NDRIMA NYA GIHEVBULO 46
Jehovha a gu hi phasa kharini gu timiseya sigaradzo na hi tsakide?
“PFHUMU Nungungulu a ngu lirela litshigu nya gu mi pwele wuhindzi; Uye a na simama a mi pwela wusiwana.” — ISA. 30:18.
NDZIMO 3 Tshivba yathu ni gutumba gwathu
ESI HI NA SI HEVBULAGO AVBA NYA NDRIMA YEYI: a
1-2. a) Siwudziso muni hi na bhulago khiso? b) Ginani gi yeyedzago gu khigyo Jehovha a ngu dzina ngudzu gu hi phasa?
JEHOVHA a nga hi phasa gu timiseya sigaradzo ni gu tsaka thumoni wathu hi mu gireyago. Jehovha a gu hi phasa kharini? Nigu hi nga wuyedwa kharini khu giphaso Jehovha a hi ningago? Ndrima yeyi, yi na hlamula siwudziso sesi. Ganiolu, na hi nga si hlamuli siwudziso sesi, gupheya hongoleni hi mana hlamulo nya giwudziso gegi: Ina Jehovha a dzi emisede gu hi phasa khu lisine?
2 Umo nya lidangaliya laye ga Vahebheru, Pawulo thumiside lito li nga hi phasago gu mana hlamulo nya giwudziso gegi. Pawulo lovide gu khuye: “Pfhumu khuye muphasedzeli wangu, eni kha nyi thavi gilo. A nga nyi gira ginani muthu?” (Hebh. 13:6) Dzireferensiya nya Bhibhiliya dzo ganeya gu khidzo umo nya livhesi leli lito “muphasedzeli”, la gu thula muthu nyo khaguri a tutumeyago gu phasa mumbe muthu a vbwetago giphaso. Dundrugeya Jehovha na gu tutumeya gu ya vbulugisa muthu a gomogo mhangoni. Uwe u na tiyisega khu lisine gu khuwe esi sa gu yeyedza gu khiso Jehovha a ngu dzina ngudzu gu hi phasa. Tepo Jehovha a hi phasago, ethu hi nga timiseya sigaradzo sathu na hi gu tsakide.
3. Khu dzevbini dzindziya dziraru edzi Jehovha a dzi thumisago gasi gu hi phasa gu timiseya sigaradzo sathu na hi tsakide?
3 Dzindziya muni nyo khaguri Jehovha a dzi thumisago gasi gu hi phasa gu timiseya sigaradzo sathu na hi tsakide? Gasi hi mana hlamulo, hongoleni hi leri gipandre nyo khaguri nya libhuku la Isaya. Khu ginani? Kholu siprofeto nya singi esi Jehovha a embedego Isaya si nga thuma ga sithumi sa Nungungulu muhuno. Isaya dzitepo nya dzingi ganede khu Jehovha na gu thumisa malito ma vbevbugago gu ma pwisisa. Gipimo 30 nya libhuku la Isaya gi na ni siyeyedzo nyo khaguri. Umo nya gipimo gegi, Isaya thumiside sipimaniso nyo mbure ngudzu gasi gu ganeya edzi Jehovha a phasago khidzo vathu vaye. Uye lovide khuye Jehovha a ngu hi phasa 1) khu gu engiseya gwadi milombelo yathu, 2) khu gu hi ninga sileletelo nigu 3) khu gu hi kategisa olu ni gu hi tumbisa gu hi kategisa mindru watshigu. Ethu hi na bhula khu dzindziya dzedzi dza dziraru Jehovha a dzi thumisago gasi gu hi phasa.
JEHOVHA A NGU HI ENGISEYA
4. a) Ginani Jehovha a ganedego khu Vajudha matshigoni ya Isaya, nigu ginani uye a dzumeledego gu gi girega? b) Gitumbiso muni Jehovha a ningidego vathu nyo tumbege? (Isaya 30:18, 19)
4 Gupheyani nya libhuku la Isaya gipimo 30, Jehovha a gu rana Vajudha kha nga “sanana nya guyeyise” si ‘engedzelago gighoho vbatshani nya gighoho.’ Uye a di engedza gambe khuye: “Vathu nya guyeyise . . . va si vbwetigo gu yingisa nayo wa [Jehovha].” (Isa. 30:1, 9) Khu kotani nya olu va nga mba engisa, Isaya ganede khuye Jehovha a di hadzi dzumeleya gu va tshaniseka. (Isa. 30:5, 17; Jer. 25:8-11) Isoso khiso si giregidego tepo Vabhabhiloni va va dzegidego kha nga dzigumbi. Ambari ulolo, gu diri ni vathu nyo khaguri nyo tumbege Judha. Isaya a diri ni mahungu ma nga hadzi gu va ninga gutumba. Uye a di khuye, Jehovha litshigu limwedo a di hadzi gu va dzumeleya va ya vbanya gambe Jerusalema. (Leri Isaya 30:18, 19.) Nigu khiso si nga girega. Jehovha a di va tshudzisa khu Bhabhiloni. Ambari ulolo, yi vbindride myaga nya yingi na nga si va tshudzise. Malito ma gu khayo: “[Jehovha] a ngu lirela litshigu nya gu mi pwele wuhindzi,” ma di gu yeyedza gu khayo va di hadzi gu vbedza tepo nyo khaguri na va si gu tshudziswi. Khu kharato, Vaisrayeli va vbedzide 70 myaga wugumbini ga Bhabhiloni na va si gu bweleyi Jerusalema. (Isa. 10:21; Jer. 29:10) Tepo Vaisrayeli va nga ba khothedwe Bhabhiloni, avo va di gu liya kholu va di gu vbede tshivba, ganiolu tepo va nga bweleya tigoni gwawe avo di liya kholu va di gu tsakide.
5. Gitiyisegiso muni egi Isaya 30:19 a hi ningago?
5 Hi ngu tiyiswa khu malito ma gu khayo: ‘Ha gu lila avbo gwaye, khu lisine uye a na hi pwela gisiro.’ (Isa. 30:19) Isaya a gu hi tiyisegisa gu khuye Jehovha a na hi engiseya tepo hi na liyago gwaye ni gu a na hlamula milombelo yathu nya mba hweya. Isaya a gu engedza khuye: “[A na] mi yingisa a vbiredza gu mi ningani phindrulo.” Gitiyisegiso gegi gya gu hi dundrugisa gu khigyo Papayi wathu wa ndzadzini a na ni gu dogoreya nya gu hi phase tepo khiyo hi mu lombago giphaso. Guti isoso si ngu hi phasa gu timiseya na hi tsakide.
6. Malito ya Isaya ma gu yeyedza kharini gu khayo Jehovha a ngu engiseya milombelo ya moyo ni moyo nya sithumi saye?
6 Ginani gambe livhesi leli li hi hevbudzago maningano khu milombelo yathu? Jehovha a ngu engisa gwadi milombelo ya moyo ni moyo wathu. Khu ginani hi ganeyago isoso? Umo nya gipandre nya gupheye nya libhuku la Isaya gipimo 30, gwa gu thumiswa lito “enu” gasi gu yeyedza gu khiso Jehovha a ngu engisa milombelo ya vathu vaye kha nga tsawa. Ganiolu, umo nya livhesi 19 gwa gu thumiswa lito “uwe” gasi gu yeyedza gu khiso Jehovha a ngu engisa milombelo ya moyo khu moyo wathu. Isaya lovide gambe khuye: ‘Enu kha mu na nga lila gambe; uye a na hi pwela gisiro a vbiredza gu hi ninga phindrulo.’ Kha nga Papayi nya lihaladzo, Jehovha kha embeyi sanana saye si vbedego tshivba gu khuye: “U yede gu tiya gu fana ni ndriyago.” Wulangani nya isoso uye a gu hi khathaleya ni gu hlamula milombelo ya moyo ni moyo wathu. — Ndzi. 116:1; Isa. 57:15.
Ginani egi Isaya a nga vbweta gu ganeya tepo a nga khuye: “U nga ningi [Jehovha] gu hefemula?” (Wona ndrimana 7)
7. Isaya ni Jesu va tshingiside kharini lisima nya gu gombeye khu gu phindra-phindra?
7 Tepo hi gombeyago ga Nungungulu hi bwe hi mu embeya edzi hi kuhidwego khidzo khu silo nyo khaguri, Jehovha adzina gupheya a na hi ninga tshivba hi yi vbwetago gasi gu timiseya. Nigu abari gu sigaradzo sathu kha si vbindri khu gu vbiredza hi yede gu lomba Jehovha khu gu phindra-phindra gasi a hi ninga tshivba nyo kodze gu timiseya. Uye a gu hi embeya gu gira isoso. Ha guti isoso khu malito ya Isaya ma gu khayo: “U nga ningi [Jehovha] gu hefemula.” (Isa. 62:7) Sa gu tshamuseya ginani isoso? Milombelo hi girago ga Jehovha hi yede gu yi gira khu gu phindra-phindra nga khatshi kha hi vbweti gu mu diga a hefemula. Malito ya Isaya ma gu hi dundrugisa gipimaniso gya Jesu maningano ni nombelo hi wu manago umo ga Luka 11:8-10, 13. Umo nya mavhesi yaya, Jesu a gu hi kutsa gu gombeya ni gu simama gu ‘lomba’ khu liphuvbo nya guage. Ethu nethu hi yede gu lomba Jehovha guti hi gu vbwetago gasi hi hunga makungo khu ndziya nya wugengeyi.
JEHOVHA A NGU HI THANGEYA
8. Dziteponi dza gale, malito ma gomogo umo ga Isaya 30:20, 21 ma tadzisegide kharini?
8 Leri Isaya 30:20, 21. Tepo Vabhabhiloni va nga randreya Jerusalema khu gipimo nya mwaga mowo ni metadi, Vaisrayeli va tshanganide ni sigaradzo nya singi va nga si oloveya nga khatshi, mati ni pawu. Ganiolu, guya khu mavhesi 20 ni 21, Jehovha a tumbiside Vajudha gu khuye va gu dzilaya va bwe va vbindrugedza mavbanyelo yawe, uye a di hadzi gu va vbulugisa. Na gu ganeya khu Jehovha kha nga “Muhevbudzi [wawe] nya khongolo,” Isaya tumbiside vathu khuye Jehovha a di hadzi gu va hevbudza edzi va nga mu khozeyago khidzo khu ndziya yi mu tsakisago. Malito yaya ma tadzisegide tepo khiyo Vajudha va nga tshudziswa khu wugumbini. Jehovha yeyedzide gu khuye a diri Muhevbudzi wawe nya Khongolo nigu khu gu thangedwa khuye avo va di hadzi gu si kodza gu wusedza wukhozeyi nya guage. Muhuno, hi ngu tsaka ngudzu kholu Jehovha a gu Muhevbudzi wathu nya Khongolo.
9. Khu yevbini mweyo nya ndziya hi hakhago khiyo sileletelo sa Jehovha muhuno?
9 Umo nya mavhesi yaya, Isaya a gu hi fananisa ni sihevbuli si hevbudzwago khu Jehovha na gu thumisa dzindziya dzimbili. Nyo pheye, Isaya a di khuye: “U na wona Muhevbudzi wago nya [Khongolo] khu maho yago.” Avba nya mavhesi yaya, Muhevbudzi womo khu mbeli nya si hevbuli saye. Khya lisima ngudzu gwathu gu hevbudzwa khu Nungungulu muhuno. Jehovha a gu hi hevbudza khu ndziya muni? Uye a gu gira isoso khu gu thumisa hengeledzano yaye. Khu kotani nya isoso, ethu hi ngu bonga ngudzu khu sileletelo hi si manago umo nya hengeledzano yaye. Sileletelo hi si manago umo nya mitshangano nya libandla, umo nya mitshangano nya yikhongolo, umo nya mabhuku yathu, dzivhidhiyu ni dzimbe dzindziya sa gu hi phasa gu simama na hi tsakide tepo hi emisanago ni sigaradzo.
10. Ha gupwa kharini lito la Nungungulu litago khu hwane [gwathu]?
10 Khu gu landreya Isaya khumbugide ndziya nya wuvili eyi Jehovha a yi thumisago gasi gu hi hevbudza, uye a di khuye: “U napwa mahungu dzindzeveni gwago ma tago khu hwane gwago.” Avba muprofeti Isaya a gu ganeya khuye Jehovha a gu vega gupima avba nya sihevbuli saye na gu gimbiya khu hwane gwaso gasi gu si yeyedza ndziya si yedego gu gimbiya khiyo. Ethu muhuno, hi ngupwa lito la Nungungulu na li guta khu hwane gwathu. Khu ndziya muni? Malito ma lovidwego khu Nungungulu, momo umo nya Bhibhiliya gukhugeya gale na yi si vbohi tepo yathu. Khu kharato, tepo hi lerigo Bhibhiliya sa gu gira gu khatshi ha gu engiseya lito la Nungungulu na li guta khu hwane gwathu.— Isa. 51:4.
11. Gasi gu timiseya na hi tsakide silo muni nya sivili hi yedego gu gira, nigu khu ginani?
11 Hi nga phasega kharini khu gu landreya sileletelo hi ningwago khu Jehovha na gu thumisa hengeledzano yaye ni Lito laye? Isaya ganede khu silo sivili. Gilo nya gupheye, “eyi khiyo ndziya.” Nya wuvili, “gimbilani khiyo.” (Isa. 30:21) Kha si eneyi basi gu yiti “ndziya.” Hi yede gambe gu “gimbiya khiyo.” Ethu ha gu hevbula esi Jehovha a si vbwetago umo nya Lito laye ni hengeledzano yaye ni edzi hi nga si thumisago khidzo. Ganiolu, gasi hi timiseya na hi tsakide thumoni wathu hi gireyago Jehovha hi yede gu gira silo sesi sa sivili, gu hevbula ni gu thumisa esi hi si hevbudego. Tepo hi girago silo sesi Jehovha a na hi kategisa.
JEHOVHA A NGU HI KATEGISA
12. Guya khu Isaya 30:23-26, Jehovha kategiside kharini vathu vaye?
12 Leri Isaya 30:23-26. Giprofeto gegi gi tadzisegide kharini ga Vajudha va bweledego tigoni gwawe Israyeli hwane nya gu ba va khade dzigumbi Bhabhiloni? Jehovha a di va ninga silo nya singi gasi gu va phasa gu vbanya ni gu simama gu mu thumeya. Jehovha ningide vathu vaye guhodza nya gungi. Ganiolu, nya lisima ga satshavbo uye a va ningide satshavbo va nga ba va si vbweta gasi gu hidzimeya gwaye ni gu pheledza gu mu khozeya khu ndziya a yi vbwetago. Vathu va Nungungulu tepo yoyo gima va di nga si hakhi silo nya singi nya sadi sitago khiyo ga Nungungulu. Livhesi 26 la gu yeyedza gu khilo, Jehovha a di va ninga gu wonegeya nya gungi. Iso si thulago gu khiso uye a di va phasa gu pwisisa Lito laye. (Isa. 60:2) Makategwa ya Jehovha ma phaside sithumi saye gu simama gu mu thumeya na si tsakide na vari ni tshivba khu kotani nya ‘gu tsake nya myonyo yawe.’ — Isa. 65:14.
13. Giprofeto nya gu wusedzwe nya wukhozeyi nya guage gya gu tadzisega kharini matshigoni yathu?
13 Giprofeto gi ganeyago khu gu wusedzwa nya wukhozeyi nya guage, ina gi ngu tadzisega gwathu muhuno? Khu lisine ina. Khu ndziya muni? Gu khugeya khu 1919 matshigoni yathu, vathu nya vangi va tshudzisidwe wugumbini wa Bhabhiloni nya Khongolo a gu tsindza nya wukhongeyi nya malipha wa mafuni gwatshavbo. Avo va di gimbidziswa gasi gu hongola wulanga nya tshukwana ngudzu guvbindra Tigoni nya Gitumbiso, a gu paradhesi ya liphuvboni. (Isa. 51:3; 66:8) Ginani paradhesi ya liphuvboni?
14. Ginani paradhesi ya liphuvboni, nigu khu vamani va vbanyago umo nya paradhesi yeyi muhuno? (Wona Mitshamuselo nya malito nyo khaguri.)
14 Gu khugeya 1919, avo va todzidwego va ngu tsaka khu gu vbanya paradhesini ya liphuvboni. b Avo va gu na ni gutumba nya guvbanye mafuni, a gu “dzimbe dzinvuta” anavo vomo tigoni momu ga liphuvboni nigu va ngu tsaka khu gu mana makategwa nya mangi ya Jehovha.— Joh. 10:16; Isa. 25:6; 65:13.
15. Yo manegeya hayi paradhesi ya liphuvboni?
15 Yomo hayi paradhesi ya liphuvboni muhuno? Vakhozeyi va Jehovha va gu vbanya sipandreni nya gu hambani avba mafuni. Ambari ulolo, paradhesi ya liphuvboni aniyo yomo mafuni gwatshavbo. Muhuno gani ho vbanya ga levbini litigo, hi nga gira gipandre nya paradhesi ya liphuvboni ha gu seketeya wukhozeyi nya lisine.
Moyo ni moyo wathu a nga patega kharini avbo nya gu mburise paradhesi ya liphuvboni?(Wona dzindrimana 16-17)
16. Hi nga simama kharini gu wona gu mbura nya paradhesi ya liphuvboni?
16 Gasi hi simama paradhesini ya liphuvboni, ethu hi yede gu bonga khu yatshavbo mabandla ma gu romo mafuni gwatshavbo. Hi nga gira kharini isoso? Khu gu hi vega gupima avba nya silo nya sadi esi vandriyathu va girago nasiri gu vega gupima avbo nya sihoso sawe. (Joh. 17:20, 21) Khu ginani isoso si gu na ni lisima? Hi na fananisa silo sesi. Ethu adzina hi nga vireya gu wona misimbo nyo hambane umo nya Jardim nyo mbure ngudzu, khu ndziya nyo fane mabandlani yathu muhuno gu na ni vathu nyo hambane-hambane hi nga va fananisago ni misimbo. (Isa. 44:4; 61:3) Ethu hi yede gu tiyisega gu khethu hi ngu simama gu vega gupima avba nya “likhabi” nyo mbure nasiri gu vega gupima avba nya sihosohoswana si gu romo umo nya “misimbo” yi gomogo vbafuvbi gwathu. Ethu kha hi yeli gu dzumeleya gu mba vbeleya gwathu mwendro ga vambe libandlani gu hi gira hi si si kodzi gu wona gumbura nya mabandla nya Wukristo ma gu romo mafuni gwatshavbo.
17. Ginani moyo ni moyo wathu a yedego gu gira gasi gu andrisa gupwanana libandlani?
17 Ginani moyo ni moyo wathu a yedego gu gira gasi hi simama gu andrisa gupwanana libandlani? Khu gu khala vathu nya gurule. (Mat. 5:9; Rom. 12:18) Tepo yatshavbo hi dzi garadzeyago gu andrisa gurula ni vambe libandlani, ha gu engedzeya gu mburisa paradhesi ya liphuvboni. Ethu hi yede gu dundruga gu khethu, Jehovha ranide moyo ni moyo wathu paradhesini ya liphuvboni gasi gu ta patega avbo nya wukhozeyi nya guage. (Joh. 6:44) Dundrugeya khedzi Jehovha a wonago vale va gu na ni lisima, a gu sithumi saye. — Isa. 26:3; Agewu 2:7.
18. Ginani hi yedego gu dundrugeya gwadi khigyo tepo yatshavbo, nigu khu ginani?
18 Jeovha a ngu ninga silo nya singi nya sadi sithumi saye, ganiolu hi nga phasega kharini khu silo soso? Hi nga dundrugeya gwadi khesi hi lerigo umo nya Lito laye ni umo nya mabhuku ma seketedwago umo nya Bhibhiliya. Tepo hi hevbulago ni gu dundrugeya, isoso si na hi phasa gu haguleya makhalelo nya Wukristo ma na hi kutsago gu yeyedza “lihaladzo nya wundruye” nigu “golana” libandlani. (Rom. 12:10) Tepo hi dundrugeyago khu makategwa hi ma manago, ha gu tiyisa wupari ni Jehovha. Nigu ha gu dundrugeya khu silo nya sadi Jehovha a hi tumbisago mindru watshigu, isoso si na engedzeya gutumba gwathu nya gu khethu hi na mu thumeya kala guprindruga. Satshavbo sesi si na hi phasa gu thumeya Jehovha na hi tsakide.
GU DZI EMISEYA GU TIMISEYA
19. a) Guya khu Isaya 30:18, hi nga tiyisega khu ginani? b) Ginani gi na hi phasago gu timiseya na hi tsakide?
19 Jehovha a na hi “pweya wusiwana” tepo a na fuvisago litigo leli nyo vivbe. (Isa. 30:18) Ethu hi ngu dziti gu khethu Jehovha “Nungungulu nyo lulame” ni gu khethu uye kha na nga dzumeleya litigo la Sathane li simama gu manega khu tepo nyo laphe ngudzu. (Isa. 25:9) Ethu ho vireya ni Jehovha litshigu leli nya gu tshudziswe. Na li si gu vbohi litshigu leli, ethu hi yede gu simama gu dzi emiseya gu gombeya, gu hevbula Lito laye ni gu dundrugeya khu makategwa hi na ma manago. Tepo hi girago isoso, Jehovha a na hi phasa gu timiseya na hi gu tsakide umo nya wukhozeyi wathu.
NDZIMO 142 Hongoleni hi bangeleya gutumba gwathu
a Avba nya ndrima yeyi, hi na bhula khu silo siraru Jehovha a girago gasi gu phasa vakhozeyi vaye gu timiseya sigaradzo nya womi na va gu tsakide. Ethu hi na wona gambe libhuku la Isaya gipimo 30 gasi gu hevbula nya singi maningano ni silo sesi. Tepo hi wusedzago gipimo gegi, ethu hi yede gu dundrugeya khu lisima nya gu gombeye ga Jehovha, gu hevbula Lito laye ni gu dundrugeya khu silo nya sadi Jehovha a hi ningago olu ni esi a na hi ningago mindru watshigu.
b MITSHAMUSELO NYA MALITO NYO KHAGURI: Ethu ho manega “Paradhesini ya liphuvboni” tepo hi khozeyago Jehovha gumogo. Jehovha a ngu hi hevbudza satshavbo hi vbwetago gu siti gasi hi mu thumeya na hi si liphedwi khu dzitshetshe, nigu ethu hi na ni thumo nya wukhongolo gasi gu wu gira, a gu gu tshumayela mahungu nya yadi nya Mufumo wa Nungungulu. Ethu hi ngu tsaka khu gu manega ni wupari nyo tiye ni Jehovha, nigu ho vbanya khu gurula ni vandriyathu va hi phasedzeyago gu timiseya sigaradzo sathu na hi tsakide. Ethu ha gu beya paradhesini ya liphuvboni tepo hi khozeyago Jehovha khu ndziya nya yadi ni tepo hi girago satshavbo gasi gu mu pimedzeya.