1. Khu gevbini gilo nya gyadi ga satshavbo egi muthu a nga hungago gu gira guvbanyani?

GUTALA nya dzitepo, esi vavelegi va hungago gu gira si ngu khuha sanana sawe womini waso watshavbo. Vo mba gira silo khu ndziya nya yadi, si nga vangeya sigaradzo sanana sawe. Ganiolu, vo gira silo khu ndziya nya yadi va na phasa sanana sawe gu vbanya womi nyo tsakise. Khu lisine, sanana niso gu vbwetega si gira silo khu ndziya nya yadi. Gilo nya gyadi ga satshavbo egi muthu a nga gi girago guvbanyani gu thumeya Papayi wathu nya lihaladzo wa ndzadzini, Jehovha. — Ndzi. 73:28.

2. Silo muni nya sadi esi Jesu ni vavelegi vaye va hathidego gu gira?

² Vavelegi va Jesu va di dzi emisede gu phasa sanana sawe gu thumeya Jehovha nigu esi va nga ba va gira kha nga va velegi, si vegide guagani gu khiso gilo nya lisima womini gwawe gu diri gu thumeya Jehovha. (Luka 2:40, 41, 52) Jesu nuye hathide gu gira silo khu ndziya nya yadi, esi si mu phasidego gu gira esi Jehovha a nga ba a vbweta gu khuye a gira. (Mat. 4:1-10) Jesu khade muthu nya wadi, nyo tumbege, ni gu tiya hwambo. Khu lisine, vatshavbo vavelegi va di hadzi dzipwa matshandza ni gu tsaka khu gu manega ni gyanana nyo fane ni Jesu.

3. Siwudziso muni hi na hlamulago avba nya ndrima yeyi?

³ Avba nya ndrima yeyi hi na hlamula siwudziso sesi si landreyago: Silo muni nya sadi esi Jehovha a hungidego gu gira khu kotani ya Jesu? Ginani egi vavelegi nya maKristo va gi hevbulago ga esi Josefa ni Mariya va hungidego gu gira? Nigu ginani egi vaphya nya maKristo va gi hevbulago ga esi si giridwego khu Jesu?

4. Gilo muni nya lisima egi Jehovha a hungidego gu gireya Gyanana gyaye?

⁴ Jehovha hathede Jesu vavelegi nya vadi. (Mat. 1:18-23; Luka 1:26-38) Malito ya Mariya ma gomogo omu nya Bhibhiliya mo yeyedza edzi a nga ba a mu haladza khidzo Jehovha ni Lito laye. (Luka 1:46-55) Ndziya eyi Josefa a nga engisa khiyo gileletelo gya Jehovha si yeyedzide gu khiso a di gu haladza Nungungulu nigu a di gu vbweta gu mu tsakisa. — Mat. 1:24.

5-6. Ginani egi Jehovha a nga dzumeleya gu khuye Gyanana gyaye gi tshangana naso?

⁵ Wona gu khuwe Jehovha kha hatheya Jesu vavelegi nyo ghanye. Ningelo owu Josefa ni Mariya va ningedego hwane nya gu velegwe ga Jesu wu yeyedzide gu khuwo avo va diri sisiwana. (Luka 2:24) Adzina saye Josefa a di gu thuma wukarpintero omu nya karpintariya yi nga ba yi dinganide ni gaya gwaye Nazareta. Avo va diri mwalo dzitsapawu nya dzingi mwendro dzithomba, ngudzungudzu khu kotani nya olu va nga ba vari ni 7 sanana ni guvbindra. — Mat. 13:55, 56.

⁶ Jehovha vhikede Jesu ga dzimhango nyo khaguri, ganiolu kha mu vhikeya ga satshavbo sigaradzo. (Mat. 2:13-15) Khu giyeyedzo, Jesu a diri ni valongo va nga ba va si khodwi gwaye. Nga dundrugeya khedzi si mu vbisidego khidzo Jesu guti gu khuye ndrangani gwaye gu diri ni vathu nyo khaguri va nga ba va si khodwi gu khavo khuye Mesiya! (Marko 3:21; Joh. 7:5) So wonega khatshi Josefa fude Jesu na ngari gyanana, nigu kha hi kanakani gu khethu isoso si mu vbiside ngudzu. Kha nga olu Josefa a nga ba a fude, si di gu thula gu khiso Jesu, kha nga uye Gyanana nya koma, a di yede gu khathaleya mamayi waye ni vandriyaye. (Marko 6:3) Tepo Jesu a nga ba a dandra, hevbude dzindziya nyo khathaleye khidzo ndranga yaye. Si lombide gu a thuma gasi a mana dzitsapawu nyo sayise khidzo ndranga yaye. Khu kharato, uye a ngu yiti gwadi migaralo nyo thume lidambo latshavbo.

7. a) Siwudziso muni si na phasago ava va tshadhidego gu khathaleya sanana sawe? b) Libhuku la Mavingu 2:1-6 li nga va phasa kharini gu hevbudza sanana sawe?

⁷ Mo ba mu tshadhide na mu dogoreya gu velega sanana, dzi wudziseni gu khenu: ‘Ina hi vathu nya gu dzi nogise hi haladzago Jehovha ni Lito laye? Ina Jehovha a di hadzi gu hi hatha gasi gu khathaleya gyanana gi ngarigo gu velegwa?’ (Ndzi. 127:3, 4) Wo ba uri muvelegi, dzi wudzise gu khuwe: ‘Ina nyi ngu hevbudza sanana sangu gu wona lisima nyo thume?’ (Muh. 3:12, 13) ‘Ina  nyi ngu gira satshavbo nyi si kodzago gasi gu vhikeya sanana sangu ga dzimhango dzi gomogo tigoni momu ga Sathane?’ (Mav. 22:3) Lisine gu khu na nga si kodza gu vhikeya sanana sago ga dzatshavbo dzimhango. Isoso kha si kodzegi kamo. Ganiolu, u nga dongiseya sanana sago ga sigaradzo si na tshanganago naso womini khu gu simama gu si hevbudza khu lihaladzo edzi si yedego gu tumba khidzo wusingalagadzi nya Bhibhiliya. (Leri Mavingu 2:1-6.) Khu giyeyedzo, go tshuka nongo nyo khaguri a diga gu thumeya Jehovha, phasa sanana sago gu simama si hevbula Lito la Nungungulu gasi si wona lisima nyo simame si tumbega ga Jehovha. (Ndzi. 31:23) Mwendro mo tshuka mu fedwa khu muthu mu mu golago, yeyedza mavhesi nya Bhibhiliya sanana sago ma na si phasago gu timiseya wuvi wowo ma bwe ma si ninga gurula. — 2 Kor. 1:3, 4; 2 Thim. 3:16.

8. Guya khu Dhewuteronome 6:6, 7, ginani egi Josefa ni Mariya va nga ba va yede gu gira?

⁸ Josefa ni Mariya va phaside Jesu gu dandra a tsakedwa khu Nungungulu kholu va landrede sileletelo esi Jehovha a ningago vavelegi. (Leri Dhewuteronome 6:6, 7.) Josefa ni Mariya va di gu mu haladza ngudzu Jehovha nigu avo va di gu vbweta gu khavo sanana sawe niso si mu haladza.

9. Silo muni nya lisima esi Josefa ni Mariya va hungidego gu gira?

⁹ Josefa ni Mariya va di hunga gu simama va hodzisa gwadi ndranga yawe khu liphuvboni. Kha hi kanakani gu khethu va di gu hongola va ya beya mitshangano semana ni semana sinagogani Nazareta nigu va di gu hongola gambe Phasikatunu Jerusalema mwaga ni mwaga. (Luka 2:41; 4:16) Va di gu londrola maendro yoyo nyo hongole Jerusalema gasi gu hevbudza Jesu ni vandriyaye khu matimo nya vathu va Nungungulu nigu si nga gira na va patide ni gu vboheya malanga ma khumbugwago omu nya Bhibhiliya. Tepo Josefa ni Mariya va ngaya va manega ni sanana nya singi, si nga gira na si va garadzede gu simama gu hodzisa ndranga yawe khu liphuvboni nga gale. Ganiolu, va yi wonide mihandro nya gudzigaradza gwawe. Khu kotani nya olu va nga ba va thangisa gu khozeya Jehovha, ndranga yawe yi diri ni wupari nyo tiye naye.

10. Ginani esi vavelegi nya maKristo va si hevbulago ga Josefa ni Mariya?

¹⁰ Ginani egi vavelegi va thavago Nungungulu  va gi hevbulago avba ga Josefa ni Mariya? Nya gikhongolo ngudzu gu yeyedza sanana sago khu malito ni sigiro sago gu khuwe u ngu mu haladza ngudzu Jehovha. Gimwegyo nya lisima ngudzu egi u yedego gu ninga sanana sago gu si phasa gu haladza Jehovha. Gilo nya lisima ngudzu u yedego gu hevbudza sanana sago gu si hevbudza gu dzi hodzisa gwadi khu liphuvboni ni gu gombeya, gu hongola mitshanganoni ni gu patega thumoni nyo tshumayele. (1 Thim. 6:6) Lisine gu gu vbwetega u khathaleya sanana sago khu nyamani. (1 Thim. 5:8) Ganiolu, dundruga gu khuwe wupari nyo tiye ni Jehovha khuwo wu na phasago sanana sago gu vbuluga avba litigo leli la Sathane ni gu beya omu nya litigo nya liphya la Nungungulu, nasiri dzithomba. * — Ezek. 7:19; 1 Thim. 4:8.

11. a) Wusingalagadzi wu gomogo omu ga libhuku la 1 Thimoti 6:17-19 wo phasa kharini vavelegi gu gira silo khu ndziya yi na phasago sanana sawe? b) Makungo muni u dogoreyago gu dzi vegeya ndrangani gwago, nigu khu yavbini makategwa u na ma manago? (Wona kwadru yi gu khiyo “ Khu yevbini misuwo u na dzi garadzeyago gu yi vboheya?”)

¹¹ Si ngu tsakisa ngudzu gu wona vavelegi nya maKristo na va gu gira silo khu ndziya yi na phasago sanana sawe gu manega ni wupari nyo tiye ni Jehovha. Avo tepo yatshavbo vo khozeya gumogo ni sanana sawe. Vo hongola naso mitshanganoni nya libandla ni eyi nya yikhongolo, va bwe va hongola naso thumoni nyo tshumayele. Dzimbe dzindranga dzi ngu bwe dzi dzi emiseya gu ya tshumayela omu gu vbwetegago giphaso. Dzimbe dzi ngu endreya Bheteli mwendro dzi patega omu nyo vbahe dzinyumba dzi thumiswago khu hengeledzano. Dzindranga dzi hathago gu gira isoso dzi ngu gastari dzitsapawu nya dzingi nigu dzi ngu tshangana ni sigaradzo nya singi gambe. Ganiolu, Jehovha a na va tshatshazeya khu mithumo yawe nya yadi. (Leri 1 Thimoti 6:17-19.) Sanana si dandriswago ga dzindranga nya nga edzi, gutala nya dzitepo si ngu simama gu manega ni mavbanyelo nya yadi si ma hevbudego, nigu kha si dzi layi khu isoso! * — Mav. 10:22.

12. Ginani egi Jesu a hathidego gu gira tepo a nga ba a dandra?

¹² Papayi wa Jesu wa ndzadzini, tepo yatshavbo a di gu hatha gu gira silo khu ndziya nya yadi, nigu vavelegi vaye va mafuni navo va di gu gira silo khu ndziya nya yadi. Ganiolu, kha nga olu Jesu a nga ba a dandra, a di yede gu pimisa ni gu gira silo abune. (Gal. 6:5) Gufana ni ethu, Jesu a di tshulegide gu dzi hatheya esi a nga ba a si vbweta. Adzina na hathide gu thangisa gugola gwaye nasiri ga Nungungulu. Ganiolu, a di hatha gu manega ni wupari nyo tiye ni Jehovha. (Joh. 8:29) Giyeyedzo gya Jesu gi nga phasa kharini vaphya muhuno?

13. Gilo muni nya lisima a hathidego gu gira Jesu na ngari gyanana?

 ¹³ Tepo Jesu a nga ba ari gyanana, a di hatha gu engisa vavelegi vaye. Uye gima kha diga gu engisa vavelegi vaye khu gu khuye a nguti silo nya singi gu va vbindra. Vbavbandze nya isoso, ‘a di simama gu va yingela.’ (Luka 2:51) Jesu a diri uye gyanana nya koma, si thulago gu khiso a diri ni thumo nya wukhongolo ndrangani. Khu kharato, uye giride satshavbo a nga si kodza gasi gu khathaleya ndranga. Uye dzi garadzede gu hevbula wukarpintero ni Josefa gasi a mana dzitsapawu nyo phasedzeye ndrangani.

14. Ho dziti kharini gu khethu Jesu a diri muhevbuli nya wadi nya Lito la Nungungulu?

¹⁴ Vavelegi va Jesu adzina va mu bhulede khu gu velegwa gwaye nyo samadzise ni esi vahavisi va si ganedego maningano naye. (Luka 2:8-19, 25-38) Ganiolu, Jesu kha eneledwa basi khesi vavelegi vaye va nga ba va mu bhuleya; a di gu dzi ninga tepo nyo gevisise Milowo khu abune. Ho dziti kharini gu khethu Jesu a diri muhevbuli nya wadi nya Lito la Nungungulu? Khu gu na ngari gyanana, vahevbudzi Jerusalema va di gu “liwuga khu guti gwaye ni dziphindrulo dzakone.” (Luka 2:46, 47) Nigu tepo a nga ba ari ni 12 myaga, Jesu yeyedzide abune gu khuye Jehovha a diri Papayi waye. — Luka 2:42, 43, 49.

15. Jesu yeyedzide kharini gu khuye hathide gu gira gu gola ga Jehovha?

¹⁵ Tepo Jesu a nga pwisisa thumo waye ndrani nya makungo ya Jehovha, a di hatha gu gira gugola ga Jehovha. (Joh. 6:38) Uye a di gu dziti gu khuye a na nyenywa khu vathu nya vangi. Ambari olu a nga ba a si dzini gu khuye isoso si mu giregeya uye a di hatha gu engisa Jehovha. Tepo Jesu a nga bhapatiswa khu 29 teponi yathu gilo nya lisima gwaye gu diri gu gira gu haladza ga Jehovha. (Hebh. 10:5-7) Ambari tepo a nga ba afa simboni nya tshanisa uye a di dzi emisede gu simama gu gira gu gola ga papayi waye. — Joh. 19:30.

16. Ginani egi sanana si nga gi hevbulago avba nya giyeyedzo gya Jesu?

¹⁶ Engisa vavelegi vago. Gu fana ni Josefa ni Mariya vavelegi vago kha va vbeleya. Ambari ulolo, Jehovha va hathide gasi va gu vhikeya nigu gu hevbudza. Wa gu engisa wusingalagadzi wawe u bwe u va ninga githawo “u na mana gu katega.” — Efes. 6:1-4.

17. Guya khu Josuwa 24:15, makungo muni aya vaphya va yedego gu dzi hungeya?

¹⁷ Hatha oyu u na mu thumeyago. U yede gu  muti gwadi Jehovha uti esi si pategago avba nya makungo yaye u bwe u gira gu gola gwaye womini wago. (Rom. 12:2) Khavbovbo u na kodza gu hunga makungo nya yadi womini wago a gu gu thumeya Jehovha. (Leri Josuwa 24:15; Muh. 12:1) Wa gu simama ni longoloko nyo leri Bhibhiliya ni gu hevbula, lihaladzo lago khu Jehovha li na simama li dandra nigu gu khodwa gwago gu na tiya ngudzu.

18. Ginani egi vaphya va yedego gu hatha gu gira nigu handro muni va na wu manago?

¹⁸ Hatha gu thangisa Jehovha womini wago. Litigo la Sathane la gu tumbisa gu khilo wa gu thumisa makodzelo u gu nawo gasi gu gira esi u si vbwetago u na mana gu tsaka. Ganiolu, hi ngu dziti gwadi gu khethu ava va vegago gu pima avba nya dzithomba va gu dzi bedza vabune “guvivbani.” (1 Thim. 6:9, 10) Ganiolu, wa gu engisa Jehovha u bwe u thangisa uye womini wago u na ‘dugeleya’ u bwe u mana womi nyo tsakise.— Jos. 1:8.

19. Ginani egi vavelegi va yedego gu gi dundruga?

¹⁹ Vavelegi phasani sanana sanu gu thumeya Jehovha. Mu tumbeni, Uye a na mu phasa gu hatha silo nya sadi. (Mav. 3:5, 6) Dundrugani gu khenu sanana sanu si na kutswa ngudzu khesi mu si girago nasiri khesi mu si ganeyago. Khu kharato hathani gu gira silo si na phasago sanana sanu gu tsakedwa khu Jehovha.

20. Makategwa muni va na ma manago vaphya va gu hatha gu thumeya Jehovha?

²⁰ Vaphya, vavelegi vanu va nga mi phasa gu hatha silo nya sadi womini. Ganiolu, mu yede gu hatha silo nya sadi gasi gu tsakisa Nungungulu. Khu kharato, pimedzeyani giyeyedzo gya Jesu, mu bwe mu hatha gu thumeya Papayi wanu nya lihaladzo wa ndzadzini. Mwa gu gira isoso mu na dzi buza khu womi nyo tsakise olu. (1 Thim. 4:16) Nigu mindru wa tshigu, mu na dzi buza khu womi nyo pindruge.