1. Mupostoli Pawulo a di gu wona kharini vaphasedzeyi nya libandla?

 VAPHASEDZEYI nya libandla va ngu gira thumo nya lisima ngudzu mabandlani. Mupostoli Pawulo a di gu ninga lisima vandriyathu vovo nyo tumbege. Khu giyeyedzo, tepo a nga loveya Makristo ya Filipi, uye a di bonga ngudzu vaphasedzeyi nya libandla gumogo ni madhota. — Filp. 1:1.

2. Ndriyathu Luis a gu dzipwa kharini khu gu khala muphasedzeyi nya libandla?

² Vandriyathu nya vangi va bhabhatisidwego nya dzitanga nya gu hambane, va ngu tsaka khu gu khala vaphasedzeyi nya libandla. Khu giyeyedzo, Devan a di khala muphasedzeyi nya libandla nari ni 18 myaga. Ganiolu, Luis a khade muphasedzeyi nya libandla nari ni 50 myaga ni gu vbindra. Uye a gu ganeya gu khuye: “Eni nyi ngu tsaka ngudzu khu gu thumeya vandriyangu va libandlani gwangu khu ndziya yeyi, avo va ngu nyi yeyedza lihaladzo ni gu olu nyi nga va yeyedza neni lihaladzo langu.” Vaphasedzeyi nya vangi nya libandla, va ngu dzipwa khu ndziya yeyi.

3. Siwudziso muni hi na bhulago khiso?

³ Wa gu ba u bhabhatisidwe, ganiolu na wu si gu khale muphasedzeyi nya libandla, ina u nga dzi vegeya misuwo yoyo? Ginani gi nga gu kutsago gu gira isoso? Nigu makhalelo muni aya Bhibhiliya yi ganeyago khayo u yedego gu manega nawo gasi u khala muphasedzeyi nya libandla? Avba nya ndrima yeyi, hi na wona mihlamulo nya siwudziso sesi. Ganiolu, gupheya hongoleni hi wonani thumo wu girwago khu muphasedzeyi nya libandla.

 MITHUMO MUNI YI GIRWAGO KHU MUPHASEDZEYI NYA LIBANDLA?

4. Mithumo muni yi girwago khu muphasedzeyi nya libandla? (Wona fotu.)

⁴ Muphasedzeyi nya libandla, i ndriyathu a bhabhatisidwego, a hathidwego khu liphuvbo nya guage gasi gu phasa madhota gu khathaleya mithumo nya yingi nya lisima libandlani. Vaphasedzeyi nyo khaguri nya libandla va ngu khathaleya sipandre si yedwego gu tshumayedwa ni mabhuku ma yedwego gu thumiswa thumoni nya gu tshumayele. Vambe va ngu phasedzeya avba nya gu agise ni gu lungisa-lungisa silo Salawuni nya Mufumo. Avo gambe va ngu thuma kha nga vaindhikadhori ni gu thuma avba nya awudhyu-vhidhyu mitshanganoni nya libandla. Nya lisima ga satshavbo khu gu vaphasedzeyi nya libandla, vama va haladzago Jehovha ni gu va vbanyago khu milayo ya Nungungulu. Avo va ngu haladza ngudzu vandriyawe. (Mat. 22:37-39) Ginani egi ndriyathu a bhabhatisidwego a yedego gu gira gasi a khala muphasedzeyi nya libandla?

5. Ginani gi na phasago ndriyathu nya mwama gu khala muphasedzeyi nya libandla?

⁵ Bhibhiliya yi ngu yeyedza esi ndriyathu nya mwama a yedego gu gira gasi gu khala muphasedzeyi nya libandla. (1 Thim. 3:8-10, 12, 13) Wa gu ba u vbweta gu phasa vambe khu gu khala muphasedzeyi nya libandla, hevbuleya makhalelo yoyo ma khumbugwago omu nya Bhibhiliya u bwe u dzi garadzeya gu ma haguleya. Ganiolu, gupheya u yede gu dzi wudzisa gu khuwe, khu ginani u vbwetago gu khala muphasedzeyi nya libandla.

KHU GINANI U VBWETAGO GU KHALA MUPHASEDZEYI NYA LIBANDLA?

6. Ginani gi yedego gu gu kutsa gasi gu phasa vandriyago? (Matewu 20:28; wona kapa.)

⁶ Dundrugeya khu giyeyedzo gyathu nya gikhongolo, Jesu Kristo. Satshavbo a nga ba a gira a di gu kutswa khu lihaladzo a nga ba ari nalo khu Papayi waye ni vathu. Lihaladzo li kutside Jesu gu phasa vambe ni gu gira mithumo yi wonedwago vbavbatshi. (Leri Matewu 20:28; Joh. 13:5, 14, 15) Wa gu ba u kutswa khu lihaladzo, Jehovha a na gu kategisa ni gu gu phasa gu vboheya misuwo yago nya gu khale muphasedzeyi nya libandla. — 1 Kor. 16:14; 1 Ped. 5:5.

7. Khu ginani ndriyathu a vbwetago gu khala muphasedzeyi nya libandla a yedego gu potsa gu dzi wona nari ni lisima guvbindra vambe?

⁷ Vathu mafuni momu, dzitepo nya dzingi va ngu samadziswa khu vale va girago silo gasi va wonwa na vari ni lisima. Hengeledzanoni ga Jehovha silo kha si thumi kharato. Ndriyathu a  haladzago vambe nga edzi Jesu a giridego khidzo, kha vbweti gu fuma vambe mwendro gu wonwa nari muthu nya lisima. A gu tshuka muthu nyo khaguri a ningwa thumo libandlani, ganiolu na gu vbweta gu wonwa khu vathu nari ni lisima ngudzu gu vbindra vambe, uye adzina saye kha na nga gira gwadi thumo waye mwendro gu gira esi si vbwetegago gasi gu khataleya dzinvuta nya lisima dza Jehovha. Khu gu ba a dzi wona nari ni lisima ngudzu, uye a nga pimisa gu khuye kha yeli gu gira mithumo yo khaguri. (Joh. 10:12) Jehovha gima kha na nga kategisa ni wevbini muthu a vbwetago gu gira silo gasi gu dzi khusedza.— 1 Kor. 10:24, 33; 13:4, 5.

8. Khu wevbini wusingalagadzi owu Jesu a ningidego vapostoli vaye?

⁸ Ga siemo nyo khaguri, ambari dzipari dza Jesu dzi zamide gu gira mithumo nyo khaguri na dziri ni makungo nya mba yadi. Wona esi si nga dugeleya vapostoli vavili va Jesu, a gu Jakobe ni Johane. Avo va di lomba Jesu gasi a va ninga wulanga nya lisima ngudzu Mufumoni gwaye. Jesu kha va zundza khu gu ba vari ni gudogoreya nya gu vbweti gu khala vathu nya lisima gu vbindra vambe. Wulangani nya isoso, uye a di embeya 12 vapostoli vaye gu khuye: “Oyu a vbwetago gu khala khongolo vbakari gwanu a na khale githumi gyanu, nigu oyu a vbwetago gu khala nya gupheye vbakari gwanu, a na khale gumbi ya vatshavbo.” (Marko 10:35-37, 43, 44) Tepo ndriyathu nyo khaguri a zamago gu khala muphasedzeyi nya libandla, khu gighelo nya gyadi, a gu gu thumeya vambe, uye a na khala giphaso ga libandla khu dzindziya nya dzingi. — 1 Tes. 2:8.

U NGA ENGEDZEYA KHARINI GUDOGOREYA GWAGO NYA GU KHALE MUPHASEDZEYI NYA LIBANDLA?

9. U nga engedzeya kharini gudogoreya gwago nya gu thumeye vambe?

⁹ Nya mba kanakana, u ngu haladza Jehovha nigu u ngu dzina gu thumeya vambe. Ganiolu, adzina saye u mwalo gudogoreya nya gu gire thumo wu girwago khu muphasedzeyi nya libandla. Ginani gi na gu phasago gu engedzeya gudogoreya gwago nya thumeye vambe? Khu ginani u gu mba dundrugeya khu litsako u na li manago khu gu thumeya vandriyago? Jesu a di khuye: “A ngu tsaka oyu a ningago, guvbindra oyu a hakhago.” (Mith. 20:35) Nigu Jesu a giride esi a ganedego. Uye a manide litsako nya likhongolo khu gu thumeya vambe, nigu si nga gu giregeya sasimweso.

10. Jesu a yeyedzide kharini gu khuye a di gu tsaka khu gu thumeya vambe? (Marko 6:31-34)

¹⁰ Wona giyeyedzo nya edzi Jesu a yeyedzidego khidzo gu khuye a di gu tsaka khu gu thumeya vambe. (Leri Marko 6:31-34.) Ga giemo nyo khaguri, Jesu ni vapostoli vaye va di gu garade ngudzu. Avo va di hongola ga wulanga nyo khaguri gasi guya hefemula. Ganiolu, gitshungu nya gikhongolo gi di pheya khigyo gu vboha, na gi vireya gu ta hevbudzwa khu Jesu. Jesu na bombide, kholu uye ni vapostoli vaye va “diri mwalo ne ni tepo nya gu hodze.” Mwendro Jesu na tutumiside vatshavbo hwane nya gu ba ava hevbudzide silo nyo khaguri. Ganiolu, khu gu kutswa khu lihaladzo, uye a di “pheya gu [va] hevbudza silo nya singi.” Nigu a di simama gu va hevbudza kala ‘lipfhola.’ (Marko 6:35) Uye kha gira isoso khu gu gurumedzwa, ganiolu uye a di gira khu gu va “pweya-wusiwana.” Uye a di gu vbweta gu va hevbudza kholu a di gu va haladza. Gu thumeya vambe si di gu ninga litsako Jesu.

11. Ginani egi Jesu a giridego gasi gu phasa vathu? (Wona fotu.)

¹¹ Tepo Jesu a nga ba a hevbudza gitshungu, giride nya singi gu vbindra isoso. Uye a va khathalede khu nyamani. Uye a di kategisa guhodza a nga ba ari nago a bwe a lomba vapizane vaye gasi gu kabaniseya vathu. (Marko 6:41) Khu ndziya yoyo, Jesu a hevbudzide vapizane vaye gu thumeya vambe. Uye a va yeyedzide lisima nya gu phase vambe khu dzindziya dzedzi, nigu khiso vaphasedzeyi nya libandla va girago. Dundrugeya edzi vapostoli va tsakidego khidzo tepo va nga phasa Jesu gu kabaniseya guhodza  gule kala ‘vatshavbo va hodza va khura.’ (Marko 6:42) Eyi khandri tepo nya gupheye Jesu na gu thangisa esi vambe va nga ba va si vbweta. Uye giride esi guvbanyani gwaye gwatshavbo mafuni. (Mat. 4:23; 8:16) Jesu a di gu tsaka khu gu hevbudza ni gu gira silo gasi gu phasa vambe. Anuwe khu lisine u na tsaka khu gu thangisa esi vambe va si vbwetago ni gu dzigaradza gasi gu khala muphasedzeyi nya libandla.

12. Khu ginani hi gu mba yela gu pimisa gu khethu hi mwalo makodzelo gasi gu phasa libandla?

¹² Wa gu ba u pimisa gu khuwe u mwalo makodzelo nyo khaguri, u nga vbeyi tshivba. U nga kanakani gu khuwe u na ni makhalelo u nga ma thumisago gasi gu phasa libandla. Dundrugeya khu malito ya Pawulo ma gomogo omu ga 1 Vakorinto 12:12-30 u bwe o lomba Jehovha gasi a gu phasa gu wona edzi u nga ma thumisago khidzo. Malito ya Pawulo ma gu vega guagani gu khayo uwe gomogo ni satshavbo sithumi sa Jehovha, mu ngu vbwetega nigu mu na ni lisima libandlani. Wa gu ba u si dinganedwi khu gu thuma kha nga muphasedzeyi nya libandla, u nga vbeyi tshivba. Wulangani nya isoso, gira esi u si kodzago gasi gu thumeya Jehovha ni gu phasa vandriyago. Nigu tiyisega gu khuwe madhota ma na gu dundruga ma bwe ma gu ninga thumo u na wu kodzago gu wu gira. — Rom. 12:4-8.

13. Khu gevbini gimwegyo nya gighelo gi yedego gu gira vandriyathu va dzi garadza gasi gu khala vaphasedzeyi nya libandla?

¹³ Wona gambe gimwegyo nya gighelo u gu nagyo nya gu dzi garadze gasi u khala muphasedzeyi nya libandla. Makhalelo nya mangi u yedego gu manega nawo gasi u dinganedwa khu gu khala muphasedzeyi nya libandla, yatshavbo Makristo ma yede gu manega nawo. Yatshavbo Makristo ma yede gu manega ni wupari nya gu tiye ni Jehovha, ma tsaka khu gu phasa vambe ni gu vbanya khu ndziya yi tsakisago Nungungulu. Khu kharato, adzina saye u hagulede makhalelo nya mangi gasi u dinganedwa khu gu khala muphasedzeyi nya libandla. Ganiolu, silo muni ndriyathu nya mwama a yedego gu gira gasi a thuma kha nga muphasedzeyi nya libandla?

GINANI U YEDEGO GU GIRA GASI U DINGANEDWA KHU GU KHALA MUPHASEDZEYI NYA LIBANDLA?

14. So thula ginani gu manega ni “mapimo nyo vidzwe?” (1 Thimoti 3:8-10, 12)

¹⁴ Hongoleni hi wona silo nyo khaguri si girago gu vandriyathu va dinganedwa gu khala vaphasedzeyi nya libandla omu ga libhuku la 1 Thimoti 3:8-10, 12. (Leri.) Muphasedzeyi nya libandla, gu vbwetega nari muthu a gu na ni “mapimo nyo vidzwe.” Lito leli li nga tshamusedwa gu pwani  “gu ningwa githawo khu vambe” mwendro “a ganeyago lisine.” Isoso kha si thuli gu khiso kha wu yeli gu hega mwendro gu hagana. (Muh. 3:1, 4) Ganiolu, sa gu tshamuseya gu khiso u yede gu ninga lisima mithumo u gu nayo. Wa gu ba u wonwa nga muthu a dzi garadzago gu gira thumo waye ni gu tumbega, u na ningwa githawo khu vatshavbo libandlani gwago.

15. So thula ginani gu ‘khala muthu a gu mba kanganyisa tepo a ganeyago’ ni ‘gu mba dogoreya gu ghanya khu ndziya nya gu kanganyise?’

¹⁵ ‘Gu khala muthu a si khanganyisigo tepo a ganeyago.’ So thula gu khiso u muthu nya lisine, u ngu tumbega ni gu tepo yatshavbo u ngu ganeya lisine. Esi u ganeyago khiso u girago, nigu kha wu lipheyi vambe. (Mav. 3:32) ‘U si dogoreyigo gu ghanya khu ndziya nyo kanganyise,’ so thula gu khiso uwe u tumbegide thumoni gwago ni edzi u thumisanago khidzo ni dzitsapawu. Uwe gima u di hadzi gu mba londrowa dzipari dzago libandlani, gasi gu mana dzitsapawu nya mba dzi garadza.

16. a) So thula ginani ‘gu mba seya ngudzu vhinyu?’ b) Sa gu thula ginani gu manega ni ‘livhalo li agidego?’

¹⁶ ‘U si seyigo ngudzu vhinyu.’ Isoso so thula gu khiso kha wu vbindrisi pimo tepo u seyago wadwa mwendro kha wu tidwe nga muthu a seyago ngudzu. Gu manega ni “livhalo li agidego” sa gu thula gu khiso u ngu ninga githawo esi Jehovha a ganeyago maningano ni esi nya sadi ni esi nyo vivbe. Lisine gu kha wa vbeleya, ganiolu u na ni ni gurula khu kotani nya olu u gu na ni wupari nya wadi ni Nungungulu.

17. So thula ginani gu ‘kambedwa gwadi gasi gu wonwa gu khuwe u ngu dinganedwa gani?’ (1 Thimoti 3:10; wona fotu.)

¹⁷ ‘Gu kambedwa gwadi gasi gu wonwa gu pwani u ngu dinganedwa gani,’ so thula gu khiso madhota ma wonide gu khayo u ngu khataleya gwadi mithumo yago, nigu ma nga gu tumba. Khu kharato, tepo madhota ma gu lombago gasi gu khataleya thumo nyo khaguri, landrisa wusingalagadzi wawe ni wusingalagadzi wu gomogo umo nya mabhuku nya hengeledzano. Tiyisega gu khuwe u pwisiside gwadi esi u yedego gu gira ni tepo u yedego gu vbedza khiyo thumo wago. Tepo u girago gwadi thumo wago ni gu manega ni singhingi, vandriyathu libandlani va na wona gudzigaradza u gu girago gasi gu gira gwadi mithumo yago ni edzi u vidzwago khidzo. Madhota, mu nga digi gu trenari vandriyathu nya vama va bhabhatisidwego. (Leri 1 Thimoti 3:10.) Ina vomo vandriyathu nya vama va bhabhatisidwego libandlani gwago, va gu na ni tanga nya 10 mwendro 14 myaga? Ina avo va ngu oloveya gu gira gihevbulo nya muthu enga ni gu dongiseya mitshangano? Ina avo va ngu hlamula mitshanganoni ni gu patega thumoni nya gu tshumayele tepo yatshavbo?  Abari gu ina, va ninge mithumo va na yi kodzago gu yi khataleya ambari na vari ni tanga nya yidugwana. Khu ndziya yeyi, vaphya vovo va na “kambedwa gwadi gasi gu wonwa gu pwani va ngu dinganedwa gani.” Khavbovbo, va gu enedza 17 kala 19 myaga, adzina va nga thuma kha nga vaphasedzeyi nya libandla.

18. So thula ginani gu mba manega ni ‘gilo gi sodwago gwago?’

¹⁸ ‘A gu mwalo gilo gi sodwago gwaye,’ so thula gu khiso mwalo muthu a gu na ni gighelo nya gu gu singedze khu gu gira silo nya mba sadi. Lisine gu vathu va nga gu singedza khu silo nya malipha. Isoso si giregede Jesu nigu a ganede gu khuye valandreyi vaye navo va na tshangana ni giemo gyogyo. (Joh. 15:20) Ganiolu, wa gu simama ni mavbanyelo ma agidego nga Jesu, u na wonwa khu ndziya nya yadi libandlani.

19. So thula ginani gu khala ‘mwama nya nyamayi moyo basi?’

¹⁹ ‘Mwama nya nyamayi moyo basi.’ Tepo Jehovha a nga gira mutshadho nyo pheye, uye a di ganeya gu khuye mutshadho wu yede gu wumbwa khu mwama ni nyamayi. (Mat. 19:3-9) Mukristo gima kha yeli gu gira wubhayi. (Hebh. 13:4) Gu diga isoso, a yede gu tumbega ga mwangadzi waye nigu gima a nga khedziseyi mwendro gu haladzana ni vambe vanyamayi. — Joba 31:1.

20. Ndriyathu nya mwama a gu thangeya kharini ‘sanana saye ni ndranga yaye khu ndziya nya yadi?’

²⁰ ‘Thangeyani sanana sanu ni dzindranga dzanu khu ndziya nya yadi.’ Wa gu ba uri hungo nya ndranga, u yede gu khataleya gwadi mithumo yago. Gira wukhozeyi nya ndranga tepo yatshavbo. Tshumayela gumogo ni mwangadzi wago ni sanana sago khavbo u si kodzago khavbo. Phasa sanana sago gu haguleya wupari nyo tiye ni Jehovha. (Efes. 6:4) Mwama a khataleyago ndranga yaye, a gu yeyedza gu khuye a nga khataleya libandla. — Fananisa ni 1 Thimoti 3:5.

21. Wa gu ba u siri muphasedzeyi nya libandla, ginani u nga girago?

²¹ Vandriyathu, mwa gu ba mu si khali vaphasedzeyi nya libandla, ha gu lomba gu khethu mu leri gwadi ndrima yeyi mu bwe mu gombeya ga Jehovha khu mahungu yaya. Hevbula esi si vbwetegago gasi u dinganedwa gasi gu khala muphasedzeyi nya libandla u bwe u dzi garadza gasi gu si thumisa. Dundrugeya khu lihaladzo u gu nalo khu Jehovha ni vandriyago. Engedzeya gudogoreya gwago nya gu thumeye vambe. (1 Ped. 4:8, 10) Dzi garadze gasi u thuma kha nga muphasedzeyi nya libandla nigu isoso si na gu ninga litsako khu gu thumeya vandriyathu libandlani. Jehovha a na kategisa gudzigaradza u gu girago gasi u thuma kha nga muphasedzeyi nya libandla. — Filp. 2:13.