Livhesi leli lari khilo: “Wa gu tshuka u wona tigoni na gu tshaniswa sisiwana ni gu hambaniswa nayo, u nga samali kholu uye a gu khongolo a na ni mumbe vbatshani gwaye a mu kalavelago a gu khongolo guvbindra uye, vbatshani ga avo va vavili, womo gambe uye a khusegidego ngudzu gu va vbindra a va kalavelago nuye avo.” — Muh 5:8.

Khu mawonelo nya vathu, lowo wowu wo ganeya khu vafumeli nya mafu yaya. Vbavbandze nya isoso, uwo wu na ni mahungu nyo tsakise ni gu thaveleya maningano ni Jehovha.

Muhevbudzi 5:8, o ganeya khu mufumeli a tshanisago sisiwana. Mufumeli yoyo yede gu dundruga gu khuye womo muthu nya tshivba ngudzu gu vbindra uye a wonago satshavbo a girago ni gu khu lisine gu ni vambe gambe va girago mithumo nya yikhongolo ngudzu nyo vbindre eyi avo va girago. Ganiolu, egi gi si tsakisigo khu gu dzipfhumu nya mafu vakanganyisi nya vakhongolo ni gu vathu va va fumeyago khavo va livbago khu isoso.

Ambari olu silo si yago si engedzeya guvivba gu na ni gilo gi hi thaveleyago. Dundruga gu khuwe, Jehovha a ngu va wona vafumeli vovo. Hi nga gombeya ga Nungungulu hi lomba giphaso. (Ndz 55:22; Flp 4:6, 7) Ethu hi ngu dziti gu khethu ‘maho ya Jehovha Nungungulu, ma gu khedza mafuni gwatshavbo gasi gu yeyedza tshivba yaye ga vale va mu vbwetago khu monyo wawe watshavbo.’ — 2 Dzik 16:9.

Khu gu piya, Muhevbudzi 5:8, a gu tshamuseya lisine nya vafumeli nya mafu yaya nyo khuye gu ni oyu a gu ni tshivba guvbindra avo. Gimbe nya lisima ngudzu, livhesi leli la gu hi dundrugisa gu khilo Jehovha khuye a khugegidego ngudzu gu vbindra vatshavbo. Olu a gu fuma khu gu thumisa mwanaye Jesu Kristo. Jehovha a khugegidego a ngu wona satshavbo nigu uye ni mwanaye va lulamide.