NDRIMA NYA GIHEVBULO 41
NDZIMO 13 Kristo, giyeyedzo gyathu
Ginani hi gi hevbulago khu 40 matshigu nyo hegise ya Jesu omu mafuni?
“Avo va mu wonide khu gipimo nya 40 matshigu nigu a di gu ganeya khu Mufumo wa Nungungulu.” — MITH. 1:3.
MAKUNGO NYA GIHEVBULO GEGI
Hi na hevbula edzi hi nga pimedzeyago khidzo esi Jesu a giridego ndrani nya 40 matshigu nyo hegise mafuni.
1-2. Ginani gi dugeledego Vapizane vavili va Jesu tepo va nga ba va hongola Emawusi?
GU DIRI litshigu nya 16 nya Nisani nya 33 matshigoni yathu. Vapizane va Jesu va di gu swihade ni gu thava ngudzu. Vavili vakone va di duga khu Jerusalema va hongola Emawusi, lidhoropa li khalago tanga nya 11 dzikilometro gu khugeya khu Jerusalema. Avo va di gu vbede ngudzu tshivba kholu Jesu, a gu mwama va nga ba va mu landreya a di gu fude. Avo va diri ni gutumba nya gu khavo Mesiya a di hadzi gu gireya silo nyo hlamadzisi ga Vajudha, ganiolu a di gu fude. Ganiolu gi di girega gilo nyo hlamadzisi.
2 Mwama moyo va nga ba va si muti a di va hidzimeleya a bwe a pheya gu gimbiya navo. Vapizane va di embeya mwama yoyo esi si nga giregeya Jesu. Mwama yoyo va nga ba va si muti a di pheya gu va embeya silo nya gu gima kha va si divala. Uye a di thumisa Milowo ni siprofeto gasi gu va tshamuseya gu khuye khu ginani Mesiya a nga tshaniseka a bwe afa. Tepo va nga vboha Emawusi, Vapizane va di tugula gu khavo mwama wule va nga ba va si muti a diri Jesu a nga wuswa khu gufani. Nga dundrugeya khu gutsaka vapizane va gupwidego khu gu tugula gu khavo Mesiya a ngu vbanya! — Luka 24:13-35.
3-4. Ginani gi nga dugeleya vapizane va Jesu, nigu ginani hi na bhulago khigyo avba nya ndrima yeyi? (Mithumo 1:3)
3 Jesu a vbedzide 40 matshigu omu mafuni na si hongoli ndzadzini, nigu a dzi wonegiside ga vapizane vaye dzitepo nya dzingi ndrani nya 40 matshigu. (Leri Mithumo 1:3.) Jesu tiyiside vapizane vaye va nga ba va swihade ni gu thava. Nigu avo va manide litsako ni gutiya-hwambo gasi gu tshumayela mahungu nya yadi nya Mufumo. a
4 Hi nga wuyedwa khu gu hevbula esi Jesu a giridego ndrani nya tepo yeyi. Ga ndrima yeyi, hi na wona edzi Jesu a thumisidego khidzo tepo yeyi gasi 1) gu tiyisa vapizane vaye, 2) gu va va phasa gu pwisisa gwadi Milowo 3) ni gu va trenari gasi gu gira mithumo nya yikhongolo mindru wa tshigu. Ga giemo ni giemo, hi na wona edzi hi nga pimedzeyago khidzo giyeyedzo gya Jesu.
TIYISA VAMBE
5. Khu ginani vapizane va Jesu va nga ba va vbweta gu tiyiswa?
5 Vapizane va Jesu va di gu vbweta gu tiyiswa. Khu ginani? Kholu vambe vakone va di gu digide dzindranga dzawe ni dzinogosi dzawe gasi gu landreya Jesu. (Mat. 19:27) Vambe va di gu pharidwe khu ndziya nya mba yadi kholu va nga khala vapizane va Jesu. (Joh. 9:22) Avo va di dzi emisede gu gira guvbindrugedza gogo womini gwawe ni gu tshaniseka kholu va di gu khodwa gu khavo Jesu a diri Mesiya a tumbisidwego. (Mat. 16:16) Ganiolu, tepo Jesu a nga songwa, gutumba gwawe gu di vbeya va bwe va vbeya tshivba.
6. Ginani egi Jesu a giridego hwane nya gu ba a wusidwe khu gufani?
6 Jesu a di gu pwisisa gu khuye si di gu olovelegide gu vapizane vaye va vbeya tshivba kholu a ngafa. Nigu a di gu dziti gu khuye khu gu ba va vbede tshivba kha si thuli gu khiso va di gu vbeledwe khu gukhodwa. Khu kharato, tepo a nga wuswa a di dzegeya gu tiyisa dzipari dzaye. Khu giyeyedzo, a dzi wonegiside ga Mariya Madhalene tepo khiyo a nga ba a liya avba a nga ba a dzingidwe Jesu. (Joh. 20:11, 16) Uye gambe a dzi wonegiside ga vapizane vavili va khumbugidwego gupheyani nya ndrima yeyi. A bwe a dzi wonegisa ga mupostoli Pedro. (Luka 24:34) Ginani hi nga gi hevbulago khu giyeyedzo gya Jesu? Wona esi si giregidego tepo a nga dzi wonegisa ga Mariya Madhalene.
7. Guya khu Johane 20:11-16, ginani Jesu a wonidego Mariya na gira, nigu ginani a mu giredego? (Wona fotu.)
7 Leri Johane 20:11-16. Khu 16 nya Nisani vbadzimindrutuno, vanyamayi nyo khaguri va di hongola avba Jesu a nga ba dzingidwe. (Luka 24:1, 10) Moyo nya vanyamayi vovo a diri Mariya Madhalene. Tepo Mariya a nga vboha avba Jesu a nga ba dzingidwe, a di wona lithowo na liri liphanga. Khu kharato, Mariya a diya embeya Pedro ni Johane esi si giregidego, nigu va di hongola avba a nga ba a dzingidwe Jesu. Tepo va nga wona gu khavo givili gya Jesu gi diri mwalo thowoni, Pedro ni Johane va di bweleya gaya. Ganiolu, Mariya kha bweleya, uye a di simama vbale na gu liya. Ganiolu, kha tugula gu khuye Jesu a di gu mu khedziseya. Uye a di wona gu khuye a di gu liya khu kotani yaye, nigu a di gu vbweta gu mu thaveleya. Khu kharato, a di dzi wonegisa ga Mariya a bwe a mu embeya malito nya madugwana basi ma nga mu tiyisa ngudzu. Uye a di bhula ni Mariya a bwe a mu ninga thumo nya lisima, a gu guya embeya vandriyaye maningano khu gu wuswa gwaye. — Joh. 20:17, 18.
Pimedzeya Jesu khu gu vega gupima ga esi vandriyathu va tshanganago naso u bwe u gira satshavbo u si kodzago gasi gu va thaveleya (Wona paragrafu 7)
8. Hi nga pimedzeya kharini Jesu?
8 Hi nga pimedzeya kharini Jesu? Hi nga pimedzeya Jesu khu gu tiyisa vandriyathu gasi va simama gu thumeya Jehovha. Gu fana ni Jesu, hi yede gu vega gupima ga sigaradzo vandriyathu va tshanganago naso, hi zama gu pwisisa edzi va dzipwago khidzo ni gu va thaveleya. Wona giyeyedzo gya ndriyathu nyo pwani khu Jocelyn, a nga fedwa khu ndriyaye avba nya mhango nyo khaguri. Uye wari, khuye: “Khu migima nya mingi, nyi di gu dzipwa na nyi gu vbede tshivba tepo yatshavbo.” Ambari ulolo, ndriyathu nyo khaguri ni mwangadzi waye va di mu rana gaya gwawe va bwe va mu dzumeleya gasi gu ganeya edzi a nga ba a dzipwa khidzo. Avo va mu engisede gwadi, va mu yeyedza wuwadi va bwe va mu embeya edzi Jehovha a nga ba a mu ninga khidzo lisima. Jocelyn wari, khuye: “Nyi di dzipwa nga khatshi nya gu dzama omu nya yiphwa nya yikhongolo, ganiolu khavbovbo Jehovha a thumisa vandriyangu gasi gu nyi vbulugisa. Avo va nyi phaside gu simama ni gudogoreya nya gu thumeye Jehovha.” Anethu hi nga tiyisa vambe khu va diga va ganeya edzi va dzipwago khidzo ni gu va engiseya gwadi tepo va ganeyago. Khu ndziya yeyi, hi na va thaveleya ni gu va phasa gu simama gu thumeya Jehovha. — Rom. 12:15.
PHASA VAMBE GU PWISISA MILOWO
9. Gigaradzo muni vapizane va Jesu va nga ba va tshangana nagyo, nigu Jesu a va phaside kharini?
9 Vapizane va Jesu va di gu khodwa avba nya Lito la Nungungulu, nigu va di gu gira satshavbo va si kodzago gasi gu engisa Jehovha. (Joh. 17:6) Ganiolu, avo kha va nga ba va pwisisa gu khavo khu ginani Jesu a nga songwa kha nga gighohi. Jesu a di gu dziti gu khuye vapizane vaye va di gu khodwa ni gu haladza Jehovha, ganiolu uye a di tugula gu khuye avo va di yede gu pwisisa gwadi Milowo. (Luka 9:44, 45; Joh. 20:9) Khu kharato, uye a di va phasa gu pwisisa esi va nga ba va hevbude omu nya Milowo. Wona edzi a giridego khidzo isoso tepo a nga dzi wonegisa ga vapizane vaye va vavili va nga ba va hongola Emawusi.
10. Jesu phaside kharini vapizane vaye gu pwisisa gu khavo uye a diri Mesiya? (Luka 24:18-27)
10 Leri Luka 24:18-27. Wona gu khuwe Jesu kha dzegeya gu embeya vama vale gu khuye a diri mani. Wulangani nya isoso, uye a di va gira siwudziso. Khu ginani? So wonegisa gu khatshi uye a di gu vbweta gu khuye va ganeya edzi va nga ba va dzipwa khidzo ni esi va nga ba va si pimisa. Nigu khiso va giridego. Avo va di mu embeya gu khuye va di gu pimisa gu khavo Jesu a di hadzi gu khala Pfhumu ya Israyeli gasi gu va tshudzisa ga Varoma. Hwane nya gu ba va ganede edzi va nga ba dzipwa khidzo, Jesu a di thumisa Milowo gasi gu va phasa gu pwisisa gu khavo siprofeto nya singi si di gu tadzisegide. b Khu gu landreya, ni wutshigu, uye a di tshangana ni vambe vapizane a bwe a va ninga tshamuselo nya siprofeto soso. (Luka 24:33-48) Ginani hi gi hevbulago khu matimo yaya?
11-12. a) Ginani hi gi hevbulago khu ndziya eyi Jesu a tshamusedego khiyo Milowo? (Wona dzifotu.) b) Ndriyathu nyo khaguri a phaside kharini gihevbuli gyaye nya Bhibhiliya?
11 Hi nga pimedzeya kharini Jesu? Gupheya, tepo u gimbidzisago gihevbulo nya Bhibhiliya, gira siwudziso si na phasago gihevbuli gyago gu ganeya edzi gi dzipwago khidzo. (Mav. 20:5) Hwane nya gu ba u pwisiside edzi gi dzipwago khidzo, gi yeyedze edzi gi nga manago khidzo mavhesi nya Bhibhiliya ma nga gi phasago ga giemo gyagyo. Wulangani nyo gi embeye esi gi yedego gu gira, gi yeyedze edzi gi nga thumisago khidzo Bhibhiliya gasi guti esi gi yedego gu gira. Wona giyeyedzo gya ndriyathu moyo a vbanyago Gana nyo pwani khu Nortey.
12 Tepo Nortey a nga ba ari ni 16 myaga a di pheya gu hevbula Bhibhiliya. Nya mba hweya, a di wugedwa khu valongo vaye. Ginani gi mu phasidego gu simama na tiyide? Muhevbudzi waye nya Bhibhiliya, a di thumisa Matewu gipimo 10 gasi gu mu tshamuseya gu khuye Makristo nya lisine ma na wugedwa. Nortey wari, khuye: “Tepo nyi nga pheya gu wugedwa nyi di tiyisega gu kheni nyi di gu li manide lisine.” Muhevbudzi waye a mu yeyedzide gambe Matewu 10:16, a ganeyago gu khuye hi yede gu gengeya. Nigu khu gu landreya, va bhude khedzi Nortey a nga thumisago khidzo ndrima yeyi gasi gu tshamuseya esi a si khodwago ga valongo vaye khu ndziya nya githawo. Hwane nya gu ba Nortey a bhabhatisidwe, a di gu vbweta gu thuma kha nga piyonero, ganiolu papayi waye a di gu vbweta gu khuye a hongola univhersidhadhi. Wulangani nyo mu embeye esi a nga ba a yede gu gira, muhevbudzi waye a di mu gira siwudziso si nga mu phasago gu thumisa Milowo gasi gu hunga makungo nya yadi. Ginani Nortey a giridego? Nortey a di hunga gu beleya thumo nya tepo yatshavbo. Papayi waye a di mu tutumisa khu gaya. Nortey a dzipwide kharini maningano ni esi si nga mu dugeleya? Uye wari, khuye: “Nyi di tiyisega gu kheni nyi di gu hungide makungo nya yadi.” Tepo hi phasago vambe gu dundrugeya khu Milowo, ha gu va phasa gu tiyisa gukhodwa gwawe ni gu simama gu thumeya Jehovha. — Efes. 3:16-19.
Pimedzeya Jesu khu gu phasa vambe gu dundrugeya Milowo (Wona paragrafu 11) e
TRENARI VANDRIYATHU GASI VA KHALA “SININGWA”
13. Ginani Jesu a giridego gasi gu tiyisega gu khuye thumo waye wu na simama gu khataledwa hwane nyo ba a hongode ndzadzini? (Vaefeso 4:8)
13 Na gu romo mafuni, Jesu a giride gwadi esi Papayi waye a mu lombidego gu gira. (Joh. 17:4) Ganiolu, Jesu kha nga ba a pimisa gu khuye a diri uye basi a nga ba yede gu gira esi Jehovha a nga ba a si vbweta. Ndrani nya myaga miraru ni metadu, uye a tshumayede mafuni ni gu a trenaride vambe gu gira sasimweso. Jesu a di gu tumba vapizane vaye. Uye a va ningide thumo nyo tshumayele, gu hevbudza mahungu nya yadi ni gu khataleya vathu va Jehovha. Vambe vapizane va phede gu thangeya thumo wowu na va nga si enedzi 30 myaga. (Leri Vaefeso 4:8.) Jesu a thumiside kharini 40 matshigu a nga ba ari nawo gasi gu phasa vama vava va nga ba va dzi ningedzede, va nga ba va tumbegide ni gu dzi garadza gasi gu khala “siningwa.” — Wona nota avba ga Vaefeso 4:8.
14. Jesu a phaside kharini vapizane vaye gu dandra khu liphuvboni ndrani nya 40 matshigu? (Wona fotu.)
14 Jesu a ningide vapizane vaye wusingalagadzi nyo kongome, ganiolu khu ndziya nya lihaladzo. Khu giyeyedzo, a di tugula gu khuye vapizane nyo khaguri kha va nga ba va khodwa gu khavo khuye kamo a nga ba a fude a bwe a wuswa, khu kharato uye a di va ninga wusingalagadzi. (Luka 24:25-27; Joh. 20:27) Uye a va phaside gu vega gupima avbo nyo sayise vathu va Jehovha nasiri avbo nyo mane dzitsapawu nya dzingi. (Joh. 21:15) Uye gambe a va dundrugiside gu mba khaleya gu fananisa esi moyo ni moyo a nga ba a gira thumoni wa Jehovha. (Joh. 21:20-22) A di bwe a kawuka vambe va nga ba vari ni mawonelo nyo hosege maningano ni Mufumo ni gu va phasa gu vega gupima avba nya thumo nyo tshumayele. (Mith. 1:6-8) Ginani egi madhota ma nga gi hevbulago khu giyeyedzo gya Jesu?
Pimedzedya Jesu khu gu phasa vambe gasi va dinganedwa khu gu gira mithumo nya yingi (Wona paragrafu 14)
15-16. a) Madhota ma nga pimedzeya Jesu khu ndziya muni? Tshamuseya. b) Patrick a wuyedwe kharini khu wusingalagadzi?
15 Madhota ma nga pimedzeya kharini Jesu? Khu gu trenari vandriyathu nya vaphya gu gira mithumo nya yingi libandlani. c Madhota kha ma vireyi gu khayo vandriyathu vovo va vbeleya. Ayo ma yede gu trenari vandriyathu nya vaphya khu ndziya nya lihaladzo gasi va si kodza gu dzi nogisa, gu tumbega ni gu dzi emiseya gu phasa vambe. — 1 Thim. 3:1; 2 Thim. 2:2; 1 Ped. 5:5.
16 Wona edzi ndriyathu nya mwama nyo pwani khu Patrick a wuyedwego khidzo khu wusingalagadzi. Na ngari muphya a di gu ganeya ni gu phara vambe khu ndziya nya mba yadi ambari kamo ni vandriyathu nya vanyamayi. Lidhota nyo khaguri li di tugula gu khilo Patrick a di yede gu gira guvbindrugedza nyo khaguri, khu kharato li di mu ninga wusingalagadzi nyo kongome khu ndziya nya yadi. Patrick wari, khuye: “Nyi tsakide olu lidhota li nga nyi yeyedza omu nyi yedego gu vbindrugedza. Eni nyi di gu vbeya tshivba tepo nyi nga ba nyi wona vambe na va gu ningwa mithumo nyi nga ba nyi yi vbweta. Ganiolu, wusingalagadzi nyi ningidwego khu lidhota lile wu nyi phaside gu vega gupima avbo nya gu dzinogise, nyi thumeya vandriyangu khu lihaladzo wulangani nyo vege gupima avbo nyo mane mithumo nya yingi libandlani.” Kha nga handro wakone, Patrick a di khala lidhota nari ni 23 myaga. — Mav. 27:9.
17. Jesu a yeyedzide kharini gu khuye a di gu tumba vapizane vaye?
17 Jesu kha ninga basi vapizane vaye thumo nyo tshumayele, ganiolu ni gu hevbudza. (Mat. 28:20) Vapizane va dzipwide na va si dinganedwi khu gu gira thumo wowu. Ambari ulolo, Jesu kha nga ba a kanakana gu khuye va na gira thumo wowu, nigu uye a va embede khu isoso. Uye a di va embeya gu khuye: “Kha nga olu Papayi a nyi rumedego, aneni nyi ngu mi rumeyani.”— Joh. 20:21.
18. Madhota ma nga pimedzeya kharini Jesu?
18 Madhota ma nga pimedzeya kharini Jesu? Madhota ma gu na ni wugengeyi ma ngu ninga mithumo ava va trenarwigo. (Filp. 2:19-22) Khu giyeyedzo, madhota ma nga lomba vaphya gasi gu phasedzeya avbo nya gu agise ni gu lungisa silo nyo khaguri Salawuni nya Mufumo. Madhota ma nga ninga vandriyathu thumo nyo khaguri gasi gu gira, ma va trenari ni gu va tumba gasi gu gira thumo wowo. Lidhota nya liphya nyo pwani khu Matthew lo ganeya gu khilo li ngu bonga ngudzu khu gu ba madhota ma mu trenaride gu gira mithumo nya yingi libandlani ma bwe ma tumba gu khayo a di hadzi gu gira mithumo yoyo enga. Uye wari, khuye: “Tepo nyi nga ba nyi gira sihoso, ayo ma nyi phaside gu wona omu nyi nga ba nyi yede gu tshukwadzisa.” d
19. Ginani hi yedego gu dzi emiseya gu gira?
19 Jesu a thumiside 40 matshigu omu mafuni gasi gu tiyisa, gu hevbudza ni gu trenari vambe. Hatshavbo hi nga dzi emiseya gu pimedzeya giyeyedzo gya Jesu. (1 Ped. 2:21) Uye a na hi phasa nethu gu gira isoso. Gu vbindra satshavbo, uye a tumbiside gu khuye: “Eni nyi nanu matshigu yatshavbo kala guhegisani nya litigo.” — Mat. 28:20.
NDZIMO 15 Zundza Matewula ya Jehovha!
a Dziinvhageli ni mambe mabhuku nya Bhibhiliya, ma ngu ganeya khu siemo nya singi tepo Jesu a nga dzi wonegisa hwane nya gu ba a wusidwe khu gufani. Uye a dzi wonegiside ga Mariya Madhalene (Joh. 20:11-18); ga vambe vanyamayi (Mat. 28:8-10; Luka 24:8-11); ga vapizane 2 (Luka 24:13-15); ga Pedro (Luka 24:34); ga vapizane, ganiolu na mwalo Tomasi (Joh. 20:19-24); ga vapizane vaye, na romo nuye Tomasi (Joh. 20:26); ga 7 valandreyi (Joh. 21:1, 2); ga 500 valandreyi ni gu vbindra (Mat. 28:16; 1 Kor. 15:6); ga ndriyaye Jakobe (1 Kor. 15:7); ga vapostoli vatshavbo (Mith. 1:4) ni ga vapostoli va khalago vbafuvbi ga Bhetaniya. (Luka 24:50-52) Adzina saye simbe siemo Jesu a nga dzi wonegisa kha sa lowa omu nya Bhibhiliya. — Joh. 21:25.
b Gasi gu mana sasamedzo nya siprofeto si ganeyago khu Mesiya, wona ndrima omu nya jw.org yi gu khiyo: “Será que as profecias da Bíblia provam que Jesus era o Messias?”
c Vaphya nyo khaguri va gu madhota va nga thuma kha nga vawoneleyi nya sirkwitu ambari na vari ni 25-30 myaga. Ganiolu, gupheya va yede gu khala madhota ma vidzidwego.
d Gasi gu mana mambe mawonelo nya edzi u nga phasago khidzo muphya gu ningwa mithumo nya yingi, wona Mukhedziseyi nya Agosto nya 2018, dzipaj. 11-12; dzipar. 15-17.
e TSHAMUSELO NYA FOTU: Ndriyathu nya mwama a gu phasa gihevbuli gyaye nya Bhibhiliya gu pwisisa esi Milowo yi ganeyago ni gu gi embeya esi si tsakisago Jehovha.
