1-2. a) Ginani egi mayigo ma na gi huweleyago nugunugu? b) Siwudziso muni hi yedego gu si hlamula?

NGA dundrugeya mayigo na ma huwelede esi hi si vireyago khu gale gu khavo “Litigo li lade, gu mwalo gilo.” Si nga gira gu va dzi khuza khavo tigoni gu na ni gurula nya gu gima gu si gu manegi. Mayigo ma na zama gu hi gira hi khodwa gu khethu avo va na ni makodzelo nyo vbedze sigaradzo nya mafu. Ganiolu avo va mwalo makodzelo nyo emisane ni esi si na landreyago! Khu ginani? Giprofeto nya Bhibhiliya gyari khigyo: “khu gipitipiti, [gu nata] gumbemba vbatshani gwawe . . . kha va na vbuluga.” — 1 Tes. 5:3.

² Gu na ni siwudziso nya lisima ngudzu hi yedego gu si lhamula: Ginani gi na giregago ndrani nya ‘tshanisa nya yikhongolo’? Ginani egi Jehovha a na vireyago gu khuye hi gira khu tepo yoyo? Nigu hi nga dzi dongiseya kharini olu gasi hi ta simama na hi tumbegide ndrani nya tshanisa nya yikhongolo? — Mat. 24:21.

3. Guya khu Gutuledwa 17:5, 15-18, Nungungulu a na fuvisa kharini “Bhabhiloni nya Khongolo”?

³ Leri Gutuledwa 17:5, 15-18. “Bhabhiloni nya khongolo” a na fuviswa! Kha nga si khumbugidwego gupheyani, mayigo kha ma na nga kodza gu emisana ni esi si na gu ba si girega khu tepo yoyo. Khu ginani? Kholu “Nungungulu [a na vega] myonyoni gwawe gasi gu gira guhaladza gwaye.” Ginani guhaladza gogo? Gutshungunudwa nya tsindza nya mafu yatshavbo nya wukhongeli nya malipha,  gu pata ni dzitshetshe dzi dziembeyago gu khidzo khya wuKristo. * Nungungulu a na theya guhaladza mwendro mapimo yaye monyoni nya “likhumi dzikheho” nya “girengo nya gufuvile.” Likhumi dzikheho ga gu thudwa mifumo yatshavbo yi seketeyago “girengo nya gufuvile” — A gu Nações Unidas. (Gutu. 17:3, 11-13; 18:8) Tepo mifumo yatshavbo yoyo yi na wugeyago wukhongeyi nya malipha, gu na ba guri giyeyedzo nyo khigyo tshanisa nya yikhongolo yi phede. Gu na ba guri gigiro nyo thise gi na khuhago vathu vatshavbo mafuni.

4. a) Sighelo muni esi adzina mayigo ma na si thumisago gasi gudziemeleya khiso tepo ma na wugeyago wukhongeyi nya malipha? b) Ginani egi adzina vathu vale va nga ba va lumba wukhongeyi wowo va na girago?

⁴ Kha hi siti sighelo esi mayigo ma na si thumisago gasi gu dziemeleya khiso tepo ma na wugeyago Bhabhiloni nya khongolo. Si nga gira va ganeya khavo wukhongeyi wa mafuni gwatshavbo wu ngu tsolopeteya gurula nigu tepo yatshavbo wa gu dzi bedzedzeya omu nya dzipolitika. Mwendro va nga ganeya khavo dzihengeledzano dzodzo nya wukhongeyi dzi ngu hengeledzeya dzitsapawu nya dzingi ni dzithomba nya dzingi ngudzu. (Gutu. 18:3, 7) Tepo mayigo ma na wugeyago wukhongeyi nya malipha so wonega khatshi kha va na nga fuvisa ni wevbini muthu a lumbago wukhongeyi wowo. Wulangani nya isoso, go wonega khatshi mayigo ma na fuvisa dzihengeledzano dzakone nya wukhongeyi. Tepo dzihengeledzano dzodzo dzi na gu ba dzi fuvisidwe, ava va nga ba va lumba idzo va na tugula gu khavo vathangeyi vawe nya wukhongeyi kha va kodza gilo, khavbovbo adzina va zama gudzihambanisa ni wukhongeyi wowo.

5. Ginani egi Jehovha a hi tumbisidego maningano ni tshanisa nya yikhongolo nigu khu ginani?

⁵ Bhibhilya kha yi ganeyi tepo gu na dzegago gufuviswa ga Bhabhiloni nya khongolo ganiolu ethu hi ngu dziti gu khethu kha gu na nga dzega tepo nyo laphe ngudzu. (Gutu. 18:10, 21) Jehovha tumbiside gu khuye a na “rodzisa matshigu yoyo” nya tshanisa gasi gu “vale a va hathidego” ni wukhongeyi nya lisine va vbuluga. (Marko 13:19, 20) Ginani egi Jehovha a na vireyago gu khuye hi gira ndrani nya tshanisa nya yikhongolo kala yi vboha Harimagedhoni?

6. Ginani gimbe hi yedego gu gira gasi hi si giri gipandre nya wukhozeyi nya malipha?

⁶ Kha nga hi gadego khiso omu nya ndrima yi vbindridego, Jehovha o vireya gu khuye sithumi saye si dzi hambanisa ni Bhabhiloni nya Khongolo. Ganiolu kha si eneyi gudzihambanisa basi. Gu vbwetega hi dziemiseya gu seketeya wukhongeyi nya lisine — Hi dziemiseya gu thumeya Jehovha. Wona dzindziya dzimbili nyo gire khidzo isoso.

7. a) Hi nga simama kharini gu bangeleya milayo nya mavbanyelo ya Jehovha? b) Khu ginani Vahebheru 10:24, 25 a ganeyago gu khuye hi yede gu tshangana gumogo nigu khu ginani isoso si gu sa lisima ngudzungudzu olu?

⁷ Nyo pheye, gu vbwetega hi simama gu bangeleya milayo ya Jehovha nya mavbanyelo. Kha hi yeli gu dzumeya mavbanyelo nya mba handzega nya litigo. Khu giyeyedzo kha hi dzumeyi ni wevbini wubhayi, ambari ni mutshadho nya vathu vavili nya sivbango nya wuvelegi nyo fane mwendro mavbanyelo nya gudzigire vama na vari vanyamayi mwendro va dzi gira vanyamayi na vari vama. (Mat. 19:4, 5; Rom. 1:26, 27) Nya wuvili, gu vbwetega hi simama gu khozeya gumogo ni maKristo makhwathu. Hi bwe hi gira isoso ni hayini si kodzegago, gani Dzisalawuni nya Mufumo, dzindrangani ambari gusihalani. Ambari gu dugeleya ginani, gima kha hi na nga diga giolovedzo gyathu nya gu tshangane gasi hi khozeya gumogo. Khu lisine gu vbwetega hi tshangana ‘ngudzungudzu olu hi wonago gukhethu litshigu li ngu vboha.’ — Leri Vahebheru 10:24, 25.

8. Mahungu hi tshumayelago adzina ma na vbindrugedza mindru wa tshigu khu ndziya muni?

⁸ Ndrani nya tshanisa nya yikhongolo mahungu hi ma huweleyago ma na vbindrugedza. Olu ha gu tshumayela mahungu nya yadi nya Mufumo nigu ha gu zama gu gira vapizane. Ganiolu ga tepo yoyo, adzina hi na huweleya mahungu nyo garadze ngundzu nyo khatsi maralala. (Gutu. 16:21) Adzina hi na huweleya gu khethu litigo la Sathane nugunugu li na fuviswa khu guvbeleya. Khu gu gimbiya nya tepo hi na dziti gwadi edzi mahungu yoyo ma na gu ba ma khade khidzo ni edzi hi na ma huweleyago khidzo. Ina hi na huweleya khu dzindziya hi tago na hi gu dzi thumisa mazana myaga yi vbindridego gasi gu tshumayela ni gu hevbudza? Mwendro hi na thumisa dzimbe dzindziya? Kha hi dziti. Nya lisima khu gu so wonega khatshi hi na manega ni lithomo nyo tshumayele mahungu nya gulamula ga Jehovha! — Ezek. 2:3-5.

9. Ginani egi mayigo ma na girago khu kotani nya mahungu yathu ganiolu ginani hi tiyisegago khigyo?

⁹ Si nga gira gu mahungu yathu ma khuthedzeya mayigo avba nya gu va zama gu hi sega magana khu guvbeleya hi si tshumayeli gambe. Kha nga olu hi tumbago Jehovha gasi a hi phasedzeya thumoni nya gutshumayele muhuno, ga tepo yoyo niyo hi na vbweta giphaso gyaye. Hi nga tiyisega gu khethu Nungungulu a na hi ninga tshivba gasi gu gira gugola gwaye. — Mik. 3:8.

10. Kha nga si profetidwego omu ga Luka 21:25-28, vathu va na dzipwa kharini khu silo si na giregago ndrani nya tshanisa nya yikhongolo?

¹⁰ Leri Luka 21:25-28. Ndrani nya tshanisa nya yikhongolo, vathu va na goroga tepo va na wonago gu khavo satshavbo va nga ba va pimisa gu khavo si ngu gimbiya gwadi mafuni sa gu ghohekeya. Avo va napwa “wuvi” ni gu garadzega na va thava gu songwa ndrani nya tepo yoyo nyo garadze nya matimo nya vathu. (Sof. 1:14, 15) Khu tepo yoyo, womi wu na garadza ambari ga vathu va Jehovha. Kha nga olu hi si girigo gipandre nya litigo, si nga gira gu hi emisana ni sigaradzo. Si nga gira hi hamuga silo nyo dzi vbanyise khiso.

11. a) Khu ginani vathu ni dzipfhumu nya mafu dzi na vegago gupima avba nya Dzifakazi dza Jehovha? b) Khu ginani hi gu mwalo gighelo nyo thave tshanisa nya yikhongolo?

¹¹ Khu tepo yoyo gambe, vathu vale va na gu ba va fuvisedwe wukhongeyi wawe va na tala khu likhulo kholu Dzifakazi dza Jehovha dzi na gu ba  dza sa fuvisedwa wukhongeyi wadzo. Avo va na huweleya isoso gwatshavbo gu pata ni omu nya interneti. Mayigo ni mufumeyi wavo Sathane, va na hi nyenya kholu wukhongeyi wathu wu na gu ba wuri uwo wonga wu nga ne fuviswa. Va na ba va sa kodza gu vboheya makungo yawe nyo fuvise watshavbo wukhongeyi mafuni gwatshavbo. Khu kharato va na vega gupima avba gwathu. Khu tepo yoyo, mayigo ma na khala Gogi wa Magogi. * Avo va na hungana gasi gu wugeya vathu va Jehovha khu tshivba yawe yatshavbo. (Ezek. 38:2, 14-16) Si nga gira gu hi garadzega adzina khesi si na giregago ndrani nya tshanisa nya yikhongolo, ngudzungudzu olu hi gu mba siti gwadi esi si pategago. Ganiolu lisine kheli: Hi mwalo gighelo nyo thave tshanisa nya yikhongolo. Jehovha a na hi ninga sileletelo si na vbulugisago womi wathu. (Ndzi. 34:19) Hi na kodza gu ‘tiya longo hi khusedza dzithamo dzathu’ kholu hi na dziti gu khethu ‘guvbanyiswa gwathu gu vbohide.’ *

12. ‘Githumi nya gutumbege ni nya gu gengeye’ gya gu hi dongiseya kharini gasi gu emisana ni esi si na giregago mindru wa tshigu?

¹² ‘Githumi nya gutumbege ni nya gu gengeye’ gi ngu hi dongiseya gasi hi ta simama gu tumbega ndrani nya tshanisa nya yikhongolo. (Mat. 24:45) Igyo gya gu gira isoso khu dzindziya nyo hambanehambane, gimwegyo nya giyeyedzo nya dzindziya dzodzo, khu mitshangano yathu nya mughanga nya 2016-2018. Dziganelo nya mitshangano yeyi, dzi hi kutside gu tiyisa makhalelo ma vbwetegago olu hi gomogo vbafuvbi ni litshigu la Jehovha. Hongoleni hi wusedzanyana makhalelo yoyo.

13. Hi nga tiyisa kharini gutumbega gwathu ga Jehovha, nigu khu ginani hi yedego gu gira isoso olu?

¹³ Gutumbega: Hungo nya mahungo nya longoloko nya tshangano nya mughanga nya 2016 wu di gu khuwo: “Simama gu tumbega ga Jehovha!” Longoloko wowo wu hi yeyedzide gu khuwo ha gu manega ni wupari nya wukhongolo ni Jehovha, hi na tumbega gwaye. Hi dundrugisidwe gu pwani hi nga hidzimeya vbafuvbi ni Jehovha khu gu gira nombelo ni gu hevbula gwadi Lito laye. Gu gira isoso gu ngu hi ninga tshivba nyo pale ambari sigaradzo nya sikhongolo ngudzu. Kha nga olu tshanisa nya yikhongolo yi gomogo vbafuvbi, gutumbega gwathu ga Nungungulu ni mufumo waye gu na engedzeya gu lingwa. Vathu va na simama gu hi hega. (2 Ped. 3:3, 4) Gimwegyo nya sighelo si hi girago hi hegwa khu gu kha hi seketeyi ni gilo gimwegyo basi gi gimbidzisanago ni litigo la Sathane. Gu vbwetega hi tiyisa gutumbega gwathu olu gasi hi ta simama na hi tumbegide ndrani nya tshanisa nya yikhongolo.

14. a) Ginani gi na giregago khu vandriyathu va na thangeyago mafuni? b) Khu ginani gu na vbwetegago gu hi tumbega khu tepo yoyo?

¹⁴ Ndrani nya tshanisa nya yikhongolo, gu na manega guvbindrugedza nyo khaguri gu na khuhago vandriyathu va thangeyago mafuni. Yi na vboha tepo eyi vatshavbo ava va todzidwego va na tshanganiswago ndzadzini gasi va ya patega avba nya nyimbi nya Harimagedhoni. (Mat. 24:31; Gutu. 2:26, 27) Isoso so thula gu khiso hi na ba hiri mwalo gambe Huwo nya guthangeye. Ambari ulolo gidzemo nya gikhongolo gi na simama na gi sasamedzidwe gwadi. Vandriyathu va ninganedwago va girago gipandre nya dzimbe dzinvuta, va na thangeya. Hi na yeyedza gutumbega gwathu khu gu seketeya vandriyathu vovo ni gu landreya wusingalagadzi va na  ningwago khu Jehovha. Isoso khiso si na hi vbulugisago.

15. Hi nga tiyisa kharini gutimiseya gwathu nigu khu ginani si gu na ni lisima gu gira isoso olu?

¹⁵ Gutimiseya: Hungo nya mahungo nya longoloko nya tshangano nya mughanga nya 2017 wu di gu khuwo “U nga digi gu timiseya!” Longoloko wowu wu hi phaside gu tiyisa gudziemiseya gwathu nyo timiseye silingo. Hi hevbude gu khethu kha hi timiseyi basi sa gu ba si hi vbevbugeya. Ho kodza gutimiseya kholu hi tumbago Jehovha. (Rom. 12:12) Gima hi nga divaledwi khesi Jesu a si tumbisidego: “Uye a na gu tsaramago mwendro gu timiseya kala mahegiso a na vbanyiswa.” (Mat. 24:13) Gitumbiso gyogyo gyo yeyedza gu khigyo gu vbwetega hi simama gu tumbega ambari ha gu manega ni sigaradzo nyo khale kharini. Ha gu timiseya silingo satshavbo olu, gukhodwa gwathu gu na tiya na yi si gu pheyi tshanisa nya yikhongolo.

16. Ginani gi na hi phasago gu tiya hwambo nigu hi nga tiyisa kharini gutiya-hwambo gwathu?

¹⁶ Gutiya-hwambo: Hungo nya mahungo nya longoloko nya tshangano nya mughanga nya 2018 wu di gu khuwo ‘Tiya hwambo’! Dziganelo nya tshangano wowu dzi hi phaside gu dundruga gu khethu gutiya-hwambo kha guti khu tshivbani gwathu. Kha nga olu hi yedego gu tumba Jehovha gasi hi kodza gu timiseya gu vbwetega hi tumba Jehovha gambe gasi hi kodza gu mana gutiya-hwambo. Hi nga tiyisa kharini gutumba gwathu ga Jehovha? Khu gu leri Lito laye tshigu ni tshigu ni gu dundrugeya khedzi Jehovha a vbulugisidego khidzo vathu vaye teponi ya gale. (Ndzi. 68:20; 2 Ped. 2:9) Tepo mayigo ma na gu hi wugeyago ndrani nya tshanisa nya yikhongolo, gu na vbwetega gu hi tiya hwambo ni gu tumba Jehovha guvbindra dzitepo dzatshavbo. (Ndzi. 112:7, 8; Hebh. 13:6) Ha gu tumba Jehovha olu, hi na ta manega ni gutiya-hwambo gu vbwetegago gasi gu emisana ni gu wugedwa khu Gogi wa Magogi. *

17. Khu ginani hi gu mwalo gighelo nyo thave Harimagedhoni? (Wona foto yi gomogo avba nya kapa.)

¹⁷ Kha nga si khumbugidwego omu nya ndrima yi vbindridego, gutala nya ethu ha gu vbanya  ndrani nya matshigu nya guhegise gukhugeya hi velegwa. Ganiolu hi na ni gu vireya nyo vbanye ndrani nya tshanisa nya yikhongolo. Nyimbi nya Harimagedhoni khiyo mahegiso nya silo satshavbo nya mafu yaya. Ganiolu gi mwalo gighelo nyo thave. Khu ginani? Kholu yi na ba yiri nyimbi ya Jehovha khu kharato ethu kha hi na nga dwana. (Mav. 1:33; Ezek. 38:18-20; Zak. 14:3) Tepo Jehovha a na ningago nayo, Jesu Kristo a na thangeya libuthu la Nungungulu nyimbituno. A na ba ari gumogo ni ava va todzidwego ni dzimiliyoni nya dzingilozi. Khu gumogo va na dwana ni Sathane ni madhemoni gumogo ni mabuthu yaye ya mafuni. — Dhan. 12:1; Gutu. 6:2; 17:14.

18. a) Ginani egi Jehovha a hi tumbisago? b) Khu ginani Gutuledwa 7:9, 13-17 a gu phasago gu manega ni gutumba khu mindru wa tshigu?

¹⁸ Jehovha tumbiside khuye: “Matshari yatshavbo ma giridwego gasi gu gu sasela, kha ma na gu gira gilo.” (Isa. 54:17) “Mwandra nya wungi ngudzu” nya vakhozeyi va Jehovha nyo tumbege wu na duga khu “musigaradzoni mwendro khomu nya tshanisa nya yikhongolo” na va vbulugide! Khavbovbo va na simama gu thumeya Jehovha. (Leri Gutuledwa 7:9, 13-17.) Bhibhiliya yi ngu hi ninga sighelo nya singi gasi hi tumba gukhethu hi na vbulugiswa! Hi ngu dziti gu khethu “[Jehovha, NM] a ngu sayisa ava va tumbegidego.” (Ndzi. 31:23) Vatshavbo va haladzago ni gu zundza Jehovha va na tsaka khu gu mu wona na gu agisa lina laye li agidego. — Ezek. 38:23.

19. Wumindru muni nyo tsakise hi na wu manago nugunugu?

¹⁹ Nga dundrugeya khedzi lowo wa 2 Thimoti 3:2-5 a nga hadzi lowa khidzo nari khatshi wu di gu ganeya khu vathu va mafuni nya maphya nya mba kutsedzedwa khu Sathane. (Wona kwadru “ Edzi vathu va na gu ba va khade khidzo teponi yi tago.”) Ndriyathu George Gangas, a thumidego nga givbango nya huwo nya Guthangeye, ganede esi: “Litigo li na ba liri wulanga nyo tsakise ngudzu tepo vatshavbo va na gu ba va thumeya Jehovha! Nugunugu u na mana lithomo nyo vbanye mafuni nya maphaya. U na vbanya tepo nyo laphe gufana ni Jehovha. Hi na vbanya kala gupindruga.” Igyogyo gitumbiso nyo tsakise ngudzu!