MUWONELEYI nya dziphuvbo a gu khedza mitshini yi woneleyago dziphuvbo. A tugula gingulu gi hidzimeyago gipandreni nyo khaguri gu vbanyago vathu nya vangi. Kha nga olu a khathalago khu vathu, uye a gu dzegeya gu tivisa vathu vovo na gi si gu vbohi.

Khu ndziya nyo fane, olu Jehovha a gu gengedza vathu va vbanyago mafuni maningano ni “gingulu” nya mhango ngudzu guvbindra satshavbo si nga tshuka si tiviswa khu vawoneleyi nya dziphuvbo. A gu si gira kharini isoso? Ha gu dziti kharini gu khethu a ngu ninga vathu tepo nyo eneye gasi va gira gilogyo? Gasi gu mana lhamulo, hongoleni hi bhula khu sigengedzo nyo khaguri esi Jehovha a ningidego vathu teponi ya gale.

Dziteponi nya Bhibhiliya, Jehovha gengedzide khu “singulu” mwendro sigiro nya gulamule, a nga hadzi reseya vale va nga ba va ndraga milayo yaye khagwenye. (Mav. 10:25; Jer. 30:23) Dzitepo dzatshavbo a giridego isoso, uye a di gu gengedza vathu na gu ngo tshade tepo nya yingi a bwe a va ruma gu vbindrugedza gasi va gira gugola gwaye. (2 Dzipf. 17:12-15; Neh. 9:29, 30) Gasi gu phasa vathu gu gira esi si vbwetegago, gutala nya dzitepo a gu thumisa sithumi saye nyo tumbege sa mafuni gasi gu huweleya gulamula gwaye ni gu gira vathu vati gu khavo va yede gu gira gilogyo khu guvbiredza. — Amosi 3:7.

Nowa moyo nya vathu va thumisidwego khu Nungungulu gasi gu tivisa gulamula gwaye. Khu myaga nya yingi, uye gengedzide vathu nya sighevenga ni mavbanyelo nya mba handzega va matshiguni yaye khu talo wu nga hadzi girega. (Gen. 6:9-13, 17) Uye a va gengedzide ngudzu gambe khesi va nga ba va yede gu gira gasi va vbuluga talo, nyo bwe a ranwa pwani “mutshumayeli nya gululama.” — 2 Ped. 2:5, NM.

Ambari olu Nowa a va tivisidego, vathu va teponi yoyo kha va engisa gigengedzo gya Nungungulu. Va yeyedzide gu khavo va diri mwalo gukhodwa. Khu kharato, avo va fude tepo Talo “wu ngata va mwaladza vatshavbo.” (Mat. 24:39; Hebh. 11:7) Tepo gumbemba gwavo gu nga vboha, va diri mwalo gighelo nyo khavo Nungungulu kha va gengedza.

Ga dzimbe dzitepo Jehovha gengedzide vathu vaye na gu keneleya gitepwana gasi gu vboha “gingulu” nya gulamula gwaye. Ambari ulolo uye a di gu tshiya tepo nyo eneye gasi gu va gira gilogyo. Khu giyeyedzo, uye a gengedzide vathu maningano ni likhumi mitungo yi nga hadzi dugeleya vaGipite. Uye rumede Mosi ni Aroni gasi guya gengedza Faro ni sithumi saye maningano ni tungo nya wu 7, ndzadzi nya maralala. Kha nga olu ndzadzi yoyo yi nga hadzi girega ga litshigu li nga landreya ina Jehovha a va tshiyede tepo nya gu vbwete wuthavelo? Bhibiliya yari khiyo: “Sithumi sa Faro si nga yingisago sileletelo sa PFHUMU Nungungulu, si di vbiredzela gu wuyisela sithumi ni sifuyo sawe dzinyumbani. Aholu uye a nga mba khathala khu lito la PFHUMU Nungungulu monyoni gwaye, a di diga sithumi ni mitshambi yaye vbavbandze.” (Ekiso. 9:18-21) Jehovha gengedzide vatshavbo, gasi gu vale va engisago khu guvbiredza va si thegedwi khu mango yile.

Faro ni sithumi saye, anavo va gengedzidwe na yi si gu pheyi likhumi mitungo. Ambari ulolo, va giride wupumbo va si engisi. (Ekiso. 4:22, 23) Kha nga handro wakona, va wonide sanana sawe nya sikhwathana nya matewula na si gufa. Si vbiside ngudzu! (Ekiso. 11:4-10; 12:29) Ina na si kodzegide gu engisa na si si gu dugeleyi? Ina! Mosi gengedzide vaIsrayeli maningano ni mitungo yoyo nya likhumi ni esi va nga ba va yede gu gira gasi va vbulugisa dzindranga dzawe. (Ekiso.  12:21-28) Vathu vangani va engisidego gigengedzo gya Mosi? Go ganedwa khu dzimiliyoni dziraru nya vathu, gupata vaIsrayeli ni “mambe mafumbu” ma nga ba ma siri vaIsrayeli, gumogo ni vaGipiti, va vbulugidego gulamudwa khu Jehovha, va duga khu Egipito. — Ekiso. 12:38.

Kha nga hi si wonidego avba nya siyeyedzo sesi, Jehovha tepo yatshavbo giride gilogyo gasi gu vathu va manega ni tepo nyo eneye gasi gu engisa gigengedzo. (Dhet. 32:4) Khu ginani Jehovha a girago isoso? Mupostoli Pedro tshamusede gu khuye Jehovha kha ‘dzini na moyo wanu a mbemba, aholu a gu vbweta gukhuye mu vbindrugedze.’ (2 Ped. 3:9) Lisine, Nungungulu a di gu khathala khu vathu. Uye a di gu vbweta gu khuye va vbindrugedza va landra wusingaladzi waye na gu si vbohi gulamudwa. — Isa. 48:17, 18; Rom. 2:4.

Muhuno nugo, vathu vatshavbo va yede gu engisa gigengedzo nya lisima ngudzu gi huweledwago mafuni gwatshavbo. Tepo a nga ba a romo mafuni, Jesu gengedzide gu khuye litigo leli li na fuviswa ndrani nya ‘tshanisa nya yikhongolo.’ (Mat. 24:21) Uye tshamusede siloso maningano ni gulamudwa gogo gu tago, uye ningide siprofeto si tshamuseyago gwadi esi valandreyi vaye va nga ba va yede gu si vireya. Jesu ganede khu sigiro nya sikhongolo si dugeleyago muhuno, mafuni gwatshavbo. — Mat. 24:3-12; Luka 21:10-13.

Guya khu giprofeto gyogyo, olu Jehovha a gu lomba gu khuye vathu vatshavbo va hatha gu thumeya ni gu khozeya uye. Uye a gu suva gu khuye vathu va engisago va mana womi nya wadi olu ni makategwa nya mafu nya maphya mindru wa tshigu. (2 Ped. 3:13) Gasi gu vathu va khodwa situmbiso saye, Jehovha a gu ninga mahungu ma vbanyisago — ma gu “Mahungu nya Yadi yaya nya Mufumo,” ma profetidwego khu Jesu gu khuye ma di hadzi “huweledwa tigoni gwatshavbo gasi gu ninga wufakazi mayigoni gwatshavbo.” (Mat. 24:14) Nungungulu a gu thumisa vakhozeyi vaye gasi gu ninga “wufakazi” mwendro gu tshumayela mahungu ma tago khiyo ga Nungungulu, mayigoni ma vbindrago 240. Jehovha o vbweta gu khuye vathu nya vangi ngudzu vapwa gigengedzo gegi va vbuluga “gingulu” gyogyo gi tago nya gulamula gwaye nyo lulame. — Sof. 1:14, 15; 2:2, 3.

Giwudziso nya lisima khandri gu Jehovha a ngu ninga tepo nyo eneye gasi gu vathu va engisa gigengedzo gani. Kholu satshavbo so yeyedza gu khiso uye a ngu ninga. Wulangani nya isoso, giwudziso nya lisima khegi: Ina vathu va na engisa gigengedzo gya Jehovha na yi ngo romo tepo? Ethu kha nga vathu va Jehovha, hongoleni hi phasa vathu nya vangi khavba hi si kodzago khavbo gasi vata vbuluga guhegisa nya litigo leli.