Vharandha mwendro likupakupa, yi di di gu thuma kha nga mwanya nya wulanga nya guage nya tempele. Guya khu Tradução do Novo Mundo das Escrituras Sagradas yi nga duswa hwane nya 2023, ‘likupakupa la mbeli nya nyangwa nya Nyumba, li diri ni magumavili mikono, li fanana ni pimo nya gulaphe nya Nyumba; li diri gambe ni lizana ni magumavili (120) mikono gulapha guya vbatshani.’ (2 Dzik. 3:4) Wumbe wuvbindrugedzeyi wu ngu ganeya nuwo gu khuwo likupakupa li diri ni “120 mikono gulapha guya vbatshani” si gira gu li manega ni 53 dzimetru (175-pés)!

Ambari ulolo, Tradução do Novo Mundo yi nga ghandlwa khu 2023 ya gu ganeya khu likupakupa nya tempeli ya Solomoni gu khiyo: “Gukhugega gwalo gu diri nya 20 mikono” mwendro 9 dzimetru (30 pés) khu gukhugega. a Wona sighelo nyo khaguri si nga gira gu gu girwa guvbindrugedza gogu.

Gukhugega nya likupakupa kha gu khumbugwi omu ga 1 Dzipfhumu 6:3. Avba nya livhesi leli, Jeremiya a khumbugide gulapha ni gueta nya likupakupa nasiri gukhugega. Avba nya gipimo gi landreyago a gu tshamuseya gwadi esi si gu romo tempeleni, gupata ni yiphwa nya sugu nya gu nyiviligiswe, 10 dzikareta mwendro sirandro ni madingo mavili nya sugu ma nga ba ma manega vbavbandzi nya likupakupa. (1 Dzipf. 7:15-37) Abari gu khu lisine likupakupa li diri ni 50 dzimetru ni gu vbindra nigu yi di gu vbindra tempele, khu ginani Jeremiya a nga mba ganeya khu gukhugega gwalo? Ambari hwane nya myaga nya yingi, Vajudha va nga ba vari valovi va ganede gu khavo likupakupa kha li nga ba li laphide guvbindra tempele ya Solomoni.

Vahevbuli va gu kanakana gu khavo dziparedhi nya tempeli dzi di hadzi gu si kodza gu seketeya likupakupa nya 120 dzimetru khu gukhugega. Gale, dzinyumba nyo laphe ngudzu nyo girwe khu dzitijolu ni siwindri, nya nga malimba nya tempele yi nga ba yi romo Egipto, dzi di gu laphide ngudzu ni gu gula mahegisotuno gwakone. Ganiolu, tempeli ya Solomoni yi di gu hambanide. Vahevbuli vari khavo dziparedhi dzakone dzi diri mwalo guvbindra tanga nya 6 mikono mwendro 2,7 dzimetru (9 pés), khu gu gula. Mulovi nya matimo Theodor Busink a di hunga gu khuye: “Guya khu gugula nya paredhi yi gomogo [vbamwanyatuno nya tempeli], likupakupa li di hadzi gu mba manega ni 120 mikono [khu gukhugega].”

Libhuku la 2 Dzikoronika 3:4 adzina saye kha la kopiyarwi gwadi. Ambari olu yimbe milowo nya mandza gu nga lowa gupwani “120” omu nya livhesi leli, yimbe milowo nyo tumbege nya nga Codex Alexandrinus do século V ni Codex Ambrosianus do século VI, ya gu ganeya khu “20 mikono.” Khu ginani hi ganeyago gu khethu mulovi yoyo a di lova “120” nya mba dziti? Malito ma gu khayo “cem” ni “mikono” khu Gihebheru ma ngu fana. Khu kharato, mulovi yoyo adzina saye a di lova lito “cem” wulangani nya “mikono.”

Lisine gu, ambari olu hi dzi garadzago gasi gu pwisisa satshavbo esi si nga ba si patega avba nya tempele ya Solomoni ni edzi yi nga ba yiri idzo, hi ngu vega gupima ngudzu-ngudzu ga esi si emeyago tempele yoyo, a gu tempele nya yikhongolo ya liphuvboni. Hi ngu bonga ngudzu khu gu ba Jehovha a kovhidharide sithumi saye satshavbo gasi gu mu khozeya omu nya tempele yeyi! — Hebh. 9:11-14; Gutu. 3:12; 7:9-17.