VAISRAYELI va di gu gola ngudzu dzindzimo. Bhibhiliya dzitepo nya dzingi yi ngu khumbuga vathu na va gu womba mwendro gu emba. Gipandre nya gikhongolo nya Bhibhiliya gya gu wumbwa khu dzindzimo. Khu giyeyedzo, libhuku la Dzindzimo, Gizimba gya Solomoni ni Gililo. Libhuku li ganeyago khu womi dziteponi nya Bhibhiliya, la gu ganeya gu khilo Bhibhiliya yi ngu vega guagani gu khiyo Vaisrayeli va di gu thumisa dzindzimo omu nya mithumo nya yingi womini gwawe.

Ndzimo tshigu ni tshigu. Vaisrayeli va di gu womba dzindzimo gasi gu yeyedza edzi va nga ba va dzipwa khidzo. (Isa. 30:29) Vanyamayi va di gu womba mitandrandra na va gu embeleya khu gu tsaka ni gu hana umo nya dzifesta nya gu emiswe nya dzipfhumu, dzifesta nya gu pale nyimbitunu ni dzimbe dzifesta. (Val. 11:34; 1 Sam. 18:6, 7; 1 Dzipf. 1:39, 40) Nigu Vaisrayeli va di gu womba dzindzimo gasi gu yeyedza gu garadzega gwawe va gu luza gigodwa gyawe. (2 Dzik. 35:25) Somo guagani gu khiso Vaisrayeli va di gu gola ngudzu dzindzimo.

Dzipfhumu dza Israyeli dzi di gu gola Dzindzimo. Dzipfhumu dza Israyeli dzi di gu tsaka khu gu engiseya Dzindzimo. Pfhumu Sawule a di rana Dhavhidhe nyumbani gwaye nya wufumo gasi guya thuma kha nga muembeleyi. (1 Sam. 16:18, 23) Khu gu landreya, tepo Dhavhidhe a nga khala pfhumu a di gira ni gu lova dzindzimo nyo mbure ngudzu a bwe a hatha dzindzimo dzi nga hadzi gu embwa tempeleni ga Jehovha. (2 Dzik. 7:6; Amosi 6:5) Pfhumu Solomoni a diri ni vaembeleyi nya vama ni vanyamayi nyumbani gwaye nya wufumo. — Muh. 2:8.

Vaisrayeli va thumiside dzindzimo avba nya wukhozeyi wawe. Khu lisine, 4000 Vaembeleyi va di gu womba dzindzimo tempeleni, Jerusalema. (1 Dzik. 23:5) Va di gu womba siphaphato nya dzisimbi, sitendre, dzimbila ni mipundru. (2 Dzik. 5:12) Ganiolu, vaembeleyi vovo khandri avo basi va nga ba va embeleya dzindzimo gasi gu khozeya Jehovha. Vaisrayeli nya vangi va di gu embeleya dzindzimo tepo khiyo va nga ba va endra va hongola Jerusalema, dziteponi nya dzifesta. (Ndzi. 120–134) Nigu guya khesi si lovidwego khu Vajudha, Vaisrayeli va di gu embeleya dzindzimo nyo khaguri nya libhuku la Ndzimo a ndrani nya Phasika.

Dzindzimo dzi na ni lisima ga sithumi sa Nungungulu muhuno. (Jak. 5:13) Gu embeleya gipandre nya wukhozeyi wathu. (Efes. 5:19) Dzindzimo dzi ngu engedzeya gu hi tshanganisa ni vandriyathu. (Kol. 3:16) Nigu dzi ngu hi tiyisa tepo hi tshanganago ni sigaradzo. (Mith. 16:25) Ndziya nya mbure gasi gu yeyedza gukhodwa gwathu ga Jehovha ni lihaladzo lathu, khu gu embeleya dzindzimo.