1. Khu ginani hi yedego gu khozeya Jehovha enga?

HI YEDE gu khozeya Jehovha enga, kholu khuye Muvangi wathu. (Gutu. 4:11) Ganiolu hi na ni gigaradzo. Ambari ha gu ba hi mu haladza Jehovha ni gu mu ninga githawo, si nga gira hi thangisa simbe silo guvbanyani gwathu, nyo bwe si hi himbedzeya gu khozeya Jehovha enga. Gu vbwetega hi tugula gu khethu so girega kharini isoso. Gupheya hongoleni hi wona gukhethu so thula ginani gu khozeya Jehovha enga.

2. Guya khu Ekisodha 34:14, ginani hi na girago ha gu ba hi dziningedzede ga Jehovha enga?

² Omu nya Bhibhiliya, gudziningedzeya ga Nungungulu, so thula gu manega ni lihaladzo li etidego khuye. Ha gu ba hi dziningedzede ga Jehovha enga, hi na khozeya uye enga. Kha hi na nga dzumeleya muthu mwendro gimbe gilo gi tshikedza wulanga waye myonyoni gwathu. — Leri Ekisodha 34:14.

3. Khu ginani hi gu na ni sighelo nyo pwale nyo haladze Jehovha?

³ Hi na ni sighelo nyo pwale nyo haladze Jehovha. Khu ginani? Kholu gudziningedzeya gwathu ga gu seketedwa khu silo nya lisine hi si hevbulago khuye. Hi ngu ma tsakeya ngudzu makhalelo yaye nyo mbure. Hi ngu siti esi Jehovha a si golago ni esi a si nyenyago, nigu hi ngu dzumeleyana naye. Hi ngu ma pwisisa makungo yaye khethu nigu hi ngu ma seketeya. Hi ngu dzipwa na hiri va lisima kholu a hi dzumeleyago gu khala dzipari dzaye. (Ndzi. 25:14) Ni gevbini hi gi hevbulago maningano ni Muvangi wathu gya gu hi gira hi hidzimeya vbafuvbi gwaye. — Jak. 4:8.

4. a) Ginani egi Dhiyabhulosi a gi thumisago gasi gu vbungula lihaladzo lathu khu Jehovha? b) Ginani hi na gi hevbulago omu nya ndrima yeyi?

⁴ Dhiyabhulosi khuye a woneleyago litigo leli, nigu a gu li gira li manega ni silo esi vathu va si wonago na siri sa lisima guvbanyani ni gu gira gu si hi garadzeya gu woneleya gudogoreya gwathu  nya nyama. (Efes. 2:1-3; 1 Joh. 5:19) Uye a gu zama gu hi gira hi haladza simbe silo, gasi hi si haladzi Jehovha enga. Hi na hevbula dzindziya dzimbili edzi Dhiyabhulosi a dzi thumisago gasi gu gira isoso. Nyo pheye, a gu zama gu hi gira hi gola ngudzu dzitsapawu, nya wuvili a gu zama gu hi gira hi hatha sivbungadzo nya mba sadi.

5. Khu ginani hi yedego gu dzi woneya gasi hi si haguleyi gu gola dzitsapawu?

⁵ Hatshavbo hi ngu dzina gu mana guhodza nyo eneye, gu ambala sombo nya sadi ni ndranga nya yadi. Ganiolu gu vbwetega hi dzi woneya gasi hi si haguleyi gugola dzitsapawu. Vathu nya vangi muhuno va ‘gu gola dzitsapawu’ ni esi dzitsapawu dzi kodzago gu renga. (2 Tim. 3:2) Jesu a di gu dziti gu khuye valandreyi vaye va di hadzi lingwa gu haguleya navo gugola dzitsapawu. Khu kharato, Jesu a di khuye: “Mwalo a dzi kodzago gu thumela dzipfhumu dzimbili. Kholu a na zondra mweyo a gola yimbe; mwendro saye gu girela ndruda mweyo a gu nyenya yimbe. Kha mu dzi kodzi gu thumela Nungungulu ni dzithomba.” (Mat. 6:24) Muthu a khozeyago Jehovha ganiolu na gu zama gambe gu mana dzithomba nya litigo leli, khu ndziya nyo khaguri a gu zama gu thumeya dzipfhumu dzimbili. Kha khozeyi Jehovha enga.

6. Ginani hi gi hevbulago avba nya malito ya Jesu a embedego libandla la Lawodhikeya?

⁶ Guvbeyani nya lizana myaga nya gu pheye teponi ya Kristo E.C., sivbango nya libandla la dhoropani ga Lawodhikeya si di gu dzi khusedza khiso: “Nyi gikhudhudhu, nyi fumide, gi mwalo nyi gi hamugago.” Ganiolu, mahoni ga Jehovha ni Jesu avo va diri “sitshaniseki, sisiwana, sikhumu, ni wumbwiri.” Jesu khandri a di va kawuka khu gu khuye va ghanyide, ganiolu kholu va nga ba va diga lihaladzo lawe khu dzitsapawu, li songa wupari wawe ni Jehovha. (Gutu. 3:14-17) Ha gu tugula gu khethu hi ngu pheya gu haguleya gu gola dzitsapawu, gu  vbwetega hi dzegeya gu vbindrugedza mapimo yoyo. (1 Thim. 6:7, 8) Ha gu mba gira isoso, hi na pheya gu gola ngudzu simbe silo, khavbovbo Jehovha a si hakhi wukhozeyi wathu. Kholu uye “Nungungulu nya wufu.” (Dhet. 4:24) Si nga girega kharini gu hi pheya gu gola dzitsapawu?

7-9. Ginani u gi hevbulago khu giyeyedzo gya lidhota leli nyo pwane khu David?

⁷ Nga dundrugeya khu giyeyedzo gya David, lidhota nya sighingi li vbanyago Estados Unidos. Uye a di gu dzi embeya gu khuye githumi gi dzi ningedzeyago gwadi. A di khusedzwa thumoni gwaye a bwe a engedzedwa dzitsapawu, ni gu bwe a hakha gihiwa kha nga moyo nya sithumi si nga ba si kodza gu gira gwadi thumo wowo tigoni gwawe. David a di khuye: “Khu tepo nyo khaguri nyi di gu pimisa gu kheni sihiwa satshavbo soso si diri makategwa ya Jehovha.” Ganiolu, ina kamo a di gu kategiswa khu Jehovha?

⁸ Vbadugwanavbadugwana, David a di pheya gu wona gu khuye thumo waye wu di gu khuha wupari waye ni Jehovha. Uye a di khuye: “Gani nyi womo mitshanganoni nya libandla mwendro thumoni nya gutshumayele, nyi di gu pimisa khu sigaradzo sa thumotuno basi.” “Nyi di gu gira dzitsapawu nya dzingi, ganiolu nyi di gu khaleya gugaradzega, nigu eni ni mwangadzi wangu hi di pheya gu manega ni sigaradzo pangoni gwathu.”

⁹ David a di tugula gu khuye a di yede gu hunga gu khuye ginani a yedego gu gi thangisa. Wari khuye: “Nyi di dzi emiseya gu vbindrugedza giemo gyangu.” David a di vbweta gu vbindrugedza longoloko nya mathumelo yaye, khavbovbo a di ya bhuleya patrawu waye esi a nga ba a si hungide. Ginani gi nga girega? A di tutumiswa thumotuno! Ginani a giridego? Wari khuye: “Ga litshigu li nga landreya hwane nyo tutumiswe thumotuno, nyi di lomba gu khala piyonero nyo phasedzeye nya mba ema.” David ni mwangadzi waye vo gira thumo nyo agise, gasi  gu dzi vbanyisa. Hwane nya gitepwana David a di pheya gu thuma nga piyonero nya tepo yatshavbo, khu gu gimbiya nya tepo mwangadzi waye nuye a di pheya gu thuma nga piyonero. Patwa wowu wu di hatha gu gira thumo nya gudzivbanyise wu wonedwago vbavbatshi khu vathu nya vangi, ganiolu thumo va nga ba va gira khandruwo wu nga ba wuri gilo nya lisima gwawe. Ambari olu va nga pheya gu hakha dzitsapawu nya dzidugwana ngudzu ga edzi dza gale, ngima ni ngima va di gu mana esi si nga ba si vbwetega gasi gudzivbanyisa. Avo va di gu vbweta gu thangisa Jehovha, nigu va si wone gu khavo uye a ngu khathaleya vale va thangisago Mufumo. — Mat. 6:31-33.

10. Hi nga woneleya kharini monyo wathu?

¹⁰ Gani hi na ni dzitsapawu nya dzingi mwendro ne, gu vbwetega hi woneleya monyo wathu. Khu ndziya muni? U nga haguleyi gu gola dzitsapawu. U nga dzumeyi gu khuwe thumo wago nya gu dzi vbanyise wu khala gilo nya lisima guvbindra Jehovha. U nga si tugula kharini so pheya gu gu giregeya? Gu vbwetega gu dzi gira siwudziso nya nga esi: ‘Ina nyi ngu oloveya gu pimisa khu thumo wangu nya gudzivbanyise nya gu ba nyi romo mitshanganoni mwendro thumoni nya gutshumayele? Ina nyi ngu khaleya gugaradzega khu gu kheni gani nyi na tshuka nyi hamuga dzitsapawu mindru wa tshigu? Ina dzitsapawu dzi ngu wusa sigaradzo gwangu ni pari yangu nya wugadzi? Ina nyi di hadzi dzumeya gu gira thumo nya gudzivbanyise wu wonedwago vbavbatshi khu vathu nya vangi gasi gu nyi kodza gu engedzeya thumo wangu ga Jehovha?’ (1 Thim. 6:9-12) Tepo hi dundrugeyago khu siwudziso sesi gu vbwetega hi dundruga gu khethu Jehovha a ngu hi haladza nigu a ngu tumbisa vale va dzinigedzeyago gwaye khuye: “Eni gima kha nyi na mi diga.” Khu kharato mupostoli Pawulo lovide esi: “Guvbanyani gwanu mu nga dzi digi mu gu fumwa khu makolo nya dzitsapawu.” — Hebh. 13:5, 6.

11. Ginani gi nga giregago ga muthu a gu mba hatha gwadi sivbungadzo saye?

¹¹ Jehovha o vbweta gu khuye hi tsaka guvbanyani, nigu gudzivbungadza gu nga hi gira tsaka. Khu lisine, Lito la Nungungulu lari khilo: “Gi mwalo gi tsakisago muthu guvbindra gu hodza ni gu seya a tsakeya thumo nya mandza yaye.” (Muh. 2:24, NM) Ganiolu, gu tala nya sivbungadzo mafuni momu khandri sadi. Sa gu vbindrugedza mavbanyelo nya yadi nya vathu, si va kutsa gu dzumeleya mwendro gu haladza silo si himbedzedwago khu Lito la Nungungulu.

12. Guya khu 1 Vakorinto 10:21, 22, khu ginani hi yedego gu hatha gwadi sivbungadzo sathu?

¹² Ha gu vbweta gu khozeya Jehovha enga,  khu kharato kha si kodzegi “gu hodza mbiyani ya [Jehovha, NM]” ni “mbiyani nya [madhemoni, NM].” (Leri 1 Vakorinto 10:21, 22.) Gutala nya dzitepo, gu hodza mbiya mweyo ni muthu giyeyedzo nya wupari. Ha gu hatha sivbungadzo si kutsedzeyago wughevenga, wudhemoni, wubhayi mwendro simbe silo si gimbileyanago ni gudogoreya nya nyama, sa gu fana ni gu ba hi hodza mbiya mweyo ni valala va nungungulu hi bwe hi hodza guhodza gu dongisedwego khavo. Vbavbandze nyo dzi gireye guvivba habune basi, ha gu ghoha gambe wupari wathu ni Jehovha.

13-14. Guya khu Jakobe 1:14, 15, khu ginani hi yedego gu dzi woneya tepo hi hathago sivbungadzo? Ninga giyeyedzo.

¹³ Khu ga sevbini siemo hi nga fananisago sivbungadzo ni guhodza nya lisine? Tepo hi hodzago hi ngu woneleya satshavbo hi theyago kanani gwathu. Ganiolu tepo hi midzago guhodza, yi mwalo gambe ndziya nyo hathe esi guhodza gu na girago givilini gwathu. Guhodza nya gwadi, gu nga hi gira hi manega ni womi nya wadi, guhodza nya mba gwadi gu nga hi gira hi si vbanyi gwadi. Si nga gira gu mihandro nya guhodza gogo yi si wonegi khavba ni avba, ganiolu khu gu gimbiya nya tepo yi na wonega.

¹⁴ Khu ndziya nyo fane, tepo hi hathago sivbungadzo hi nga si kodza gu hatha esi hi theyago mapimoni gwathu. Hwane nya isoso, sivbungadzo hi si hathidego si na khuha edzi hi pimisago khidzo ni edzi hi dzipwago khidzo. Sivbungadzo nya sadi si nga hi tangadzisa; sivbungadzo nyo vivbe si na hi reseya mhango. (Leri Jakobe 1:14, 15.) Si nga gira gu mihandro nya sivbungadzo nyo vivbe yi si wonegi khavba ni avba, ganiolu khu gu gimbiya nya tepo yi na wonega. Khu kharato Bhibhiliya ya gu hi gengedza khiyo: “Mu nga dzi pfhadzini sanu; kholu Nungungulu khandri wa gu hagana khuye. Muthu ni muthu a na vbwera esi a nga yalago. Kholu oyu a yalago gudogorela nya tumbunugo nya wuthu, khu nayo nya tumbunugo a na vbwera guhina.” (Gal. 6:7, 8) Si na ni lisima ngudzu gu hi bomba sivbungadzo si kutsedzeyago silo si vengwago khu Jehovha! — Ndzi. 97:10.

15. Giningwa muni egi Jehovha a hi ningidego gasi hi dzi tsakisa khigyo?

¹⁵ Vathu nya vangi va Jehovha va ngu gola gu wona JW Broadcasting^®, televhizawu yathu ya omu nya interneti, yi gu na ni sivbungadzo si phasago. Moyo nya ndriyathu nyo pwani khu Marilyn a di khuye: “JW Broadcasting yi nyi phaside gu khala muthu nyo tsake, nigu nyi ngu kodza gu sistiri ni gevbini nyi gi vbwetago kholu khyadi. Tepo nyi dzipwago na nyiri nyonga, nyi ngu mana dziganelo dzi tiyisago mwendro milongoloko nya Adoração Matinal yi tiyisago. Isoso sa gu nyi gira nyi dzipwa vbafuvbi ga Jehovha hi hengeledzano yaye. Malulamiselo nya JW Broadcasting, ma vbindrugedzide womi wangu khu guvbeleya.” Ina u ngu phasega khu giningwa gegi gi tago khiyo ga Jehovha? Omu nya JW Broadcasting, gu na ni milongoloko nya ngima ni ngima nigu gu na ni milongoloko nya awudhiyu ni eyi nya vhidhiyu ni dzindzimo dzi tiyisago, nya gu u nga dzi wona ni gu engiseya ni yevbini tepo.

16-17. Khu ginani hi yedego gu woneleya gwadi tepo hi vbedzago na hi gu dzi vbungadza nigu hi nga si gira kharini isoso?

¹⁶ Khandri gu woneleya basi sivbungadzo sakona ganiolu gu vbwetega hi woneleya gambe tepo hi vbedzago na hi gu dzi vbungadza. Ha gu mba gira isoso, hi na vbedza tepo nya yingi na hi gu dzi vbungadza guvbindra eyi hi vbedzago na hi gu thumeya Jehovha. Vambe si ngu va garadzeya gu woneleya tepo va vbedzago na va gu dzi vbungadza. Ndriyathu nyo khaguri nya nyamayi nyo pwani khu Abigail a gu ni 18 myaga wari khuye: “Gu sixitiri gu ngu nyi phasa gu rula  mapimo guvbeyani nya litshigu. Ganiolu nya gu mba dzi woneya, nyi nga vbedza dziora nya dzingi na nyi gu sixitiri.” Moyo nya ndriyathu nyo pwani khu Samuel a gu ni 21 myaga wari khuye: “Nyi ngu tshuka nyi vbedza tepo nya yingi ngudzu na nyi gu sixitiri dzivhidhiyu nyo role omu nya interneti. Nyo pheya khu gu wona mweyo, ganiolu tepo nyi hapfhulago gu vbindride tanga nya dziora dziraru mwendro dzina.”

¹⁷ U nga woneleya kharini tepo u vbedzago na wu gu dzi vbungadza? Nyo pheye gu vbwetega hi tugula gu khethu tepo muni hi vbedzago na hi gu dzi vbungadza. Khu ginani u gu mba yedza gu lova tepo u vbedzago ndrani nya semana mweyo? Lova avba nya kalendariyu dziora u vbedzago na wu sixitiri televhizawu, na wu beya omu nya interneti ni eyi u vbedzago na wu gu veteya dzighemi omu nya telefoni yago. Wa gu tugula gu khuwe u ngu vbedza tepo nya yingi ngudzu, zama gu gira longoloko. Vega tepo nyo gire silo nya lisima ngudzu wulangani nyo pheye, khavbovbo o tshiya tepo nya gu dzivbungadze. U lomba Jehovha gasi a gu phasa gu landreya longoloko u wu giridego. Wo gira kharato, u na manega ni tepo ni tshivba yi vbwetegago gasi gu gira gihevbulo gyago nya muthu enga nya Bhibhiliya, wukhozeyi nya ndranga, mitshangano nya libandla ni gu thumeya Jehovha khu gu tshumayela ni gu hevbudza. Nigu khu na nga dzipwa nandru khu tepo u vbedzidego na wu gu dzi vbungadza.

18-19. Hi nga yeyedza kharini gu khethu ha gu khozeya Jehovha enga?

¹⁸ Hwane nyo love maningano ni mahegiso nya litigo la Sathane ni litigo nya liphya hi li vireyago, mupostoli Pedro lovide esi: “Sigodwa sangu, nga olu mu lindrelago litshigu lolo, girani tshivba mu khale ga Nungungulu, nyambana gisolo, ambari gighoho mbeli gwaye.” (2 Ped. 3:14) Ha gu engisa wusingalagadzi wowo hi gira satshavbo si gomogo tshivbani gwathu gasi hi khala na hi agide khu nyamani ni liphuvboni, ha gu yeyedza gu khethu hi ngu khozeya Jehovha enga.

¹⁹ Sathane ni litigo laye a na simama gu zama gu hi gira hi thangisa simbe silo guvbanyani gwathu wulangani nyo thangise Jehovha. (Luka 4:13) Ganiolu, ambari hi emisana ni sigaradzo muni, kha hi na nga dzumeleya gilo mwendro muthu a dzega wulanga wa Jehovha myonyoni gwathu. Hi dzi emisede gu ninga Jehovha esi si mu yelago — gu khozeya uye enga!