1. Vambe vo dzipwa kharini tepo muthu nyo khaguri va mu golago a duswago libandlani?

 INA u na ni nongo mwendro pari yi dusidwego libandlani? Kha si kanakanisi gu khiso isoso si ngu vbedzana tshivba. Ndriyathu moyo nya nyamayi nyo pwani khu Hilda, wari khuye: “Tepo mwama wangu a ngafa hwane nya 41 myaga na hi tshadhide, nyi di gu pimisa gu kheni gu diri igyo gigaradzo nya gikhongolo guvbindra satshavbo nyi nga emisana nagyo guvbanyani. * Ganiolu, tepo gyanana gyangu ni mwangadzi wagyo ni sanana sawe va nga diga gu thumeya Jehovha nyi dipwa wuvi nya wukhongolo ngudzu nyo bwe nyi hamuga ni lipindru.”

2-3. Guya khu Ndzimo 78:40, 41, Jehovha o dzipwa kharini tepo sithumi saye si mu digago?

² Nga dundrugeya khu wuvi a wu pwidego Jehovha tepo dzingilozi nyo khaguri, sivbango nya ndranga yaye ya ndzadzini, dzi nga mu diga. (Judha 6) Nga dundrugeya gambe khu wuvi a wu pwidego tepo a nga kanyiswa ni gu wugedwa khu vathu a nga ba a va gola, va na Israyeli. (Leri Ndzimo 78:40, 41.) Isoso so yeyedza gu khiso Papayi wathu wa ndzadzini a ngu vbisega nuye tepo muthu nyo khaguri u mu golago a digago gu mu thumeya. Uye a ngu pwisisa wuvi u wu pwago, khu kharato uye a na gu phasa a bwe a gu tiyisa dziteponi dzodzo.

³ Avba nya ndrima yeyi, hi na wona esi hi yedego gu gira gasi hi phaswa khu Jehovha. Hi na bwe hi wona edzi hi nga phasago khidzo vandriyathu libandlani va tshanganago ni gigaradzo gegi. Ganiolu, hongoleni hi pheya khu gu wona mapimiselo nyo khaguri hi yedego gu ma potsa.

4. Vavelegi nya vangi vo dzipwa kharini tepo sanana sawe si digago Jehovha?

⁴ Gyo tshuka gyanana nyo khaguri gi diga Jehovha, vavelegi va ngu tala gu dzi wudzisa gu khavo ginani va nga mba gira gasi gu phasa gyanana gwawe gu simama lisineni. Hwane nya gu ba gyanana gyaye gi dusidwe libandlani, ndriyathu Luke, ganede khuye: “Nyi di gu dzi ninga nandru khesi si nga dugeleya nigu dzimbe dzitepo nyi di gu lora silo nyo thise. Nyi di gu liya mambe matshigu, monyo wangu wu vbisa khu wuvi.” Ndriyathu moyo nya nyamayi nyo pwani khu Elizabeth, a nga dugeledwa khu silo nyo fane, wari khuye a di gu tala khu dzi wudzisa gu khuye: “Khu hayini nyi nga phazama? Ina nyi giride satshavbo si nga ba si romo tshivbani gwangu gasi gu hevbudza lisine gyanana gyangu?”

5. Khu mani a gu na ni nandru tepo muthu nyo khaguri a digago Jehovha?

⁵ Gu vbwetega hi dundruga gu khethu Jehovha ningide moyo ni moyo wathu gutshulega nyo dzi hatheye gu gira ni gevbini a gi vbwetago. Isoso so thula gu khiso hi tshulegide gu hatha gu mu engisa mwendro gu mba mu engisa. Vambe vaphya va mwalo vavelegi va gu siyeyedzo nya sadi gasi gu si pimedzeya, ambari ulolo va ngu hatha gu thumeya Jehovha va bwe va tumbega gwaye. Ganiolu vambe vaphya, va manegide ni lithomo nyo dandriswe khu vavelegi va dzi garadzidego ngudzu gasi gu va hevbudza lisine, ambari ulolo avo va hathide gu diga Jehovha. Isoso so hi hevbudza ginani? So hi hevbudza gu khiso moyo ni moyo wathu gu vbwetega a hunga gu khuye a na thumeya Jehovha mwendro ne. (Jos. 24:15) Khu kharato, abari gu wo dzipwa nandru khu gu ba gyanana gyago gi digide Jehovha dundruga gu khuwe uwowo khandri nandru wago. Nigu wo tshuka u pimisa isoso, dzi garadzeye gu si dusa khu mapimoni gwago.

6. Muphya a nga dzipwa kharini o tshuka moyo nya vavelegi vaye a diga Nungungulu?

⁶ Si nga gira moyo nya vavelegi a diga lisine a bwe a bhangula ndranga yaye. (Ndzi. 27:10) Isoso si nga dzudza gupima ga sanana si olovedego gu khedza mavbanyelo ya vavelegi vaso si va pimedzeya. Esther a wonidego papayi waye na gu duswa libandlani, wari khuye: “Nyi di gu liya ngudzu kholu nyi di gu dziti gu kheni papayi wangu kha nga ba a digide basi lisine, ganiolu uye a di hungide gu mba wuya gambe ga Jehovha. Eni nyi ngu mu gola ngudzu papayi wangu, khu kharato tepo a nga duswa libandlani nyi di gu garadzega ngudzu khuye. Dzimbe dzitepo monyo wangu wu di gu veta khu tshivba khu gu thava gu kheni a dugeledwa khu silo nya mba sadi.”

7. Jehovha o dzipwa kharini khu vaphya vale vavelegi vawe va dusidwego libandlani?

⁷ Vaphya, abari gu moyo nya vavelegi vago dusidwe libandlani tiyisega gu khuwe anethu hi ngu wupwa wuvi u wupwago. Tiyisega gu khuwe Jehovha a ngu si pwisisa esi u tshanganago naso. Uye a ngu gu haladza ni gu a ngu ninga lisima gutumbega gwago nigu vandriyathu navo. Vbavbandze nya isoso, dundruga gu khuwe u mwalo nandru khesi vavelegi vago va hungago gu gira. Kha nga si khumbugidwego gupheyani, Jehovha ningide moyo ni moyo wathu gutshulega nyo hathe gu gira esi a si vbwetago. Nigu ni wevbini a dzi hendzeledzidego ga Jehovha a bwe a bhabhatiswa “guvbweta a rwale abune rwalo waye”. — Gal. 6:5.

8. Na va ngo vireya gu khavo givbango nya ndraga yawe gi wuya ga Jehovha, ginani egi vambe ndrangani va nga girago? (Wona gambe kwadru “ Wuya ga Jehovha.”)

⁸ A gu tshuka muthu nyo khaguri u mu golago a diga Jehovha, si olovelegide gu u manega ni gutumba nyo khuwe litshigu limwedo a na wuya. Ganiolu, ginani u nga girago na wu gu vireya isoso? Dzi garadzeye gu tiyisa gukhodwa gwago. Wo gira isoso, u na ninga giyeyedzo nya gyadi vandrangani gwago adzina gupata ni wule a dusidwego libandlani. Nigu u na manega ni tshivba nyo timiseye wuvi u wu pwago. Hongoleni hi wona silo nyo khaguri u nga girago gasi gu tiyisa gukhodwa gwago.

9. Dzindziya muni edzi Jehovha a nga dzi thumisago gasi gu gu ninga tshivba? (Wona gambe kwadru “ Milowo yi nga gu tiyisago a gu ba muthu u mu golago a tsukude Jehovha.”)

⁹ Dzi garadzeye gu simama gu dzi hodzisa khu liphuvboni. Isoso si na ni lisima gasi u simama na wu tiyide u bwe u tiyisa vandrangani gwago. Ganiolu, u nga si gira kharini isoso? Khu gu leri Bhibhiliya, u dundrugeya khesi u si lerigo u bwe u si hamugegi mitshanganoni yathu. Jehovha a na thumisa dzindziya dzedzi gasi gu gu ninga tshivba u yi vbwetago. Joanna oyu papayi waye ni ndriyaye nya nyamayi va digidego lisine, wari khuye: “Tepo nyi hevbulago matimo nya Bhibhiliya ma ganeyago khu Abhigayili, Esiteri, Joba, Josefa ni Jesu si ngu nyi rudzisa mapimo. Giyeyedzo gyawe gi ngu nyi tiyisa ni gu nyi phasa gu mba garadzega ngudzu. Nigu dzimuzika dzi girwago khu hengeledzano anidzo dzi ngu nyi tiyisa ngudzu.”

10. Guya Ndzimo 32:6-8, ginani u yedego gu gira wa gu ba u vbede tshivba?

¹⁰ Embeya Jehovha satshavbo si gu garadzago. Tepo u vbeyago tshivba, u nga digi gu gombeya ga Jehovha. Lomba Nungungulu wathu nya lihaladzo gasi a gu phasa gu wona silo khedzi a si wonago khidzo uye. Mu lombe gu khuwe a gu ‘hevbudza ni gu gu yeyedza ndziya u na yi landrago.’ (Leri Ndzimo 32:6-8.) Lisine gu dzimbe dzitepo kha si na nga vbevbuga gu embeya Jehovha esi si gu vbisago ganiolu tiyisega gu khuwe Jehovha a ngu pwisisa esi u tshanganago naso. Uye a ngu gu haladza ngudzu nigu a ngu gu kutsa gu mu tshuleya khana yago. — Ekiso. 34:6; Ndzi. 62:7, 8.

11. Guya khu Vahebheru 12:11, khu ginani hi yedego gu tumba malulamiselo nyo hevbudze ya Jehovha? (Wona gambe kwadru “ Guduswa nya muthu khu libandlani giyeyedzo nya lihaladzo la Jehovha.”)

 ¹¹ Seketeya esi si hungidwego khu madhota. Gu dusa muthu libandlani malulamiselo ma vegidwego khu Jehovha. Nigu isoso si ngu phasa oyu a dusidwego libandlani si bwe si vhikeya libandla. (Leri Vahebheru 12:11.) Si nga gira na wu pwide muthu nyo khaguri na gu ganeya guvivba khu madhota khu gu ba ma hungide gu dusa muthu nyo khaguri libandlani. Ganiolu, vathu nya nga vovo va ngu tala gu divala gu ganeya khu silo nyo vivbe si giridwego khu oyu a dusidwego. Lisine khu gu ethu kha hiti satshavbo si pategidego. Khu kharato, tiyisega gu khuwe madhota ma wumbidego kometi nya wulamuli ma dzi garadzede gu landreya matshina nya milayo nya Bhibhiliya ma bwe ma lamula khu guya khu gu gola ga Jehovha. — 2 Dzik. 19:6.

12. Mihandro muni eyi vambe va yi manidego khu gu ba va seketede malulamiselo ya Jehovha nyo duse muthu libandlani?

¹² Wa gu seketeya esi si hungidwego khu madhota si nga phasa oyu a dusidwego gu wuya ga Jehovha. Elizabeth a khumbugidwego gupheyani, wari khuye: “Gu ema gu ganeya ni gyanana gyathu si hi garadzede ngudzu. Ganiolu, tepo a nga wuya ga Jehovha, ganede gu khuye gu ba a dusidwe libandlani si mu phaside ngudzu nigu hevbude silo nya singi. Isoso si nyi phaside gu wona gu kheni malulamiselo yaya ya Jehovha khyadi ngudzu.” Mwama waye Mark anuye o engedzeya, khuye: “Hwane nya tepo nyo khaguri, uye hi embede gu khuye gimwegyo nya silo gi mu kutsidego gu wuya, khu kotani nya olu ethu vavelegi vakone hi giridego esi hi nga ba hi yede gu gira. Nyi ngu mu bonga ngudzu Jehovha khu gu ba a hi phaside gu mu engisa teponi yeyi nyo garadze.”

13. Ginani gi nga gu phasago gu emisana ni wuvi u wupwago?

¹³ Bhula ni dzipari dzi pwisisago esi u tshanganago naso. Vbungadza ni Makristo ma na gu phasago gu simama u timiseya. (Mav. 12:25; 17:17) Joanna a khumbugidwe go gupheyani, wari khuye: “Dzimbe dzitepo, nyi di gu dzipwa wutundzu monyoni gwangu, ganiolu tepo nyi nga ba nyi bhula ni dzipari dzangu nyi di gu dzipwa gwadi.” Ahati vo tshuka vandriyathu nyo khaguri libandlani va ganeya silo si gu vbedzago tshivba ke, ginani u nga girago?

14. Khu ginani hi yedego gu ‘simama gu phasedzana ni gu tsetselelana khu gyathu’?

¹⁴ Laphiseya monyo vandriyathu. Khu lisine, khandri tepo yatshavbo vathu va na ganeyago silo nya sadi. (Jak. 3:2) Hatshavbo kha ha vbeleya, khu kharato u nga thurugi a tshuka muthu nyo khaguri a si giti gilo nyo ganeye mwendro kamo va gu tshuka va gu embeya silo si na gu vbisago monyo. Dudruga wusingalagadzi wa Pawulo wu gu khuwo: “Phasedzanani mu tsetselelana khu gyanu.” (Kol. 3:13) Ndriyathu nyo khaguri nya nyamayi a gu na ni nongo a dusidwego libandlani wari khuye: “Jehovha a nyi phaside gu divaleya vandriyathu avo va nga zama gu nyi tiyisa, ganiolu va hegisa khu gu ganeya silo si nga nyi vbisa monyo.” Libandla li nga phasa kharini sivbango nya ndraga sa wule a dusidwego libandlani?

15. Hi nga phasa kharini sivbango nya ndranga sa oyu a nga rigo gu duswa libandlani?

¹⁵ Khala pari nya sivbango nya ndranga sa owu a  dusidwego libandlani. Ndriyathu moyo nya nyamayi nyo pwani khu Miriam wari khuye tepo ndriyaye a nga duswa libandlani a di gu garadzega ngudzu a gu dundrugeya gu hongola mitshanganoni. Uye wari khuye: “Nyi di gu thava esi vambe va nga hadzi gu ganeya, ganiolu vandriyathu va nyi pharide khu ndziya nya yadi nigu avo va tshanisekide gumogo ni eni nigu avo kha va ganeya silo nyo vivbe maningano ni esi si dugeledego ndriyangu. Khu gu phaswa khu vandriyathu kha nya emisana ni gigaradzo gegi nyonga.” Mumbe ndriyathu nya nyamayi wari khuye: “Hwane nya gu ba gyanana gyathu gi dusidwe libandlani, vandriyathu va dita hi thaveleya. Vambe va ganede gu khavo va di gu siti gilo nyo ganeye. Ganiolu, vambe va lide ni eni nigu vambe va nyi rumelede makarta gasi gu ta nyi tiyisa. Iso va giridego si nyi phaside ngudzu!”

16. Libandla li nga simama kharini gu phasa sivbango nya ndranga sa oyu a dusidwego libandlani?

¹⁶ Simama gu phasa sivbango nya ndranga sa oyu a dusidwego libandlani. Olu avo va ngu vbweta ngudzu giphaso gyago ni gu yeyedzwa lihaladzo guvbindra gale. (Hebh. 10:24, 25) Dzimbe dzitepo vandriyathu nyo khaguri va ngu ema gu bhula ni sivbango nya ndraga sa oyu a dusidwego libandlani nigu avo va gu dzipwa nga khatshi anavo va di duswa libandlani. Kha hi vbweti gu khethu avo va dzipwa khu ndziya yoyo! Hi yede gu zundza ni gu tiyisa vaphya ava vavelegi vawe va digidego gu thumeya Jehovha. Maria oyu mwama waye a dusidwego libandlani a bwe a bhaghula ndranga yaye wari khuye: “Dzipari nyo khaguri dzi dita gaya dzi ta hi phasa gu phula dzi bwe dzi gira ni ethu wukhozeyi nya ndranga. Avo va pwide guvbisa gwangu va bwe va liya ni eni. Tepo vathu va nga pheya gu phalalegiseya malipha kheni, idzo dzi di nyi emeya. Khu lisine avo va nyi tiyiside!” — Rom. 12:13, 15.

17. Madhota ma nga gira ginani gasi gu thaveleya sivbango nya ndranga sa oyu a dusidwego libandlani?

¹⁷ Madhota, thumisani ni levbini lithomo gasi gu tiyisa sivbango nya ndranga sa oyu a dusidwego libandlani. Enu mu na ni thumo nyo hathege, nyo tiyise ava valongo vawe va digidego gu thumeya Jehovha. (1 Tes. 5:14) Gasi gu va tiyisa, bhulani navo na yi si pheyi mitshangano ni hwane nya mitshangano. Wuseyani vandriyathu vava mu bwe mu gombeya navo. Gimbiyani navo thumoni nyo  tshumayele, mwendro gu va khonvhidhari gasi gu ta patega avbo nya wukhozeyi wanu nya ndranga. Madhota ma yede gu khathaleya ava va garadzegago, ma bwe ma yeyedza lihaladzo ni gupweya wusiwana. — 1 Tes. 2:7, 8.

18. Guya khu 2 Pedro 3:9, Nungungulu a gu suveya ginani vale va digidego mu thumeya?

¹⁸ Jehovha ‘kha dzini ni moyo wanu a mbemba, aholu a gu vbweta gu khuye mu vbindrugedze’ (Leri 2 Pedro 3:9.) Ambari muthu a gu gira gighoho nya gikhongolo, womi waye wu ngari ni lisima ga Nungungulu. Dundruga gu khuwe Jehovha livbide tengo nya wukhongolo ngudzu a gu womi wa Gyanana gyaye nya gu gi gole gasi hi divaledwa sighoho sathu. Khu lihaladzo, Jehovha a gu zama gu phasa ava va mu digedego gasi va bweleya gwaye. Uye a gu vireya gu khuye va hakha giphaso gyogyo kha nga hi si wonago avbo nya gipimaniso gya Jesu maningano ni gyanana gi dzimedego. (Luka 15:11-32) Nya vangi va digidego lisine, khu gu gimbiya nya tepo va bwelede hengeledzanoni ya Jehovha. Nigu, vandriyathu va tsakide ngudzu khu gu va hakha. Elizabeth, a khumbugidwego gupheyani, tsakide ngudzu tepo a nga wona gyanana gyaye na gi gu wuyela libandlani. A gu dundruga esi si giregidego hwane, uye wari khuye: “Nyi ngu bonga gundzu vatshavbo vale va nga nyi kutsa gu mba vbeledwa khu gutumba.”

19. Khu ginani hi nga tumbago Jehovha?

¹⁹ Tepo yatshavbo hi nga tumba Jehovha. Sileletelo a hi ningago si na hi phasa tepo yatshavbo. Uye Papayi a gu na ni wuhindzi ni pweya wusiwana, a haladzago vatshavbo vale va mu khozeyago. Tiyisega gu khuwe Jehovha kha na nga gu diga wa gu ba u tshangana ni sigaradzo. (Hebh. 13:5, 6) Mark khumbugidwego gupheyani wari khuye : “Jehovha gima kha na nga hi niga. Uye tepo yatshavbo a na hi phasa tepo hi emisanago ni sigaradzo.” Jehovha a na simama gu gu ninga “tshivba yeyi yatshavbo nya yikhongolo.” (2 Kor. 4:7) Khu kharato, ambari muthu u mu golago a gu diga gu thumeya Jehovha, tiyisega gu khuwe u nga simama na wu tumbegide nya mba vbeledwa khu gutumba.