Ina si di nga gu garadzeya gu dundruga esi u hevbudego? Dzimbe dzitepo isoso si ngu giregeya hatshavbo. Ginani gi na gu phasago? Wusedza esi u nga hevbula.

Tepo u hevbulago, emanyana gasi gu lova silo nyo khaguri nya lisima u hevbudego. Esi khiso mupostoli Pawulo a kutsidego vandriyathu gu gira tepo khiyo va nga ba va leri lidangaliya laye. Uye a di ganeya gu khuye: “Esi [khiso] hi vbwetago gu ganeya.” (Hebh. 8:1) Khu ndziya yeyi, uye a di va phasa gu pwisisa esi a nga ba a ganeya ni edzi isoso si nga ba si pwanana khidzo.

U nga dzi tshiyela 10 dzimeneti hwane nya gu ba u vbedzide gu hevbula gasi gu dundrugeya khu dzipontu nya lisima u hevbudego. Wa gu mba dundruga gwadi dzipontu u dzi hevbudego, wona ni gu leri sihungwana nya mahungu mwendro gu leri malito nyo pheye nya paragrafu ni paragrafu gasi si gu phasa gu dundruga. Wa gu ba u hevbude silo nya siphya, zama gu si tshamuseya khu malito yago. Nigu wa gu wusedza dzipontu nya lisima, kha wu na nga dzi vegisa mapimoni gwago basi, ganiolu u na wona edzi u nga dzi thumisago khidzo womini gwago.