Guya khu 1 Vakorinto 15:8, Pawulo ganede gu khuye: “Khu guhegisa, a di wonega gambe ga eni, nyi gu khwatshi nyi gyanana nya guvelegwe ma si gu eneli matshigu yaye.” Gale, ethu hi di gu pwisisa gu khethu Pawulo khatshi a di gu dzi thula uye mune tepo a nga manega ni giwoniso gya Jesu nari ndzadzini. Gwaye si di gu gira gu khatshi a di gu hakha wuzundzo khu gu velegwa, m-wendro khu gu wuswa gasi gu vbanya kha nga givangwa nya liphuvbo khu gu gimbiya nya tepo, nigu na gu tshade mazanazana nya myaga na gu si giregi silo sesi. Ambari ulolo, hwane nya gu ba hi hevbude silo sesi, si di gu vbwetega gu tshukwadzisa mapwisiselo nya livhesi leli.

Lisine gu Pawulo a di gu ganeya khesi si nga dugeleya khu gu vbindrugedza gwaye. Ganiolu, ginani a nga ba a vbweta gu ganeya tepo a nga khuye “nyi gyanana nya guvelegwe ma si gu eneli matshigu”? Hongoleni hi si wona.

Gu velegwa gwaye gu diri ga githugedza nigu gu di gu thisa. Gyanana gi velegwago na ma si gu vboyi matshigu yagyo, dzitepo dzatshavbo gya gu velegwa khu githugedza. Kha nga Sawule (oyu khu gu gimbiya nya tepo a nga tidwa kha nga Pawulo) a nga endra a hongola Dhamasiku gasi guya tshanisa Makristo ya eyi, uye kha nga ba a vireya gu wona giwoniso nya gu wuswe ga Jesu. Guvbindrugedza ga Pawulo gu diri ga githugedza nasiri basi gwaye, ganiolu ga Makristo a nga hadzi gu ma tshanisa ga lidhoropa lile. Nigu gambe, esi si nga mu giregeya si di gu thavisa ngudzu nyo bwe a khala gikhumu khu gitepwana. — Mith. 9:1-9, 17-19.

Uye vbindrugedzide ga “tepo nya mba yadi.” Lito nya Gigreki li vbindrugedzedwego gu pwane “gyanana nya guvelegwe ma si gu eneli matshigu” li nga tshamusedwa gambe khu ndziya yeyi: “Muthu a velegidwego khu tepo nya mba yadi.” Bhibhiliya ya Jerusalema yo ganeya malito yaya khu ndziya yeyi: “Eni nyi di velegwa khu tepo nya gu mwalo a nga ba a yi vireya.” Tepo Pawulo a nga vbindrugedza, Jesu a di gu bwelede ndzadzini. Gu hambana ni ava Pawulo a nga va khumbuga ga mavhesi hwane yeyi, uye kha nga ba a wonide Jesu na gu wuswa a hongola ndzadzini. (1 Kor. 15:4-8) Jesu ningide Pawulo lithomo nya gu mu wone hwane nyo gu ba a wusidwe khu gufani, ambari si nga ba si gira gu khatshi gu diri ga “tepo nya mba yadi.”

Uye a di gu ganeya khuye mune khu ndziya nya yadi. Guya khu sihevbuli nyo khaguri, lito eli Pawulo a nga li thumisa avba, la gu gira gu khatshi a di gu konaniseya. Abari gu khiso Pawulo a nga ba a si pwisisa, uye a di gu pimisa gu khuye a di si ninganedwe khu gu khala mupostoli. Khu kharato, uye a di simama gu khuye: “Eni kheni nyi gu dugwana ga vapostoli, gambe kha nyi faneli gu ranwa mupostoli, khu kotani nyi nga tshanisa Libandla la Nungungulu. Aholu khu wuhigo wa Nungungulu nyi womo kha nga idzo nyi gu idzo.” — 1 Kor. 15:9, 10.

Khu kharato, so wonegisa gu khatshi Pawulo a di gu thula ndziya eyi Jesu a nga wonega khiyo gwaye, guvbindrugedza nya githugedza mwendro olu uye a nga ba a dzipwa na a si ninganedwe gu ningwa giwoniso gegi nyo hlamadzisi. Ni ga gevbini giemo, esi si nga dugeleya si diri ni lisima ga Pawulo. Vbavbandze nyo kanakane, esi si mu tiyisigeside gu khuye Jesu a di wusidwe khu gufani. Kha si hlamadzisi gu uye tepo yatshavbo na thumiside matshango yaya nya githugedza tepo a nga ba a tshumayela vambe maningano ni gu wuswa ga Jesu. — Mith. 22:6-11; 26:13-18.