1. Konvhite muni eyi Jesu a ningidego vagogi vale nya 4 nigu ginani va giridego?

PEDRO, Andreya, Jakobe ni Johane va diri vagogi ni varengisi nya dzindzandzi. Nga dundruga khedzi va nga hlamala khidzo tepo va ngapwa malito yaya ya Jesu: “Nyi landreni, nyi na mi gira vagogi nya vathu.” * Ginani va giridego? Bhibhiliya yari khiyo: “Va di dzegela gu diga dzikhoga, va mu Iandra.” (Mat. 4:18-22) Isoso si vbindrugedzide womi wawe watshavbo. Wulangani nyo goge dzindzandzi, avo va di hadzi khala ‘vagogi nya vathu.’ (Luka 5:10) Muhuno nugo, Jesu a ngu kutsa vathu nya gudzinogise va golago lisine gasi gu gira sasimweso. (Mat. 28:19, 20) Ina u dzumede konvhite yeyi ya Jesu?

2. Khu ginani hi yedego gu dundrugeya gwadi na hi si hungi gu khala vagogi nya vathu nigu ginani gi na hi phasago gu hunga isoso?

² Si nga gira nu gu hevbula Bhibhiliya nigu u vbindrugedzide silo nyo khaguri womini wago. Olu u yede gu hunga gu khuwe u na khala muhuweleyi nya mahungu nya yadi mwendro ne. Wa gu ba u kanakana gu dzumeya thumo wowo, u nga vbeyi tshivba. Gukanakana gwago go yeyedza gu khugo u ngu dziti gu khuwe thumo wowu i thumo nya lisima ngudzu. Ambari olu Bhibhiliya yi ganeyago gu khiyo Pedro ni dzipari dzaye “va di dzegela” gu diga dzikhoga, kha si thuli gu khiso avo va di gira isoso nya mba pheya khu gu pimisa. Gu di vbindride 6 migima na va gu khodwe gu khavo Jesu khuye Mesiya. (Joh. 1:35-42) Khu ndziya nyo fane, si nga gira na wu hevbude silo nya singi maningano ni Jehovha ni Jesu nigu u ngu dzina gu dandra khu liphuvboni. Ganiolu na wu si hungi  gu khala muhuweleyi, gu vbwetega u pheya khu gu dundrugeya gwadi khiso. Ginani gi phasidego Pedro, Andreya ni vambe gu hunga isoso?

3. Makhalelo muni ma na gu phasago gu mba kanakana gu dzumeya thumo nyo gire vapizane?

³ Vapizane nyo pheye va Jesu va diri ni sighingi, gutiya-hwambo, va di gu wuti gwadi thumo va nga ba va gira nigu va di gu timiseya. Makhalelo yaya ma va phaside gu khala vagogi nya vadi nya vathu. Ndrima yeyi yi na ganeya khedzi u nga haguleyago khidzo makhalelo yaya gasi u si kodza gu gira gwadi thumo nyo gire vapizane va Kristo.

4. Khu ginani Pedro a nga ba ari mugogi?

⁴ Pedro a di gu goga dzindzandzi gasi gu sayisa ndranga yaye. Ganiolu, uye kha nga ba a gira thumo wowo khu gu manega, uye a di gu wu gola thumo wowo. (Joh. 21:3, 9-15) Uye hevbude gambe gu gola thumo nyo goge vathu. Nigu khu gu phaswa khu Jehovha, Pedro khade mugogi nya wadi nya vathu. — Mith. 2:14, 41.

5. Guya khu Luka 5:8-11, khu ginani Pedro a nga thava nigu ginani gi na hi phasago nethu gu pala hwanga?

⁵ Gighelo nya lisima ngudzu gi hi girago hi tshumayela khu gu hi ngu haladza Jehovha. Lihaladzo lathu khu Jehovha li na hi phasa gu pala watshavbo hwanga hi gu nawo. Tepo Jesu a nga rana Pedro gasi gu khala mugogi nya vathu, a di mu embeya khuye: “U nga thavi.” (Leri Luka 5:8-11.) Pedro kha thava esi si nga hadzi dugeleya a gu khala mupizane wa Kristo. Wulangani nya isoso, uye a di samadziswa khu dzindzandzi nya dzingi edzi Jesu a nga ba a mu phaside gu goga. Khu kotani nya olu Jesu a giridego gilewugiso, Pedro a di dzipwa na si ninganedwi khu gu thuma ni Jesu. Gu fana ni Pedro, si nga gira anuwe u thava. Adzina u nga garadzega khesi u yedego gu gira gasi gu khala mupizane wa Kristo. Wa gu ba u dzipwa kharato, tiyisa wupari wago ni  Jehovha, ni Jesu, ni vavhizinyu mwendro vathu u tivanago navo. Wa gu gira isoso u na dzipwa na wu dongide gu khala mugogi nya vathu. — Mat. 22:37, 39; Joh. 14:15.

6. Khu sevbini simbe sighelo si hi girago hi tshumayela?

⁶ Gu na ni simbe sighelo si hi girago hi tshumayela. Ho vbweta gu engisa gileletelo gya Jesu gi gu khigyo: “Indrani mu gimbila mu [gira vapizane, NM].” (Mat. 28:19, 20) Gimbe gambe khu gu vathu va “garade havo hokohoko, kha nga dzinvuta nyambana muhavisi” nigu va na ni gudogoreya nya gukhongolo nyo hevbule lisine maningano ni Mufumo wa Nungungulu. (Mat. 9:36) Jehovha o vbweta gu khuye vathu vatshavbo vati lisine gasi va vbulugiswa. — 1 Thim. 2:4.

7. Varoma 10:13-15, o yeyedza kharini gu khuye gutshumayela gu na ni lisima?

⁷ Gu dundrugeya khedzi thumo wathu nyo tshumayele wu nga vbulugisago khidzo vathu si na engedzeya gudogoreya gwathu nyo vbwete gu tshumayela. Gu hambana ni vagogi nya dzindzandzi va hodzago ni gu rengisa dzindzandzi va gogago, ethu ha gu “goga” vathu gasi gu vbulugisa womi wawe. — Leri Varoma 10:13-15; 1 Thim. 4:16.

8-9. Ginani egi mugogi nya dzindzandzi a yedego gu giti nigu khu ginani?

⁸ Matshiguni ya Jesu, vagogi nya vaIsrayeli va di yede guti lifumbo nya silo sa phwani va nga ba va vbweta gu goga. (Levhi 11:9-12) Va di yede guti gambe omu va nga manago dzindzandzi nya dzingi. Gutala nya dzitepo dzindzandzi dzo manega omu nya mati dzi kodzago gu sihala ni omu gu gu ni guhodza nya gungi. Ganiolu, ina gu ni tepo nyo khaguri hi yedego gu goga khiyo? Misiyonariyo moyo a vbanyago gidwani gya Pacífico tugude gu khuye khandri tepo yatshavbo si kodzegago gu goga dzindzandzi. Ndriyathu nyo khaguri a di mu rana gasi vaya goga dzindzandzi. Misiyonariyo yoyu a di khuye: “Hi na manana mindru khu dzi 9 ora.” Ndriyathu wule a hlamula, khuye: “U ngu dziti, khandrethu hi dzi hatheyago tepo nyo goge khiyo ganiolu ho landra tshigu.”

⁹ Khu ndziya nyo fane, vapizane va Jesu va di gu hongola omu va nga ba va dziti gu khavo gu na ni vathu khu tepo yoyo. Khu giyeyedzo, vapizane va Jesu va di gu tshumayela omu nya dzitempele, omu nya dzisinagoga, khu ndranga ni ndranga ni mudzibazarini. (Mith. 5:42; 17:17; 18:4) Anethu gu vbwetega hiti tepo nya yadi hi nga manago khiyo vathu va gipandreni hi tshumayelago umo. Gu vbwetega hi dzi emiseya gu tshumayela khu tepo ni wulanga gu manegago vathu. — 1 Kor. 9:19-23.

10. Dziferameta muni edzi hengeledzano ya Jehovha yi hi ningago?

¹⁰ Mugogi gu vbwetega a manega ni satshavbo si vbwetegago gasi gu goga khiso a bwe a kodza gu si thumisa gwadi. Anethu gu vbwetega hi manega ni satshavbo si vbwetegago gasi hi tshumayela khiso hi bwe hiti edzi hi nga si thumisago khidzo. Jesu hevbudzide vapizane vaye edzi va nga tshumayelago khidzo mahungu nya yadi a bwe a va embeya omu va nga ba va yede gu tshumayela umo ni esi va nga ba va yede gu ganeya. (Mat. 10:5-7; Luka 10:1-11) Hengeledzano ya Jehovha muhuno, yi ngu dusa dziferameta nyo hevbudze khidzo dzi hi phasago thumoni nyo tshumayele. * Nigu yi ngu hi hevbudza edzi hi nga dzi thumisago khidzo. Isoso si ngu hi phasa guti edzi hi nga tshumayelago khidzo ni edzi hi nga khalago khidzo vahevbudzi nya vadi. — 2 Thim. 2:15.

11. Khu ginani si vbwetago gu tiya hwambo gasi gu khala vagogi nya vathu?

¹¹ Vagogi nya dzindzandzi gu vbwetega va tiya hwambo kholu dzimbe dzitepo va ngu emisana  ni sigaradzo thumoni gwawe. Dzitepo nya dzingi vagogi nya dzindzandzi va gu thuma ni wutshigu ni omu nya mati nya makhongolo si garadzago gu duga go veta phuvbo nya yikhongolo. Vagogi nya vathu va ngu fana ni vagogi nya dzindzandzi, anavo gu vbwetega va tiya hwambo. Tepo hi pheyago gu tshumayela ha gu dzi tivegisa kha nga Dzifakazi dza Jehovha, khu kharato hi nga emisana ni “dzi phuvbo nya dzikhongolo” nya nga gu wugedwa khu valongo, gu hegwa khu dzipari ni gu vathu va si hakhi mahungu yathu. Ganiolu, isoso kha si pheyi khethu. Vapizane va Jesu navo va emisanide ni gu wugedwa thumoni gwawe nyo tshumayele. — Mat. 10:16.

12. Guya khu Josuwa 1:7-9, ginani gi na hi phasago gu tiya hwambo?

¹² Ginani gi nga hi phasago gu manega ni gutiya-hwambo? Nyo pheye, gu vbwetega hi khodwa gu khethu Jesu khuye a thangeyago thumo nyo tshumayele. (Joh. 16:33; Gutu. 14:14-16) Nya wuvili, tiyisa gukhodwa gwago ga situmbiso sa Jehovha. (Mat. 6:32-34) Tepo u yago u tiyisa gu khodwa gwago, gutiya-hwambo gwago gu na engedzeya. Pedro ni vambe vapizane va yeyedzide gukhodwa nyo tiye tepo va nga diga thumo wawe nyo goge gasi va landreya Jesu. Khu gu fana, u nga yeyedza gukhodwa nyo tiye khu gu embeya dzipari dzago ni valongo vago edzi gu hevbula Bhibhiliya ni Dzifakazi dza Jehovha ni gu manega mitshanganoni si gu phasidego khidzo. Kha si kanakanisi gu khiso u giride gu vbindrugedza nya gukhongolo gasi gu pwananisa mavbanyelo yago ni matshina nya milayo ya Jehovha. Gasi gu gira isoso, si vbwetide gukhodwa ni gutiya-hwambo. Wa gu simama gu  yeyedza gutiya-hwambo, tiyisega gu khuwe ‘Jehovha Nungungulu wago, a na bani ari nago gwatshavbo umo u na gimbilago khumo.’ — Leri Josuwa 1:7-9.

13. Nombelo ni gu dundrugeya khedzi Jehovha a hi phasago khidzo gu emisana ni sigaradzo si nga hi phasa kharini gu tiya hwambo?

¹³ Ginani gambe gi nga hi phasago gu tiya hwambo? Gombeya ga Jehovha gasi a gu ninga gutiya-hwambo. (Mith. 4:29, 31) Jehovha a na hlamula milombelo yago nigu gima kha na nga gu diga. Tepo yatshavbo a na gu phasa. Gimbe gambe, gu dundrugeya khedzi Jehovha a phasidego khidzo sithumi saye gale. Dundrugeya khedzi a gu phasago khidzo gu emisana ni sigaradzo ni edzi a gu phasago khidzo gu vbindrugedza silo nyo khaguri womini wago. Tiyisega gu khuwe Jehovha phasidego vathu vaye gu tshatuga Yiphwa nya Gufuviye nigu a na gu phasa nuwe gu khala mupizane wa Jesu Kristo. (Ekiso. 14:13) Manega ni gu tiyisega nga ogu ga mulovi nya dzindzimo, tepo a nga khuye: ‘Jehovha Nungungulu a na ni eni, kha nyi thavi gilo; a nga nyi gira ginani muthu?’ — Ndzi. 118:6.

14. Ginani u gi hevbulago avba nya giyeyedzo gya Masae ni Tomoyo?

¹⁴ Yimbe ndziya yi nga hi phasago gu manega ni gutiya-hwambo gu hevbula khedzi Jehovha a phasidego khidzo vathu nya hwanga gu tshumayela mahungu nya yadi. Wona giyeyedzo gya ndriyathu moyo nya nyamayi nyo pwani khu Masae. Uye a diri ni hwanga nya wukhongolo nigu a di gu pimisa gu khuye gima kha na nga tshuka a si kodza gu tshumayela. A gu pimisa khu gu tshumayela, si di gu mu vbedza tshivba. Ganiolu, uye a dzi garadzide ngudzu gasi gu engedzeya lihaladzo laye khu Nungungulu ni vathu. Dundrugede khu givbiredza nya gu tshumayele mahungu nya yadi ga tepo yeyi hi vbanyago ga iyo a bwe a lomba Jehovha gu a mu engedzeya gudogoreya gwaye nyo tshumayele. Uye pade hwanga a nga ba ari nawo nigu olu a gu thuma kha nga piyonero nya tepo yatshavbo. Jehovha a nga phasa vahuweleyi nya vaphya “gu tiya hwambo.” Wona esi si nga dugeleya ndriyathu moyo nya nyamayi nyo pwani khu Tomoyo. Tepo a nga pheya gu tshumayela khu ndranga ni ndranga, ga ndranga nyo pheye a nga beya, mune ndranga a di mu vbenyeya, khuye: “Nyi mwalo tepo nanu enu Dzifakazi dza Jehovha!” a sega lidimba. Tomoyo khu gutiya-hwambo a di embeya pari yaye khuye: “U si pwide isoso? Uye kha vireya gu khuye nyi tula likana, a di dzegeya gu tugula gu khuye nyi Fakazi ya Jehovha. Nyi tsakide ngudzu!” Tomoyo olu a gu thuma kha nga piyonero nya tepo yatshavbo.

15. Ginani gutimiseya nigu khu ginani isoso si gu na ni lisima ga maKristo?

¹⁵ Gasi gu mugogi a dugeleya thumoni gwaye gu vbwetega a timiseya. Gutimiseya so thula “makodzelo aya muthu a gu nawo nyo dzi garadzeye gu gira esi si vbwetegago.” Mugogi nya dzindzandzi gu vbwetega a dzi dongiseya gwadi ni gu dzi garadza gasi a kodza gu emisana ni dziphuvbo nya dzikhongolo go tshuka tepo yi vbindrugedza. Anethu gu vbwetega hi dzi dongiseya gwadi ni gu dzigaradza gasi hi kodza gu gira thumo wathu nyo tshumayele. — Mat. 10:22.

16. Ginani gi nga hi phasago gu gira silo nyo garadze?

¹⁶ Gutimiseya khandri gilo hi velegwago nagyo. Ethu khu tumbunugo wathu ha gu oloveya gu gira silo si hi vbevbugeyago basi. Ganiolu, dzimbe dzitepo si na vbweta gu hi dzi garadza gasi gu gira silo nya lisima ngudzu. Khu kharato, gu vbwetega hi hevbula gutimiseya gasi hi kodza gu gira silo nyo garadze. Ganiolu, isoso kha hi na nga si gira khu tshivba yathu basi. Jehovha a na hi phasa khu gu thumisa liphuvbo laye nya guage. — Gal. 5:22, 23.

17. Guya khu 1 Vakorinto 9:25-27, mupostoli Pawulo a gu gu tshamuseya kharini gu dzigaradza gwaye gasi a haguleya gutimiseya?

¹⁷ Mupostoli Pawulo a di gu timiseya. Ganiolu,  isoso kha sa nga ba si mu vbevbugeya, uye a di gu “dwana” ni givili gyaye gasi gu gira silo nya sadi. (Leri 1 Vakorinto 9:25-27.) Uye kutside mambe maKristo gu timiseya ni gu gira satshavbo “khu githawo ni nayo.” (1 Kor. 14:40) Gasi gu hi simama gu khozeya Jehovha gu vbwetega hi dzi garadzeya gu tshumayela mahungu nya yadi ni gu hevbudza lisine vambe. — Mith. 2:46.

18. Ginani gi na girago gu hiri vathu nya lisima ga Jehovha?

¹⁸ Gu dugeleya ga mugogi nya dzindzandzi ga guya khu pimo nya dzindzandzi a gogago. Ganiolu, ethu gu dugeleya gwathu kha guyi khu tengo nya vathu hi va phasago gu beya hengeledzanoni ya Jehovha. (Luka 8:11-15) Gu hambana ni isoso, tepo hi simamago gu dzigaradzeya gu tshumayela mahungu nya yadi ni gu hevbudza vambe lisine, Jehovha a ngu gu wona gudzigaradza gwathu nigu a ngu gu ninga ngudzu lisima. Khu ginani hi ganeyago isoso? Khu gu, tepo hi simamago gu gira thumo wowu, ha gu yeyedza gu khethu hi ngu engisa Jehovha ni mwanaye Jesu. — Marko 13:10; Mith. 5:28, 29.

19-20. Khu gevbi gimbe gighelo gi hi girago hi tshumayela mahungu nya yadi olu kamo?

¹⁹ Omu nya mambe mayigo, vagogi vo dzumeledwa gu goga khu migima nyo khaguri basi. Ga malanga yaya, mugogi gu vbwetega a londrola gwadi tepo. Gu fana ni vagogi vovo nya dzindzandzi, anethu gu vbwetega hi londrola gwadi tepo, hi tshumayela olu kamo, kholu mahegiso nya litigo momo vbafuvbi. Nigu tepo yi tshadego gasi gu phasa vathu gu vbuluga yidugwana kamo ngudzu. Khu kharato, u nga khali mihuni, simama gu gira satshavbo u si kodzago womini wago gasi gu phasa vathu gu hevbula lisine.— Muh. 11:4.

²⁰ Engedzeya gudogoreya gwago nyo tshumayele, guti u gu nago khu Bhibhiliya, u hevbuleya dzimbe dzindziya nyo tshumayele khidzo, u tiya hwambo u bwe u timiseya. Dzipate ni vathu va vbindrago 8 dzimiliyoni, va tshumayelago mahungu nya yadi mafuni gwatshavbo. Wa gu gira isoso, u na mana litsako nya likhongolo nyo thumeye Jehovha. (Neh. 8:10) Dzi emiseye gu gira satshavbo u si kodzago gasi gu simama u tshumayela kala mahegiso. Omu nya ndrima yi landreyago hi na bhula khu silo siraru si na hi phasago gu simama gu tshumayela mahungu nya yadi nya Mufumo wa Nungungulu.