1. Guya khu Malakiya 3:16, libhuku muni Jehovha a lovago ni gu ginani a lovago umo nya libhuku lolo?

 GU NGU vbindra dzimiliyoni nya myaga Jehovha na gu lova libhuku nya gu hathege. Umo nya libhuku lolo gu na ni sasamedzo nya malina, nigu lina nya gu pheye gu lowa khya fakazi nyo tumbege Abheli. * (Luka 11:50, 51) Gu khugeya iyoyo, Jehovha a ngu engedzeya malina umo nya libhuku lolo, nigu muhuno li na ni dzimiliyoni nya malina. Umo nya Bhibhiliya libhuku lolo la gu ranwa pwani, “libhuku nya sialakanyiso”, “libhuku nya womi” ni ‘libhuku mwendro rolo nya womi.’ Avba nya ndrima yeyi, hi na rana libhuku leli khethu “libhuku nya womi.” — Leri Malakiya 3:16; Gutu. 3:5; 17:8.

2. Malina ya va mani ma na lowago umo nya libhuku nya womi nigu ginani hi nga girago gasi malina yathu ma lowa umo nya libhuku lolo?

² Libhuku leli nyo hathege, li na ni malina ya vatshavbo va khozeyago Jehovha khu githawo mwendro vale va haladzago lina laye. Avo va na ningwa lithomo nya gu hakhe womi nya gupindruge. Muhuno, malina yathu ma nga lowa umo nya libhuku leli, ha gu manega ni wupari wa vbafuvbi ni Jehovha wu dzi seketeyago avbo nya dzegiso wa Gyanana gyaye, Jesu Kristo. (Joh. 3:16, 36) Hatshavbo ho vbweta gu khethu malina yathu ma lowa umo nya libhuku leli, gani hi na ni gutumba nya gu vbanye ndzadzini mwendro mafuni.

3-4. a) Ina hi na vbanya kala gupindruga malina yathu ma gu lowa olu umo nya libhuku nya womi? Tshamuseya. b) Ginani hi na bhulago khigyo avba nya ndrima yeyi ni eyi yi landreyago?

 ³ Ina so thula gu khiso vatshavbo malina yawe ma lovidwego umo nya libhuku leli va na ni gutumba nya gu vbanye kala gupindruga? Ethu hi na mana hlamulo wa Jehovha a embedego Mosi umo ga Ekisodha 32:33. Jehovha a di khuye: “Oyu a nyi ghohedego khuye nyi na futago lina laye libhukuni gwangu.” Khu kharato, malina ma gomogo umo nya libhuku olu, ma nga futwa, nigu Isoso si ngu fana ni gu ba Jehovha a lovide malina yawe khu lápis. (Gutu. 3:5) Hi yede gu gira satshavbo hi si kodzago gasi malina yathu ma simama umo nya libhuku leli kala ma lowa khu kaneta.

⁴ Esi adzina si nga hi gira hi dzi gira siwudziso sesi. Khu giyeyedzo, ginani Bhibhiliya yi ganeyago khu vale malina yawe ma lovidwego umo nya libhuku nya womi ni ava malina yawe ma nga mba lowa? Lini va na hakhago womi nya gupindruge ava malina yawe ma lovidwego umo nya libhuku? Ahati ava va fudego nya mba mana lithomo nya guti Jehovha ke? Ina si na kodzega gu malina yawe ma lowa omu nya libhuku lolo? Siwudziso sesi si na hlamudwa avba nya ndrima yeyi ni eyi yi landreyago.

MALINA YA VA MANI MA NGA LOWA UMO NYA LIBHUKU?

5-6 a) Guya khu Vafilipi 4:3, malina ya va mani ma lovidwego umo nya libhuku nya womi? b) Ginani va yedego gu gira gasi malina yawe ma lowa khu kaneta umo nya libhuku nya womi?

⁵ Malina ya va mani ma lovidwego umo nya libhuku nya womi? Gasi gu mana hlamulo nya giwudziso gegi, hi na bhula khu 5 mitsawa nya vathu. Ga mitsawa yoyo, malina nya vathu nyo khaguri ma lovidwe umo nya libhuku nya womi, ganiolu ya vambe kha ma lowa.

⁶ Tsawa nya gu pheye wa gu wumbwa khu vale va nga hatwa gasi guya fuma ni Jesu ndzadzini.  Ina malina yawe ma lovidwe umo nya libhuku nya womi? Ina. Guya khu malito ya mupostoli Paulo a nga loveya “vale a hengelago navo thumoni” Filipi, malina ya vale va todzidwego a gu vale va nga hatwa gasi guya fuma ni Jesu, olu ma lovidwe umo nya libhuku nya womi. (Leri Vafilipi 4:3.) Ganiolu, gasi malina yawe ma simama umo nya libhuku nya womi, avo va yede gu simama na va tumbegide. Khavbovbo, hwane nya gu ba va hakhide gifungu nya gu hegise, malina yawe ma na lowa khu kaneta umo nya libhuku leli. Esi si na girega hwane nya gu ba va fude mwendro hwane nya gu na yi phede tshanisa nya yikhongolo. — Gutu. 7:3.

7. Ginani hi gi pwisisago omu ga Gutuledwa 7:16, 17, maningano ni tepo malina nya gidzemo nya gikhongolo nya dzimbe dzinvuta ma na lowago khu kaneta omu nya libhuku nya womi?

⁷ Tsawa nya wuvili, wa gu wumbwa khu gidzemo nya gikhongolo nya dzimbe dzinvuta. Ina malina yawe ma lovidwe olu umo nya libhuku nya womi? Ina. Ina malina yawe ma na simama omu nya libhuku nya womi hwane nya gu ba va vbulugide Harmagedhoni? Ina. (Gutu. 7:14) Jesu ganede gu khuye dzivhuta dzedzi dzi na “hongola guvbanyani nya gupindruge.” (Mat. 25:46) Ganiolu, vale va na vbulugago Harmagedhoni kha va na nga dzegeya gu hakha womi nya gupindruge. Malina yawe ma na simama gu lowa umo nya libhuku khu lápis. Ndrani nya Mufumo nya 1000 myaga, Jesu a na va “havisa a va yisa nambhoni nya mati nya womi.” Vale va na engisago sileletelo sa Kristo va bwe va lamudwa kha nga vathu va tumbegidego ga Jehovha, malina yawe ma na simama na ma lovidwe khu kaneta omu nya libhuku nya womi. — Leri Gutuledwa 7:16, 17.

8. Ginani gi na giregago ni vale malina yawe ma nga mba lowa omu nya libhuku nya womi?

⁸ Tsawa nya wuraru, wa gu wumbwa khu vale va fananiswago ni dziphongo, va na fuviswago ga Harmagedhoni. Malina yawe kha ma lowa omu nya libhuku nya womi. Jesu ganede gu khuye avo “va na hongola gu mbembiswani nya gupindruge.” (Mat. 25:46) Na gu kutswa khu liphuvbo nya guage, Pawulo a gu hi embeya gu khuye “avo va na mbembiswa va yiswa hwindzo.” (2 Tes. 1:9; 2 Ped. 2:9) Wulangani nya isoso, vatshavbo vatago na va gu ghoheya liphuvbo nya guage khu nyagigwenye, kha va na nga vbanya kala gupindruga, ganiolu va na fuviswa kala gupindruga. Khu lisine, avo kha va nga ta wuswa. (Mat. 12:32; Marko 3:28, 29; Hebh. 6:4-6) Olu hongoleni hi bhula khu mitsawa mivili nya vathu va na wuswago.

KHU VAMANI VA NA WUSWAGO KHU GUFANI?

9. Kha nga si yeyedzwago ga Mithumo 24:15, khu yevbini mitsawa mivili nya vathu yi na wuswago gasi gu vbanya mafuni nigu khu gwevbini gu hambana ga mitsawa yeyi ya mivili?

⁹ Bhibhiliya ya gu ganeya khu mitsawa mivili nya vathu va na wuswago gasi gu vbanya kala gupindruga mafuni, “va nya gululama” ni ‘va nya gu mba lulama.’ (Leri Mithumo 24:15.) “Va nya gululama” khu vale va thumedego Jehovha khu gutumbega na va ngo vbanya, ganiolu ‘va nya gu mba lulama’ kha va thumeya Jehovha khu gutumbega nigu gutala nya dzitepo mavbanyelo yawe ma di siri yadi. Khu kotani nya olu mitsawa yeyi ya mivili yi na wuswago, ina hi na ganeya gu khethu malina yawe ma lovidwe omu nya libhuku nya womi? Gasi gu hlamula giwudziso gegi, hongoleni hi bhula khu tsawa moyo ni moyo.

10. Khu ginani “va nya gululama” va na wuswago nigu lithomo muni vathu nyo khaguri va na dzi buzago khilo? (Wona gambe “siwudziso sa valeri” maningano ni gu wuswa omu mafuni.)

¹⁰ Tsawa nya wu 4, wa gu wumbwa khu “va nya gululama”. Na va si gufi, malina yawe ma di lovidwe umo nya libhuku nya womi. Ina malina yawe ma gu futwa omu nya libhuku nya womi tepo avo vafago? Ahihi, kholu avo va gu simama “gu vbanya” mapimoni ga Jehovha.  Jehovha khandri “Nungungulu na vafi aholu, nya vathu va vbanyago kholu ga Nungungulu vatshavbo va ngu vbanya.” (Luka 20:38) Iso si thulago gu khiso tepo va nya gululama va na wuswago va vbanya mafuni, malina yawe ma na ba ma lovidwe omu nya libhuku nya womi, ganiolu gupheyani khu “lápis”. (Luka 14:14) Kha si kanakanise gu khiso vathu nyo khaguri va na ningwa lithomo nya gu thume kha nga, “vafumeli nya litigo latshavbo.” — Ndzi. 45:16.

11. Ginani egi ‘va nya mba lulama’ va yedego gu hevbula na ma si gu lowi malina yawe omu nya libhuku nya womi?

¹¹ Khu gu hegisa hongoleni hi bhula khu tsawa nya wu 5 wu wumbwago khu, ‘va nya mba lulama.’ Adzina, khu kotani nya olu avo va nga ba va si yiti milayo ya Jehovha, avo kha va vbanya khu ndziya nya gululame na va si gufi. Khu kharato, malina yawe kha ma lowa omu nya libhuku nya womi. Ganiolu, Nungungulu a na va wusa gasi va mana lithomo nya gu malina yawe ma lowa omu nya libhuku leli. Avo ‘va nya gu mba lulama’, va na vbweta giphaso nya gikhongo. Na va si gufi, vathu nyo khaguri va giride silo nya singi nyo vivbe. Khu kharato, avo va na vbweta gu hevbudzwa edzi va nga vbanyago khidzo guya khu milayo nya gululame ya Jehovha. Gasi gu va hevbudza silo sesi, Mufumo wa Nungungulu wu na thangeya thumo nya gu hevbudze khu ndziya nya gu wu di nga si girwi omu mafuni.

12. a) Khu mani a na hevbudzago va nya mba lulama? b) Ginani gi na dugeleyago vale va na bombago gu thumisa esi va na si hevbulago?

¹² Khu mani a na hevbudzago va nya mba lulama? Gidzemo nya gikhongolo ni ava nya gululame va na wuswago khu gufani. Gasi malina ya ava nya mba lulama ma lowa omu nya libhuku nya womi, va yede gu tiyisa wupari wawe ni Jehovha va bwe va dzi hendzeledza gwaye. Jesu Kristo ni ava va todzidwego, va na khedziseya gwadi khu ndzadzini edzi ava nya mba lulama va na si hakhago khidzo esi va na hevbulago. (Gutu. 20:4) Ni wevbini a na bombago gu hakha giphaso gegi a na fuviswa ambari nari ni 100 myaga. (Isa. 65:20) Jehovha ni ni Jesu va  nga si kodza gu wona esi si gu romo monyoni nya muthu nigu avo kha va na nga dzumeleya ni wevbini muthu a ghoheteya mafu nya maphya.—  Isa. 11:9; 60:18; 65:25; Joh. 2:25.

GUWUGA GU YISAGO GU VBANYANI NI GUWUGA GU YISAGO GULAMUDWATUNU

13-14. a) Gale hi di gu pwisisa kharini malito ya Jesu ma gu romo ga Johane 5:29? b) Ginani hi yedego gu gi pwisisa avba nya malito yaya?

¹³ Jesu gambe ganede khu vale va nga hadzi gu wuswa va vbanya omu mafuni. Khu giyeyedzo, uye a di khuye: “Gi ngu vboha gikhati egi vatshavbo va fudego va gomogo marowoni va na pwago Iito Iaye, va wuga: Ava na bani va na giride mithumo ya yadi, va na wuga vaya guvbanyani, gasi vale va na gu bani va giride guvivba va na wuga vaya [gulamudwatunu].” (Joh. 5:28, 29) Jesu a di gu vbweta gu khuye ginani?

¹⁴ Gale hi di gu pwisisa malito ya Jesu gasi gu thula sigiro sa vale va wuswago khu gufani; iso si thulago gu khiso vathu nyo khaguri va na wuga va gira silo nya sadi vambe silo nyo vivbe. Ambari ulolo, Jesu kha ganeya gu khuye vale va na wuswago va na gira silo nya sadi mwendro silo nyo vivbe. Uye a di gu ganeya khu sigiro sawe sa gale. Uye a di gu ganeya khu vale va nga ba va “giride mithumo nya yadi” ni vale va nga ba va “giride guvivba.” Isoso so thula gu khiso sigiro sesi va giride na va si gufi. Khu lisine, isoso si ngu pwisisega. Kholu mwalo a na dzumeledwago gu gira silo nyo vivbe mafuni nya maphya. Mo vbweta ganeya ginani malito ya Jesu maningano ni ‘wuga gasi guya guvbanyani’ ni gu ‘wuga gasi guya [gulamudwatunu]’?

15. Khu va mani va na “wuswago vaya guvbanyani”, nigu khu ginani?

¹⁵ Va nya gululama va nga gira silo nya sadi na va si gufi “va na wuga vaya guvbanyani” kholu malina yawe ma na ba ma lovidwe omu nya libhuku nya womi. Isoso so thula gu khiso ‘guwuga ga vale va nga bani va giride mithumo nya yadi’ gu khumbugwago omu ga Johane 5:29 khugu ga gumogo ni guwuga ga “va nya gululama” gu khumbugwago umo ga Mithumo 24:15. Tshamuselo wowu wu ngu pwana ni malito hi ma manago omu ga Varoma 6:7 ma gu khayo: “Kholu muthu a fudego tshulegide wugumbini nya gighoho.” Khu kharato, tepo va nya gululama vafago Jehovha a ngu divala sighoho sawe, ganiolu uye a gu dundruga yatshavbo mithumo nya yadi va yi giridego na va si gufi. (Hebh. 6:10) Khu lisine, va nya gululama tepo va na wuswago va yede gu simama na va tumbegide, gasi malina yawe ma simama umo nya libhuku nya womi.

16. Khu va mani va na ‘wugago va hongola [gulamudwatunu]’?

¹⁶ Ginani gi na giregeyago vale va girigidego silo nyo vivbe na va si gufi? Ambari olu sighoho sawe si nga divaledwa, avo kha va thumeya Jehovha na va ngo vbanya. Malina yawe kha ma lowa umo nya libhuku nya nya womi. Khu kotani nya isoso, guwuga ga vale ‘va nga gira silo nya gu vivbe’ khugu ga gumogo gu khumbugwago ga Mithumo 24:15. Avo va na ‘wuga va hongola [gulamudwatunu].’  * Isoso sagu thula gu khiso, Jesu a na va khedziseya ni gu va woneleya. (Luka 22:30) Hwane nya gu ba yi vbindride tepo nyo khaguri, Jesu a na vati ava va dinganedwago khu gu malina yawe ma lowa umo nya libhuku nya womi. Si nga kodzega basi gu malina ya ava nya mba lulama ma manega umo nya libhuku nya womi va gu diga mavbanyelo yawe ya gale va bwe va dzi hendzeledza ga Jehovha.

17-18. Ginani gi yedwego gu girwa khu vatshavbo va na wuswago va vbanya omu mafuni ni gu mithumo muni yi khumbugidwego ga Gutuledwa 20:12, 13?

 ¹⁷ Gani avo va diri vathu nya gu lulame mwendro mba lulama, avo va na wuswago va yede gu engisa milayo va na yi manago umo nya mabhuku nya maphya (rolos), ma na tudwago ndrani nya 1000 myaga. Mupostoli Johane tshamusede esi a nga si wona umo nya giwoniso, uye a di khuye: “Nyi di wona va nya gufa, vakhongolo ni sanana, va na emide mbeli nya gikhalo nya wufumu. Ma di tudwa mabhuku. Li tudwa gambe libhuku nya womi. Vafi va di lamudwa nga idzo gu nga bani gu lovidwe khidzo mabhukuni, gupima khu mithumo yawe.”—  Gutu. 20:12, 13

¹⁸ Avo va na wuswago va na lamudwa guya khu yevbini “mithumo”? Ina avo va na lamudwa guya khu mithumo va giridego na va si gufi? Ahihi! Dundruga gu khuwe, sighoho sawe si divaledwe tepo avo va ngafa. Khu kharato, avo kha va na nga lamudwa guya khu “mithumo yawe” va giridego gale. Wulangani nya isoso, avo va na lamudwa guya khedzi va na hakhago esi va na hevbudzwago mafuni nya maphya. Ambari va nya gutumbege nya nga, Nowa, Samueli, Dhavhidhe ni Dhaniyeli va yede gu ta hevbula khu Jesu ni dzegiso waye. Abari gu vama vava nya gu tumbege va yede gu ta hevbula silo nya singi, khu lisine ava nya mba lulama va na hevbula nya singi ngudzu.

19. Ginani gi na dugeleyago vale va na bombago lithomo leli nya gu samadzise?

¹⁹ Ginani gi na giregeyago vale va na bombago lithomo leli nya gu samadzise? Gutuledwa 20:15 a gu hi embeya khuye: “Tsivani momo va di rinywa vatshavbo vathu va nga bani va sa Iowa malina yawe omu nya libhuku nya womi.” Khu lisine, avo va na fuviswa khu gu vbeleya kala gupindruga. Khu kharato, si na ni lisima gu tiyisega gu khethu lina lathu lomo omu nya libhuku nya womi, nigu li na simama umo kala gupindruga mwendro gu lowa khu kaneta.

20. I thumo muni nya gu samadzise wu na girwago ndrani nya Mufumo nya 1000 myaga? (Wona fotu avba nya kapa.)

²⁰ Ndrani nya Mufumo nya 1000 myaga gu na ba guri tepo nyo tsakise ngudzu. Isoso si na pata thumo nya gu hevbudze nya gu gima wu di nga si girwi mafuni gwatshavbo. Ganiolu, gu na ba guri tepo nya gu khedziseye mavbanyelo ya ava nya gululame ni va nya mba lulama (Isa. 26:9; Mith. 17:31) Ginani gi na giregago ndrani nya thumo wowo? Ndrima yi landreyago yi na hi phasa gu pwisisa ni gu bonga malulamiselo yaya nya gu tsakise.