NDRIMA NYA GIHEVBULO 47
U nga dzumeleyi gilo gi gu hambanisa ni Jehovha
“Eni nya gu tumba uwe PFHUMU Nungungulu.” — NDZI. 31:14.
NDZIMO 122 Tiyani, mu si vbeyi tshivba!
ESI HI NA SI HEVBULAGO AVBA NYA NDRIMA YEYI: a
1. Ho dziti kharini gu khethu Jehovha a ngu dzina gu hidzimeya gwathu?
JEHOVHA a ngu hi rana gasi gu hidzimeya gwaye. (Jak. 4:8) Uye o vbweta gu khala Nungungulu wathu, Papayi wathu ni Pari yathu. Uye a ngu hlamula milombelo yathu ni gu a ngu hi phasa gu timiseya dziteponi nyo garadze. Nigu uye a ngu thumisa hengeledzano yaye gasi gu hi hevbudza ni gu hi vhikeya. Ganiolu, ginani hi yedego gu gira gasi gu hidzimeya vbafuvbi ga Jehovha?
2. Hi nga hidzimeya kharini ga Jehovha?
2 Hi nga hidzimeya ga Jehovha khu gu gombeya gwaye, hi leri Lito laye ni gu dundrugeya khilo. Tepo hi girago isoso, ha gu engedzeya gu mu haladza nigu mu bonga. Hi ngu kutswa gu mu engisa ni gu mu ninga wuzundzo wu mu fanekeyago. (Gutu. 4:11) Tepo hi yago hiti Jehovha, ha gu engedzeya gu mu tumba ni gu tumba hengeledzano yaye a yi thumisago gasi gu hi phasa.
3. Dhiyabhulosi a gu zama kharini gu hi hambanisa ni Jehovha, ganiolu ginani gi na hi phasago gu mba diga Nungungulu wathu ni hengeledzano yaye? (Ndzimo 31:13, 14)
3 Dhiyabhulosi a gu zama gu hi hambanisa ni Jehovha tepo hi emisanago ni sigaradzo. A gu si gira kharini isoso? Vbadugwana–vbadugwana uye a gu zama gu hi gira hi ema gu tumba Jehovha ni hengeledzano yaye. Ganiolu, ethu hi nga pala milaphwi yaye. Tepo gutumba gwathu khu Jehovha gu tiyago, ethu kha hi na nga diga Nungungulu ni hengeledzano yaye. — Leri Ndzimo 31:13, 14.
4. Ginani hi na bhulago khigyo avba nya ndrima yeyi?
4 Avba nya ndrima yeyi, hi na bhula khu sigaradzo siraru si nga manegago vbakari nya libandla ni edzi gimwegyo khu gimwegyo gi nga vegago mhangoni gutumba hi gu nago khu Jehovha ni hengeledzano yaye. Sigaradzo sesi si nga hi hambanisa kharini ni Jehovha? Nigu ginani hi nga girago gasi gu pala Sathane?
TEPO HI TSHANGANAGO NI SIGARADZO
5. Sigaradzo si nga vega kharini mhangoni gutumba gwathu ga Jehovha ni hengeledzano yaye?
5 Dzimbe dzitepo, hi ngu tshangana ni sigaradzo nya nga gu wugedwa khu valongo mwendro gu vbeledwa khu thumo. Sigaradzo sathu si nga vega kharini mhangoni gutumba hi gu nago khu hengeledzano ya Jehovha ni gu hi hambanisa naye? Tepo hi timiseyago sigaradzo khu tepo nyo laphe, hi nga dzipwa na hi mwalo gutumba nigu vbeya tsivba. Sathane a gu thumisa dzitepo dzodzo gasi a hi gira hi pimisa gu khethu Jehovha kha hi haladze. Sathane a gu vbweta gu khuye hi pimisa gu khethu Jehovha mwendro hengeledzano yaye khavo va hi vangeyago sigaradzo. Si giregide silo nya gu fane ni Vaisrayeli nyo khaguri Egipito. Gupheyani, avo va di gukhodwa gu khavo Jehovha a di gu emiside Mosi ni Aroni gasi gu va tshudzisa wugumbini. (Ekiso. 4:29-31) Ganiolu, khu gu landreya tepo Faro a nga lemedzisa womi wawe, avo va di ninga nandro Mosi ni Aroni khu sigaradzo sawe, va ganeya gu khavo: “Mu hi giride vathu nya gunyenyeze mahoni ga Faro ni sithumi saye. Mu vegideni litshari mandzani gwawe vafela gu hi songa.” (Ekiso. 5:19-21) Avo va di gu singedza sithumi nyo tumbege sa Nungungulu. Isoso kha si tsakise ne vbadugwana. Wa gu ba gu tshangana ni sigaradzo khu tepo nyo laphe, u nga simama kharini gu tumba Jehovha ni hengeledzano yaye?
6. Ginani hi gi hevbulago ga muprofeti Habhakuka tepo hi emisanago ni sigaradzo? (Habhakuka 3:17-19)
6 Tuleya monyo wago Jehovha khu nombelo nigu vbweta giphaso gyaye. Muprofeti Habhakuka a emisanide ni sigaradzo nya singi. Khu tepo nyo khaguri, uye a kanakanede gu khuye Jehovha a di gu mu khathaleya. Khu kharato, uye a di tuleya monyo waye Jehovha khu nombelo. Uye a di khuye: “Kala lini, PFHUMU Nungungulu na nyi gu lila u si nyi yingisi? . . . Khu ginani u nyi yeyedza guvivba ni gu nyi wonisa tshanisa?” (Habh. 1:2, 3) Jehovha a hlamude nombelo wu nga ba wu dugeya khu monyoni nya githumi gyaye nyo tumbege. (Habh. 2:2, 3) Hwane nya gu ba Habhakuka a dundrugede gwadi khedzi Jehovha a phasidego khidzo sithumi saye, uye a di pheledza gambe gu mana litsako. Uye a tiyisegide gu khuye Jehovha a di gu mu khathaleya nigu a di hadzi gu mu phasa gu timiseya ni gevbini gigaradzo. (Leri Habhakuka 3:17-19.) Ginani hi gi hevbulago? Tepo hi tshanganago ni sigaradzo, hi yede gu gombeya ga Jehovha hi mu embeya edzi hi dzipwago khidzo ni gu vbweta giphaso gyaye. Tepo hi girago isoso, ethu hi na tumba gu khethu Jehovha a na hi ninga tshivba hi yi vbwetago gasi gu timiseya. Nigu tepo hi wonago giphaso gyaye gukhodwa gwathu gu na engedzeya gu tiya.
7. Moyo nya nongo wa Shirley a di gu zama gu mu gira a pimisa ginani, nigu ginani gi mu phasidego gu mba luza gukhodwa a nga ba ari nago ga Jehovha?
7 Gira silo si na gu phasago gu simama vbafuvbi ga Jehovha. Esi khiso si phasidego ndriyathu moyo nya nyamayi nyo pwani khu Shirley wa Papua Nova Guiné tepo a nga tshangana ni sigaradzo. b Ndranga ya Shirley yi diri sisiwana, nigu dzimbe dzitepo va di gu hamuga gilo nyo hodze. Moyo nya nongo wawe a di zama gu vega mhangoni gutumba ogu Shirley a nga ba ari nago khu Jehovha. Uye a di ganeya gu khuye: “Uwe wo ganeya gu khuwe liphuvbo nya guage la Nungungulu li ngu gu phasedzeya, ganiolu gyomo hayi giphaso gyakone? Ndranga yago yi ngari gisiwana. Uwe wa gu vbedza tepo yago basi khu gu tshumayela.” Shirley wari khuye: “Eni nyi di dzi wudzisa gu kheni: ‘Ina Nungungulu a ngu hi khathaleya khu lisine?’ Khu kharato, nyi di dzegeya gu gombeya ga Jehovha nyi mu embeya satshavbo nyi nga ba nyi si pimisa. Isoso kha sa nyi gira nyi ema gu leri Bhibhiliya ni mabhuku yathu, nigu eni nyi simamide gu tshumayela ni gu hongola mitshanganoni.” Uye nya mba hweya a di tugula gu khuye Jehovha a di gu khathaleya ndranga yaye. Avo va di si lali ni ndzala, nigu avo va di gu tsakide. Shirley a gu ganeya gambe gu khuye: “Eni nyi di wona gu kheni Jehovha a di gu hlamula milombelo yangu.” (1 Thim. 6:6-8) Wa gu simama gu gira silo si na gu phasago gu hidzimeya vbafuvbi ga Jehovha, uwe nuwe kha wu na nga dzumeleya sigaradzo mwendro gukanakana gu gu hambanisa ni Jehovha.
TEPO VANDRIYATHU VA THANGEYAGO VA TSHANISWAGO
8. Ginani gi dugeleyago vandriyathu nya vangi va thangeyago umo nya hengeledzano ya Jehovha?
8 Khu gu thumisa dzinotisiya ni dziredhi sociais, valala vathu va ngu phalalegisa malipha khu vandriyathu va thangeyago umo nya hengeledzano ya Jehovha. (Ndzi. 31:13) Vandriyathu nyo khaguri va di modwa va bwe va singedzwa gu pwani sighohi. Makristo ya lizana myaga nyo pheye va emisanide ni sigaradzo nyo fane tepo mupostoli Pawulo a nga modwa ni gu khothedwa. Ginani avo va giridego?
9. Ginani egi Makristo nyo khaguri ma giredego tepo mupostoli Pawulo a nga khothedwa?
9 Makristo nyo khaguri ya lizana myaga nyo pheye va emide gu seketeya mupostoli Pawulo tepo a nga khothedwa Roma. (2 Thim. 1:8, 15) Khu ginani? Ina avo va dipwa dzitshoni kholu vathu va nga ba va wona Pawulo kha nga gighohi? (2 Thim. 2:8, 9) Mwendro ina va di gu thava khu gu khavo va di hadzi gu wugedwa? Gani khu kotani nya sighelo sesi mwendro simbe, dundrugeya khedzi Pawulo a dzipwidego khidzo. Uye a di gu timisede sigaradzo nya singi nigu a di gu vegide womi waye mhangoni khu kotani yawe. (Mith. 20:18-21; 2 Kor. 1:8) Ethu gima kha hi yeli gu fana ni vathu vava va nga diga gu ninga giphaso Pawulo tepo a nga ba a gi vbweta. Ginani hi yedego gu gi dundrugeya tepo vandriyathu va thangeyago va wugedwago?
10. Ginani hi yedego gu gi dundruga tepo vandriyathu va thangeyago va wugedwago, nigu khu ginani?
10 Dundruga gu khuwe khu ginani hi wugedwago nigu khu mani a hi wugeyago. Thimoti nya wuvili 3:12 wari khuye: “Vatshavbo vale va vbwetago gu vbanya khu gukhodwa ga Kristo Jesu va na saniswa.” Khu kharato, kha hi hlamali tepo Sathane a wugeyago vandriyathu va thangeyago. Uye a gu vbweta gu khuye vathu va ema gutumbega ga Jehovha, nigu uye a gu vbweta gu hi thurugiseya. — 1 Ped. 5:8.
Ambari olu Pawulo a nga ba khothedwe, Onesiforo khu gu tiya hwambo muphasedzede. Muhuno, vandriyathu va ngu phasedzeya vambe vandriyathu va nga khothedwa, kha nga si yeyedzwago avba (Wona dzindrimana 11-12)
11. Ginani hi gi hevbulago khu giyeyedzo gya Onesiforo? (2 Thimoti 1:16-18)
11 Simama gu phasedzeya vandriyago ni gu va tumba. (Leri 2 Thimoti 1:16-18.) Mukristo nyo khaguri wa lizana myaga nyo pheye nyo pwani khu Onesiforo giride silo nyo hambane ni esi si giridwego khu mambe makristo tepo Pawulo a nga khothedwa. ‘Uye kha khala dzitsoni khu gu modwa ga Pawulo.’ Wulangani nya isoso, Onesiforo a di vbwetedzeya Pawulo a bwe a zama gu mu ninga giphaso a nga ba a gi vbweta. Nigu gambe Onesiforo vegide womi waye mhangoni. Ginani hi gi hevbulago? Ethu kha hi yeli gu thava gu thusedzedwa khu muthu mwendro gu himbedzedwa gu phasedzeya vandriyathu va wugedwago. Wulangani nya isoso, hongoleni hi gira satshavbo hi si kodzago gasi hi va phasa. (Mav. 17:17) Avo va ngu vbweta ngudzu giphaso gyathu ni lihaladzo lathu.
12. Ginani hi gi hevbulago khu vandriyathu va Russia?
12 Hongoleni hi wona edzi vandriyathu va Russia va phasedzeyago khidzo vambe vandriyathu tepo va khothedwago. Tepo vandriyathu nyo khaguri va thethiswago, vandriyathu nya vangi va gu hongola tribhunali gasi gu ya va phasa. Ginani hi gi hevbulago? Tepo vandriyathu va thangeyago va singedzwago, gu khothedwa mwendro gu wugedwa, ethu kha hi yeli gu thava. Hi yede gu va gombeleya, hi khathaleya dzi ndraga dzawe ni gu vbwetedzeya dzindziya nya gu va phase. — Mith. 12:5; 2 Kor. 1:10, 11.
TEPO HI POYIDWAGO
13. Gu poyidwa gu nga vega kharini mhangoni gutumba gwathu ga Jehovha ni hengeledzano yaye?
13 Valongo vathu va gu siri Dzifakazi, sithumi khwathu mwendro sihevbule khwathu adzina si nga hi poyila khu kotani nya thumo wathu nyo tshumayele ni olu hi vbanyago khu milayo yo khugege ya Jehovha. (1 Ped. 4:4) Avo adzina va nga ganeya gu khavo: “Eni nyi ngu gu gola kha nga muthu, ganiolu tshetshe yago yi ngu garadza ngudzu.” Vambe adzina va nga hi wugeya khedzi hi pharago khidzo vale va dusidwego libandlani, khu gu va ganeya gu khavo: “Wa gu dzi wona kharini na wuri muthu u gu na ni lihaladzo?” Malito nya nga aya, ma nga hi gira hi pheya gu kanakaneya milayo ya Jehovha nya esi si gu sadi. Ethu hi nga pheya gu dziwudzisa esi: ‘Ina Jehovha a gu vireya nya singi gwangu? Ina hengeledzano yaye yi ngu garadza ngudzu?’ Wa gu emisana ni gimwego nya siemo sesi, u na simama kharini vbafuvbi ga Jehovha ni hengeledzano yaye?
Joba kha khodwa malipha a embedwego khu vama nyo khaguri va nga ba va vbweta gu dzi gira dzipari dzaye, wulangani nya isoso uye a di dzi emisede gu simama na tumbegide ga Jehovha (Wona ndrimana 14)
14. Ginani hi yedego gu gira tepo vambe va hi poyilago khu kotani nya olu hi vbanyago khu milayo ya Jehovha? (Ndzimo 119:50-52)
14 Simama gu gira esi Jehovha a ganeyago gu khuye khyadi. Joba a diri mwama a nga ba a emeya milayo ya Jehovha ambari olu a nga ba a poyidwa khu kotani nya gu giri isoso. Mwama moyo a nga ba a dzi gira pari ya Joba a di zama gu mu gira a khodwa gu khuye Nungungulu kha theyi kota khu silo nya sadi a giridego. (Joba 4:17, 18; 22:3) Ganiolu, Joba kha khodwa malipha yoyo. Uye a di gu dziti gu khuye milayo ya Jehovha nya esi nya sadi ni esi nyo vivbe yi diri yadi, nigu a di dzi emisede gu emeya milayo yoyo. Uye kha dzumeleya vambe va mu gira a ema gu tumbega. (Joba 27:5, 6) Ginani hi gi hevbulago? Khu kotani nya olu hi poyidwago, isoso kha si yeli gu hi gira hi kanakaneya milayo ya Jehovha. Hi yede gu dundrugeya khesi si dugeledego ndrani nya womi wathu. Uwe adzina saye dzitepo nya dzingi u wonide gu khuwe womi wago wo gimbiya gwadi tepo u girago esi Jehovha a ganeyago gu khuye khyadi. Tepo yatshavbo dzi emiseye gu gira gipandre nya hengeledzano yi emeyago milayo yoyo. Khu kharato, ambari vathu va gu hi poyila ethu kha hi yeli gu ema gu thumeya Jehovha. — Leri Ndzimo 119:50-52.
15. Khu ginani Brizit a nga wugedwa?
15 Wona matshango ya ndriyathu moyo nyo pwani khu Brizit a vbanyago Índia. Uye a di poyidwa khu sivbango nya ndraga yaye khu kotani nya gukhodwa gwaye. Hwanenyana nya gu ba a bhabhatisidwe khu 1997, mwama waye a nga ba siri Fakazi ya Jehovha a di luza thumo. Khu kharato, uye a di hunga gu khuye Brizit ni sanana saye va fuluga va ya vbanya ni vavelegi vaye va nga ba va vbanya ga limbe lidhoropa. Ganiolu, Brizit a di hadzi gu tshangana ni sigaradzo nya sikhongolo. Kha nga olu mwama wakone a nga ba a luzide thumo, uye a di yede gu thuma tepo yatshavbo gasi gu sayisa ndranga yaye. Nigu gambe gasi gu mana libandla la vbafuvbyana mule a di yede gu gimbiya 350 dzikilometru. Nya mba tsakisa, khu gu vavelegi va mwama waye va di mu wugeya khu kotani nya gu khodwa gwaye. Giemo gi di engedzeya gu garadza nyo bwe ndranga ya Brizit yi fuluga gambe. Khavbovbo, nya mba si vireya mwama waye a difa. Khu hwane, gimwegyo nya gyanana gyaye gi nga ba giri ni 12 myaga gi difa khu câncer. Nya mba tsakisa khu gu, valongo va Brizit va di mu singedza khu satshavbo silo sesi nyo vivbe si nga girega. Avo va di ganeya gu khavo nari khatshi uye kha khala moyo nya Fakazi ya Jehovha, satshavbo sesi nya gu vivbe na sa sa girega. Ambari ulolo, uye simamide gu tumba Jehovha ni gu simama vbafuvbi ni hengeledzano yaye.
16. Brizit a kategisidwe kharini khu gu ba a simamide vbafuvbi ni Jehovha ni hengeledzano yaye?
16 Kha nga olu Brizit a nga ba a vbanya hwindzo ni libandla, muwoneleye nya gipandre a mu kutside gu tshumayela gipandreni gwaye ni gu gimbidzisa mitshangano gaya gwaye. Gupheyani, isoso si mu garadzede. Ganiolu, uye a landrede wusingalagadzi a nigidwego khu ndriyathu wule. Uye a hengede mahungu nya yadi ni vambe ni gu gimbidzisa mitshangano gaya gwaye, a bwe a tshiya tepo gasi gu gimbidzisa wukhozeyi nya ndraga ni sanana saye. Khu wuvbini handro wu manegidego? Brizit a si kodzide gu gimbidzisa sihevbuli nya singi nya Bhibhiliya, nigu sihevbuli saye nyo khaguri si bhabhatisidwe. Khu 2005, uye a di pheya gu thuma kha nga piyonero nya tepo yatshavbo. Uye a di tumba Jehovha ni hengeledzano yaye. Sanana saye sithumi nya gu tumbege sa Jehovha, nigu olu gipandreni gwaye gu na ni mabandla mavili. Brizit a ngu tiyisega gu khuye Jehovha khuye a nga mu ninga tshivba gasi gu emisana ni sigaradzo saye ni gu timiseya gu wugedwa khu valongo vaye.
SIMAMA NA WU TUMBEGIDE GA JEHOVHA NI HENGELEDZANO YAYE
17. Ginani u yedego gu dzi emiseya gu gira?
17 Sathane o vbweta gu khuye hi khodwa gu khethu Jehovha a na hi diga tepo hi tshanganago ni sigaradzo ni gu khuye gu seketeya hengeledzano ya Jehovha si na lemedzisa basi womi wathu. Sathane o vbweta gu hi thurugiseya tepo vandriyathu va thangeyago va singedzwago, va wugedwago mwendro gu khothedwa. Nigu khu gu thumisa vawugeyi uye a gu vbweta gu hi gira hi si tumbe milayo ya Jehovha ni hengeledzano yaye. Ambari ulolo, ethu hi ngu yiti gwadi milaphwi ya Dhiyabhulosi, nigu kha hi khanganyiswe. (2 Kor. 2:11) Dzi emiseye gu bomba malipha ya Sathane u bwe u simama na wu tumbegide ga Jehovha ni hengeledzano yaye. Dundruga gu khuwe, Jehovha gima kha na nga gu diga. (Ndzi. 28:7) Khu kharato, gimwalo gi na gu hambanisago ni Jehovha. — Rom. 8:35-39.
18. Ginani hi na bhulago khigyo avba nya ndrima yi landreyago?
18 Ga ndrima yeyi, hi bhude khu sigaradzo hi nga tsanganago naso vbavbandze nya libandla. Ganiolu, gutumba gwathu ga Jehovha ni hengeledzano yaye ugo gambe gu nga lingwa khu sigaradzo si manegago ndrani nya libandla. Ganiolu, hi nga emisana kharini ni sigaradzo soso? Hi na bhula khu isoso avba nya ndrima yi landreyago.
NDZIMO 118 ‘Engedzeya gukhodwa gwathu’
a Gasi gu timiseya na hi tumbegide matshigoni yaya nyo hegise, ethu hi yede gu simama gu tumba Jehovha ni hengeledzano yaye. Dhiyabhulosi a gu zama gu thumisa milaphwi yaye gasi gu vbedza gutumba gogo. Avba nya ndrima yeyi, hi na bhula khu silo siraru esi Dhiyabhulosi a si thumisago ni esi hi nga girago gasi gu simama na hi tumbegide ga Jehovha ni hengeledzano yaye.
b Mambe malina ma vbindrugedzidwe.