1-2. Khu gwevbini gu tsekatseka ogu muprofeti Agewu a ganedego khuye gu di hadzi girega matshigoni yathu?

 “KHU dzimeneti nya dzi dugwana basi dziloja ni dziprediyu dza gale dzi di pheya gu khungumuga nga nyumba nyo girwe khu mafu.” “Vathu vatshavbo va di thava ngudzu, vathu nya vangi vari khavo gi giro gile gi di dzega dzimineti dzimbili basi, ganiolu gwangu si di gira nga khatshi si dzi dzega tepo nyo laphe.” Aya malito ma ganedwego khu vathu nyo khaguri va nga vbuluga avba nya girevareva gi giregidego Nepal khu 2015. Nari khatsi wa gu emisana ni giemo nyo thise nya nga egi, u di hadzi gu mba gi divala.

² Matshigoni yathu ha gu emisana ni gu tsekatseka nyo hambane. Gu tsekatseka gogu kha gu giregi basi ga lidhoropa limwedo mwendro ga litigo nyo khaguri. Ganiolu, ga gu girega mayigoni gwatshavbo nigu gu na ni myaga nya yingi na gu girega. Muprofeti Agewu ganede gu khuye gu tsekatseka gogu gu di hadzi girega matshigoni yathu. Uye lovide khuye: “PFHUMU Nungungulu nya Tshivba Yatshavbo a ngu ganela kharati, khuye: Khu gikhati gidugwana, Eni nyi na tsekatsekisa ndzadzini, litigo, linene ni mafu nya gubange.” — Agewu 2:6.

3. Khu ginani gutsekatseka gu ganedwego khu Agewu gu hambanidego ni girevareva?

³ Gutsekatseka gu thudwego khu muprofeti Agewu kha gu fani ni girevareva gi khungumuleyagu silo basi, wulangani nya isoso gu tsekatseka gogo gu ngu resa silo nya sadi. Jehovha a ngu hi embeya khuye: “Nyi na tsekatsekisa mayigo yatshavbo, gasi ma rese eno dzithomba dzawe dzatshavbo; nyi na tadza nyumba yeyi khu wudhumo.” (Agewu 2:7) Giprofeto gegi gi di gu tshamuseya ginani ga vathu va nga ba va vbanya matshigoni ya Agewu? Nigu gyo tshamuseya ginani gwathu muhuno? Hi na wona mihlamulo nya siwudziso sesi, hi bwe hi wona edzi hi nga pategago khidzo avbo nya thumo wu girago mayigo matsekatseka.

4. Khu ginani Jehovha a rumedego muprofeti Agewu ga vathu vaye?

⁴ Jehovha ningide muprofeti Agewu thumo nya lisima ngudzu. Nga wona esi si giregidego na a si gu ningwe thumo wowo. So gira khatsi Agewu a diri ni Vajudha tepo va nga duga khu wu gumbini Bhabhiloni va bweleya Jerusalema khu 537 AEC (na ma nga si vbohi matshigu yathu.) Tepo va nga vboha eyi va di dzegeya gu pheya gu vbaha tempele mwendro nyumba ya Jehovha. (Ezira 3:8, 10) Ganiolu, nya mba hweya gu di girega gilo nya mba tsakisa. Avo va di ema gu vbaha tempele kholu va di wugedwa khu valala va nga ba va vbanya mule. (Ezira 4:4; Agewu 1:1, 2) Khu kharato khu mwaga nya 520 AEC Jehovha a di rumeya Agewu gasi guya tiyisa Vajudha va bwe va mana tshivba nyo vbedzise gu vbaha tempele. * — Ezira 6:14, 15.

5. Khu ginani malito ya Agewu adzina ma tiyisidego vathu va Nungungulu?

⁵ Makungo nya malito ya Agewu gu diri gu phasa Vajudha gu tiyisa gukhodwa gwawe ga Jehovha. Khu gu tiya, uye a di embeya Vajudha vale va nga ba va vbede tshivba khuye: “Dzi garadzeni nenu vathu vatshavbo va tigoni, a ngu ganela PFHUMU Nungungulu, thumani; kholu eni nyi womo gumogo nanu; a ngu ganela PFHUMU Nungungulu nya Tshivba Yatshavbo.” (Agewu 2:4) Malito “Nungungulu nya tshivba yatshavbo” adzina ma tiyiside ngudzu Vajudha. Jehovha na ni libuthu nya dzingilozi dzi mu engisago. Khu kharato, gasi va dugeleya Vajudha va di yede gu tumba Jehovha.

6. Ginani gi nga hadzi girega avba nya gu tsekatseka gu profetidwego khu Agewu?

⁶ Jehovha rumide Agewu guya embeya Vajudha khuye a di hadzi tsekatsekisa mayigo yatshavbo. Mahungu yaya ma tiyiside ngudzu Vajudha vale va nga ba vbede tshivba va bwe va ema gu vbaha tempele. Ayo ma di gu yeyedza gu khayo Jehovha a di hadzi tsekatsekisa Persiya, a gu litigo li nga ba liri ni tshivba ngudzu tepo yile. Ginani gi nga hadzi girega khu gu tsekatsekiswa gogu? Nyo pheye, vathu va Nungungulu va di hadzi gu si kodza gu vbaha tempele. Khu kharato, ambari vale va nga ba va siri Vajudha va di hadzi hongola va ya khozeya Jehovha omu nya tempele yi vbahedzidwego. Khu lisine, mahungu yale ma tiyiside ngudzu vathu va Nungungulu.—  Zak. 8:9.

7. Khu wevbini thumo hi pategago ga uwo muhuno wu girago mayigo ma tsekatseka? Tshamuseya.

⁷ Giprofeto gya Agewu gyo tshamuseya ginani gwathu muhuno? Muhuno gambe Jehovha a ngu gira mayigo ma tsekatseka nigu ga tepo yeyi anethu gi ngu phasedzeya avba nya thumo wowu. Nga dundrugeya khesi: khu 1914 mufumo wa Nungungulu wu di pheya gu fuma ndzadzini nigu Jehovha emiside Jesu gasi gu khala pfhumu nya mufumo wowo. (Ndzi. 2:6) Dzipfhumu nya mafu kha dza tsaka khu guti gu khidzo mufumo wa Nungungulu wu phede gu fuma. Isoso so thula gu khiso ‘gu vbeya nya tepo ya va nya mayigo’ yi di tadzisegide. Khu mambe maganelelo tepo nya gu gu diri mwalo ni mufumeli a nga ba a emeya Jehovha yi di vbede. (Luka 21:24) Khu kharato gu khugeya 1919, vathu va Nungungulu va gu huweleya ga vatshavbo vathu khavo mufumo wa Nungungulu khuwo basi wu na si kodzago gu vbedza sigaradzo nya vathu. Thumo nya gu tshumayele “mahungu nya yadi nya mufumo” wa gu girwa tigoni gwatshavbo.— Mat. 24:14.

8. Guya khu Ndzimo 2:1-3, gu tala nya mayigo ma gu ma hakha kharini mahungu nya mufumo?

⁸ Vathu va gu ma hakha kharini mahungu yaya? Nya vangi kha va ma tsakeyi. (Leri Ndzimo 2:1-3.) Mayigo ma kudzugide, khu kharato  ayo kha ma seketeyi pfhumo yi hathidwego khu Nungungulu. Ayo kha ma woni mahungu nya mufumo hi tshumayelago kha nga “mahungu nya yadi.” Khu lisine, vambe vafumeli va himbedzede thumo nyo tshumayele. Ambari olu dzipfhumu nya dzingi dzi ganeyago gu khidzo dza gu thumeya Nungungulu, idzo kha dzi dzini gu diga wufumo dzi gu nawo. Khu kharato. gu fana ni dzipfhumu dza matshigoni ya Jesu, idzo dza gu yeyedza gu khidzo kha dzi seketeyi oyu a hathidwego khu Jehovha a gu Kristo, khu gu wugeya sithumi saye nyo tumbege. — Mith. 4:25-28.

9. Ginani egi Jehovha a girago gasi gu phasa mayigo ma gu mba hakha mahungu nya mufumo?

⁹ Ginani egi Jehovha a ganeyago khu kotani nya olu mayigo ma si tsakeyigo mahungu yaya nya mufumo? Libhuku la Ndzimo 2:10-12 lari khilo: “Gasi olu, enu vafumeli gengelani; dzumelani gu kawukwa, enu valamuli nya litigo! Khozelani PFHUMU Nungungulu khu githawo mu tsaka ni gu ndrendremela mbeli gyaye. Khidzimani mawundruni ga mwamana gasi a si gorogi, mu si mbembi na mu ngari ndzilani, kholu hwane nya gikhatinyana a na tala khu likhulo. Va kategide vatshavbo vale va thavelago gwaye.” Khu lihaladzo, Jehovha a ngu ninga lithomo valala vava nya gu va vbindrugedza mavbanyelo yawe, va seketeya mufumo wa Nungungulu. Ganiolu, tepo ya gu vbeya. Muhuno ha gu vbanya ga “matshigu nyo hegise” nya litigo leli nyo vivbe. (2 Thim. 3:1; Isa. 61:2) Eyi khiyo tepo nya gu vathu vati lisine va bwe va hatha gu thumeya Jehovha.

10. Guya khu Agewu 2:7-9, khu wevbini handro nya wadi wu nga hadzi reswa khu gu tsekatsekiswa nya mayigo?

¹⁰ Vathu nyo khaguri va ngu ma hakha gwadi mahungu nya gu tsekatsekiswe ma ganedwego khu Agewu. Uye wari khuye: “dzithomba dzawe dzatshavbo [mwendro vathu nya myonyo nya yadi]” va di hadzi khozeya Jehovha.  * (Leri Agewu 2:7-9.) Vaprofeti nya nga Isaya ni Mikeya va ganede navo khesi si nga hadzi girega ndrani nya “matshigu nya gu hegise.” — Isa. 2:2-4; Mik. 4:1, 2.

11. Ginani egi ndriyathu nyo khaguri a giridego tepo a ngapwa mahungu nya mufumo khu tepo nyo pheye?

 ¹¹ Khu giyeyedzo, wona esi si giregedego ndriyathu moyo nyo pwani khu Ken, muhuno a thumago tsindza gwathu nya mafu yatshavbo. Uye a ngu dundruga iso a nga gira tepo a ngapwa mahungu nya mufumo khu tepo nyo pheye 40 myaga hwane. Uye wari khuye: “Tepo nyi ngapwa lisine la omu nya Bhibhiliya khu tepo nya pheye, nyi di tsaka ngudzu khu gu hevbula gu kheni ha gu vbanya ga matshigu nyo hegise nya litigo leli nyo vivbe. Nyi pwisiside gu kheni gasi nyi tsakedwa khu Nungungulu nyi bwe nyi mana womi nya pindrugedwa nyi yede gu dzi hambanisa ni litigo leli nyi namareya ga Jehovha. Khu kharato nyi di gombeya ga Jehovha nyi dzegeya gu gira gilogyo. Nyi di ema gu seketeya litigo leli nyi seketeya mufumo wa Nungungulu owu nya gu gima kha wu na nga fuviswa.”

12. Tempele nya liphuvbo ya Jehovha ya gu tala khu wudhumo matshigoni ya ya nyo hegise khu ndziya muni?

¹² Kha hi kanakani gu khethu Jehovha a ngu kategisa vathu vaye. Matshigoni yaya nyo hegise hi ngu wona gu khethu tengo nya vathu va khozeyago Nungungulu wa gu engedzeya. Khu 1914 hi diri vanganiyana basi, ganiolu muhuno gu na ni guvbindra 8 dzimiliyoni nya vakhozeyi va Jehovha, nigu mwaga ni mwaga dzimiliyoni nya vathu va ngu manega avbo nya gidundrugiso. Khu kharato, hi nga ganeya gu khethu tempele nya liphuvbo ya Jehovha nya ndranga ya mafuni, a gu malulamiselo nya wukhozeyi nyo age, yi ngu tala khu “dzithomba dzawe dzatshavbo.” Khu lisine, isoso so dhumisa Jehovha. Lina la Jehovha la gu dhumiswa gambe tepo dzimiliyoni nya vathu dzi dzi garadzeyago gu vbindrugedza mavbanyelo yavo. — Efes. 4:22-24.

13. Khu sevbini siprofeto si tadzisegago khu gu engedzeya nya tengo nya vathu va Jehovha? (Wona foto yi gogomo avba nya kapa)

¹³ Satshavbo esi si giregago sa gu tadzisa simbe siprofeto nya nga esi si ganedwego ga Isaya gipimo 60. Livhesi 22 nya gipimo gegi lari khilo: “Lipango nya lidugwana, li na andra kala likhumi mazana (1.000), ni eli nya lidugwana ngudzu, li na khala litigo nya tshivba. Eni kheni PFHUMU Nungungulu; khu gikhati givbwetegago nyi na gira satshavbo sesi si tadzisega khu guvbiredza.” Khu kotani nya olu vathu nya vangi va pheyago gu khozeya Jehovha, gu ngu girega gilo nyo samadzise. “Dzithomba” dzedzi mwendro vathu va tago hengeledzanoni ya Jehovha va  na ni makodzelo nyo khaguri, nigu avo va dzi emisede gu tshumayela “mahungu nya yadi nya mufumo.” Kha nga handro wakona, vathu va Jehovha va nga thumisa makodzelo yoyo, ayo Isaya a ma ranidego khuye “mahwe ya va nya mayigo.” (Isa. 60:5, 16) Khu gu phaswa khu vama ni va nyamayi vava nyo hathege, hi ngu tshumayela mahungu nya yadi umo nya 240 mayigo nigu hi ngu dusa mabhuku khu 1000 malimi ni guvbindra.

14. Ginani egi vathu va yedego gu dzi hatheya olu?

¹⁴ Khu kotani nya olu Jehovha a tsekatsekisago mayigo, matshigoni yaya nyo hegise, vathu vo gurumedzega gu hunga gu gira gilo nyo khaguri. Avo va yede gu hunga gu khavo va na seketeya Mufumo wa Nungungulu mwendro va na tumba mifumo nya mafu yaya? Egi gimegyo mya silo egi moyo ni moyo wathu a yedego gu dzi hatheya. Lisine gu vathu va Nungungulu va ngu engisa milayo nya mifumo, ganiolu avo kha va dzi bedzedzeyi umo nya politika. (Rom. 13:1-7) Avo va ngu dziti gu khavo mufumo wa Nungungulu khuwo basi wu na si kodzago gu lulamisa sigaradzo nya vathu. Mufumo wowu kha wu giri gipandre nya litigo leli. — Joh. 18:36, 37.

15. Libhuku la Gutuledwa la gu yeyedza kharini gu khilo gutumbega ga vathu va Nungungulu gu na lingwa?

¹⁵ Libhuku la Gutuledwa la gu yeyedza khilo matshigoni nyo hegise gu tumbega ga vathu va Nungungulu gu na lingwa. Gu lingwa gogo gu na hi lemeleya kamu ngudzu. Mifumo nya mafu yaya yi na hi gurumedza gu yi khozeya nigu yi seketeya ni gu ava va na bombago gu gira isoso va na tshaniswa. (Gut. 13:12, 15) Iyo yi na “ruma vatshavbo vathu, sanana ni vakhongolo, sitetema ni sisiwana, va nya gutshulega ni dzikhumbi, vatshavbo gu vbweta va vegwe gifungo mandzani ya nyamudye, mwendro vbagiwombotunu.” (Gut. 13:16) Gale yoyo dzigumbi dzi di gu vegwa gifungo gasi dzi tidwa gu dza gu lumba mani. Khu ndziya nyo fane, matshigoni yathu mifumo yi na vireya gu khiyo vatshavbo va yeyedza oyu va mu seketeyago nigu mifumo yeyi yi na vbweta gu khiyo vatshavbo va yeyedza khu mithumo gu khavo va ngu seketeya politika.

16. Khu ginani si gu sa givbiredza gu gevisisa edzi gu guromo khidzo gutumbega gwathu ga Jehovha?

¹⁶ Ethu ke, hi na dzumeya gifungo gegi hi seketeya mifumo nya vathu? Uye a na bombago gu hakha gifungo gegi a na tshangana ni sigaradzo nya singi ambari gu vega womi waye mhangoni. Libhuku la Gutuledwa la gu tshamuseya khilo vale va gu na ni gifungo “khavo basi va dzumedziswago gu renga mwendro gu rengisa silo.” (Gut. 13:17) Ganiolu, vathu va Nungungulu va ngu siti esi si na dugeleyago avo va gu na ni gifungo gi khumbugwago omu ga Gutuledwa 14:9, 10. Wulangani nya gu va hakha gifungo, avo va na lova mandzani gwavo khavo: ‘Eni nya gu lumba Jehovha.’ (Isa. 44:5) Eyi tepo nya gu hi dzi gevisisa gwadi hi wona gu khethu ina hi ngu tumbega ga Jehovha mwendro ne. Abari gu hi ngu tumbega gwaye, Jehovha a na tsaka khu gu ganeya khuye ha gu lumba uye.

17. Ginani hi yedego gu gi dundruga maningano khu gu laphisa monyo ga Jehovha?

¹⁷ Ga matshigu yaya nyo hegise, Jehovha a ngu laphisa ngudzu monyo. Jehovha kha vbweti ni moyo wathu a mbembiswa. (2 Ped. 3:9) Jehovha a gu ninga lithomo vatshavbo gasi va dzi laya nigu va hatha gu mu thumeya. Ganiolu, uye kha na nga laphisa monyo kala gupindruga. Avo va bombago gu seketeya mufumo wa Nungungulu, va na tshangana ni esi si giregidego Faro matshigoni ya Mosi. Jehovha a di embeya Faro khuye: “Kholu nari gukhwatshi nyi khuside libogo langu; nari pwani nyi thumiside tshivba yangu nyi gu veta khu tungu, uwe ni vathu vago, olu na mu mbembide mu vbela mafuni. Aholu nyi gu digide u vbanya, khu gufela gukheni u  wone tshivba yangu, ni gukheni lina Iangu li tidwe tigoni gwatshavbo.” (Ekiso. 9:15, 16) Mayigo yatshavbo ma na dziti gu khayo Jehovha khuye enga Nungungulu nya lisine. (Ezek. 38:23) Si na girega kharini isoso?

18. a) Agewu 2:6, 20-22 o ganeya khu gu tsekatseka muni? b) Ha gu dziti kharini gu khethu malito ma lovidwego umo ga Agewu ma na tadzisega mindru watshigu?

¹⁸ Myaga nya yingi hwani Agewu na fude, mupostoli Pawulo lovede makristo nya Vahebheru khuye malito ma lovidwego umo ga Agewu 2:6, 20-22 ma di hadzi tadzisega mindru watshigu. (Leri.) Uye lovide gu khuye: “Olu tumbiside, gukhuye: “Eni nyi na engedza gambe gu kutsunga, nasiri mafuni basi, aholu, ni ndzadzini gambe.” Magana yaya ma gukhayo: “Nyi na engedza gambe,” ma gu yeyedza gupwani silo si vangidwego, si na kutsungwa si mwalalega. Gasi esi nyamba tsekatseka, si na simama gu khala.” (Hebh. 12:26, 27) Gutsekatseka gogu gu hambanide ni ogu gu ganedwago umo ga Agewu 2:7. Ogu go tshamuseya gu khugo gu fana ni faro, avo va bombago Jehovha kha nga mufumeyi va na fuviswa kala gupindruga.

19. Ginani egi nya gu gima kha gi na nga tsekatsekiswa nigu ha gu siti kharini isoso?

¹⁹ Ginani egi nya gu gima kha gi na nga tsekatsekiswa mwendro gu fuviswa? Pawulo a di simama khuye: “Hongoleni hi bonge, kholu, hi hakhide Mufumo wa ndzadzini, owu wu si kodzigo gu kutsungwa. Hongoleni hi bonge, hi khozela Nungungulu khu magirelo nya gu mu tsakise ni githawo.” (Hebh. 12:28) Hwane nya gu ba gu tsekatsekiswa gogu nyo hegise na gu vbede, mufumo wa Nungungulu khuwo basi wu na simamago kala gupindruga. — Ndzi. 110:5, 6; Dhan. 2:44.

20. Vathu va yede gu hunga gu gira ginani, ni gu hi nga va phasa kharini?

²⁰ Eyi khiyo tepo nya gu vathu va dzi hatheya. Va gu hatha gu simama gu seketeya litigo leli va na fuviswa, ganiolu va gu hatha gu thumeya Jehovha va bwe va vbindrugedza mavbanyelo yavo, avo va na vbanya kala gupindruga. (Hebh. 12:25) Khu thumo nya gu tshumayele, hi nga si kodza gu phasa vathu gu hatha silo si na va phasago. Hongoleni hi simama gu phasa dzithomba dzedzi mwendro vathu vava nya lisima gu seketeya mufumo wa Nungungulu. Tepo yatshavbo hi yede gu dundruga malito ya pfhumo yathu Jesu a nga khuye: “Mahungu yaya nya yadi nya Mufumo ma na tshumayedwa mafuni gwatshavbo, gasi ma khala wufakazi ga mayigo yatshavbo, khavbo gu na tago guhegisa.” — Mat. 24:14.