1-2. a) Sithumi sa Jehovha si nga dzi gira siwudziso muni? b) Hi na bhula khu ginani avba nya ndrima yeyi?

 HATSHAVBO hi ngu kanakana, a gani hi vaphya mwendro hi dandride khu tanga. Khu giyeyedzo, dundrugeya muphya nyo khaguri a dzi wudzisago gu khuye Jehovha a ngu mu ninga lisima gani. Uye a gu kanakana gu khuye a nga bhabhatiswa mwendro ne. Gimbe giyeyedzo kha ndriyathu nya mwama a nga hatha gu thangisa Mufumo womini gwaye na ngari muphya, wulangani nyo mane thumo wu nga hadzi gu mu ninga dzitsapawu nya dzingi. Olu khongolo nigu a na ni dzitsapawu nyo eneye basi gasi gu khathaleya ndranga yaye, ganiolu a nga kanakana gu khuye a hungide makungo nya yadi na ngari muphya. Mwendro ndriyathu nya nyamayi a dandridego khu tanga a gu mwalo gambe tshivba nga gale. Uye a nga vbeya tshivba khu gu mba kodza gu gira silo a nga ba a si kodza gu gira gale. U di nga dzi wudzisa gu khuwe: ‘Ina Jehovha a ngu nyi ninga lisima? Ina esi nyi giridego gasi gu thumeya Jehovha si phaside? Ina gyomo gilogyo nyi nga gireyago Jehovha?’

² Ha gu mba dzi garadza gasi gu mana mihlamulo nya siwudziso sesi, gukhodwa gwathu gu na vbola hi bwe hi ema gu khozeya Jehovha. Avba nya ndrima yeyi, hi na bhula khu matshina nya Bhibhiliya ma na hi phasago ha gu ba hi kanakana gu khethu  1) Jehovha a ngu hi ninga lisima, 2) hi hungide makungo nya yadi mwendro 3) hi nga si kodza gu gireya gilogyo Jehovha.

U NGA FUVISA KHARINI GU KANAKANA GWAGO

3. Khu yevbini mweyo nya dzindziya hi nga yi thumisago gasi gu fuvisa gu kanakana gwathu?

³ Mweyo nya dzindziya hi nga yi thumisago gasi fuvisa gu kanakana gwathu khu gu vbwetedzeya mihlamulo nya siwudziso sathu omu nya Lito la Nungungulu. Ha gu gira isoso, gukhodwa gwathu ga Jehovha ni wupari wathu naye wu na tiya nigu hi na simama na hi “tiyide gukhodwani.” — 1 Kor. 16:13.

4. Hi nga ‘tiyisega kharini khu silo satshavbo?’ (1 Vatesalonika 5:21)

⁴ Leri 1 Vatesalonika 5:21. Wona gu khuwe Bhibhiliya ya gu hi kutsa gu ‘tiyisega khu silo satshavbo.’ Hi nga gira kharini isoso? Ha gu ba hi si tiyisegi khu gilo nyo khaguri, hi yede gu wona esi Bhibhiliya yi ganeyago khu mahungu yoyo. Khu giyeyedzo, muphya nyo khaguri a nga dzi wudzisa gu khuye a na ni lisima mahoni ga Nungungulu gani. Ina a yede gu diga gu vbwetedzeya hlamulo nya giwudziso gegi? Ahihi. Uye a yede gu ‘tiyisega khu silo satshavbo,’ khu gu hevbula Bhibhiliya gasi guti esi Jehovha a pimisago khu mahungu yoyo.

5. Jehovha a na hi phasa kharini gu mana mihlamulo nya siwudziso sathu?

⁵ Tepo hi lerigo Bhibhiliya so gira gu khatshi Jehovha o ganeya ni ethu. Ganiolu, hi yede gu gira nya singi guvbindra gu leri Bhibhiliya basi ha gu ba hi vbweta gu mana mihlamulo nya siwudziso sathu. Hi yede gu vega gupima avba nya gu leri gwathu nya Bhibhiliya ga mahungu hi vbwetago gu mana mihlamulo. Hi nga gira isoso khu gu gira wugevisisi omu nya mabhuku yathu. (Mav. 2:3-6) Hi yede gu gombeya ga Jehovha ni gu mu lomba gasi a hi phasa gu mana hlamulo nya giwudziso gyathu. Khu gu landreya, hi nga vbwetedzeya matshina nya Bhibhiliya ni mahungu ma na hi phasago ga giemo gyathu. Nigu gambe hi nga phasega khu gu hevbula khu siyeyedzo nya vathu nyo tumbege si khumbugwago omu nya Bhibhiliya va nga tshangana ni sigaradzo nyo fane.

6. Mitshangano ya gu hi phasa kharini gu fuvisa gu kanakana gwathu?

⁶ Nigu gambe hi “napwa” Jehovha na ganeya ni ethu mitshanganoni. Ha gu dzi garadza gu hongola mitshanganoni, hi napwa dziganelo mwendro hlamulo wa muthu nyo khaguri wu na tshulago gu kanakana gwathu. (Mav. 27:17) Hongoleni hi wona esi hi na girago gasi gu fuvisa gu kanakana nyo khaguri.

GINANI U NGA GIRAGO WA GU BA U KANAKANA GU KHUWE JEHOVHA A NGU GU KHATHALEYA?

7. Khu gevbini giwudziso vambe va dzi girago?

⁷ U di nga dzi wudzisa gu khuwe: ‘Ina Jehovha a ngu nyi ninga lisima?’ Wa gu dzipwa na uri mwalo lisima, adzina u nga pimisa gu khuwe kha si kodzegi gu u gira wupari ni Muvangi nya mafu ni ndzadzi. Adzina saye Pfhumu Dhavhidhe a pimiside khu ndziya nyo fane. Uye a di gu hlamadziswa khu gu ba Jehovha a ninga lisima vathu. Uye a di khuye: “Pfhumu Nungungulu, ginani muthu nya gukala u mu alakanya? Mwamana wa muthu ginani nya gukala u mu khathalela?” (Ndzi. 144:3) Hi nga yi mana hayi mihlamulo nya siwudziso sesi?

8. Guya khu 1 Samuweli 16:6, 7, 10-12, ginani egi Jehovha a gi wonago ga vathu?

⁸ Omu nya Bhibhiliya, hi ngu hevbula gu khethu Jehovha a ngu wona vale va girago gu khatshi va mwalo lisima ga vambe. Khu giyeyedzo, Jehovha rumede Samuweli gu hongola ndrangani ga Jese gasi guya todza gimwegyo nya sanana saye kha nga Pfhumu yi nga hadzi gu fuma Israyeli. Ga sanana saye nya 8, Jese a di rana 7 nya iso gasi guya wonana ni Samuweli,  ganiolu kha rana Dhavhidhe, oyu nya nandra. b Ganiolu, Jehovha a di hatha Dhavhidhe. (Leri 1 Samuweli 16:6, 7, 10-12.) Jehovha a di wona monyo wa Dhavhidhe — a gu muphya a nga ba a ninga lisima silo nya liphuvbo.

9. Khu ginani u nga tiyisegago gu khuwe Jehovha a ngu gu ninga lisima? (Wona fotu.)

⁹ Dundrugeya khedzi Jehovha a yeyedzidego khidzo gu khuye a ngu gu ninga lisima. Uye a ngu gu ninga wusingalagadzi guya khu giemo gyago. (Ndzi. 32:8) Isoso so yeyedza gu khiso uye a ngu siti esi u si vbwetago. (Ndzi. 139:1) Tepo u thumisago wusingalagadzi wa Jehovha u bwe u wona edzi wu gu phasago khidzo, u na tiyisega gu khuwe Jehovha a ngu gu ninga lisima. (1 Dzik. 28:9; Mith. 17:26, 27) Jehovha a ngu wona satshavbo u girago gasi gu mu thumeya ni gu mu engisa. Uye gambe a ngu wona makhalelo nya yadi u gu nawo, nigu o vbweta gu khala pari yago. (Jer. 17:10) Jehovha o vbweta gu khuye u khala pari yaye. — 1 Joh. 4:19.

U NGA GIRA GINANI WA GU KANAKANA GU KHUWE U HUNGIDE MAKUNGO NYA YADI GALE?

10. Tepo hi dundrugeyago khu makungo hi hungidego gale, siwudziso muni hi nga dzi girago?

¹⁰ Dzimbe dzitepo, vathu nyo khaguri va nga dundrugeya khu makungo va hungidego gale va bwe va kanakana gu khavo va hungide makungo nya yadi. Adzina saye va digide thumo nya wadi wu nga ba wu va ninga dzitsapawu mwendro gu hunga gu mba pheya nogosi gasi gu gireya nya singi Jehovha. Ganiolu, isoso adzina si giregide gale. Avo adzina saye va nga dundrugeya khu vathu nyo khaguri va va tigo, va nga hunga makungo nyo hambane ni ayo yawe, nigu na vari ni dzitsapawu nya dzingi ni womi nyo khadzisege.  Kha nga handro wakone, va nga dzi wudzisa gu khavo: ‘Ina esi nyi dzi hiyidego gasi gu thumeya Jehovha si phaside? Mwendro esi nyi hungidego si di nyi gira nyi luza mathomo nyo mane dzitsapawu?’

11. Khu ginani mulovi nya Ndzimo 73 a nga ba a vbede tshivba?

¹¹ Wa gu ba u dzi gira siwudziso nyo fane, wona esi Bhibhiliya yi ganeyago khedzi mulovi nya Ndzimo 73 a dzipwidego khidzo. Uye a di wona vathu va nga ba va si thumeyi Jehovha na vari ni womi nya wadi, na va ghanyide nigu na va mwalo sigaradzo. (Ndzi. 73:3-5, 12) Tepo a nga wona gu khuye womi waye wu ngu gimbiya gwadi, isoso si di mu gira a dzipwa gu khatshi gudzigaradza a gu girago gasi gu thumeya Jehovha kha wu phasi gilo. Uye a di “gutshaniseka gikhati gyatshavbo” khu kotani nya esi a nga ba a si pimisa. (Ndzi. 73:13, 14) Uye a emisanide kharini ni gu dzipwa gwaye nya mba gwadi?

12. Guya khu Ndzimo 73:16-18, mulovi yoyu a pade kharini gudzipwa gwaye nya mba gwadi?

¹² Leri Ndzimo 73:16-18. Muembi nya dzindzimo a di hongola ga wulanga nya gurule, tempeleni ga Jehovha. Iyoyo a si kodzide gu pimisa khu ndziya nya yadi. Uye a wonide gu khuye ambari olu vathu vale va nga ba vari ni womi nyo khadzisege, va diri mwalo gutumba nya wumindru. Gu dundrugeya khesi, si mu ningide gurula mapimoni, khu gu dziti gu khuye gu thangisa silo nya liphuvbo makungo nya yadi a hungidego womini. Kha nga handro wakone, a di gu dzi emisede gu simama gu thumeya Jehovha. — Ndzi. 73:23-28.

13. Hi nga gira ginani ha gu ba hi kanakaneya makungo hi hungidego gale? (Wona fotu.)

¹³ Gu fana ni esi mulovi a giridego, anuwe u nga pala gudzipwa gwago nya mba gwadi. Khu ndziya muni? Dundrugeya khu silo nya sadi u gu naso, gu pata olu u tsakedwago khu Jehovha  u bwe u dundruga gu khuwe vale va gu mba mu thumeya va mwalo giphaso gyaye. Ga vathu nya vangi va gu mba thumeya Jehovha, gu manega ni womi nyo khadzisege gilo nya lisima ngudzu kholu va mwalo gutumba nya wumindru. Ganiolu, avbo gwago Jehovha a gu tumbisa gu gu kategisa khu ndziya u gu mba yi dundrugeya. (Ndzi. 145:16) Gu diga isoso, dundrugeya khu giwudziso gegi: Ina u di hadzi gu dziti edzi womi wago wu nga hadzi gu khala khidzo nari khatshi u di hungide makungo nyo hambane? Ganiolu, u nga tiyisega gu khuwe: Tepo u hungago makungo kholu u haladzago Nungungulu ni vambe, tepo yatshavbo u na mana silo womini gwago si na gu girago u tsaka ngudzu.

WA GU BA U PIMISA GU KHUWE JEHOVHA KHA NINGI LISIMA ESI U GIRAGO

14. Sithumi nyo khaguri sa Jehovha somo ga giemo muni, nigu giwudziso muni si nga dzi girago?

¹⁴ Sithumi nyo khaguri sa Jehovha kha si kodzi gambe gu gira esi si si vbwetago khu kotani nya olu si dandridego khu tanga, sigaradzo nya madwali mwendro simbe sitshetsheya. Khu kharato, iso si nga dzipwa na si mwalo lisima ga Jehovha. Iso si nga dzi wudzisa gu khiso: ‘Ina nyi na ni lisima ga Jehovha?’

15. Mulovi nya Ndzimo 71 a di gu tiyisega khu ginani?

¹⁵ Mulovi nya Ndzimo 71 a dzipwide khu ndziya nyo fane. Uye a gombede gu khuye: “U nga nyi dzudzugi olu nyi vbeledwego khu tshivba.” (Ndzi. 71:9, 18) Khu kharato, muembi nya dzindzimo simamide gu tiyisega gu khuye a gu thumeya Nungungulu khu gu tumbega, Jehovha a di hadzi gu mu thangeya ni gu mu phasa. Muembi nya dzindzimo hevbude gu khuye Jehovha a ngu tsakeya vale va girago esi va si kodzago gasi gu mu thumeya ambari na vari ni gu hegedwa nyo khaguri.— Ndzi. 37:23-25.

16. Ava va dandridego khu tanga va na ni lisima ga Jehovha khu ndziya muni? (Ndzimo 92:12-15)

¹⁶ Wa gu ba u dandride khu tanga, dundrugeya  edzi Jehovha a gu wonago khidzo. Uye a nga gu phasa gu mu thumeya ambari na wuri ni sitshetsheya nya singi. (Leri Ndzimo 92:12-15.) Wulangani nyo vege gupima ga esi u gu mba si kodza gu gira gambe, vega gupima ga esi u si kodzago gu gira. Khu giyeyedzo, u nga tiyisa vambe khu giyeyedzo gyago nya gukhodwa ni edzi u pharago khidzo vambe. U nga embeya vambe edzi Jehovha a gu phasidego khidzo khu myaga nya yingi ni situmbiso nya Bhibhiliya u si vireyago khu maho nyo fuviye gasi gu tadzisega mindru wa tshigu. Nigu gambe, u nga divali gu khuwe milombelo u gireyago vambe yi ngu phasa. (1 Ped. 3:12) Na si si khatadzisegi siemo hi gomogo ga iso, hatshavbo hi na ni gilo nyo khaguri gasi gu ninga Jehovha ni vambe.

17. Khu ginani hi yedego gu potsa gu dzi fananisa ni vambe?

¹⁷ Wa gu ba u garadzega khu gu ba u si si kodzi gu gireya nya singi Jehovha, tiyisega gu khuwe a ngu ninga lisima esi u mu gireyago. Adzina u na zama gu fananisa esi u girago ni esi vambe va girago. Ganiolu, u nga gire isoso. Khu ginani? Kholu Jehovha kha hi fananise ni vambe. (Gal. 6:4) Khu giyeyedzo, Mariya ningide Jesu mafura nyo dhure ngudzu, nyo nungeye gwadi. (Joh. 12:3-5) Gu hambana ni Mariya, noni nya gisiwana yi ningede singerengere sivili, nya mba na lisima. (Luka 21:1-4) Ganiolu, Jesu kha fananisa vanyamayi vava vavavili. Wulangani nya isoso, uye a wonide gu khuye Mariya ni noni va di gu yeyedza gukhodwa. Jesu a ngu pimedzeya Papayi waye khu gu vbeleya. Khu kharato, u nga tiyisega gu khuye Jehovha a ngu wona satshavbo u girago khu lihaladzo ambari nari sidugwana avbo gwago.

18. Ginani gi na hi phasago gu fuvisa gukanakana gwathu? (Wona kwadru yi gu khiyo “ Lito la Jehovha li na gu phasa gu fuvisa gukanakana gwago.”)

¹⁸ Hatshavbo hi ngu kanakana dzimbe dzitepo. Ganiolu, kha nga hi hevbudego, Bhibhiliya yi nga hi phasa gu fuvisa gu kanakana gogo. Khu kharato, gira satshavbo u si kodzago gasi gu mana mihlamulo yago, nigu isoso si na gu phasa gu tiya wulangani nyo vbeye tshivba. Jehovha a ngu guti gwadi. Uye a ngu ninga lisima gudzigaradza u gu girago nigu a dzi emisede gu gu tshatshazeya. Tiyisega gu khuwe Jehovha a ngu haladza ni gu khathaleya gimwegyo ni gimwegyo nya sithumi saye nyo tumbege.