1. Jehovha a nga khala ginani gwathu?

 NDRANGA nya vakhozeyi va Jehovha ya gu pata Jesu a velegidwego khu “Babe na li si gu vangwi litigo,” ni mazanazana nya dzingilozi. (Kol. 1:15; Ndzi. 103:20) Tepo Jesu a nga ba a romo mafuni, phaside vathu gu pwisisa gu khavo va nga wona Jehovha kha nga Papayi wawe. Na gu ganeya ni vapizane vaye, Jesu ganede gu khuye Jehovha “Babe wangu, a gu Babe wanu nenu.” (Joh. 20:17) Tepo hi hendzeledzago womi wathu ga Jehovha hi bwe hi bhabhatiswa, ha gu dzegeya gu lumba ndranga yi wumbwago khu vandriyathu nya lihaladzo. — Marko 10:29, 30.

2. Ginani hi na gi wonago avba nya ndrima yeyi?

² Vambe si ngu va garadzeya gu wona Jehovha kha nga Papayi nya lihaladzo. Vambe kha va dziti edzi va nga yeyedzago khidzo lihaladzo ga vandriyathu. Avba nya ndrima yeyi, hi na wona edzi Jesu a hi phasago khidzo gu wona Jehovha kha nga Papayi nya lihaladzo oyu a nga si kodzago gu khala pari yathu. Hi na hevbula gambe dzindziya hi nga pimedzeyago khidzo Jehovha nya edzi hi pharago khidzo vandriyathu.

3. Nombelo hi hevbudzidwego khu Jesu, wa gu hi gira hi dzipwa vbafuvbi ni Jehovha khu ndziya muni?

³ Jehovha Papayi nya lihaladzo. Jesu a gu vbweta gu khuye hi wona Jehovha nga edzi a mu wonago khidzo. Hi mu wona nga papayi nya lihaladzo si vbevbugago gu mu hidzimeleya nasiri nga muthu nya mba wadi ni oyu a vbwetago gu khuye hi gira basi esi a yi rumago. Isoso somo guagani avba nya nombelo owu Jesu a hevbudzidego valandreyi vaye. Uye phede nombelo wowo khu malito yaya: “Papayi wathu.” (Mat. 6:9) Jesu na hi hevbudzide gu rana Jehovha khethu “Nya tshivba yatshavbo,” “Muvangi,” mwendro “Pfhumu nya gupindruge.” Maranelo yaya khama hosega kholu  Bhibhiliya yi ngu ma thumisa gasi gu rana Jehovha. (Gen. 49:25; Isa. 40:28; 1 Thim. 1:17) Ambari ulolo, Jesu hi hevbudzide gu rana Jehovha khethu “Papayi.”

4. Ha gu dziti kharini gu khethu Jehovha a gu vbweta gu khuye hi mu hidzimeleya?

⁴ Ina si ngu gu garadzeya gu wona Jehovha kha nga Papayi nya lihaladzo? Vambe va gu si wona kharato. Isoso adzina si nga girega kholu vambe va nga mba dandriswa khu ndziya nya lihaladzo. Si ngu tsakisa gu dziti gu khethu Jehovha a ngu pwisisa edzi hi dzipwago khidzo. Uye a gu vbweta gu hidzimeya vbafuvbi gwathu. Lito laye la gu hi kutsa gu khilo: “Hidzimelani vbafuvbi ga Nungungulu, uye nuye a na mi hidzimelela.” (Jak. 4:8) Jehovha a ngu hi haladza ngudzu ni gu a ngu hi tumbisa gu khala Papayi nya wadi gwathu.

5. Guya khu Luka 10:22, Jesu a gu hi phasa kharini gu hidzimeya ga Jehovha?

⁵ Jesu a nga hi phasa gu hidzimeya ga Jehovha. Jesu a ngu muti gwadi Jehovha nigu pimedzede makhalelo yaye khu guvbeleya. Khu kharato, uye ganede gu khuye: “Uye a nyi wonago, a ngu wona Babe.” (Joh. 14:9) Kha nga koma, Jesu a ngu hi hevbudza edzi hi nga ningago khidzo githawo ni gu engisa Papayi wathu, edzi hi nga mu tsakisago khidzo ni edzi hi nga tsakedwago khidzo khuye. Ni gu nya lisima khu gu Jesu a ngu hi phasa gu pwisisa makhalelo ya Jehovha nya nga wuwadi ni lihaladzo. (Leri Luka 10:22.) Hongoleni hi wona siyeyedzo nyo khaguri si yeyedzago gu khiso Jehovha Papayi nya lihaladzo.

6. Ha gu dziti kharini gu khethu Jehovha a di gu engiseya milombelo ya Jesu?

⁶ Jehovha a ngu engiseya sanana saye. Wona dzindziya nyo khaguri edzi Jehovha a engisedego khidzo Gyanana gyaye nya matiwula. Nari mafuni, Jesu gombede khu dzitepo nya dzingi ni gu Jehovha engisede milombelo yaye. (Luka 5:16) Jehovha engisede Gyanana gyaye tepo gi nga ba gi gombeya khu silo nya lisima gi nga ba gi vbweta gu hunga. Khu giyeyedzo, gu hatha 12 vapostoli. (Luka 6:12, 13) Ni gu gambe, Jehovha engisede nombelo wa Jesu tepo a nga ba a garadzega. Gitepwana hwane na si gu ningedwi khu Judha, Jesu gombede ga Papayi waye maningano ni gilingo a nga hadzi emisana nagyo. Jehovha kha engiseya basi nombelo wa Jesu, ganiolu  rumede dzingilozi gasi dziya tiyisa Gyanana gyaye nyo gigole. — Luka 22:41-44.

7. Wa gu dzipwa kharini khu gu dziti gu khuwe Jehovha a ngu engiseya milombelo yathu?

⁷ Muhuno, Jehovha a ngo simama gu engiseya milombelo yathu. A ngu hlamula milombelo yoyo khu tepo yakona nigu khu ndziya nya yadi. (Ndzi. 116:1, 2) Ndriyathu moyo nya nyamayi wa India wonide edzi Jehovha a nga ba a hlamula khidzo milombelo yaye. Uye a di gu tshangana ni gigaradzo nyo khaleye gu garadzega, khu kharato uye a di gombeya ga Jehovha khu monyo waye watshavbo a mu embeya esi si nga ba si girega. Uye lovide gu khuye: “Longoloko nya JW Broadcasting^® nya maio nya 2019, wu ganeyago khedzi hi nga emisanago khidzo ni gu garadzega, wu nyi phaside ngudzu. Longoloko wowu wu diri hlamulo nya milombelo yangu.”

8. Jehovha yeyedzide kharini gu khuye a ngu haladza Jesu?

⁸ Jehovha yeyedzide lihaladzo ga Jesu ni gu khathala ndrani nya matshigu yaye nyo garadze mafuni nigu uye a ngu hi yeyedza lihaladzo la limwedo ni gu khathala muhuno. (Joh. 5:20) Uye phaside Jesu gu tiyisa gukhodwa gwaye, a mu tiyisa tepo a nga ba a garadzega a bwe a mu khataleya khu nyamani. Nigu Jehovha embede Gyanana gyaye gu khuye a ngu gi haladza ni gu gi ngu tsakisa monyo waye. (Mat. 3:16, 17) Jesu a di gu dziti gu khuye Papayi waye nya lihaladzo a di hadzi mu phasa ni ga yevbini tepo, khu kharato a di si dzipwi enga. — Joh. 8:16.

9. Ginani gi yeyedzago gu khigyo Jehovha a ngu hi haladza?

⁹ Gu fana ni Jesu, hi ngu wona edzi Jehovha a hi haladzago khidzo. Nga dundrugeya khesi: Jehovha a ngu hi dzumeleya gu khala dzipari dzaye nigu hi ningide vandriyathu nya lihaladzo va hi tsakisago va bwe va hi tiyisa tepo hi garadzegago. (Joh. 6:44) Jehovha a ngu hi ninga gambe satshavbo hi si vbwetago gasi hi tiyisa gukhodwa gwathu. Ni gu uye a ngu hi phasa gambe khu nyamani. (Mat. 6:31, 32) Ha gu dundrugeya khu lihaladzo eli Jehovha a hi yeyedzago, lihaladzo lathu khuye la gu engedzeya.

10. Hi nga mu pimedzeya kharini Jehovha avba nya edzi hi pharago khidzo vandriyathu?

¹⁰ Jehovha a ngu haladza vandriyathu. Ganiolu, gwathu adzina si nga hi garadzeya gu haladza vandriyathu ni gu yeyedza gu khethu hi ngu va haladza. Isoso si nga girega kholu hi dandrede ga siemo nyo hambane nigu hi na ni tumbunugo nyo hambane. Nigu hatshavbo hi ngu gira sihoso si gorosago vambe mwendro gu mba va tsakisa. Ambari ulolo, hatshavbo hi nga dzi garadza gasi hi tiyisa lihaladzo lathu khu vandriyathu. Khu ndziya muni? Khu gu pimedzeya Papayi wathu avba nyo yeyedze lihaladzo khu vandriyathu. (Efes. 5:1, 2; 1 Joh. 4:19) Hongoleni hi wona egi hi nga gi hevbulago khu giyeyedzo gya Jehovha.

11. Jesu pimedzede kharini “pweya-wusiwana” wa Jehovha?

¹¹ Jehovha a ngu yeyedza “pweya-wusiwana.” (Luka 1:78, NM) Muthu a gu na ni pweya-wusiwana a ngu garadzega tepo a wonago mumbe na gu tshaniseka. Nigu a gu vbwetedzeya dzindziya nya gu mu phase ni gu mu tiyisa. Jesu yeyedzide pweya-wusiwana nya nga wa Jehovha khedzi a nga ba a phara khidzo vathu. (Joh. 5:19) Tepo a nga ba a wona gitshungu, a di gu gi “gi pweya wusiwana kholu gi di gu tshaniseka ni gu legalegiswa, nga dzinvuta nya mba na muhavisi.” (Mat. 9:36) Ganiolu, Jesu kha va pweya basi wusiwana, uye giride gilogyo gasi gu va phasa. Uye hawulugiside vadwali ni gu tangadzisa vale va “garadego ni gu lemedwa.” — Mat. 11:28-30; 14:14.

12. Ninga giyeyedzo nya edzi hi nga yeyedzago khidzo pweya-wusiwana.

¹² Gasi hi si kodza gu yeyedza pweya-wusiwana ga vandriyathu gupheya hi yede guti esi si va garadzago.  Khu giyeyedzo, adzina ndriyathu nyamayi a gu tshangana ni gigaradzo nyo khaguri nya madwali. Uye kha ganeyi khu gigaradzo a gu nagyo, ganiolu adzina a ngu vbweta giphaso. Ina a ngu si kodza gu khataleya esi si vbwetagago ndrangani gwaye? Ina a di hadzi tsaka khu gu phaswa gu phula guhodza ni gu agisa ndrangani? Mwendro, si nga gira ndriyathu nyo khaguri nya mwama na vbeledwe khu thumo. Hi nga mu ninga sitsapawana gasi si mu phasa na ngo vireya gu mana wumbe thumo, ganiolu hi si mu pwadzeyi gu khethu sitsapawana sile khyathu.

13-14. Hi nga yeyedza kharini wuhidzi nya nga Jehovha?

¹³ Jehovha na ni wuhindzi. (Mat. 5:45) Ethu kha hi yeli gu vireya kala vandriyathu va hi lomba giphaso gasi hi va yeyedza pweya-wusiwana. Gu fana ni Jehovha, hi nga pheya khethu hi va gireya gilogyo na va nga si hi lombi giphaso. Tshigu ni tshigu a gu gira gu lidambo li duga nya mba mu lomba, ni gu vatshavbo va ngu phasega khu lihani nasiri basi vale va bongago Jehovha. Jehovha a gu yeyedza gu khuye a ngu hi haladza khu gu hi ninga satshavbo hi si vbwetago, nigu hatshavbo hi ngu mu haladza kholu na ni wuwadi ni wuhindzi.

¹⁴ Vandriyathu va ngu pimedzeya Jehovha khu gu yeyedza wuhindzi vambe. Khu giyeyedzo, khu 2015 gingulu nya gikhongolo nyo pwane Supertufão Haiyan, gi ghohetede silo nya singi ngudzu Filipinas. Vandriyathu va luzide dzindranga dzawe ni dzithomba dzawe. Ganiolu, vandriyathu va mayigoni gwatshavbo va va phaside khu givbiredza. Nya vangi va phasedzede khu gu gira miningelo ni gu patega avba nya projeto nya gu vbahe ni gu vbahedza tanga 750 dzinyumba na wu si vbeyi ni mwaga. Ndrani nya tungu nya COVID-19, Dzifakadzi dza Jehovha dzi dzi garadzede gu phasa vandriyawe va nga ba va vbweta giphaso. Tepo hi vbiredzeyago gu phasa vandriyathu va emisanago ni sigaradzo ha gu yeyedza gu khethu hi ngu va haladza.

15-16. Guya khu Luka 6:36, hi nga pimedzeya kharini Papayi wathu wa ndzadzini?

¹⁵ Jehovha na ni wuhindzi nigu a ngu divaleya. (Leri Luka 6:36.) Tshigu ni tshigu hi ngu divaledwa khu Papayi wathu wa ndzadzini. (Ndzi. 103:10-14) Jesu pimedzede Papayi waye kholu ambari olu valandreyi vaye va nga ba va sa vbeleya, uye tepo yatshavbo a di gu va yeyedza wuhindzi ni gu divaleya. Nigu Jesu ningede womi waye  gasi hi divaledwa sighoho sathu. (1 Joh. 2:1, 2) Gu dziti gu khethu Jehovha ni Jesu va na ni wuhindzi nigu va ngu divaleya, sa gu engedzeya lihaladzo lathu khavo.

¹⁶ Lihaladzo lathu khu vandriyathu, la gu engedzeya gu dandra tepo hi divaleyanago. (Efes. 4:32) Lisine gu dzimbe dzitepo si ngu garadza gu divaleya, ganiolu hi yede gu dzi garadzeya gu gira isoso. Ndriyathu nyo khaguri nya nyamayi phasidwe khu ndrima nya Mukhedziseyi yi gu khiyo “Divaleya vambe na si gu khugeya monyoni.” * Uye lovide khuye: “Ndrima yeyi yi nyi phaside gu wona edzi gu divaleya vambe gu nga nyi phasago khidzo. Ndrima yeyi yi tshamusede gu khiyo, gu divaleya vambe kha si thuli gu khiso wa gu ema ni silo nyo vivbe va giridego mwendro esi va giridego kha si gu vbisi. Ganiolu, gu divaleya sa gu thula gu divala satshavbo va gu giredego u si va vegeyi likhulo u bwe u dzi garadzeya gu vbweta gurula.” Tepo hi divaleyago vandriyathu na si gu khugeya monyoni, ha gu yeyedza gu khethu hi ngu va haladza nigu ha gu pimedzeya Papayi wathu nya lihaladzo, Jehovha.

17. Guya khu Matewu 5:16, hi nga ninga kharini wuzundzu Papayi wathu wa ndzadzini?

¹⁷ Hi ngu bonga ngudzu kholu hi gu na ni vandriye mafuni gwatshavbo va gu na ni lihaladzo. Ha gu vbweta gu khethu vathu nya vangi va khozeya Jehovha. Khu kharato, hi yede gu dziwoneya gasi hi si giri silo si na nyenyezisago lina la Jehovha ni vathu vaye. Tepo yatshavbo ha gu dzi garadzeya gu manega ni mavbanyelo nya yadi ma na phasago vathu gu dzumeya mahungu nya yadi. — Leri Matewu 5:16.

18. Ginani gi nga hi phasago gu pala hwanga nyo tshumayele?

¹⁸ Dzimbe dzitepo vathu va ngu ganeya guvivba khethu va bwe va hi wugeya khu kotani nya olu hi engisago Papayi wathu wa ndzadzini. Ina esi si ngu gu gira u thava gu bhuleya vambe khesi u si khodwago? Abari gu ina, tiyisega gu khuwe Jehovha gumogo ni Gyanana gyaye va na gu phasa. Jesu tiyisegiside vapizane vaye gu khuye kha va nga ba va yede gu garadzega khesi va na ganeyago ni edzi va na ganeyago khidzo. Khu ginani? Jesu a di khuye: “Mu na ningwa esi mu yedego  gu ganeya khu tepo yoyo; kholu khandrenu basi mu na ganeyago, ganiolu, liphuvbo la Papayi wanu khilo li na mi ganeleyago.” — Mat. 10:19, 20.

19. Ninga giyeyedzo nya muthu a tshumayedego khu gu tiya hwambo.

¹⁹ Wona giyeyedzo gya Robert. Tepo si nga lomba gu a hongola tribhunali ya Àfrica do Sul, uye a di ngari gu pheya gu hevbula Bhibhiliya nigu a diri mwalo guti nya gungi khu Bhibhiliya. Ganiolu, khu gu tiya hwambo, tshamusede mulamuli (Juiz) khuye kha vbweti gu dzi bedzedzeya omu nya politika kholu a ngu haladza vandriyaye nya Makristo. Uye a di gu bonga ngudzu kholu a girago gipandre nya ndranga ya Jehovha. Khavbovbo, mulamuli a di mu wudzisa khuye: “Khu vamani vandriyago?” Robert kha nga ba a gi virede giwudziso gile, ganiolu a di dundruga lowo wa litshigu lile. Gu diri Matewu 12:50 wu gu khuwo: “Ni wevbini a girago gugola ga Papayi wangu a gomogo ndzadzini, uyoyo khuye a gu ndriyangu nya mwama, ndriyangu nya nyamayi nigu khuye a gu mamayi wangu.” Ambari olu Robert a nga ba a ngari gu pheya gu hevbula Bhibhiliya, Jehovha mu ningide liphuvbo nya guage gasi li mu phasa gu hlamula siwudziso sile ni simbe a nga ba a sa si vireya. Khu lisine, Jehovha dzipwide matshandza khesi Robert a giridego! Uye gambe a ngupwa matshandza khethu tepo hi mu tumbago hi bwe hi tiya hwambo hi tshumayela ndrani nya siemo nyo garadze.

20. Ginani u yedego gu dzi emiseya gu gira? (Johane 17:11, 15)

²⁰ Simama gu ninga lisima lithomo u gu nalo nyo gire gipandre nya dranga yi wumbwago khu vathu va gu na ni lihaladzo. Hi na ni Papayi nya wadi gu vbindra vatshavbo nigu hi na ni vandriyathu nya vangi nyo tumbege. Tepo yatshavbo hi yede gu yeyedza gubonga khu lithomo hi gu nalo. Dundruga gu khuwe Sathane ni valandreyi vaye va gu zama gu hi gira hi kanakana gu khethu Jehovha a ngu hi haladza va bwe va zama gu pfhungumula gu pwanana gwathu. Ganiolu, Jesu gombede a lomba ga Papayi waye khu khuye a hi sayisa gasi hi simama gu pwana. (Leri Johane 17:11, 15.) Jehovha a ngu hlamula nombelo wowo. Gu fana ni Jesu, u nga tshuki u kanakana gu khuwe Jehovha a ngu gu haladza. Tiyisega gu khuwe Jehovha tepo yatshavbo a na gu seketeya nigu dzi emiseye gu simama u tiyisa lihaladzo lago khu Jehovha ni vandriyathu.