1-2. Malito ma gomogo omu ga Muhevbudzi 11:6, ma gu yelana kharini ni thumo wathu nyo tshumayele?

OMU nya mayigo nyo khaguri, vathu nya vangi va ngu dzumeya mahungu nya yadi va bwe va vbweta guti nya singi khu Jehovha. Nigu esi hi va hevbudzago, khiso kamo esi vathu va si vbwetago. Ganiolu, omu nya mambe mayigo vathu va mwalo tepo khu Nungungulu nigu kha va theyi kota khu Bhibhiliya. Ahati vathu va gipandreni u vbanyago umo, va gu ma hakha kharini mahungu nya yadi? Gani va ngu ma hakha gwadi, gani kha va ma hakhi, Jehovha o vbweta gu khuye hi tshumayela kala huye khuye thumo wu vbede.

² Jehovha hungide litshigu “gu no tago guhegisa.” (Mat. 24:14, 36) Ganiolu na li si vbohi litshigu lolo, hi nga yeyedza kharini gu khethu hi ngu engisa malito ma gomogo omu ga libhuku la Muhevbudzi, ma gu khayo: “U nga khali khu mawogo”? * — Leri Muhevbudzi 11:6.

3. Hi na bhula khu ginani avba nya ndrima yeyi?

³ Omu nya ndrima yi vbindridego, hi hevbude khu 4 makhalelo ma nga hi phasago gu khala ‘vagogi nya vathu.’ (Mat. 4:19) Avba nya ndrima yeyi, hi na bhula khu dzindziya dziraru dzi na hi phasago gu tiyisa gu dziemiseya gwathu nyo tshumayele mahungu nya yadi ambari ha gu tshangana ni sigaradzo nyo khale kharini. Hi na hevbula gu khethu khu ginani si gu sa lisima 1) gu thangisa thumo nyo tshumayele guvbanyani gwathu, 2) gu laphisa monyo ni 3) gu manega ni gukhodwa nyo tiye.

4. Khu ginani hi yedego gu vega gupima avba nya thumo hi ningidwego khu Jehovha?

⁴ Jesu profetide silo si nga hadzi girega matshiguni nyo hegise  nigu a di gu dziti gu khuye silo soso si di hadzi va tsolopeteya gu gira thumo nyo tshumayele. Khu gighelo gyogyo, uye a di va gengedza khuye “khalani na mu dongide.” (Mat. 24:42) Matshiguni ya Nowa, vathu va di pharegide ngudzu nyo bwe va si vegi gupima avba nya gigengedzo va ningidwego khu Nowa. Khu gu fana, muhuno nugo, vathu va gu khala na va pharegide nyo bwe va si tshaledwi khu tepo nyo engiseye mahungu nya yadi. (Mat. 24:37-39; 2 Ped. 2:5) Ganiolu, ethu gu vbwetega hi simama gu vega gupima avba nya thumo hi ningidwego khu Jehovha.

5. Guya khu Mithumo 1:6-8, wu di hadzi andra kala hayi thumo nyo tshumayele?

⁵ Muhuno, gu vbwetega hi vega ngudzu gupima avba nya thumo nyo tshumayele mahungu nya yadi. Jesu ganede gu khuye thumo wowu wu di hadzi phalalega mafuni gwatshavbo ambari hwane nya gu ba a fude. (Joh. 14:12) Hwane nya gu ba Jesu a fude, vambe vapizane vaye va di bweleya va ya gira thumo wawe nyo goge dzindzandzi. Hwane nya gu ba Jesu a wusidwe khu gufani, giride gilewugiso nya gu vapizane vaye va mola dzindzandzi nya dzingi. Jesu thumiside tepo yeyi kamo gasi gu va yeyedza gu khuye thumo nyo tshumayele ni gu gira vapizane wu na ni lisima ngudzu gu vbindra ni wevbini thumo. (Joh. 21:15-17) Na gu tshade gitepwana basi gasi gu Jesu a hongola ndzadzini, embede vapizane vaye gu khuye thumo nyo tshumayele a wu phedego kha wu na nga hegeya basi Israyeli. (Leri Mithumo 1:6-8.) Hwane nya myaga nyo khaguri, Jesu nari ndzadzini, ningide giwoniso Johane nya esi si nga hadzi dugeleya ndrani nya “litshigu la Pfhumu.” * Gimwegyo nya silo esi Johane a nga si wona si mu samadziside ngudzu. A di wona ngilozi yi nga ba ‘yiri ni Mahungu nya Yadi nya gupindruge’ ma nga ba ma tshumayedwa ga vathu “nya mafumbu, ni mahundzu, ni malimi yatshavbo.” (Gutu. 1:10; 14:6) Somo guagani gu khiso Jehovha o vbweta gu khuye hi tshumayela kala mahegiso.

6. Hi nga simama kharini gu vega gupima avba nya thumo nyo tshumayele?

 ⁶ Hi nga simama gu vega gupima avba nya thumo nyo tshumayele khu gu dundrugeya khedzi Jehovha a hi phasago khidzo. Khu giyeyedzo, Jehovha a ngu hi ninga guhodza nya gungi ga liphuvboni, nya nga mabhuku nyo ghandlwe ni aya hi ma thumisago khomu nya mitshini, dziawudhiyu ni dzivhidhiyu gumogo ni milongoloko nya broadcasting. Nga dundrugeya khesi, omu nya sayiti yathu gu na ni mahungu nya mangi khu malimi nyo vbindre 1000. (Mat. 24:45-47) Vathu nya vangi muhuno va hambanide khu politika, wukhongeyi ni dzinogosi. Ganiolu gu na ni guvbindra 8 dzimiliyoni nya sithumi sa Nungungulu si wumbago ndranga mweyo mafuni gwatshavbo. Khu giyeyedzo, khu livbandre, 19 nya Abril nya 2019, Dzifakazi dza Jehovha mafuni gwatshavbo dzi tshanganide gasi dzi hevbula lowo nya litshigu. Ni wutshigu wakona, vathu va ninganago 20 919 041 va tshanganide gasi gu dundruga litshigu nya gufe ga Jesu. Gu wona edzi Jehovha a kategisago khidzo thumo wathu so hi kutsa gu simama gu tshumayela.

7. Giyeyedzo gya Jesu gi nga hi phasa kharini gu simama gu vega gupima avba nya thumo wathu nyo tshumayele?

⁷ Gimbe gi nga hi phasago gu vega gupima avba nya thumo nyo tshumayele gu landreya giyeyedzo gya Jesu. Uye kha dzumeleya gilo gi mu digisa gu tshumayela. (Joh. 18:37) Tepo Sathane a nga zama gu senga Jesu khu gu mu ninga “mifumo yatshavbo nya mafu ni dzithomba dzakone”, Jesu kha thegeya naphwini wowo. Ambari tepo vathu va nga zama gu mu gira pfhumu, Jesu kha dzumeya. (Mat. 4:8, 9; Joh. 6:15) Jesu kha vega gupima avba nya dzithomba ambari gu dzumeya gu thurugisedwa. (Luka 9:58; Joh. 8:59) Tepo hi tshanganago ni sigaradzo hi nga simama gu vega gupima avba nya thumo wathu khu gu dundruga malito ya mupostoli Pawulo ma gu khayo: “Mu nga vbeli tshivba, mu bwelelela hwane.” — Hebh. 12:3.

8. Ginani gulaphisa-monyo nigu khu ginani gu vbwetegago ngudzungudzu olu?

⁸ Gulaphisa-monyo likhalelo li hi phasago gu timiseya sigaradzo. Si na ni lisima ngudzu gu laphisa monyo tepo hi tshanganago ni sigaradzo mwendro tepo hi vireyago gilo nyo khaguri khu tepo nyo laphe. Ambari olu muprofeti Habhakuki a nga ba a dzina ngudzu gu wona gu fuviswa nya wuvivbi Judha, si vbwetegide gu a laphisa monyo. (Habh. 1:2) Vapizane va Jesu va di gu vireya gu khavo Mufumo wa Nungungulu wu “vboha khu guvbiredza” gasi wu ta va vbulugisa ga vaRoma va nga ba va va tshanisa. (Luka 19:11) Anethu hi wu virede khu maho nyo fuviye Mufumo wa Nungungulu gasi wu ta fuvisa watshavbo wuvivbi wu gomogo mafuni. (2 Ped. 3:13) Ambari ulolo, gu vbwetega hi laphisa monyo, hi vireya litshigu eli Jehovha a li emisidego. Hongoleni hi wonani edzi Jehovha a hi hevbudzago khidzo gu laphisa monyo.

9. Siyeyedzo muni si yeyedzago gu khiso Jehovha a ngu laphisa-monyo?

⁹ Jehovha giyeyedzo nya gyadi nyo laphise monyo. Uye ningide tepo nyo eneye Nowa gasi gu vbaha ngalava a bwe a ‘tshumayela mahungu nyo lulame.’ (2 Ped. 2:5; 1 Ped. 3:20) Khu gulaphisa-monyo, Jehovha engisede gwadi Abrahama tepo a nga mu gira siwudziso nya singi maningano ni gu fuviswa ga Sodhoma ni Ghomora. (Gen. 18:20-33) Jehovha yeyedzide gulaphisa-monyo vaIsrayeli khu tepo nyo laphe, ambari olu va nga ba va si tumbegi gwaye. (Neh. 9:30, 31) Ambari muhuno, Jehovha a ngo yeyedza gulaphisa-monyo kholu a ngo simama gu ndrindra vathu va ta hengeledzanoni yaye a bwe a va ninga tepo nya gu ‘va vbindrugedza.’ (2 Ped. 3:9; Joh. 6:44; 1 Thim. 2:3, 4) Giyeyedzo gya Jehovha gi ngu hi phasa gu wona gu khethu hi  yede gu laphisa monyo hi simama gu tshumayela ni gu hevbudza mahungu nya yadi. Olu, hongoleni hi wona giyeyedzo gimwegyo nya Bhibhiliya gi hi hevbudzago gu laphisa monyo.

10. Giyeyedzo gi ganeyago khu mulimi gi gomogo omu ga Jakobe 5:7, 8, gyo hi hevbudza ginani?

¹⁰ Leri Jakobe 5:7, 8. Giyeyedzo gi ganeyago khu mulimi gi ngu hi hevbudza gulaphisa-monyo. Lisine gu yimbe misimbo yi ngu dandra khu guvbiredza. Ganiolu, nya mingi yakone, ngudzungudzu eyi yi ningago mihandro, yi ngu hweya gu dandra. Israyeli misimbo yi nga ba yi ninga mihandro yi di gu dzega tanga nya 6 migima gasi yi dandra. Mulimi a di gu yala dzimbewu hwane nya gu ba yi wide ndzadzi. Si di gu lomba gulaphisa-monyo gasi mulimi a mana mihandro yakone. (Marko 4:28) Kha si kanakanisi gu khiso egi giyeyedzo nya gyadi hi nga gi dzegeleyago. Ganiolu isoso kha si vbevbugi.

11. Gulaphisa-monyo gu nga hi phasa kharini thumoni nyo tshumayele?

¹¹ Khu kotani nya gu mba vbeleya gwathu si ngu hi garadzeya gu laphisa monyo kholu guvbedza hi vbedza gu gira gilo nyo khaguri ho vbweta gu wona mihandro yakone. Ganiolu, kha si kodzegi gu hi mana mihandro yakone khu gu vbiredza kholu gu vbwetega hi pheya khu gu lima, hi yala, hi thedzeya mati hi bwe hi vireya gu khethu si dandra. Thumo nyo gire vapizane nuwo wo vbweta gu khuwo hi simama hi dzi garadza. Si ngu dzega tepo gasi gihevbulo nya Bhibhiliya gi tshunguhedza mwendro gu vbindrugedza mavbanyelo. Gulaphisa-monyo gu na hi phasa gu mba vbeya tshivba ambari vathu va gu bomba mahungu yathu. Ganiolu, ambari vo dzumeya mahungu yathu, gu vbwetega gambe hi va laphiseya monyo, kholu kha hi vbweti gu va gurumedza gu khodwa mahungu yathu. Ambari vapizane va Jesu, dzimbe dzitepo va di gu hweya gu pwisisa esi Jesu a nga ba a va hevbudza. (Joh. 14:9) Dundruga gu khuwe ethu ha gu yala ni gu thedzeya mati ganiolu oyu a dandrisago khu Nungungulu. 1 Kor. 3:6.

12. Hi nga yeyedza kharini gulaphisa-monyo tepo hi tshumayelago valongo vathu?

 ¹² Si nga hi garadzeya gu laphisa monyo tepo hi tshumayelago valongo vathu va gu siri Dzifakazi. Litshina nya nayo li gomogo omu ga Muhevbudzi 3:1, 7 li nga hi phasa. Lari khilo, gu na ni “gikhati nya gudegule, ni gikhati nya guganele.” Siemo nyo khaguri so vbweta gu khiso hi diga mavbanyelo yathu ma ninga wufakazi, ganiolu ha gu tulegedwa khu lithomo, hi nga digi gu va tshumayela. (1 Ped. 3:1, 2) Si na ni lisima gu tshumayela khu sighingi, ganiolu hi nga divali gu khethu gu vbwetega hi laphiseya monyo vathu vatshavbo gupata ni valongo vathu.

13-14. Siyeyedzo muni nya gu laphise monyo hi si wonidego nigu hi nga si pimedzeya kharini?

¹³ Hi nga hevbula khu gulaphisa-monyo ga vathu va gu siyeyedzo nya sadi muhuno. Habhakuki a di gu vireya khu maho nyo fuviye gu wona gufuviswa nya wuvivbi Judha, ganiolu yeyedzide gulaphisa-monyo tepo a nga khuye: “Nyi na khala wulangani gwangu nya guwonelele.” (Habh. 2:1) Mupostoli Pawulo a di dzi emisede gu “vbedzisa” thumo waye. Ambari ulolo, khu gulaphisa-monyo simamide ‘gutivisa mahungu nya yadi.’ — Mith. 20:24.

¹⁴ Nga dundrugeya khu giyeyedzo gya patwa nyo khaguri wu nga hevbula xikola ya Gileyadhi. Hwane nya xikola, uwo wu di rumedwa ga litigo eli gu nga ba gu vbwetega vatshumayeli. Nya vangi tigoni momo va diri mwalo tepo ni Bhibhiliya. Vambe va nga ba va thuma ga mambe mayigo va di gu mana mihandro nya yadi thumoni nyo tshumayele. Ganiolu patwa wule wu di simama gu laphisa monyo wu tshumayele. Hwane nya gu ba va tshumayede khu 8 myaga omu nya gipandre gile, 12 sihevbulo nya Bhibhiliya si di bhapatiswa. Isoso si va ningide gutsaka nya gukhongolo. Nigu giyeyedzo gyawe gi ngu hi hevbudza lisima nya gu laphise monyo. Khu kotani nya olu va simamidego gu tshumayela khu sighingi ni gu laphisa monyo, Jehovha a va kategiside ngudzu. Anethu gu vbwetega hi pimedzeya ava va nga hakha situmbiso sa Nungungulu khu kotani nya gukhodwa ni gu laphisa monyo va gu yeyedzidego. — Hebh. 6:10-12.

15. Gukhodwa nyo tiye gu nga hi phasa kharini gu simama gu tshumayela?

¹⁵ Hi ngu khodwa avba nya mahungu hi tshumayelago, khu kharato, gu vbwetega hi tshumayela khavba hi si kodzago khavbo. Hi ngu tumba situmbiso sa Nungungulu si gomogo omu nya Lito Laye. (Ndzi. 119:42; Isa. 40:8) Hi ngu wona gutadzisega nya siprofeto nya Bhibhiliya muhuno. Hi ngu wona gambe vathu na va gu vbindrugedza mavbanyelo yawe va bwe va vbanya khu matshina nya milayo nya Bhibhiliya. Isoso si ngu hi gira gi khodwa gu khethu mahungu nya yadi nya Mufumo wa Nungungulu khiso kamo vathu va si vbwetago.

16. Guya khu Ndzimo 46:1-3, ha gu khodwa ga Jehovha ni Jesu si na hi phasa kharini gu simama gu tshumayela?

¹⁶ Ethu hi ngu khodwa gambe ga Jehovha, a gu uye Gifefe nya mahungu nya yadi hi tshumayelago nigu hi ngu khodwa gambe ga Jesu a gu oyu Jehovha a mu emisidego gasi a khala Pfhumu nya Mufumo wa Nungungulu. (Joh. 14:1) Ambari ho ba hiri ga giemo muni, Jehovha a na simama nari wuthavelo wathu ni tshivba yathu. (Leri Ndzimo 46:1-3.) Khu gu thumisa tshivba eyi Jesu a ningidwego khu Jehovha, hi ngu tumba gu khethu a na simama gu thangeya thumo nyo tshumayele. — Mat. 28:18-20.

17. Khu ginani hi yedego gu simama gu tshumayela? Ninga giyeyedzo.

¹⁷ Gukhodwa gu ngu tiyisa gutumba gwathu nyo khethu Jehovha a na kategisa gudzigaradza gwathu nigu dzimbe dzitepo Jehovha a ngu gira isoso khu ndziya hi nga ba ha sa yi vireya. (Muh. 11:6) Khu giyeyedzo, nga dundrugeya khu vathu va hi wonago tshigu ni tshigu na hi gu tshumayela khu gikarinyana. Ganiolu, ina gutshumayela  khu gikarinyana si ngu resa mihandro? Nya mba kanakana! Wuthumeli nya Mufumu nya Novembro nya 2014, wu ganede khu litshango nya gihevbulo gimwegyo gya Univhersidhadhe gi nga ba gi vbweta gu lova mahungu nyo khaguri maningano ni Dzifakazi dza Jehovha. Igyo gi vbwetedzede Salawu nya Mufumo gi yi hamuga, ganiolu, gi hegiside khu gu mana Dzifakazi dza Jehovha dzi nga ba dzi tshumayela khu gikarinyana. Igyo gi dzegide mabhuku nyo khaguri nigu mabhuku yoyo ma mu phaside avba nya thumo waye wa xikwatunu. Olu hi gu ganegane, igyo i Fakazi ya Jehovha nigu gya gu thuma kha nga piyonero nya tepo yatshavbo. Litshango leli li ngu hi kutsa gu simama hi tshumayela kholu ilo lo yeyedza gu khilo gu ngari ni vathu nya vangi va vbwetago gupwa mahungu nya yadi.

18. Khu ginani hi tiyisegago gu khethu thumo nyo tshumayele Mufumo wa Nungungulu wu na tadzisega kha nga edzi Jehovha a dzinago khidzo?

¹⁸ Hi ngu tiyisega gu khethu thumo nyo tshumayele wu na vbeya khu tepo eyi Jehovha a yi emisidego. Nga dundrugeya khesi si giregidego matshiguni ya Nowa. Na gu ngo keneleya 120 myaga, Jehovha a di vegiside litshigu eli a nga hadzi tisa khilo ndrambi. Na gu vbindride myaga nyo khaguri, Jehovha a di embeya Nowa gu vbaha litaro. Si nga gira na gu vbindride tanga nya 40 mwendro 50 myaga Nowa na gu vbaha litaro, ndrambi yi si gu vbohi. Nowa simamide gu tshumayela ambari olu vathu va nga ba va si ma hakhi mahungu yaye kala litshigu eli Jehovha a nga khuye bedza sirengo omu nya litaro. Khu tepo yakone, Jehovha a di “sega lidimba.”— Gen. 6:3; 7:1, 2, 16.

19. Ho mba khala khu mawogo ginani hi nga gi vireyago?

¹⁹ Nugunugu, Jehovha a na emisa thumo nyo tshumayele. Khu ndziya nyo khaguri, uye a na “sega lidimba” nya litigo la Sathane gasi gu hi reseya litigo nya liphya. Na hi ngo vireya litshigu lolo, dzi emiseye gu pimedzeya giyeyedzo gya Nowa, Habhakuki ni vambe va nga mba khala khu mawogo. Simama gu thangisa thumo nyo tshumayele mahungu nya yadi, u laphisa monyo u bwe u manega ni gukhodwa nyo tiye ga Jehovha ni situmbiso saye.