1. Ha gu dundrugeya khu muthu nya wuhindzi, ha gu wona muthu a gu na ni makhalelo muni?

HA GU dundregeya khu muthu nya wuhindzi, ha gu wona muthu a gu na ni wuwadi, pweya-wusiwana ni gu gola gu ninga. Muthu nya makhalelo yaya a gu hi gira hi dundruga gipimaniso gya Jesu maningano ni Musamariya nya wadi. Mwama wule a di siri Mujudha, ganiolu girede “mithumo nya wuhindzi” Mujudha a nga ba a bedwe ni gu vetwa khu sighevenga. Musamariya pwede “gisiro” Mujudha wule a bwe a mu khataleya. (Luka 10:29-37) Gipimaniso gegi gya gu hi hevbudza maningano ni wuhindzi, a gu likhalelo nyo mbure la Nungungulu. Tshigu ni tshigu Jehovha a ngu hi yeyedza wuhindzi, nigu uye a gu gira isoso kholu a ngu hi haladza.

2. Ginani gambe gi pategago avba nya gu yeyedze wuhindzi?

² Ha gupwa lito wuhindzi, adzina hi nga dundrugeya gambe khu gimbe gilo. Muthu a gu na ni wuhindzi, adzina a nga hunga gu mba tsayisa muthu a nga ba a yede gu tsayiswa. Khu ndziya yoyo, hi nga ganeya gu khethu Jehovha na ni wuhindzi. Libhuku la Ndzimo lari khilo Jehovha “kha hi tsayisi gupima khu sighoho sathu.” (Ndzi. 103:10) Ganiolu, ga siemo nyo khaguri Jehovha adzina a nga tsayisa muthu a giridego gighoho.

3. Khu sevbini siwudziso si na hlamudwago avba nya ndrima yeyi?

³ Avba nya ndrima yeyi hi na hlamula siwudziso siraru. Khu ginani Jehovha a yeyedzago wuhindzi? Ina si ngu kodzega gu tsayisa muthu u bwe u mu yeyedza wuhindzi? Ginani gi nga hi phasago gu yeyedza wuhindzi? Hongoleni hi wona edzi Lito la Nungungulu li hlamulago khidzo siwudziso sesi sa siraru.

4. Khu ginani Jehovha a yeyedzago wuhindzi?

⁴ Jehovha a ngu tsaka khu gu khala muthu nya wuhindzi. Mupostoli Pawulo lovide gu khuye Nungungulu ‘tade khu wuhindzi nya  wukhongolo.’ Avba nya mongo wowu, Pawulo a di gu tshamuseya gu khuye Nungungulu na ni wuhindzi kholu ningide gutumba vathu nya mba vbeleya nya gu vbanye ndzadzini. (Efes. 2:4-7) Ganiolu, Jehovha kha yeyedzi basi wuhindzi ga vandriyathu va todzidwego. Dhavhidhe, muembi nya dzindzimo, lovide gu khuye: “PFHUMU Nungungulu khwadi ga vathu vatshavbo; wuhindzi waye wukhongolo guvbindra satshavbo a giridego.” (Ndzi. 145:9) Jehovha a ngu haladza vathu, khu kharato tepo yatshavbo a ngu mana sighelo nya sadi nya gu va yeyedze wuhindzi.

5. Jesu hevbude kharini maningano ni wuhindzi wa Jehovha?

⁵ Jesu a ngu dziti gwadi gu khuye Jehovha a ngu gola gu yeyedza wuhindzi. Na a si guti mafuni uye vbanyide ni Papayi waye ndzadzini khu tepo nya yingi. (Mav. 8:30, 31) Ga siemo nya singi, Jesu wonide Papayi waye na a gu yeyedza wuhindzi vathu va gu sighohi. (Ndzi. 78:37-42) Na gu hevbudza, Jesu tshingiside likhalelo leli nyo mbure la Papayi waye.

6. Jesu a hi phaside kharini gu pwisisa wuhindzi wa Jehovha?

⁶ Kha nga hi nga si wona ga ndrima yi nga vbindra, Jesu thumiside gipimaniso nya gyanana gi dzimedego gasi gu hi phasa gu pwisisa edzi Jehovha a golago khidzo gu yeyedza wuhindzi. Gyanana gi di khuga khu ndrangani gi ya “phalalegisa thomba [yagyo] yatshavbo ni mibhedzwa” (Luka 15:13) Khu hwane nya tepo, igyo gi di dzi laya gi bweleya gaya. Ganiolu, ginani egi Papayi wagyo a giridego? Hongoleni hi siwona. Jesu a di khuye: “Na nga guta khu hwindzo, a di wonwa khu babe waye, a nga pwago gisiro, a mu khinga khu mazambo, aya mu wugarela ni gu mu bhejari.” Papayi wule kha gorogeya gyanana gyaye. Wulangani nya isoso, uye a gi yeyedzide wuhindzi, a gi divaleya a bwe a gi hakha khu mandza mavili. Gyanana gile gi nga ba gi dzimede gi di giride gighoho nya gikhongo, ganiolu khu gu ba gi dzilayide, Papayi wagyo a gi divalede. Muvelegi yoyu nya wuhindzi avba nya gipimaniso gegi a gu emeya Jehovha. Avba nya gipimaniso gegi, Jesu yeyedzide gu khuye Jehovha a ngu dzina ngudzu gu divaleya ava va dzilayago khu lisine. — Luka 15:17-24.

7. Edzi Jehovha a yeyedzago khidzo wuhindzi, so yeyedza kharini gu khiso uye a nguti?

⁷ Jehovha a gu yeyedza wuhindzi kholu uye a nguti ngudzu. Jehovha tepo yatshavbo a gu hunga gu gira silo si na phasago sivangwa saye. Bhibhiliya yari khiyo: “Guti gutago khu ga Nungungulu” gu tade “khu wuhindzi, wa gu ninga mihandro nya mithumo nya yadi.” (Jak. 3:17) Gu fana ni papayi nya lihaladzo, Jehovha a ngu dziti gu khuye a gu yeyedza wuhindzi, sanana saye si ngu phasega. (Ndzi. 103:13; Isa. 49:15) Khu kotani nya wuhindzi wa Jehovha, vathu vaye ambari olu  va nga mba vbeleya, va na ni gutumba ga mindru watshigu. Kha nga olu Jehovha a gu na ni guti nya gukhongolo, uye tepo yatshavbo a gu yeyedza wuhindzi tepo a wonago gighelo nya gu gire isoso. Ganiolu, Jehovha gambe a ngu yiti tepo eyi a si yeligo gu yeyedza wuhindzi. Jehovha a nguti ngudzu, khu kharato uye a ngu pwisisa guhambana gu gomogo avba nya gu yeyedze wuhindzi ni gu pweya gisiro muthu a ghohidego.

8. Ginani egi dzimbe dzitepo gi yedego gu girwa nigu khu ginani?

⁸ Nga dundrugeya khu Mukristo a hungago kha gwenye gu manega ni mavbanyelo nyo nyenyeze mahoni ga Jehovha. Ginani hi yedego gu gira ga giemo gegi? Jehovha embede Pawulo gasi a loveya libandla gu khuye mu nga “thangini” wupari naye. (1 Kor. 5:11) Sighohi si gu mba dzilaya si yede gu duswa libandlani. Si na ni lisima gu gira isoso gasi gu vhikheya vandriyathu nyo tumbege hi bwe hi aga kha nga Jehovha. Vambe vo pimisa gu khavo muthu a gu duswa libandlani, so thula gu khiso Nungungulu kha mu yeyedza wuhindzi. Ina isoso lisine? Hongoleni hi si wona.

9-10. Guya khu Vahebheru 12:5, 6, khu ginani hi nga ganeyago gu khethu gu dusa muthu libandlani so yeyedza wuhindzi? Ninga giyeyedzo.

⁹ Si ngu vbisa ngudzu tepo mitshanganoni gu tiviswago gu pwane ndriyathu nyo khaguri hi mutigo, hi mu haladzago ngudzu kamo, “khandri gambe Fakazi ya Jehovha.” Adzina hi nga dzi wudzisa gu khethu, ina kamo si di lomba gu a duswa libandlani! Ganiolu, Ina gu dusa muthu libandlani so yeyedza wuhindzi? Ina. Si na yeyedza guti, wuhindzi ni lihaladzo ha gu tsayisa muthu si lombago gu a tsayiswa. (Mav. 13:24) Muthu a gu duswa libandlani, ina si nga mu phasa gu vbindrugedza mavbanyelo yaye a bwe a dzi laya? Ina. Vandriyathu nya vangi va giridego sighoho nya sikhongolo va ganede gu khavo, gu duswa libandlani si va phaside gu pwisisa gu khavo gighoho va giridego gi diri gikhongolo ngudzu, khu kharato va si kodzide gu dzilaya, va vbindrugedza mavbanyelo yawe va bwe va bweleya ga Jehovha. — Leri Vahebheru 12:5, 6.

¹⁰ Nga dundrugeya khu gipimaniso gegi? Muhavisi nyo khaguri a gu tugula gu khuye mweyo nya dzinvuta dzaye yi ngu dwala. Uye a ngu dziti gu khuye gasi gu khataleya nvuta yeyi yi dwalago a yede gu yi hambanisa ni dzimbe. Ganiolu, idzo dzi ngu tsaka ngudzu khu gu khala wulanga wumowo, khu kharato tepo dzi hambaniswago ni dzimbe dza gu phungeya. Khu kharato, ina esi so thula gu khiso muhavisi a hambanisago nvuta yi dwalago ni dzimbe a gu yi tshanisa? Khu lisine ne! Uye a ngu dziti gu khuye a gu diga nvuta yile yi dwalago ni dzimbe, anidzo dzi na thapedwa khu madwali. Khu kharato, a gu dusa nvuta yile yi dwalago, a na vhikeya tshambi watshavbo. — Fananisa ni Levhi 13:3, 4.

11. a) Muthu a dusidwego libandlani a gu fana ni nvuta yi dwalago khu ndziya muni? b) Ginani egi ava va dusidwego libandlani va nga girago nigu giphaso muni va gi manago?

¹¹ Tepo ndriyathu nyo khaguri a duswago libandlani, hi yede gu mu wona kha nga nvuta yi dwalago kholu wupari waye ni Jehovha womo mhangoni. Uye a gu fana ni muthu a dwalago. (Jak. 5:14) Gu fana ni muthu a gu na ni madwali nyo thapeyane, muthu a vegidego mhangoni wupari waye ni Jehovha a nga kutsedzeya vambe gu gira silo nyo vivbe. Khu kharato, dzimbe dzitepo si ngu lomba gu dusa khu libandlani oyu a ghohidego. Gu tsayisa gogu, go yeyedza lihaladzo la Jehovha khu vathu vaye libandlani. Nigu isoso si nga khuha monyo nya gighohi gi bwe gi dzilaya. Ganiolu, oyu a dusidwego libandlani a nga gira silo nyo khaguri. Uye tshulegide gu hongola mitshanganoni gasi a dzi hodzisa khu liphuvboni a bwe a tiyisa gambe gukhodwa gwaye. Uye tshulegide gambe gu hakha mabhuku gasi a ma thumisa avba nya gihevbulo gyaye nya muthu enga ni gu sixitiri JW Broadcasting^®. Nigu, tepo madhota ma wonago gu khayo uye a ngu vbindrugedza mavbanyelo yaye, ayo ma nga mu ninga wusingalagadzi gasi  gu mu phasa gu tiyisa wupari waye ni Jehovha nigu isoso adzina si nga mu phasa gu wuyela libandlani kha nga moyo nya Dzifakazi dza Jehovha. *

12. Khu yevbini ndziya nya yadi eyi madhota ma nga yeyedzago khiyo lihaladzo ni wuhindzi ga gighohi gi gu mba dzilaya?

¹² Si na ni lisima gu dundruga gu khuwe ava va duswago libandlani khu vale va ghohago, ganiolu va si dzilayi. Madhota ma ngu dziti gu khayo ma yede gu pimisa gwadi na ma si hungi gu dusa muthu libandlani. Ayo ma ngu dziti gu khayo Jehovha a gu tsayisa ‘khu ndziya yi fanedego’ nigu uye o vbweta gu khuye a nayo ma gira sasimweso. (Jer. 30:11) Madhota ma ngu haladza ngudzu vandriyawe, khu kharato ayo kha ma vbweti gu gira gilo gi na ghohago wupari wawe ni Jehovha. Ganiolu, dzimbe dzitepo ndziya nya yadi nya gu va yeyedza lihaladzo ni wuhindzi, khu gu va dusa libandlani gighohi.

13. Khu ginani Mukristo wa Korinto a nga ba a yede gu duswa libandlani?

¹³ Wona esi mupostoli Pawulo a giridego khu gighohi gi nga mba dzilaya. Mukristo nyo khaguri Korinto a di gu gira wubhayi ni ngadza papayi waye. Ngapwa gu nyenyeza gwaso! Jehovha a di embede Vaisrayeli gu khuye: “Mwama a gu lala ni mwangadzi wa babe waye, funungude khu kharato wumbwiri wa babe waye, khu wuvili wawe va na songwe.” (Levhi 20:11) Lisine gu Pawulo kha ganeya gu khuye mwama wule a di yede gu songwa, ganiolu embede vandriyathu va Korinto gasi va mu dusa khu libandlani. Mavbanyelo nyo vivbe ya mwama wule ma di gu khuha vambe libandlani. Ganiolu, vambe va di gu pimisa gu khavo iso a nga ba a gira gu di siri gighoho nya gikhongolo.— 1 Kor. 5:1, 2, 13.

14. Pawulo yeyedzide kharini wuhindzi ga mwama moyo a nga ba a dusidwe libandlani Korinto, nigu khu ginani a giridego isoso? (2 Vakorinto 2:5-8, 11)

¹⁴ Khu hwane nya tepo, Pawulo dzitide gu khuye mwama wule vbindrugedzide kamo ngudzu. Uye a di dzilayide khu lisine! Mwama wule a di thede dzitshoni libandla, ganiolu Pawulo a embede madhota khuye kha nga ba a vbweta gu tshingisa mahungo yaya. Uye a va embede gu khuye mu yede “gu mu tsetselelani ni gu mu thavelela.” Nigu Pawulo a va tshamusede gighelo nya gu va gira isoso. Uye a di khuye: “Gasi a si luzi khu mahungu nya gusaniseke ngudzu.” Pawulo a di pweya wusiwana mwama wule a nga ba a dzi layide. Uye kha nga ba a vbweta gu wona mwama wule na vbede tshivba khu kotani nya iso a giridego nyo kala a tsukula ni gu lomba divalelo ga Nungungulu.— Leri 2 Vakorinto 2:5-8, 11.

15. Madhota ma nga tsayisa ma bwe ma yeyedza wuhindzi khu tepo yamweyo khu ndziya muni?

¹⁵ Khu gu landra giyeyedzo gya Jehovha, madhota ma ngu gola ngudzu gu yeyedza wuhindzi. Ayo, sa gu lombega, ma na tsayisa gighohi khu tshivba, ganiolu tepo si kodzegago ayo ma na yeyedza wuhindzi. Madhota ma gu mba tsayisa gighohi, kha ma yeyedzi wuhindzi, wulangani nya isoso ayo ma gu pweya gisiro gighohi gile. Ganiolu, ina madhota basi ma yedego gu yeyedza wuhindzi?

16. Guya khu Mavingu 21:13, ginani egi Jehovha a na va girago vale va gu mba yeyedza wuhindzi?

¹⁶ Hatshavbo hi ngu dzina gu manega ni wuhindzi nga Jehovha. Khu ginani? Gimwegyo nya sighelo khu gu, Jehovha kha engiseyi milombelo ya vale va gu mwalo wuhindzi. (Leri Mavingu 21:13.) Mwalo gwathu a vbwetago gu khuye isoso si dugeleya. Khu kharato, ha gu dzi woneya gasi hi si manegi ni monyo nya mba wadi. Ethu kha hi digi gu engiseya ndriyathu a tshanisekago, ganiolu tepo yatshavbo ha gu engiseya “huwa nya gisiwana gya gulila.” Khu ndziya nyo fane, ethu ha gu dzi garadzeya gu thumisa wusingalagadzi wu gomogo umo nya Bhibhiliya, umo ga Jakobe 2:13 wu gu khuwo: “Gikhati Nungungulu a na gu lamulago kha na tsetselela ava va ngamba tsetselela vakwawe.” Ha gu dzi nogisa, hi dundrugeya edzi hi vbwetago khidzo gu yeyedzwa wuhindzi, hi na si kodza gu yeyedza wuhindzi vambe. Hi yede gu yeyedza wuhindzi ngudzungudzu tepo gighohi gi dzilayago gi bwe gi wuyela libandlani.

17. Pfhumu Dhavhidhe yeyedzide kharini gu khuye a diri muthu nya wuhindzi?

¹⁷ Bhibhiliya yi na ni siyeyedzo nya singi si hi phasago gu khala vathu nya wuhindzi, na siri gu manega ni monyo nya mba wadi. Khu giyeyedzo, dundrugeya khu giyeyedzo gya Pfhumu Dhavhidhe. Khu dzitepo nya dzingi uye a yeyedzide gu khuye a diri muthu nya wuhindzi. Ambari olu Sawule a nga zama gu mu songa Dhavhidhe yeyedzide wuhindzi ga Pfhumu yeyi yi nga ba yi todzidwe khu Nungungulu. Uye gima kha zama gu phodza mwendro gu yi gireya guvivba. — 1 Sam. 24:9-12, 18, 19.

18-19. Khu sevbini siemo sivili esi Dhavhidhe a nga mba yeyedza wuhindzi?

¹⁸ Ganiolu, ga dzimbe dzitepo Dhavhidhe kha yeyedza wuhindzi. Khu giyeyedzo, Nabhali, mwama moyo a nga ba ari ni makolo ni dzihanyi, a di ganeya khu ndziya nya mba yadi ni Dhavhidhe a bwe a bomba gu ninga guhodza Dhavhidhe ni vathu vaye. Khu kharato, Dhavhidhe a di goroga ngudzu a bwe a hunga gu songa, Nabhali ni vatshavbo va ndrangani gwaye. Ganiolu, Abhigayili, ngadza Nabhali a diri muthu nya wadi ni gu laphisa monyo nigu uye khu gu vbiredza a di hongola a ya ninga guhodza Dhavhidhe. Khu kharato, Dhavhidhe kha songa Nabhali gumogo ni va ndrangani gwaye. — 1 Sam. 25:9-22, 32-35.

¹⁹ Ga gimbe giemo, muprofeti Natane a di embeya Dhavhidhe gu khuye, mwama moyo nyo ghanye a di bide nvuta ya vhizinyu waye nya gisiwana. Dhavhidhe a di goroga ngudzu a embeya Natane khuye: “Nyi ngu sambanya khu PFHUMU Nungungulu a vbanyago, gukheni muthu yoyo a giridego isoso fanede gufa!” (2 Sam. 12:1-6) Dhavhidhe a di gu wuti gwadi nayo wa Mosi. Guya khu nayo wowo, muthu a guba nvuta mweyo a di yede gu livba mune wayo 4 nya idzo. (Ekiso. 22:1) Ganiolu,  khu ginani Dhavhidhe a nga ganeya gu khuye mwama wule a di yede gu songwa? Tsayiso wowo wu diri wukhongolo ngudzu. Natane tshamusede matimo yaya ga Dhavhidhe gasi gu mu phasa gu pwisisa gu khuye a di giride sighoho nya sikhongolo. Amabari ulolo, Jehovha yeyedzide wuhindzi nya wukhongolo ngudzu ga Dhavhidhe, owu Dhavhidhe a nga hadzi gu mba si kodza gu wu yeyedza ga mwama wule avba nya gipimaniso gya Natane! — 2 Sam. 12:7-13.

20. Giyeyedzo gya Dhavhidhe gyo hi hevbudza ginani?

²⁰ Tepo Dhavhidhe a nga ba a gorogide ngudzu, a di ganede gu khuye Nabhali ni va ndrangani gwaye va di yede gu songwa. Nigu khu hwane nya tepo, Dhavhidhe ganede khuye mwama wule wa avba nya gipimaniso gya Natane a di yede gu songwa. Ganiolu, Dhavhidhe a diri mwama nya wadi, khu kharato khu ginani a nga lamula mwama wule nya gighanyi khu ndziya nya mba yadi? Dundrugeya khedzi Dhavhidhe a nga ba a dzipwa khidzo. Ga tepo yile livhalo la Dhavhidhe li di gu dzipwa nandru. Muthu a gu lamula vambe khu ndziya nya mba yadi so yeyedza gu khiso wupari waye ni Jehovha kha wa tiya. Jesu gengedzide vapizane vaye gu khuye: “Mu nga lamuli vakwanu, gasi anenu mu si lamudwi; kholu edzi mu lamulago khidzo vakwanu, mu na lamudwa khidzo nenu.” (Mat. 7:1, 2) Khu kharato, hi yede gu gira satshavbo hi si kodzago gasi hi potsa gu khala vathu nya dzihanyi, ganiolu hi khala vathu nya gu tale khu “wuwadi nya wukhongolo” gu fana ni Nungungulu.

21-22. Khu dzevbini dzindziya hi nga yeyedzago khidzo wuhindzi ga vambe?

²¹ Muthu nya wuhindzi a ngu gira nya singi gasi gu phasa vambe, wulangani nyo va pweye basi wusiwana. Hatshavbo hi nga dzi garadzeya gu wona ava va vbwetago giphaso ndragani gwathu, libandlani mwendro omu hi vbanyago umo. Khu ndziya yoyo, hi na mana mathomo nya mangi nyo yeyedze wuhindzi. Ina womo muthu u mutigo a vbwetago gu thaveledwa? Adzina u nga mu tiyisa khu gu mu phasa gu phula ni gu gira yimbe mithumo. Ina womo ndriyathu nyo khaguri a wuyisedwego libandlani a vbwetago pari nya yadi gasi yi mu thaveleya ni gu mu tiyisa? Ina hi nga thaveleya vambe khu gu va bhuleya mahungu nya yadi? Eyi mweyo nya dzindziya nya dzadi nyo yeyedze wuhindzi vambe. — Joba 29:12, 13; Rom. 10:14, 15; Jak. 1:27.

²² Ha gu vega gupima avba nya esi vambe va si vbwetago, hi na wona gu khethu hi na ni mathomo nya mangi nya gu yeyedze wuhindzi. Tepo hi yeyedzago wuhindzi, ha gu tsakisa Papayi wathu wa ndzadzini kholu uye ‘tade khu wuhindzi!’