1. Ginani gi hi girago hi tiyisega gu khethu ha gu vbanya ga “matshigu nya guhegise”?

WA GU ba u velegidwe hwane nya 1914, dziti gu khuwe gu khugeya u velegwa wa gu vbanya ndrani nya “matshigu nya guhegise” nya litigo leli. (2 Thim. 3:1) Hatshavbo hi ngu si wona mwendro gupwa na gu ganedwa khu sigiro si profetidwego khu Jesu maningano ni matshigu yaya. Silo nya nga dzinyimbi, dzindzala, sirevareva, madwali, guengedzeya nya vathu nya mba engisa milayo ni gutshaniswa nya vathu va Jehovha. (Mat. 24:3, 7-9, 12; Luka 21:10-12) Hi ngu wona gambe vathu nya mavbanyelo ma ganedwego khu mupostoli Pawulo. (Wona kwadru “ Mavbanyelo nya vathu va muhuno.”) Kha nga vakhozeyi va Jehovha ethu hi ngu tiyisega gu khethu ha gu vbanya ga “matshigu nya guhegise” — Mik. 4:1.

2. Siwudziso muni hi yedego gu si hlamula?

² Kha nga olu gu vbindridego myaga nya yingi gu khugeya 1914 kala muhuno, olu ha gu vbanya guvbeyani nya “matshigu nya guhegise.” Kha nga olu mahegiso ma gomogo vbafuvbi ngudzu, gu vbwetega hiti milhamulo nya siwudziso nyo khaguri nya lisima: Sigiro muni si na giregago guvbeyani nya “matshigu nya guhegise”? Nigu ginani egi Jehovha a vireyago gu khuye hi gira na hi ngo vireya sigiro soso?

3. Guya khu giprofeto gi gomogo omu ga 1 Vatesalonika 5:1-3, ginani egi mayigo ma na huweleyago?

³ Leri 1 Vatesalonika 5:1-3. Pawulo a gu ganeya khu ‘litshigu la Jehovha.’ Lowo wowu wa gu ganeya khu tepo a na wugedwago “Bhabhiloni nya Khongolo,” tshindza nya wukhongeyi nya malipha nya mafu yatshavbo, khu mahegiso gu landreya Harimagedhoni.  (Gutu. 16:14, 16; 17:5) Na gu keneleya vbadugwana gasi gu “litshigu” lolo li pheya, mayigo ma na huweleya gu khayo gu rude “litigo li lade, gu mwalo gilo”! (Dzimbe dzibhibhiliya dzi si lovide kharati: “Gurula ni gukhadzisega.”) Dzipfhumu nya mafu dzi ngu tshuka dzi thumisa malito yoyo dza gu ba dzi ganeya khu gu vega gupwanana vbakari nya mayigo. * Ganiolu guhuweledwa nya gu pwani “litigo li lade, gu mwalo gilo” gu thudwago khu Bhibhiliya gu na ba gu hambanide. Khu ginani? Kholu tepo isoso si na giregago adzina vathu nya vangi va na pimisa gu khavo vathangeyi nya mafu va kodzide gu resa gurula ni gukhadzisega tigoni. Ganiolu khu lisine hwane nya ‘tshanisa nya yikhongolo’, “khu gipitipiti, [gu nata] gumbemba vbatshani gwawe.”  — Mat. 24:21.

4. a) Ginani hi si gi tigo maningano ni guhuweledwa nyo pwani “litigo li lade, gu mwalo gilo”? b) Ginani egi hi gi tigo?

⁴ Hi nguti silo nyo khaguri maningano ni guhuweledwa nyo pwani “litigo li lade, gu mwalo gilo.” Ganiolu simbe silo kha hi siti. Kha hi giti egi gi na girago dzipfhumu dzi huweleya isoso mwendro edzi si na huweledwago khidzo. Kha hi dziti gambe gu khethu si na huweledwa khu dzitepo nya dzingi mwendro gumogo basi. Ambari gu dugeleya ginani, ethu hi ngu dziti gu khethu kha hi yeli gu sengwa hi pimisa gu khethu vathangeyi nya mafu va na ni makodzelo nyo rese gurula mafuni. Hi na dziti gukhethu khugo guhuweledwa gu nga thudwa khu Bhibhiliya hi nga ba hi gu vireya nigu gi na ba giri giyeyedzo nya gu khigyo ‘litshigu la Jehovha lomo vbafuvbi’ ni gu pheya!

5. Lowo wa 1 Vatesalonika 5:4-6 wa gu hi phasa kharini gu khala na hi dzi dongisede ‘litshigu la Jehovha’?

⁵ Leri 1 Vatesalonika 5:4-6. Gigengedzo gya Pawulo gyo hi yeyedza edzi hi yedego gu dzi dongiseya khidzo guta nya ‘litshigu la Jehovha.’ Hi nga “khali na hi lade nga vambe.” Gu vbwetega hi “khedzisele” hi bwe hi khala na hi gengede. Khu giyeyedzo gu vbwetega hi khala na hi gengede gasi hi si dzi bedzedzeyi omu nya politika nya mafu. Ha gu dzibedzedzeya omu nya silo soso hi na “lumba litigo.” (Johane 15:19) Hi ngu dziti gu khethu Mufumo wa Nungungulu khuwo basi wu na resago gurula mafuni.

6. Ginani egi hi yedego gu phasa vambe gu gira nigu khu ginani?

⁶ Vbavbandze nyo dzi dongiseye honga, gu vbwetega hi phasa vambe navo gu hevbula esi Bhibhiliya yi si profetidego gu khiyo si di hadzi dugeleya mafuni. Gu vbwetega hiti gu khethu gu pheya yi na pheyago tshanisa nya yikhongolo, gu na ba gu mwalo gambe tepo nya gu vathu va pheya gu thumeya Jehovha. Khu kharato thumo nya gutshumayele khwa givbiredza ngudzu! *

7. Ginani egi Jehovha a vireyago gu khuye hi gira olu?

⁷ Ga gitepwana gegi gi nga tshadego li si gu vbohi “litshigu” laye, Jehovha a gu vireya gu  khuye hi khala na hi pharegide thumoni nya gutshuyele. Gu vbwetega hi tiyisega gu khethu hi ngu “thuma gikhati gyatshavbo khu gunengela esi Nungungulu a si vbwetago.” (1 Kor. 15:58) Jesu profetide esi hi nga hadzi gira. Tepo a nga ganeya khu satshavbo si nga hadzi dugeleya matshiguni nya guhegise, a di vbedza khuye: “Mahungu nya Yadi yaya nya Mufumo wa Nungungulu ma na huweledwa tigoni gwatshavbo.” (Marko 13:4, 8, 10; Mat. 24:14) Dundrugeya gwadi khesi: Tepo ni tepo u hongolago thumoni nya gutshumayele, wa gu patega avba nya gutadzisege nya giprofeto gyogyo nya Bhibhiliya!

8. Wa gu dandra kharini thumo nya gutshumayele mahungu nya Mufumo?

⁸ Thumo nya gutshumayele wa gu dandra khu ndziya muni? Mwaga ni mwaga thumo wowu wa gu dandra. Khu giyeyedzo nga dundrugeya khu guengedzeya nya tengo nya vahuweleyi nya Mufumo mafuni gwatshabo ndrani nya matshigu yaya nya guhegise. Khu 1914, gu diri ni 5155 nya vahuweleyi omu nya 43 mayigo. Muhuno gu na ni gipimo nya 8.5 dzimiliyoni nya vahuweleyi omu nya 240 mayigo! Ambari ulolo thumo wathu wu si gu hegisi. Gu vbwetega gu hi simama gu tshumayela gu khethu Mufumo wa Nungungulu khuwo basi wu na kodzago gu lulamisa sigaradzo nya vathu vatshavbo. — Ndzi. 145:11-13.

9. Khu ginani hi yedego gu simama gu tshumayela mahungu nya Mufumo?

⁹ Thumo wathu nya gutshumayele wu na simama kala Jehovha khuye wu vbede. Tepo muni yi tshadego gasi gu vathu vati Jehovha Nungungulu ni Jesu Kristo? (Joh. 17:3) Kha hi dziti. Egi hi gi tigo khegi nya gu kala yi pheya tshanisa nya yikhongolo, vambe va dzi ‘emisedego gu hakha guvbanya nya gupindruge’ va na simama gu dzumeya mahungu nya yadi va hatha gu thumeya Jehovha. Hi nga phasa kharini vathu vovo na ma si gu vbalagi mati?

10. Giphaso muni hi ningwago khu Jehovha gasi gu hevbudza lisine vathu?

¹⁰ Khu gu thumisa hengeledzano yaye, Jehovha a ngu hi ninga satshavbo si vbwetegago gasi gu hevbudza lisine vathu. Khu giyeyedzo, semana ni semana, omu nya tshangano wa vbakari nya semana hi ngu hevbudzwa gutshumayela. Tshangano wowu wa gu hi phasa guti esi hi yedego gu ganeya avba nya liendro nyo pheye ni avba nya liendro nyo bweleleye. Wu ngu hi hevbudza gambe edzi hi yedego gu gimbidzisa khidzo sihevbulo nya Bhibhiliya. Hengeledzano ya Jehovha yi ngu hi ninga gambe dziferameta hi hevbudzago khidzo. Dziferameta dzodzo dzi ngu hi phasa gu . . .

•   pheya mabhulo,

• wusa gutsakeya,

• gira muthu a vbweta gu hevbula nya singi khu Bhibhiliya,

• hevbudza lisine sihevbuli nya Bhibhiliya ni gu

• kutsa ava va tsakeyago gasi va beya omu nya sayite ni gu va raneya guta Salawuni nya Mufumo.

Khu lisine, kha si eneyi gu manega basi ni dziferameta dzedzi. Gu vbwetega gu hi dzi thumisa. * Khu giyeyedzo, wa gu tshiya gidangaliyana mwendro revista hwane nya gu bhule ni muthu a tsakeyago, uye a na si kodza gu tshala a leri kala u bweleya u ya bhula naye gambe. I thumo wathu gu simama na hi pharegide ngima ni ngima khu thumo nya gutshumayele.

11. Khu ginani gi nga girwa gipandre nya Curso da Bíblia On-line?

¹¹ Gasi gu wona gimbe giyeyedzo nya edzi Jehovha a phasago khidzo vathu gu hevbudza lisine, wona gipandre Curso da Bíblia On-line omu nya sayite jw.org^®. Khu ginani gi nga girwa gipandre gegi? Ngima ni ngima vathu nya vangi ngudzu mafuni va ngu beya omu nya interneti va vbwetedzeya sihevbudzo nya Bhibhiliya. Sihevbudzo si gomogo omu nya sayiti yathu si nga phasa vathu vovo guti lisine li gomogo omu nya Lito la Nungungulu. Si nga gira gu vambe vathu u bhulago navo na va kanakana gu dzumeya gihevbulo nya Bhibhiliya. Abari kharato, va yeyedze gipandre gegi gi gomogo omu nya sayiti yathu mwendro gu va rumeleya link nya omu si manegago sihevbudzo sesi. So kodzega va leleteye gasi va beya khu lidimi va li pwisisago. *

12. Ginani egi muthu a nga gi hevbulago omu nya gipandre Curso da Bíblia On-line?

¹² Gipandre gegi nya Curso da Bíblia On-line gi na ni sihevbudzo sesi: “A Bíblia e seu Autor,” “Os principais personagens da Bíblia” ni “A mensagem da Bíblia sobre um futuro melhor.” Sihungwana sesi nya mahungu so hevbudza esi:

• Edzi Bhibhiliya yi phasago khidzo muthu

• Khu mani Jehovha, Jesu, ni dzingilozi?

• Khu ginani Nungungulu a vangidego vathu?

• Khu ginani gu gu ni gutshaniseka ni wuvivbi?

Gipandre gegi gi ngu ganeya gambe khedzi Jehovha a na . . .

• vbedzago khidzo gutshaniseka ni gufa,

• wusago khidzo ava vafudego ni

• tshikedzago khidzo mifumo yeyi nya vathu khu Mufumo wa Nungungulu.

13. Ina gipandre gya omu nya sayiti nya sihevbudzo nya Bhibhiliya gya gu tshikedza malulamiselo nya gihevbulo nya Bhibhiliya? Tshamuseya.

¹³ Gipandre gegi khandri gyo tshikedza malulamiselo nya gihevbulo nya Bhibhiliya. Jesu a hi nigide lithomo nya gu gire vapizane. Gipandre gegi gi giridwe gasi gu vale va tsakeyago va hevbula va tsakiswa khesi va hevbulago, khavbovbo va vbweta gu hevbula nya singi. Khu kharato adzina si va gira va dzumeya gihevbulo nya Bhibhiliya. Khu mahegiso nya gihevbudzo ni gihevbudzo, muthu a gu kutswa gu lomba muthu gasi a mu gimbidziseya gihevbulo nya Bhibhiliya. Litshigu ni litshigu, omu nya sayiti yathu, mafuni gwatshavbo hi ngu hakha silombo nya gihevbulo nya Bhibhiliya si vbindrago 230. Gihevbulo gyogyo nya moyo khu moyo gi ngu phasa ngudzu!

14. Guya khu sileletelo sa Jesu si gomogo ga Matewu 28:19, 20, ginani hi dzi garadzeyago gu gira nigu khu ginani?

¹⁴ Leri Matewu 28:19, 20. Tepo hi gimbidzisago sihevbulo gu vbwetega hi dzi garadzeya gu “gira vapizane, NM . . . ni gu va hevbudza gu landrisa satshavbo [esi Jesu] a si hevbudzidego.” Gu vbwetega hi phasa vathu gu pwisisa lisima nya gu va thumeya Jehovha ni gu seketeya Mufumo waye. Isoso so thula gu kutsa vathu gu vbanyeya lisine khu gu va vbanya khesi va si hevbulago, va hendzeledza womi wawe ga Jehovha va bwe va  bhapatiswa. Va gu gira isoso khavbo va na vbulugago litshigu la Jehovha. — 1 Ped. 3:21.

15. Ginani hi gu mba dzi vbedzeya khigyo tepo nigu khu ginani?

¹⁵ Kha nga hi ganedego khiso gupheyani, tepo yi tshadego gasi gu vboha mahegiso nya litigo leli yi dugwana. Khu kharato kha hi dzi vbedzeyi tepo yathu khu gu simama gu hevbula Bhibhiliya ni vathu va gumba yeyedza gu khavo va gu vbweta kamo gu khala sithumi sa Jehovha. (1 Kor. 9:26) Thumo wathu khwa givbiredza! Gu na ni vathu nya vangi va vbwetago gupwa mahungu nya Mufumo na yi si yi gu vbeyi tepo.

16. Guya khu Gutuledwa 18:2, 4, 5, 8, ginani egi hatshavbo hi yedego gu gira? (Wona tshamuselo wa vbavbatshi.)

¹⁶ Leri Gutuledwa 18:2, 4, 5, 8. Lowo wowu wu ngu yeyedza gimbe gilo egi Jehovha a vbwetago gu khuye vakhozeyi vaye va gira. Gu vbwetega gu wonega guhambana vbakari nya maKristo yatshavbo nya lisine ni Bhabhiloni nya Khongolo. Si nga gira gu gihevbuli nyo khaguri nya Bhibhiliya na gi lumbide wukhongeyi nyo khaguri nya malipha, na gi si gu hevbuli lisine. Adzina gi di gu patega avba nya sigiro ni mithumo nya wukhongeyi wowo. Mwendro gi di gu henga dzitsapawu ga hengeledzano yoyo. Khu kharato, gihevbuli nya Bhibhiliya na gi si gu dzumeledwi gu khala muhuweleyi nya mba bhabhatiswa, gu vbwetega gu gi dzi hambanisa khu guvbeleya ni wukhongeyi nya malipha. Gu vbwetega gu a loveya lidangaliya tshetshe mwendro hengeledzano nya wukhongeyi nya malipha a nga ba a lumba iyo a va embeya khuye a dugide gwayo. *

17. Mithumo muni nya gudzivbanyise eyi muKristo a yedego gu yi potsa nigu khu ginani?

¹⁷ Mukristo nya lisine gu vbwetega a tiyisega gu khuye thumo waye nya gudzivbanyise kha wu gimbileyani ne ni vbadugwana ni wukhongeyi nya malipha. (2 Kor. 6:14-17) Khu giyeyedzo kha yeli gu thumeya tshetshe nyo khaguri. Gimbe gambe, ambari a bari gu muKristo a thodwe gasi gu thuma yimbe mithumo kha yeli gu gira mithumo malangani gu gimbidzisanago ni wukhongeli nya malipha. Nigu abari gu a gu dzi thumeya, kha yeli gu dzumeya thumo mwendro gu gira contrato ni Bhabhiloni nya khongolo. Khu ginani hi tiyago hi gira isoso? Kholu kha hi vbweti gu dzi bedzedzeya omu nya mithumo ni sighoho nya dzihengeledzano dzi nga mba aga mahoni ga Nungungulu. — Isa. 52:11. *

18. Ndriyathu nyo khaguri bangelede kharini avba nya matshina nya milayo nya Bhibhiliya maningano ni thumo nya gudzivbanyise?

 ¹⁸ Myaga nyo khaguri yi vbindridego, lidhota limwedo li nga ba li dzi thumeya, li di lombwa khu mwama nyo khaguri gasi guya gira thumo nya wuvati ga tshetshe nyo khaguri dhoropani li nga ba li vbanya umo. Mwama yoyo a di gu dziti gu khuye ndriyathu yoyu a di ganede khuye kha dzumeyi gu gira mithumo omu nya dzitshetshe. Ganiolu mwama yoyu a di gu vbwetedzeya muthu nyo gire thumo wowo khu maho nyo fuviye. Ambari ulolo, ndriyathu yoyu a di bangeleya avba nya matshina nya milayo nya Bhibhiliya, a bomba gu gira thumo wowo. Ga semana yi nga landreya, vajorinalista va gipandreni mule va di dusa jorinali yi nga ba yiri ni foto nya mwama nyo khaguri na gu khokhotheya gihambano tshetsheni mule. Nari khatshi ndriyathu wule a di fanya matshina nya milayo nya Bhibhiliya a dzumeya thumo wule, nari foto yaye yi nga hadzi yeyedzwa avba nya jorinali yile. Nga dundrugeya khu phungu nyo vivbe a nga hadzi manega nayo ndriyathu yoyu ga maKristo makhwathu! Nga dundrugeya gambe khedzi Jehovha a nga hadzi gu dzipwa khidzo.

19-20. a) Ginani hi gi hevbudego kala avba? b) Ginani gimbe hi yedego gu gi hevbula?

¹⁹ Bhibhiliya yari khiyo giprofeto nya lisima ngudzu gi na tadzisegago nugunugu, khu tepo vafumeli nya mafu va na huweleyago gu khavo “litigo li lade, gu mwalo gilo.” Khu kotani nya esi Jehovha a hi hevbudzago, hi ngu dziti gu khethu mayigo kha ma na nga kodza gu resa gurula nya lisine gu na pindrugago. Ginani hi yedego gu gira na gi si gu tadzisegi giprofeto gyogyo gi na landredwago khu gumbemba nya gipitipiti? Jehovha o vireya gu khuye hi simama na hi pharegide khu thumo nya gutshumayele mahungo nya Mufumo wa Nungungulu ni gu zama gu gira vapizane. Hi bwe hi dzi hambanisa ni wukhongeyi nya malipha. Isoso so thula gu dzihambanisa ni satshavbo si yelanago ni Bhabhiloni nya khongolo gupata ni mithumo nya gudzivbanyise yi gimbidzisanago naye.

²⁰ Gu na ni simbe sigiro si na giregago guvbeyani nya “matshigu nya guhegise.” Nigu gu na ni simbe silo gambe esi Jehovha a vireyago gu khuye hi gira. Khu sevbini silo soso nigu hi nga dzi dongiseya kharini gasi gu emisana ni gevbini gi na dugeleyago mindru wa tshigu? Hi na si wona omu nya ndrima yi na landreyago.