1. Ginani egi maKristo ma bhapatisidwego ma yedego gu simama gu gira?

INA u bhapatisidwe? Abari gu ina, tepo u nga bhapatiswa u yeyedzide mbeli ga vathu vatshavbo gu khuwe u ngu khodwa ga Jehovha nigu wo vbweta gu mu thumeya ni hengeledzano * yaye. Khu kharato, gu khodwa gwago ga Jehovha gu yede gu engedzeya. Simama gu tiyisega gu khuwe Jehovha a ngu thumisa hengeledzano yaye muhuno gasi gu gira thumo waye.

2-3. Khu yavbini makhalelo mararu ya Jehovha ma wonegago omu nya hengeledzano yaye muhuno? Ninga siyeyedzo.

² Edzi Jehovha a thangeyago khidzo hengeledzano yaye muhuno sa gu yeyedza makhalelo yaye, makungo yaye ni milayo yaye nyo lulame. Hongoleni hi bhula khu makhalelo mararu ya Jehovha hi nga ma wonago avba nya hengeledzano yaye.

³ Nyo pheye, ‘Nungungulu mwalo gihatheya.’ (Mith. 10:34) Lihaladzo li kutside Jehovha gu ningeya gyanana gyaye gasi “gu vbanyisa vathu vatshavbo.” (1 Thim. 2:6; Joh. 3:16) Jehovha a gu thumisa vathu vaye gasi gu tshumayela mahungu nya yadi ga vatshavbo va vbwetago gu engisa. A gu phasa vathu vatshavbo gasi va wuyedwa khu muphaso wowo gasi va fela gu vbuluga. Nya wuvili, Jehovha Nungungulu nya sasamedzo ni gurula. (1 Kor. 14:33, 40) Khu kharato, vakhozeyi vaye tsawa wu sasamedzidwego gwadi ni gu andrisa gurula. Nya wuraru, Jehovha “muhevbudzi nya khongolo.” NM (Isa. 30:20, 21) Khu kharato, hengeledzano yaye yo dzi garadzeya ngudzu gu hevbudza vambe maningano ni lito laye a gu Bhibhiliya libandlani ni thumoni nyo tshumayele. Libandla nya maKristo nyo pheye li pimedzede kharini makhalelo yaya nya mararu ya  Jehovha? Vathu va Jehovha vo pimedzeya kharini makhalelo yaya nya mararu muhuno? Liphuvbo nya guage la gu gu phasa kharini tepo u thumago ni hengeledzano ya Jehovha muhuno?

4. Guya khu Mithumo 1:8, ginani egi Jesu a rumidego va landreyi vaye gu gira nigu giphaso muni va nga hadzi gu gi mana?

⁴ Dziteponi nya maKristo nyo pheye. Mahungu a ya Jesu a tshumayedego ma ningide gu tumba vathu vatshavbo. (Luka 4:43) Jesu rumide va landreyi vaye gu simama ni thumo a wu phedego gasi gu ningeya wufakazi “kala mahegiso nya mafu.” (Leri Mithumo 1:8.) Khu lisine, avo va di hadzi gu mba si kodza gu gira thumo wowo khu tshivba yawe. Avo va di hadzi vbweta liphuvbo nya guage a gu “muphasedzeyi” oyu Jesu ava tumbisidego. — Joh. 14:26; Zak. 4:6.

5-6. Liphuvbo nya guage li phaside vapizane va Jesu khu dzindziya muni?

⁵ Va landreyi va Jesu va hakhide liphuvbo nya guage khu pentekosta nya 33 teponi yathu. Khu gu phaswa khu liphuvbo nya guage va di dzegeya gu pheya gu tshumayela nigu khu gitepwana basi, dzimiliyoni nya vathu va di dzumeya mahungu nya yadi. (Mith. 2:41; 4:4) Tepo va nga pheya gu wugedwa, vapostoli kha va bweleya hwane va diga gu tshumayela ganiolu va di lomba giphaso ga Nungungulu. Va di gombeya khavo “ninga tshivba sithumi sago si huweleya mahungu yago khu gu tiya gwatshavbo.” Avo va di tala khu liphuvbo nya guage va bwe va simama “gu ganeya mahungu ya Nungungulu na va tiyide.” — Mith. 4:18-20, 29, 31.

⁶ Vapizane va Jesu va emisanide ni simbe sigaradzo gambe. Khu giyeyedzo, avo va diri mwalo dzi kopiya nya dzingi nya milowo. Vapizane va diri mwalo mabhuku ma nga ba ma tshamuseya Bhibhiliya nya nga a ya hi gu nawo muhuno. Nigu vapizane va di yede gu tshumayela vathu va nga ba va ganeya malimi nyo hambanehambane. Ndrani nya sigaradzo sile vapizane va giride silo nyo samadzise ngudzu. Ndrani nya 30 myaga avo va di tshumayela mahungu nya yadi “ga vathu vatshavbo va tigoni mule.” — Kol. 1:6, 23.

7. Ga 100 myaga hwane, sithumi sa Jehovha si si tide kharini esi Nungungulu a nga ba a si vbweta gwawe nigu si giride ginani?

⁷ Matshigoni yathu. Jehovha a ngu simama gu ninga tshivba ni gu thangeya vathu vaye. Uye a gu thangeya vathu vaye khu gu thumisa Bhibhiliya yi lovidwego khu gu thumisa li phuvbo nya guage. Omu nya Bhibhiliya hi ngu hevbula khu thumo wu giridwego khu Jesu ni gileletelo a ningidego va landreyi vaye nya gu simame ni thumo a wu phedego. (Mat. 28:19, 20) Revhista yi dusidwego khu Julho nya 1881, yari khiyo “Jehovha kha hi hatha gasi hi zundzwa khu vathu mwendro gu ghanya ganiolu a hi hathide gasi gu thumisa satshavbo hi gu naso hi fela gu tshumayela mahungu nya yadi.” Maningano ni ava va ningidwego thumo broxura yi dusidwego khu 1919 yi di khiyo “gu na ni thumo nya wungi nyo gire ganiolu thumo khwa Pfhumu nigu Uye a na hi ninga tshivba.” Gu fana ni maKristo nyo pheye va ndriyathu vava va di tiya hwambo va thuma na va tumba gu khavo liphuvbo nya guage li na va phasa gu tshumayela vathu vatshavbo. Anethu hi ngu tumba gu khethu liphuvbo nya guage li na hi phasa muhuno.

8-9. Dzindziya muni edzi hengeledzano ya Jehovha yi dzi thumisidego gasi gu tshumayela mahungu nya yadi?

⁸ Hengeledzano ya Jehovha yi ngu thumisa dziferameta nya dzadi gasi gu tshumayela mahungu nya yadi. Dziferameta dzodzo, dzo pata mabhuku nyo ghandlwe “foto drama de criação”, dzifonografo, dzimovha dzi nga ba dzi thumiswa gasi gu huweleya mahungu, milongoloko nya radhiyu ni tekinolojiya ya matshigwanaya nya nga dzikomputadhori ni interneti. Hengeledzano ya Nungungulu yi ngu vbindrugedzeya mahungu khu malimi nya mangi gu vbindra gale. Khu ginani? Gasi gu vathu vatshavbo va si kodza gupwa mahungu nya yadi khu malimi yawe. Jehovha mwalo gihatheya Uye profetide gu khuye mahungu nya yadi mana tshumayedwa ga vathu “nya mafumbo ni mahundzo ni malimi yatshavbo.” (Gutu. 14: 6, 7) Uye o vbweta gu khuye mahungu nya yadi ma pwidwa khu vathu vatshavbo.

⁹ Ahati vale hi si kodzigo gu va tshumayela khu gu ba dzindranga dzawe dzi segidwe mwendro guri ni dzighadhi? Gasi gu tshumayela vathu vovo Jehovha phaside hengeledzano yaye gasi yi pheya gu thumisa dzimbe dzindziya nyo tshumayele khidzo. Khu giyeyedzo, khu 2001, Huwo nya gu Thangeye yi dzumelede vandriyathu va França gu pheya gu thumisa sikarinyana ni dzimbe dzindziya nyo tshumayele khidzo. Khu hwane, vandriyathu va mambe mayigo va di pheya navo gu thumisa dzindziya dzedzi nyo tshumayele. Mihandro yakona yi tsakiside ngudzu. Khu 2011, dhoropani ga Nova York, Estados Unidos, gu phede longoloko nya wuphya omu vathu vakone va khalago na va pharide basi. Ga mwaga nyo pheye gu ningedwe mabhuku nyo ningani 102 129 ni dzi revhista nyo ningani 68 911 nigu vathu nyo ningani 4701 va lombide gihevbulo nya Bhibhiliya. Somo guagani gu khiso Jehovha o thumisa liphuvbo laye nya guage gasi gu phasedzeya thumo wowu nyo tshumayele. Khu kharato, Huwo nyo Thangeye yi ngu dzumeleya va ndriyathu mafuni gwatshavbo gu thumisa sikarinyana ni dzimbe dzindziya nyo tshumayele khidzo.

10. Ginani hi nga girago gasi gu khala vatshumayeli ni vahevbudzi nya vadi?

¹⁰ Ginani u yedego gu gira. Thumisa esi Jehovha a hi hevbudzago mitshanganoni nya libandla gasi gu tshumayela. Tepo yatshavbo patega thumoni nyo tshumayele ni libandla lago. Vandriyathu va libandlani gwago va na gu phasa gu khala mu tshumayeli ni muhevbudzi nya wadi. Nigu giyeyedzo gyawe nya gyadi gi na gu tiyisa. Simama gu tshumayela ambari wa gu emisana ni sigaradzo. Kha nga hi si wonidego avba nya hungo nya mahungu nya ndrima yeyi, ethu ha gu gira gu gola ga Nungungulu. Ganiolu, khu gu phaswa khu liphuvbo nya guage. (Zak. 4:6) Hi nga tiyisega gu khethu Nungungulu a na hi ninga tshivba hi yi vbwetago kholu ha gu gira thumo waye.

11. Dziteponi nya maKristo nyo pheye Huwo nyo Thangeye yi thumide kharini khu gupwanana gasi gu vathu va Nungungulu va simama na va sasamedzidwe gwadi?

¹¹ Dziteponi nya maKristo nyo pheye. Huwo nyo Thangeye yi thumide khu pwana Jerusalema gasi gu andrisa gurula ga vathu va Nungungulu yi bwe yi simama na yi sasamedzidwe gwadi. (Mith. 2: 42) Khu giyeyedzo, khu mwaga nya 49 teponi yathu tepo gu nga manega pfilupfilu maningano ni gu hana wugwera Huwo nyo Thangeye khu gu phaswa khu liphuvbo nya guage yi di lulamisa gigaradzo gegi. Na ri khatshi pfilupfilu yi di simamide libandlani na si va garadzede gu tshumayela. Ambari olu vapostoli ni vama va vidzidwego va nga ba va ri vaJudha avo kha va dzumeya gu kutsedzedwa khu si hena nya giJudha mwendro gu kutsedzedwa khava va nga ba va hevbudza isoso. Vbavbandze nya isoso, avo va di gu hevbula lito la Nungungulu ni gu thangedwa khu liphuvbo nya guage. (Mith. 15:1, 2, 5-20, 28) Va wuyedwe kharini? Jehovha kategiside esi va si hungidego, libandla li di simama gu manega ni gurula ni pwanano ni gu avo va di simama gu tshumayela mahungu nya yadi. — Mith. 15:30, 31; 16:4, 5.

12. Ginani gi yeyedzago gu khigyo hengeledzano ya Jehovha muhuno yi sasamedzidwe gwadi ni gu yi ngu andrisa gurula?

¹² Dziteponi dzathu. Hengeledzano ya Jehovha yo phasa vathu va Jehovha gasi va simama na va sasamedzidwe gwadi ni gurula. Khu 15 nya Novembro 1895, (A Torre de Vigia de Sião e Arauto da Presença de Cristo) yi diri ni hungo nya mahungu wu gu khuwo “githawo ni nayo,” wu seketedwego omu ga 1 Vakorinto 14:40. Vapostoli va lovede silo nya singi libandla nyo pheye maningano ni sasamedzo. Khya lisima gu simama gu engisa satshavbo silo “si lovidwego gasi gu khala gihevbudzo gwathu.” (Rom. 15:4) Khu gu fana, Hengeledzano ya Jehovha muhuno yi ngu dzi garadza gasi gu libandla nya wuKristo li simama na li sasamedzidwe gwadi ni gurula kha nga edzi si giregidego khidzo dziteponi nya maKristo nyo pheye. Khu giyeyedzo, wa gu ya wona gihevbulo nya Mukhedziseyi ga limbe libandla ambari na liri ga limbe litigo u ngu dziti edzi gi na gimbidziswago khidzo, ni ndrima yi na hevbudwago. Khu lisine, wa gu ya vboha iyoyo, khu na nga dzipwa nga ndzandzi vbavbandze nya mati. Gupwanana gogu go kodzega basi khu gu phaswa khu liphuvbo la Nungungulu. — Sof. 3:9.

13. Guya khu Jakobe 3:17, siwudziso muni hi yedego gu dzi gira?

¹³ Ginani u yedego gu gira. Jehovha o vbweta gu khuye vathu vaye va ‘sayisa wu hengeli va ningwago khu liphuvbo nya guage va vbanye khu gurula vbakari gwawe.’ (Efes. 4:1-3) Dzi wudzise gu khuwe: ‘Ina nyi ngu andrisa gu pwana ni gurula libandlani? Ina nyi ngu engisa ava va thangeyago? Abari gu nyi ni malungelo libandlani,  ina nyi ngu kabana mithumo ni vambe mwendro nyo gola gu gira satshavbo nyenga? Ina nyi ngu dzi ningedzeya gu phasa ni gu thumeya vambe?’ (Leri Jakobe 3:17 khavba nya nota. *) Wa gu tugula gu khuwe gomo u yedego gu tshukwadzisa avba nya sipandre sesi, gombeya u lomba liphuvbo nya guage gasi li gu phasa. Wa gu dzumeleya liphuvbo nya guage li kutsedzeya mavbanelo yago ni sigiro sago, vandriyathu va na gu haladza ni gu gu ninga lisima.

14. Guya khu Vakolosi 1:9, 10, Jehovha hevbudzide kharini vathu vaye dziteponi nya maKristo nyo pheye?

¹⁴ Dziteponi nya maKristo nyo pheye. Jehovha a ngu gola gu hevbudza vathu vaye. (Ndzi. 32:8) Jehovha o vbweta gu khuye va muti, va mu haladza va bwe va vbanya womi nyo pindruge kha nga sanana saye nyo si haladze. Nya mba hevbudzwa khuye satshavbo sesi si di hadzi gu mba kodzega. (Joh. 17:3) Jehovha thumiside libandla nya maKristo nyo pheye gasi gu hevbudza vathu vaye. (Leri Vakolosi 1:9, 10.) Liphuvbo nya guage a gu “muphasedzeli” oyu Jesu a hi tumbisidego phaside gambe vapostoli. (Johane 14:16) Liphuvbo nya guage li phaside vapizane gu pwisisa lito la Nungungulu ni gu dundruga satshavbo esi Jesu a ganedego ni gu gira kha nga edzi si lovidwego khidzo omu nya ivhangeli. Guti gogu gu tiyiside gukhodwa nya maKristo nyo pheye, gu tiyisa lihaladzo lawe khu Nungungulu ni Gyanana gyaye ni lihaladzo lawe khu vambe.

15. Situmbiso si gomogo omu ga Isaya 2:2, 3, wa gu si wona na si gu tadzisega khu dzindziya muni?

¹⁵ Dziteponi dzathu. Jehovha profetide gu khuye ga “matshigu nya gu hegise” vathu nya mafumbo yatshavbo va di hadzi hongola gigomoni gwaye khu ndziya nyo fananise gasi va ya hevbudzwa dzindziya dzaye. (Leri Isaya 2:2, 3.) Hi ngu wona giprofeto gegi na gi gu tadzisega. Wukhozeyi nya lisine wa guya wu dandra gu vbindra  owu nya malipha nigu Jehovha a ngu ninga vathu vaye mahungu nya mangi maningano ni Bhibhiliya. (Isa. 25:6) Uye a gu thumisa ‘Githumi nya gu tumbege ni nya gu gyengeye,’ gasi gu ninga yatshavbo mahungu yaya khu dzindziya nyo hambanehambane. Khu giyeyedzo, hi nga leri dzindrima nyo khaguri mwendro gu engiseya dzi ganelo ni gu sixitiri dzivhidhiyu. (Mat. 24:45) Ha gu dzipwa kha nga edzi Eliyu pari ya Joba a dzi pwidego khidzo tepo a nga khuye: “khu mani muhevbudzi a fanago ni [Nungungulu].” — Joba 36:22.

16. Ginani u nga girago gasi gu dandra khu liphuvboni?

¹⁶ Ginani u yedego gu gira. Liphuvbo nya guage la Nungungulu li na gu phasa gu vbanya khesi u si lerigo ni gu hevbula omu nya lito laye. Gombeya kha nga mu lovi nya dzindzimo a nga khuye: “Nyi hevbudze Pfhumu Nungungulu ndzila yago, gasi nyi kodza gu gimbila lisineni.” (Ndzi. 86:11) Khu kharato, simama gu hodza guhodza ga liphuvboni ogu Jehovha a hi ningago khu gu thumisa Lito laye ni hengeledzano yaye. Khu lisine, makungo yago khandri gu mana guti basi ganiolu wo vbweta gu tiyisega gu khuwe eli lisine u bwe u vbanya khilo. Liphuvbo nya guage la Jehovha li na gu phasa gu gira isoso. Nigu wo vbweta gambe gu tiyisa va ndriyago. (Hebh. 10:24, 25) Khu ginani? Kholu avo ndranga yago ya liphuvboni. Gombeya u lomba liphuvbo nya guage gasi li gu phasa gu ningeya mihlamulo yi dugago khu monyoni mitshanganoni nigu li gu phasa wa gu ba uri ni gipandre. Wa gu gira kharato, u na yeyedza Jehovha ni Gyanana gyaye gu khuwe u ngu haladza “dzi nvuta” dzawe. —  Joh. 21:15-17.

17. U nga yeyedza kharini gu khuwe u ngu seketeya khu gu tumbega hengeledzano ya Jehovha?

¹⁷ Nugunugu mafuni gwatshavbo gu na tshala hengeledzano mweyo basi, a gu eyi yi thangedwago khu liphuvbo nya guage la Nungungulu. Khu kharato dzi garadzeye gu thuma gumogo ni hengeledzano ya Jehovha. Pimedzeya lihaladzo nya mba na gihatheya la Jehovha khu gu tshumayela mahungu nya yadi ga vatshavbo. Kha nga olu Jehovha a golago sasamedzo ni gurula, mu pimedzeye khu gu andrisa pwanano ni gurula libandlani. U bwe u engiseya muhevbudzi wago nya khongolo khu hevbula yatshavbo mahungu a hi ningago. Khavbovbo, tepo mafu ya Sathane mana fuviswago, uwe khu na nga thava gilo. Wulangani nya isoso, u na ema u tiya gumogo ni vale va thumago khu gu tumbega ni hengeledzano ya Jehovha.