1. 2 Vakorinto 3:1-3 a gu hi phasa kharini gu tsakeya lithomo hi gu nalo nyo hevbudze muthu Bhibhiliya hi bwe hi mu wona na gu bhapatiswa? (Wona foto nya kapa.)

WA GU dzipwa kharini tepo u wonago gihevbuli nya Bhibhiliya gya libandlani gwago na gi gu bhapatiswa? Khu lisine isoso si ngu gu tsakisa ngudzu! (Mat. 28:19) Abari gu khuwe u nga ba u hevbula nagyo kha si kanakanisi gu khiso si gu tsakiside ngudzu gu gi wona na gi gu bhapatiswa. (1 Tes. 2:19, 20) Vapizane nya vaphya va bhapatisidwego, “malangaliya nya sileletelo” na siri basi ga vale va va hevbudzidego ganiolu ga libandla latshavbo. — Leri 2 Vakorinto 3:1-3.

2. a) Giwudziso muni nya lisima hi yedego gu bhula khigyo ni gu khu ginani? b) Ginani gihevbulo nya Bhibhiliya? (Wona tshamuselo wa vbavbatshi.)

² Si ngu tsakisa gu wona gu ga 4 myaga yi vbindridego, ngima ni ngima gu gimbidzisidwe tanga nya 10 000 000 sihevbulo nya Bhibhiliya * mafuni gwatshavbo. Ndrani nya 4 myaga yoyo tanga nya 280 000 vathu va bhapatisidwe mwaga ni mwaga kha nga Dzifakazi dza Jehovha ni vapizane va Jesu Kristo. Hi nga phasa kharini sihevbuli soso nya Bhibhiliya nya singisingi gasi gu si bhapatiswa? Jehovha a ngu ninga lithomo vathu nyo khale Dzifakazi dzaye. Khu kharato, ha gu gira satshavbo hi si kodzago gasi gu va phasa gu dandra khu liphuvboni kala va ya bhapatiswa. Tepo hi tshadego nayo yi dugwana kamo ngudzu! — 1 Kor. 7:29a; 1 Ped. 4:7.

3. Ginani hi na bhulago khigyo avba nya ndrima yeyi maningano ni gu gimbidzisa sihevbulo nya Bhibhiliya?

 ³ Khu kotani nya lisima nya gu gire vapizane olu, Huwo nya Guthangeye yi embede dzibheteli esi hi nga girago gasi gu phasa sihevbuli sathu nya Bhibhiliya gu dandra khu liphuvboni kala siya bhapatiswa. Avba nya ndrima yeyi ni eyi yi landreyago hi na wona esi hi nga si hevbulago avba ga va piyonero, va misiyonariyo ni va woneleyi nya sipandre * va vidzidwego. (Mav. 11:14; 15:22) Avo va gu tshamuseya esi vahevbudzi nya Bhibhiliya ni sihevbuli sawe va nga girago gasi gu gihevbulo nya Bhibhiliya gi dugeleya gwadi. Avba nya ndrima yeyi hi na bhula khu 5 silo esi gihevbuli nya Bhibhiliya gi yedego gu gira gasi gi dandra khu liphuvboni kala giya bhapatiswa.

4. Ginani hi yedego gu giti maningano ni gu bhula ni muthu khu mahungu nya Bhibhiliya na hi romo khu vbavbandze nya kitali?

⁴ Gutala nya vandriyathu va gu gimbidzisa sihevbulo nya Bhibhiliya na va emide vbavbandze nya kitali ya mune ndranga. Ambari olu maphelelo yaya ma gu yadi gasi gu wusa gudogoreya nyo vbwete gu hevbula Bhibhiliya, gutala nya dzitepo maphelelo yaya kha ma pfoledwi khu lidambo nigu adzina saye isoso kha si na nga girega dzisemana dzatshavbo. Gasi gu haguleya gudogoreya gogo, vambe vandriyathu va gu tala gu lomba numeri nya telefone ya muthu yoyo gasi va mu rumeleya mahungu va bwe va khumbuga lowo nyo khaguri avbo nya mahungu yoyo. Mabhulo yoyo nyo role ma nga simama khu migima nya yingi ganiolu gihevbuli nya Bhibhiliya na gi si velegi mihandro nya yadi. Ina gihevbuli gi nga dandra khu liphuvboni gasi gi hendzeledza womi wagyo gi bwe gi bhapatiswa na gi si * dzigaradzi ni gu dzi ninga tepo nyo hevbule lito la Nungungulu?

5. Ginani egi Jesu a ganedego omu ga Luka 14:27-33 hi nga gi thumisago gasi gu phasa sihevbuli sathu nya Bhibhiliya?

⁵ Jesu khu gu thumisa giyeyedzo nyo khaguri, tshamusede esi muthu a yedego gu gira o ba a vbweta gu khala mupizane waye. Uye ganede khu muthu a vbwetago gu vbaha langwe ni mufumeli a vbwetago gu hongola a ya dwana nyimbi. Jesu a di khuye muvbahi gupheya a yede “gu khala vbavbatshi a wona dzitsapawu a gu nadzo” gasi gu vbedzisa gu vbaha langwe nigu mufumeli gupheya a yede “gu khala vbavbatshi a wona” gasi guti ava a na va hathago gasi gu tadzisa esi a si hungidego gu gira. (Leri Luka 14:27-33.) Khu gu fana Jesu a di gu dziti gu khuye muthu a vbwetago gu khala mupizane waye yede gu gevisisa  gwadi gasi ati gu so thula ginani gu khala mu landreyi waye. Khu kharato, hi yede gu kutsa sihevbuli sathu nya Bhibhiliya gu hevbula naso semana ni semana. Hi nga si gira kharini isoso?

6. Ginani hi yedego gu zama gu gira gasi gu hi manega ni sihevbuli si dandrago khu liphuvboni?

⁶ Simama gu hevbula ni vale va dzumeyago gu hevbula na va emide vbamwanyatuno. Dzimbe dzitepo avbo nya maendro yago, vbavbandze nyo thumise lowo moyo basi u nga thumisa mivili. Hwane nya tepo nyo khaguri na wu endreya muthu yoyo u nga mu wudzisa gu khuwe, hi nga simama ni gihevbulo gyathu na hi khade wulanga nyo khaguri gani? Hlamulo waye wu na yeyedza gu khuwo a ngu ninga lisima gihevbulo nya Bhibhiliya mwendro ne. Khavbovbo gasi gu phasa gihevbuli gyogyo gu dandra khu liphuvboni u nga gi wudzisa gu khuwe, si nga kodzega gu hi hevbula guvili khu semana gani. Ambari ulolo, gu ngu vbwetega nya singi gu vbindra gu hevbula gumogo mwendro guvili khu semana.

7. Muhevbudzi a nga dongiseya kharini gipandre ni gipandre nya gihevbulo nya Bhibhiliya?

⁷ Kha nga muhevbudzi, u yede gu dongiseya gwadi gipandre ni gipandre nya gihevbulo nya Bhibhiliya. Pheya khu gu leri gwadi mahungu yakone u bwe u khedza gwadi milowo. Zama gu pwisisa gwadi mongo wakone. Dundrugeya khu hungo nya mahungu, sihungwana nya mahungu, siwudziso nya gihevbulo, milowo a gu pwani leri, dzifoto ni dzivhidhiyu dzi na gu phasago gu tshamuseya mahungu mu bhulago khayo. Khavbovbo dundrugeya khu gihevbuli gyago ni edzi u nga tshamuseyago khidzo mahungu yoyo khu ndziya nyo vbevbuge niyo nyo pwisisege gwadi, gasi gu gihevbuli gyago gi ma pwisisa khu gu vbevbuga gi bwe gi ma thumisa. — Neh. 8:8; Mav. 15:28a.

8. Malito ya mupostoli Pawulo ma gomogo omu ga Vakolosi 1:9, 10 ma gu hi hevbudza ginani maningano ni gu gombeleya sihevbuli sathu nya Bhibhiliya?

⁸ Tepo u dzi dongiseyago gombeya ga Jehovha gasi a phasa gihevbuli gyago. Lomba Jehovha a gu phasa gu hevbudza khu ndziya yi na khuhago monyo nya gihevbuli gyago. (Leri Vakolosi 1:9, 10.) Dundrugeya khesi si nga garadzeyago gihevbuli gyago gu si pwisisa ni esi si nga gi garadzeyago gu si khodwa na yi ngo tshade tepo. Dundruga gu khuwe makungo yago gu gi phasa gu dandra khu liphuvboni kala giya bhapatiswa.

9. Muhevbudzi a nga phasa kharini gihevbuli gyaye nya Bhibhiliya gu dzi dongiseya? Tshamuseya.

⁹ Gu gimbidzisa gihevbulo nya Bhibhiliya tepo yatshavbo si na phasa gihevbuli gu bonga khu satshavbo esi Jehovha ni Jesu va girago gi bwe gi  vbweta guti nya singi. (Mat. 5:3, 6) Gasi gu phasega khu gihevbulo, gihevbuli nya Bhibhiliya gi yede gu vega gupima avba nya esi gi si hevbulago. Gasi gu gi phasa gu gira isoso, gi tshamuseye khu lisima nya gu dongiseye gipandre ni gipandre nya gihevbulo khu gu leri na yi ngo tshade tepo gi bwe gi dundrugeya khedzi gi nga thumisago khidzo mahungu yoyo. U nga gi phasa kharini gu dongiseya? Dongiseyani mwatshavbo ndrima nyo khaguri gasi gu gi yeyedza edzi gi nga girago * khidzo. Gi yeyedze edzi gi nga manago khidzo hlamulo nya giwudziso ni edzi gi nga fungago khidzo malito ma na gi phasago gu dundruga hlamulo. Gi phase gu ningeya hlamulo khu malito yagyo. Gihevbuli gya gu gira isoso u na si kodza gu wona gu ina gi ngu pwisisa mahungu gi hevbulago gani. Gu na ni gimbe gilo gambe egi u yedego gu kutsa gihevbuli gyago gu gira.

10. Khu ginani si gu sa lisima gu leri Bhibhiliya tshigu ni tshigu nigu ginani egi gihevbuli nya Bhibhiliya gi yedego gu gira gasi gu gi phasega khesi gi si lerigo omu nya Bhibhiliya?

¹⁰ Vbavbandze nyo hevbule ni muhevbudzi wagyo basi semana ni semana, gihevbuli nya Bhibhiliya gi na wuyedwa khu gu gira simbe silo gyonga tshigu ni tshigu. Gu vbwetega gi ganeya ni Jehovha. Khu ndziya muni? Khu gu gi mu engiseya gi bwe gi ganeya naye. Igyo gi nga engiseya Nungungulu khu gu gi leri Bhibhiliya tshigu ni tshigu. (Jos. 1:8; Ndzi. 1:1-3) Gi yeyedze edzi wu thumiswago khidzo “longoloko nya gu leri Bhibhiliya” wu gomogo omu nya jw.org. * Gasi gu gi phasa gu pwisisa esi gi si lerigo omu nya Bhibhiliya, gi kutse gu dundrugeya khesi Bhibhiliya yi si hevbudzago maningano ni Jehovha ni edzi gi nga si thumisago khidzo womini wagyo.— Mith. 17:11; Jak. 1:25.

11. Gihevbuli gi nga hevbula kharini gu gombeya gwadi nigu khu ginani si gu sa lisima gu gombeya ga Jehovha tepo yatshavbo?

¹¹ Kutsa gihevbuli gyago nya Bhibhiliya gu ganeya ni Jehovha khu nombelo tshigu ni tshigu. Gombeya khu monyo wago watshavbo tepo mu pheyago gihevbulo ni tepo mu vbedzago u bwe u khumbuga gihevbuli gyago omu nya milombelo. Wa gu gira isoso, gihevbuli gyago gi na hevbula edzi gi nga gombeyago khidzo ga Jehovha khu monyo watshavbo khu gu thumisa lina la Jesu Kristo. (Mat. 6:9; Joh. 15:16) Nga dundrugeya khedzi gu leri Bhibhiliya tshigu ni tshigu (gu engiseya Jehovha) ni nombelo (gu ganeya ni Jehovha) si na phasago khidzo gihevbuli gyago gu hidzimeya ga Nungungulu! (Jak. 4:8) Gya  gu gira isoso tshigu ni tshigu, gi na si kodza gu dandra khu liphuvboni, gi hendzeledza womi wagyo gi bwe gi bhapatiswa. Ginani gambe gi na gi phasago?

12. Muhevbudzi a nga phasa kharini gihevbuli gyaye gu haguleya wupari ni Jehovha?

¹² Ethu ha gu vbweta gu khethu gihevbuli gyathu nya Bhibhiliya giti nya singi khu Jehovha ganiolu, esi gi si hevbulago si yede gu khuha monyo wagyo gasi gu gi vbanya khiso. Jesu hevbudzide silo nya singi vathu nigu avo va di gu gola gu hevbula nya singi gwaye. Ganiolu, vathu va di gu mu landreya kholu uye a di gu khuha myonyo yawe. (Luka 24:15, 27, 32) Gihevbuli gi yede gu wona Jehovha kha nga Muthu nya lisine oyu gi nga si kodzago gu haguleya wupari naye gi bwe gi Mu wona kha nga Papayi wagyo, Nungungulu wagyo ni Pari yagyo. (Ndzi. 25:4, 5) Tepo mu hevbulago zama gu gihevbuli gyago gi wona makhalelo nya yadi ya Nungungulu. (Ekiso. 34:5, 6; 1 Ped. 5:6, 7) Ga ndrima ni ndrima mu hevbulago, zama gu phasa gihevbuli gyago gu wona edzi Jehovha a gu muthu nya wadi khidzo. Phasa gihevbuli gyago gu pwisisa makhalelo yaya nya yadi ya Jehovha: Lihaladzo, wuwadi ni pweya-wusiwana. Jesu a di khuye ‘nayo nya khongolo ni owu nyo pheye ga yatshavbo’ khu gu ‘haladza Jehovha Nungungulu wago.’ (Mat. 22:37, 38) Phasa gihevbuli gyago nya Bhibhiliya gu haladza Jehovha khu monyo wagyo watshavbo.

13. Ninga giyeyedzo nya edzi u nga phasago khidzo gihevbuli gyago nya Bhibhiliya gu hevbula khu makhalelo nya yadi ya Jehovha.

¹³ Omu nya mabhulo yago, tshamuseya gihevbuli gyago gighelo gi gu girago u haladza Jehovha. Isoso si na phasa gihevbuli gyago guti gu khigyo anigyo gi yede gu khala pari ya Jehovha gi bwe gi hevbuleya gu mu haladza. (Ndzi. 73:28) Khu giyeyedzo, avba ga libhuku mu li thumisago ina gyomo gipandre nyo khaguri mwendro lowo wu yeyedzago gilogyo maningano ni Jehovha nya nga lihaladzo, guti, gululama mwendro tshivba si khuhago monyo wago? Khumbuga isoso ga gihevbuli gyago u bwe u gi tshamuseya gu khuwe egi gimwegyo nya sighelo gi gu girago u haladza Papayi wathu wa ndzadzini. Gu na ni simbe silo gambe esi sihevbuli satshavbo nya Bhibhiliya si yedego gu gira gasi gu si dandra khu liphuvboni kala siya bhapatiswa.

14. Ginani esi libhuku la Vahebheru 10:24, 25 li ganeyago khu mitshangano nya libandla si nga phasago gihevbuli gyago nya Bhibhiliya gu dandra khu liphuvboni?

¹⁴ Hatshavbo ha gu vbweta gu khethu sihevbuli sathu nya Bhibhiliya si dandra khu liphuvboni kala siya bhapatiswa. Mweyo nya dzindziya nya gu hi si phasa, gu si kutsa gu manega mitshanganoni nya libandla. Vahevbudzi va vidzidwego vari khavo, sihevbuli sa gu manega mitshanganoni si ngu vbiredzeya gu dandra khu liphuvboni.  (Ndzi. 111:1) Vambe vahevbudzi vo tshamuseya sihevbuli sawe gu khawe, gasi gu hevbula nya singi khu Bhibhiliya si yede gu manega mitshanganoni. Leri Vahebheru 10:24, 25 ni gihevbuli gyago u bwe u gi tshamuseya edzi gi na wuyedwago khidzo khu gu manega mitshanganoni nya libandla. Gi yeyedze vhidhiyu yi gu khiyo: Ginani gi giregago salawuni nya Mufumo? * Phasa gihevbuli gyago gu wona mitshangano kha nga gilo nya lisima womini wagyo.

15. Ginani hi nga girago gasi gu phasa sihevbuli sathu nya Bhibhiliya gu manega mitshanganoni tepo yatshavbo?

¹⁵ Ginani u nga girago a bari gu gihevbuli gyago nya Bhibhiliya kha giti mitshanganoni mwendro a bari gu kha giti dzisemana dzatshavbo? Bhuleya gihevbuli gyago khesi u si hevbudego mitshanganoni na wu tsakide. Gihevbuli gya gu wona edzi u dzipwago khidzo khu mitshangano, adzina gi na kutsega gu hongola nigyo. Gi ninge Mukhedziseyi mwendro Gibhukwana nya mitshangano gi hevbudwago mitshanganoni. Gi yeyedze esi si na hevbudwago ga mitshangano yi landreyago u bwe u gi wudzisa gu khuwe khu gevbini gipandre a nga gi gola. Esi gihevbuli gyago gi na sipwago ni gu si wona mitshanganoni, si na vbindra satshavbo esi gi tshukidego gi sipwa ni gu si wona ga wumbe wukhongeyi. (1 Kor. 14:24, 25) Gihevbuli gi na ta mana vathu va gu siyeyedzo nya sadi gasi gu va pimedzeya, ava va na gi phasago gu dandra khu liphuvboni kala giya bhapatiswa.

16. Ginani gi vbwetegago gasi gu phasa sihevbuli nya Bhibhiliya gu dandra khu liphuvboni kala siya bhapatiswa nigu ginani hi na bhulago khigyo avba nya ndrima yi landreyago?

¹⁶ Hi nga phasa kharini sihevbuli nya Bhibhiliya gu dandra khu liphuvboni kala siya bhapatiswa? Hi nga si phasa gu wona lisima nyo hevbule Bhibhiliya khu gu si kutsa gu hevbula semana ni semana ni gu bwe hi si kutsa gu dongiseya gipandre ni gipandre nya gihevbulo. Gu vbwetega hi si kutsa gambe gu ganeya ni Jehovha tshigu ni tshigu si bwe si haguleya wupari nyo tiye naye. Gu vbwetega hi si kutsa gu manega mitshanganoni nya libandla. (Wona kwadru yi gomogo pajina 12, “ Esi sihevbuli nya Bhibhiliya si yedego gu gira gasi si dandra khu liphuvboni kala siya bhapatiswa.”) Ambari ulolo, ndrima yi landreyago yi na ganeya khu 5 silo esi vahevbudzi nya Bhibhiliya va yedego gu gira gasi gu phasa sihevbuli nya Bhibhiliya gu dandra khu liphuvboni kala siya bhapatiswa.