Mosi nuye fananiside Jehovha ni wuthavelo. (Ndzi. 90:1) Na a si gufi, Mosi ganede khu gilo nyo tsakise ngudzu. Lovide gu khuye: “Nungungulu nya pindrugedwa, a na khale wuthavelo wago, khu vbavbatshi gwago, a na thawuludze mandza yaye nya gupindruge.” (Dhet. 33:27) Malito ma gu khayo “a na thawuludze mandza yaye nya gupindruge” ma gu hi hevbudza ginani khu Jehovha?

16. Jehovha a gu hi phasa kharini? (Ndzimo 136:23)

¹⁶ Tepo hi tugulago gu khethu Jehovha a na hi vhikeya, ho dzipwa na hi gu vhikelegide. Ambari ulolo, dzimbe dzitepo hi ngu tshuka hi dzipwa na hi vbede tshivba nyo bwe hi pimisa gu khethu kha hi na nga si kodza gu gira gilogyo. Ga siemo nya nga esi, ginani egi Jehovha a nga hi gireyago? (Leri Ndzimo 136:23.) Uye a na thawuludza mandza yaye a hi wusa, a bwe a hi phasa gu ema gambe. (Ndzi. 28:9; 94:18) Ha gu wuyedwa kharini? Guti gu khethu hi nga tumba Nungungulu tepo yatshavbo, sa gu hi phasa khu dzindziya dzimbili. Nyo pheye, ni hayini hi vbanyago, hi ngu dziti gu khethu Jehovha tepo yatshavbo a na hi vhikeya. Nya wuvili, Papayi wathu wa ndzadzini Jehovha a ngu khatala khu moyo ni moyo wathu.

17. Khu kotani nya lihaladzo nyo tumbege la Nungungulu, hi nga tiyisega khu ginani? (Ndzimo 33:18-22)

¹⁷ Kha nga hi si hevbudego, ambari ha gu tshangana ni sigaradzo, Jehovha a na simama gu hi phasa ha gu tumbega gwaye. (2 Kor. 4:7-9) Muprofeti Jeremiya a di khuye: “Ethu kha ha mbembiswa khu wuhigo wa PFHUMU Nungungulu; kholu lihaladzo laye li mwalo mahegiso.” (Gil. 3:22) Hi nga tiyisega gu khethu Jehovha a na simama gu hi yeyedza lihaladzo nyo tumbege kholu Bhibhiliya yari khiyo: “Maho ya PFHUMU Nungungulu, ma gu khedza vale va mu ningago githawo, ni ga vale va tumbago wuhindzi waye.”— Leri Ndzimo 33:18-22.

18-19. (a) Ginani hi yedego gu gi dundruga tepo yatshavbo? (b) Ginani hi na gi wonago avba nya ndrima yi landreyago?

¹⁸ Ginani hi yedego gu gi dundruga tepo yatshavbo? Na hi si gu pheyi gu thumeya Jehovha, uye a di gu hi yeyedza lihaladzo eli a yeyedzago vathu vatshavbo, ganiolu tepo hi nga khala vakhozeyi vaye, Jehovha a di yeyedza gambe lihaladzo nyo tumbege. Khu gu kutswa khu lihaladzo lolo, Jehovha a gu hi wugareya khu mawogo yaye. Uye tepo yatshavbo a na ba a romo vbafuvbi gwathu nigu a na tadzisa satshavbo a nga hi tumbisa. Uye a gu vbweta gu khuye hi khala dzipari dzaye kala gupindruga! (Ndzi. 46:1, 2, 7) Khu kharato, ni gevbini gigaradzo hi tshanganago nagyo, hi nga tiyisega gu khethu Jehovha a na hi ninga tshivba hi yi vbwetago gasi hi simama na hi tumbegide gwaye.

¹⁹ Kala avba hi wonide edzi Jehovha a yeyedzago khidzo lihaladzo nyo tumbege ga sithumi saye. Nigu, uye o vireya gu khuye hi yeyedzana lihaladzo nyo tumbege. Hi nga si gira kharini isoso? Ga ndrima yi landreyago hi na bhula khu mahungu yaya nya lisima.