1. Lini si nga hi garadzeyago gu khozeya Jehovha?

KHU yevbini tepo u si wonago na si gu garadzeya gu khozeya Jehovha? Khu tepo u emisanago ni sigaradzo mwendro khu tepo u gu mwalo sigaradzo? Tepo hi tshanganago ni sigaradzo si ngu hi vbevbugeya gu tumba Jehovha. Ganiolu, ahati tepo hi gu mwalo sigaradzo ke, ginani hi girago? Ina si ngu hi vbevbugeya gu divala gu ninga lisima wukhozeyi wathu ga Jehovha? Jehovha gengedzide vaIsrayeli khu mhango yoyo. — Dhet. 6:10-12.

2. Giyeyedzo muni nya gyadi hi vegedwego khu Pfhumu Asa?

² Pfhumu Asa, giyeyedzo nya gyadi nya muthu a tumbidego Jehovha khu guvbeleya. Uye thumede Jehovha dziteponi nya sigaradzo ni dziteponi nya gurula. Gukhugeya gale, “Asa a diri ni monyo wu lulamidego mbeli ga PFHUMU Nungungulu.” (1 Dzipf. 15:14) Gimwegyo nya silo si giridwego khu Asa, gi yeyedzidego gu khigyo a di gu khozeya Jehovha khu monyo waye watshavbo khu gu fuvisa wukhozeyi nya malipha Judha. Bhibhiliya yari khiyo: “A di fuvisa siluvelo nya vanungungulu nya malipha, ni malangani nya sigomo, a khungumulela madingo, a pandrelela gifananiso gya nungungulu Asitaroti.” (2 Dzik. 14:3, 5) Uye a di bwe a dusa vhovho waye khu vbagikhalotunu nya lisima. Khu ginani? Khu gu vhovho waye a di gu kutsa vathu gu khozeya gifananiso nyo khaguri. — 1 Dzipf. 15:11-13.

3. Hi na bhula khu ginani avba nya ndrima yeyi?

³ Asa giride silo nya singi nyo vbindre gu fuvisa wukhozeyi nya malipha. Uye a di andrisa wukhozeyi nya lisine a bwe a phasa vathu va Judha gu bweleya ga Jehovha. Jehovha kategiside Asa ni vathu va Judha teponi nya gurula. Khu tanga nya 10 myaga, ndrani  nya gufuma ga Asa, ‘tigoni gu manegide gurula.’ * (2 Dzik. 14:1, 4, 6) Avba nya ndrima yeyi, hi na ganeya khedzi Asa a yi thumisidego khidzo tepo nya gurula. Khavbovbo, hi na vbedza hi ganeya khu giyeyedzo gya vandriyathu va lizana-myaga nyo pheye. Gufana ni Asa, avo va si kodzide gu londrola gwadi tepo va nga ba vari ni gurula. Khu gu hegisa, hi na hlamula giwudziso gegi: Wa gu ba u vbanya tigoni omu mu tshulegidego gu khozeya Jehovha, u nga yi thumisa kharini tepo yoyo khu wugengeyi?

4. Guya 2 Dzikoronika 14:2, 6, 7, Asa yi thumiside kharini tepo nya gurula?

⁴ Leri 2 Dzikoronika 14:2, 6, 7. Asa a di embeya vathu gu khuye khu Jehovha a nga ba a va “ningide guhefemula.” Asa kha khala khu mawogo teponi yile nya gurule. Wulangani nya isoso, a thumiside tepo yile gasi gu vbaha madhoropa, mabhiyo nya madhoropa, dzilangwe ni malimba. Uye a di embeya vathu va Judha khuye: “Litigo li ngari gurulani vbakari gwathu.” A di gu vbweta gu khuye ginani Asa khu malito yaya? Uye a di gu vbweta gu khuye vathu va di yede gu dzipwa na va tshulegide gu gimbiyagimbiya ni gu vbaha nya mba thava valala. Uye kutside vathu gu londrola gwadi tepo yile nya gurula.

5. Khu ginani Asa a nga tiyisa libutho laye nya masotshwa?

⁵ Asa thumiside tepo nya gurula gasi gu tiyisa libutho laye nya masotshwa. (2 Dzik. 14:8) Ina esi so thula gu khiso kha nga ba a tumba Jehovha? Ahihi. Wulangani nya isoso, Asa a di gu dziti gu khuye kha nga Pfhumu a di yede gu khala na dongide gasi gu vhikisana ni esi si nga hadzi girega mindru wa tshigu. A di gu dziti gu khuye tepo yile nya gurula yi di hadzi gu mba pfoledwa khu lidambo. Nigu khiso kamo si nga girega.

6. Makristo ya matshiguni ya vapostoli ma yi thumiside kharini tepo nya gurula?

⁶ Ambari olu maKristo ya dziteponi dza vapostoli ma nga ba ma tala gu kuruvisedwa ni gu tshaniswa, ayo ma manegide ni dzitepo nya gurula. Ginani ma giridego dziteponi dzodzo? Ayo ma di londrola dzitepo dzodzo khu gu tshumayela mahungu nya yadi nya mba ema. Matimo ma gomogo omu nya libhuku la Mithumo, mo yeyedza gu khayo ayo ma di gu yeyedza “githawo [khu] Nungungulu.” Ayo kha ma khala khu mawogo, ma di simama gu tshumayela. Kha nga handro wakone, ayo ma di simama gu engedzeya. Khu lisine, Jehovha kategiside sighingi si yeyedzidwego khu maKristo yaya dziteponi nya gurula. — Mith. 9:26-31.

7-8. Ginani egi Pawulo ni vambe va giridego tepo va nga ba vari ni gurula? Tshamuseya.

⁷ Vapizane va lizana-myaga nyo pheye va londrode gwadi ni levbini lithomo gasi gu tshumayela mahungu nya yadi. Khu giyeyedzo, tepo mupostoli Pawulo a nga tugula gu khuye gu diri ni thumo nya wukhongolo Efeso, a di londrola lithomo lolo gasi gu tshumayela ni gu gira vapizane vathu va dhoropani mule. — 1 Kor. 16:8, 9.

⁸ Khu mwaga nya 49  E.C, Pawulo ni mambe maKristo ma manegide ni limbe lithomo tepo gu nga lulamiswa mahungu nyo hane wugwera. (Mith. 15:23-29) Tepo Pawulo ni vambe va nga embeya mabandla esi si nga ba si hungidwe, avo va di tshumayela “mahungu nya yadi” khu sighingi. (Mith. 15:30-35) Khu wevbini handro wakone? Bhibhiliya yari khiyo “mabandla ma di tiyisedwa gukhodwani, tengo nya vathu wu di engedzelana litshigu ni litshigu.” — Mith. 16:4, 5.

9. Giemo muni ma gomogo ga igyo mayigo nya mangi muhuno nigu giwudziso muni hi nga dzi girago?

⁹ Muhuno, hi ngu si kodza gu tshumayela khu gutshulega mayigoni nya mangi. Ina u ngu vbanya ga limwedo nya mayigo yoyo? Abari kharato, dzi wudzise esi: ‘Nyo yi londrola kharini tepo yeyi nya gurule?’ Matshiguni yaya nyo hegise, Jehovha a ngu thangeya thumo nyo tshumayele ni gu hevbudza, a gu uwo thumo nya wukhongolo ngudzu guvbindra yatshavbo yi giridwego mafuni. (Marko 13:10) Khu kharato, sithumi sa Jehovha si na ni thumo nya wungi gasi gu wu gira.

10. 2 Thimoti 4:2, a gu hi kutsa gu gira ginani?

¹⁰ U nga yi londrola kharini tepo nya gurula? (Leri 2 Thimoti 4:2.) Khu ginani u gu mba khedza giemo gya ndrangani gwago gasi gu wona gu khuwe givbango gimwegyo nya ndranga gi nga si kodza gu engedzeya thumo wagyo gani, adzina khu gu thuma kha nga piyonero? Olu khandri tepo nyo vbwetedzeye dzithomba kholu kha hi na nga si kodza gu vbindra nadzo avba nya tshanisa nya yikhongolo. — Mav. 11:4; Mat. 6:31-33; 1 Joh. 2:15-17.

11. Ginani egi vambe va girago gasi gu tshumayela mahungu nya yadi vathu nya vangi khavba si kodzegago khavbo?

¹¹ Vahuweleyi nya vangi va ngu hevbula lidimi nya liphya gasi va si kodza gu li thumisa gutshumayelani ni guhevbudzani. Hengeledzano ya Jehovha yi ngu va phasa ngudzu khu gu dusa mabhuku yathu khu malimi nya mangi. Khu giyeyedzo, khu 2010, mabhuku yathu ma di gu duswa khu tanga nya 500 malimi. Muhuno, ayo ma gu duswa khu gu vbindra 1000 malimi!

12. Vathu va gu phasega kharini khu gupwa mahungu nya yadi khu lidimi lawe nya mavelego? Ninga giyeyedzo.

¹² Vo dzipwa kharini vathu va pwago mahungu nya yadi khu lidimi lawe nya mavelego? Nga wona giyeyedzo gya ndriyathu moyo nya nyamayi a phasegidego ngudzu khu tshangano nya mughanga wu giridwego Memphis, Tennessee, Estados Unidos. Tshangano wowu wu giridwe khu lidimi nya Kinyarwanda, a gu lidimi li ganedwago ngudzu Ruanda, República Democrática do Congo ni Uganda. Hwane nya tshangano, ndriyathu  yoyo a di khuye: “Nyi na ni 17 myaga na nyi gu vbanya Estados Unidos, ganiolu eyi khiyo tepo yangu nyo pheye nyi nga phasega gwadi khu guhodza nya liphuvbo nyi gu manidego avba.” Kha si kanakanisi gu khiso ndriyathu yoyu khuhidwe ngudzu monyo khu gu engiseya tshangano nya mughanga khu lidimi laye. Giemo gyago gyo gu dzumeleya, ina u nga hevbula limbe lidimi gasi gu phasa vambe gipandreni u tshumayelago umo? Abari gu gu na ni vathu nyo khaguri va talago gu ganeya limbe lidimi gipandreni u tshumayelago umo, ina u ngu kutsega gu hevbula lidimi lolo gasi gu va tshumayela? Khu lisine, dzi ngu wuya gu hevbula lidimi nya liphya, ganiolu khu na nga dzi laya!

13. Vandriyathu va Russúa va yi thumiside kharini tepo nya gurula?

¹³ Khandri vatshavbo vandriyathu va gu na ni lithomo nyo tshumayele na va tshulegide. Mambe mayigo vandriyathu kha va tshumayeli khu gutshulega kholu wufumu wu ngu himbedzeya thumo wathu nyo tshumayele. Khu giyeyedzo, nga dundrugeya khu vandriyathu Rússia. Hwane nya myaga ni myaga na va gu tshaniswa, va manide gutshulega nya wukhozeyi khu Março nya 1991. Khu tepo yoyo, gu diri ni tanga nya 16 000 vahuweleyi Rússia. Ganiolu, hwane nya 20 myaga, tengo nya vahuweleyi wu di engedzeya kala 160 000 vahuweleyi ni guvbindra. Khu lisine, isoso so yeyedza gu khiso vandriyathu va yi londrode khu wugengeyi tepo nya gurula. Tepo yile nya gurula kha ya pfoledwa khu lidambo. Ambari olu silo si nga vbindrugedza Rússia, vandriyathu va ngo simama gu thumeya Jehovha khu sighingi. Avo kha va khali khu mawogo, vo simama gu gira ni gevbini va gi kodzago gasi gu thumeya Jehovha.

14-15. Jehovha thumiside kharini tshivba yaye gasi gu vbulugisa vathu vaye?

¹⁴ Matshiguni ya Asa, tepo nya gurula yi vbohedwe khu mahegiso yaye. Avo va di dhumedwa  khu libutho nya likhongolo nya masotshwa li nga ba lita khu Etiyopi. Zera, muthangeyi nya nyimbi yoyo, a di gu tiyisega gu khuye va na si kodza gu pala Judha. Ganiolu, Asa kha nga ba a tumba tengo nya vathu va nga hadzi dwana ganiolu a di gu tumba Nungungulu waye, Jehovha. Asa a di gombeya khuye: “Hi phase Uwe PFHUMU Nungungulu wathu, kholu ethu ha gutumba Uwe, hi somide nyimbi yeyi Linani gwago, guta dwana ni mwandra yoyu.”— 2 Dzik. 14:11.

¹⁵ Ambari olu masotshwa ya Zera ma nga ba ma vbindra guvili aya ya Asa, Asa a di gu dziti gu khuye Jehovha na ni tshivba nya yikhongolo nigu a di hadzi si kodza gu vbulugisa vathu Vaye. Nigu khiso kamo Jehovha a giridego. Vaetiyopi vale nya vangivangi va di padwa khu vaIsrayeli.— 2 Dzik. 14:8-13.

16. Ha gu dziti kharini gu khethu tepo nya gurule yi na vbeya nya mba hweya?

¹⁶ Ambari olu hi gu mba siti esi si na hi dugeleyago mindru wa tshigu, hi ngu dziti gu khethu ni yevbini tepo nya gurule hi na manegago nayo khya gitepwana. Khu lisine, Jesu profetide gu khuye matshiguni nya guhegise, vapizane vaye va di hadzi “zondrwa khu mayigo yatshavbo.” (Mat. 24:9) Mupostoli Pawulo nuye a di khuye: “Vatshavbo vale va vbwetago gu vbanya khu gukhodwa ga Kristo Jesu va na saniswa.” (2 Thim. 3:12) Sathane “tade khu likhulo nya likhongolo ngudzu,” khu kharato, yimwalo ndziya nya gu hi vbuluga gu tshaniswa khuye. — Gutu. 12:12.

17. Gukhodwa gwathu nga lingwa khu dzindziya muni?

¹⁷ Nugunugu, hatshavbo hi na lingwa gukhodwa gwathu. Litigo latshavbo li na emisana ni “tshanisa nya yikhongolo nya gu gima yi si gu manegi, gukhugela Nungungulu na vangide litigo kala matshigu ya muhuno.” (Mat. 24:21) Ndrani nya tepo yoyo, si nga gira vandrangani gwathu va hi wugeya nigu thumo wathu nuwo si nga gira wu himbedzedwa. (Mat. 10:35, 36) Ina moyo ni moyo wathu, a na pimedzeya Asa khu gu tumba gukhuye Jehovha a na hi phasa ni gu hi vhikeya?

18. Guya khu Vahebheru 10:38, 39, ginani gi na hi phasago gu dzi dongiseya gasi gu emisana ni esi si tago?

¹⁸ Jehovha o hi phasa gu tiyisa gukhodwa gwathu olu gasi hi dzi dongiseya gu emisana ni esi si tago. Uye o thangeya ‘githumi nya gutumbege ni nya gugengeye’ gasi gi hi ninga guhodza khu “gikhati gi vbwetegago” gasi hi si kodza gu emisana ni esi si tago. (Mat. 24:45) Ganiolu, hatshavbo  gu vbwetega hi dzi garadza gasi gu tiyisa gukhodwa gwathu. — Leri Vahebheru 10:38, 39.

19-20. Guya khu 1 Dzikoronika 28:9, siwudziso muni hi yedego gu dzi gira nigu khu ginani?

¹⁹ Gufana ni Asa, anethu gu vbwetega hi “vbweta” Jehovha. (2 Dzik. 14:4; 15:1, 2) Gilo nyo pheye hi yedego gu gira gasi gu yeyedza gu khethu hi ngu vbweta Jehovha khu gu hi hevbula khuye hi bwe hi bhapatiswa. Khu kharato, dzi wudzise esi: ‘Ina nyi ngu hongola mitshanganoni yatshavbo?’ Mitshanganoni hi ngu mana guhodza nya liphuvbo gu hi ningago tshivba nyo simame gu thumeya Jehovha hi bwe hi tiyiswa khu vandriyathu. (Mat. 11:28) Adzina gwadi gambe gu dzi wudzisa esi: ‘Ina nyi ngu hevbula Bhibhiliya tshigu ni tshigu?’ Wo ba u vbanya ni vavelegi vago, ina mu ngu tshiya gitepwana semana ni semana gasi gu gira wukhozeyi nya ndranga? Wo ba u vbanya wenga, ina u ngu dzi tshiyela tepo nyo hevbule? Ina u ngu dzi garadzeya gu tshumayela ni gu hevbudza vambe?

²⁰ Khu ginani hi yedego gu dzi gira siwudziso sesi? Khu gu Bhibhiliya yari khiyo Jehovha a ngu khedza esi si gomogo mapimoni gwathu ni monyoni gwathu, khu kharato anethu gu vbwetega hi gira sasimweso. (Leri 1 Dzikoronika 28:9.) Ho wona gu khethu gu vbwetega hi vbindrugedza makungo nyo khaguri, mavbanyelo nyo khaguri ni mapimiselo nyo khaguri, gu vbwetega hi lomba gu khethu Jehovha a hi phasa gu vbindrugedza khu guvbiredza. Olu khiyo tepo hi yedego gu dzi dongiseya gu emisana ni esi si tago. Gu vbwetega hi yi londrola gwadi tepo yathu ho ba hiri teponi nya gurula.