1-2. Khu ginani ethu hi manegago Gidundrugisotunu mwaga ni mwaga?

 HWANE nya 2000 myaga, Jesu ningede womi waye khu kotani yathu gasi hi si kodza gu vbanya kala gupindruga. Ga wutshigu waye nyo hegise na si gufi, Jesu rumide valandreyi vaye gu dundruga dzegiso waye khu gu gira buzu nya wudugwana wu patago pawu ni vhinyu. — 1 Kor. 11:23-26.

² Ethu ha gu engisa gileletelo gya Jesu kholu hi mu haladzago ngudzu. (Joh. 14:15) Mwaga ni mwaga ndrani nya dzisemana na gi si giregi gidundrugiso ni hwane nyo ba gi giregide, ethu hi ngu yeyedza gubonga gwathu khu gu dzi vegeya tepo nya gu dundrugeye hi bwe hi gombeya maningano ni lisima ogu gufa gwaye gu gu nago ga vathu vatshavbo. Ethu gambe hi ngu tsaka khu gu manega thumoni nyo tshumayele, hi rana vathu nya vangi gasi va ta manega ni ethu ga gigiro gegi nya lisima ngudzu. Nigu ethu hi dzi emisede gu mba dzumeleya ni gevbini gi hi tandregisa gu manega Gidundrugisotunu.

3. Ginani hi na gi wonago avba nya ndrima yeyi?

³ Avba nya ndrima yeyi, hi na wona dzindziya dziraru edzi vathu va Jehovha va dzi thumisago gasi gu yeyedza gu khavo va ngu dundruga gufa ga Jesu. 1) Khu gu gira gidundrugiso khu ndziya eyi Jesu a hevbudzidego gu hi gira khiyo, 2) gu raneya vambe gasi va ta Gidundrugisotunu ni 3) gu manega Gidundrugisotunu ambari giemo gyo ba gi garadza.

4. Ginani hi gi hevbulago myaga yatshavbo hi hongolago Gidundrugisotunu, nigu khu ginani isoso si gu na ni lisima gwathu? (Luka 22:19, 20)

⁴ Mwaga ni mwaga tepo hi hongolago Gidundrugisotunu, ethu hi ngu engiseya ganelo yi seketedwago umo nya Bhibhiliya yi hlamulago siwudziso nya singi. Ethu hi ngu hevbula gu khethu  khu ginani vathu vatshavbo va vbwetago dzegiso ni edzi gufa ga muthu moyo gu nga livbago khidzo sighoho nya vathu nya vangi. Ethu gambe hi ngu dundrugiswa esi si emeyago pawu ni vhinyu nigu khu mani a yedego gu hodza pawu ni gu seya vhinyu. (Leri Luka 22:19, 20.) Nigu ethu hi ngu dundrugeya khu wumindru nyo tsakise wu viredwago khu vale va gu na ni gutumba nyo vbanye mafuni kala gupindruga. (Isa. 35:5, 6; 65:17, 21-23) Lisine leli khya lisima ngudzu gwathu. Khu giyeyedzo, vathu nya vangi kha va pwisisi isoso nigu kha va ningi lisima dzegiso wa Jesu. Avo gambe kha va dundruge gufa gwaye guya khedzi uye a hevbudzidego valandreyi vaye gu gira khidzo. Khu ginani?

5. Hwane nya gu ba va fude vapostoli va Jesu, vathu va di pheya gu dundruga gufa ga Jesu khu ndziya muni?

⁵ Hwanenyana nya gu ba va fude vapostoli va Jesu, gu di pheya gu manega Makristo nya malipha libandlani. (Mat. 13:24-27, 37-39) Avo va di ganeya “malipha, va gu dzimedza vakhodwa.” (Mith. 20:29, 30) Limwedo nya “malipha” yoyo khu gu Makristo nya malipha ma di pheya gu hevbudza gu khayo Jesu kha ningeya givili gyaye “gumogo basi a gu khala mhamba nya guhandze sighoho nya vathu nya vangi,” kha nga edzi Bhibhiliya yi ganeyago khidzo. Ganiolu, avo vari khavo muphaso waye wu yedwe gu pheledzwa. (Hebh. 9:27, 28) Muhuno, vathu nya vangi va ngu khodwa ga malipha yoyo. Avo va gu hongola tshetsheni semana ni semana, dzimbe dzitepo tshigu ni tshigu gasi vaya gira esi tshetshi nya Katolika yi si ranago khiyo “Misa.” b Vambe nya dzimbe dzitshetshe va gu dundruga gufa ga Jesu tepo yatshavbo, ganiolu vambe kha va pwisisi gwadi tshamuselo nya muphao wa Jesu. Vambe va ngu dzi wudzisa gu khavo ‘ina si ngu kodzega gu sighoho sangu si divaledwa khu gufa ga Jesu?’ Khu ginani avo va girago giwudziso gyogyo? Kholu avo va di embedwa khu vathu nyo khaguri gu khavo sighoho sathu kha si divaledwi khu kotani nya gufe ga Jesu. Valandreyi nya lisine va Jesu va gu phasa kharini vathu gu pwisisa tshamuselo nya muphaso wa Jesu ni edzi va yedego khidzo gu dundruga gufa ga Jesu?

6. Khu 1872, ginani egi tsawa nya sihevbuli nya Bhibhiliya wu nga gi pwisisa?

⁶ Gu hegisani nya lizana myaga nya wu 19, tsawa nyo khaguri nya sihevbuli nya Bhibhiliya wu nga ba wu thangedwa khu Charles Taze Russell wu di pheya gu hevbula Milowo. Avo va di gu vbweta gu pwisisa gwadi esi dzegiso wa Jesu wu tshamuseyago iso ni edzi gufa gwaye gu nga ba gu yedwe gu dundrugwa khidzo. Khu 1872, avo va pwisiside lisine la umo nya Bhibhiliya li ganeyago gu khilo Jesu khu lisine fede vathu vatshavbo. Avo kha va degula ni esi va nga si tugula. Wulangani nya isoso, va di bhuleya vambe khu gu thumisa mabhuku, dzijornali ni dzirevhista. Nigu khu hwane nya isoso avo va di pheya gu pimedzeya Makristo ya lizana myaga nyo pheye. Avo va di pheya gu tshangana gumogo khu mwaga gasi gu dundruga gufa ga Kristo.

7. Ha gu wuyedwa kharini khu wu gevesisi wu giridwego khu sihevbuli nyo pheye nya Bhibhiliya?

⁷ Muhuno hi ngu wuyedwa khu wugevesisi wu giridwego khu Makristo nyo pheye va wu giridego khu myaga nya yingi. Khu ndziya muni? Jehovha a ngu hi phasa gu pwisisa esi dzegiso wa Jesu wu tshamuseyago iso ni esi uwo wu na hi gireyago ni gu gireya vathu vatshavbo. (1 Joh. 2:1, 2) Ethu gambe hi hevbude gu khethu Bhibhiliya yi ngu ninga gutumba guvili ga vathu va tsakisago Nungungulu, a gu gu vbanya nya mbafa ndzadzini ga vathu nyo khaguri ni gu vbanya mafuni kala gupindruga  ga dzimiliyoni nya vathu. Ethu ha gu hidzimeya ga Jehovha kholu hi wonidego edzi uye a hi haladzago khidzo ni edzi hi wuyedwago khidzo khu dzegiso wa Jesu. (1 Ped. 3:18; 1 Joh. 4:9) Khu kharato, gufana ni vandriyathu nyo tumbege va gale ethu ho rana vambe gasi guta dundruga gufa ga Jesu khu ndziya eyi Jesu a hevbudzidego khidzo valandreyi vaye gu gira khidzo.

8. Ginani egi vathu va Jehovha va giridego gasi gu rana vathu vata Gidundrugisotunu? (Wona fotu.)

⁸ Khu myaga nya yingi vathu va Jehovha va ngu rana vathu gasi vata Gidundrugisotunu. Gupheyani nya 1881, vandriyathu va Estados Unidos va ranidwe gasi vaya tshangana gumogo avba nya nyumba nyo khaguri Allegheny, Pensilvânia ga gigiro gegi nya lisima ngudzu. Khu gu gimbiya nya tepo mabandla ma di gu dzi gireya yabune gindundrugiso. Khu Março nya 1940, vahuweleyi va di ganeya gu khavo va di yede gu rana ni wevbini gipandreni gwawe a nga ba a yeyedza gu tsakeya. Khu 1960, khu tepo nyo pheye, Bheteli yi di gira malulamiselo nya gu dzi gandlwa dzikonvhite. Gukhugeya iyoyo gu ngu ningedwa dzikonvhite nya dzingi nya gidundrugiso. Khu ginani hi vbedzago tepo nya yingi hi bwe hi dzi garadza gasi gu rana vambe?

9-10. Khu mani a wuyedwago tepo hi girago satshavbo hi si kodzago gasi gu rana vambe guta Gidundrugisotunu? (Johane 3:16)

⁹ Gimwegyo nya gighelo gi hi girago hi raneya vathu gasi va ta Gidundrugisotunu, khu gu ethu ha gu vbweta gu khethu vale vatago va ta wona gidundrugiso khu tepo nyo pheye va hevbula lisine maningano khesi Jehovha ni Jesu va hi giredego. (Leri Johane 3:16.) Ethu ho vireya gu khethu esi avo va na si wonago ni gu  sipwa avbo nya gidundrugiso si va kutsa gu hevbula nya singi ni gu khala sithumi sa Jehovha. Ganiolu, vambe gambe va ngu wuyedwa.

¹⁰ Ethu gambe hi ngu rana vale va nga diga gu thumeya Jehovha. Ethu ho gira isoso gasi gu va dundrugisa gu khethu Nungungulu nga go simama gu va haladza. Nya vangi va ngu hakha konvhite yathu nigu va nguta wona gidundrugiso. Gu manega Gidundrugisotunu si ngu va dundrugisa edzi va tsakidego khidzo gale khu gu thumeya Jehovha. Wona giyeyedzo gya Monica. c Ndrani nya tungu nya COVID-19, uye a di pheledza gu tshumayela. Hwane nyo ba wonide gidundrugiso gi nga girega khu 2021 wari khuye: “Gidundrugiso gegi gi nyi kuhide ngudzu. Hwane nya 20 myaga, nyi si kodzide gambe gu tshumayela vathu khu gu va rana gasi guta Gidundrugisotunu. Eni nyi giride satshavbo nyi nga si kodza gasi gu rana vambe kholu eni nyi ngu bonga ngudzu khesi Jehovha ni Jesu va nyi giredego.” (Ndzi. 103:1-4) Gani vathu va ngu hakha kovhinte yathu mwendro ne, ethu hi na gira satshavbo hi si kodzago gasi gu rana vambe guta Gidundrugisotunu, na hi gu dziti gu khethu Jehovha a ngu wona gu dzigaradza gwathu.

11. Jehovha kategiside kharini gu dzi garadza hi gu giredego gasi gu raneya vathu guta Gidundrugisotunu? (Agewu 2:7)

¹¹ Jehovha kategiside gu dzigaradza gwathu nya gu rane vathu gasi vata Gidundrugisotunu. Khu 2021, ambari olu si garadzidego gu wona gidundrugiso khu kotani nya tungo nya COVID-19 wu manegide tengo nya 21 367 603 nya vathu va manegidego Gidundrugisotunu. Tengo wowu wa gu bhanya guvili ni metadi tengo nya Dzifakazi dza Jehovha dzi gomogo mafuni gwatshavbo. Khu lisine, Jehovha kha theye kota khu tengo nya vathu va manegago Gidundrugisotunu. Uye a gu theya kota khu moyo ni moyo a manegago. (Luka 15:7; 1 Thim. 2:3, 4) Ethu hi ngu tiyisega gu khethu tepo hi raneyago vambe, Jehovha a na hi phasa gu mana vathu va gu na ni myonyo nya yadi. — Leri Agewu 2:7.

12. Sigaradzo muni si nga hi girago si hi garadzeya gu manega Gidundrugisotunu? (Wona fotu.)

¹² Jesu ganede gu khuye ndrani nya matshigu nyo hegise, ethu hi di hadzi gu tshangana ni sigaradzo nya singi nya nga gu wugedwa khu valongo, gu tshaniswa, dzinyimpi, tungo ni simbe ni simbe. (Mat. 10:36; Marko 13:9; Luka 21:10, 11) Dzimbe dzitepo, sigaradzo soso si ngu hi gira si hi garadzeya gu manega Gidundrugisotunu nya gufe ga Jesu. Vandriyathu ginani va giredego tepo va nga tshangana ni sigaradzo soso, nigu Jehovha ava phaside kharini?

13. Jehovha kategiside kharini gutiya-hwambo ga Artem ni gu dziemiseya gwaye nyo gire Gidundrugiso ambari olu a nga ba a khothedwe?

¹³ Gu khothedwa pasoni. Vandriyathu va khothedwego khu kotani nya gukhodwe gwawe, va ngu gira satshavbo va si kodzago gasi gu dundruga gufa ga Jesu. Wona giyeyedzo gya Artem. Khu 2020, ndrani nya dzisemana nyo khaguri na gi si giregi gidundrugiso ni hwane nya gu ba gi giregide, uye a di khothedwe ni 5 sibotshwa umo nya lipaso li nga ba liri ni 17 dzimetru. Uye giride satshavbo a nga si kodza gasi gu vegedzeya silo a nga hadzi si thumisa kha nga pawu ni vhinyu avba nya Gidundrugiso. Uye gambe a di hunga gu vega ganelo nya Gidundrugiso gasi a phasega uye kamo. Ganiolu, sibotshwa si nga ba siri naye si di gu daha ni gu mu valeteya. Ginani a giridego? Uye a di va lomba gasi va ema gu mu valeteya ni gu daha teponi yile a nga ba a gira Gidundrugiso. Artem a di hlamala ngudzu khu gu wona sibotshwa  sile na si gu ema gu mu valeteya ni gu daha tepo a nga ba a gira Gidundrugiso. Uye wari khuye: “Eni nyi di zama gu va bhuleya maningano ni Gidundrugiso.” Ambari olu va nga ganeya gu khavo kha va dzini gu engiseya Gidundrugiso, hwane nya gu ba va wonide ni gu engiseya Artem na gu gira Gidundrugiso, avo va di mu gira siwudziso nya singi.

14. Gudzigaradza muni gu giridwego khu Dzifakazi dza Jehovha gasi gu wona Gidundrugiso ambari olu dzi nga ba dziri ndrani nya tungu?

¹⁴ Tungu nya COVID-19. Khu kotani nya tungu, Dzifakazi dza Jehovha kha dza si kodza gu wona Gidundrugiso khu gumogo Salawuni nya Mufumo. Ganiolu, isoso kha sa va tandregisa gu wona Gidundrugiso. d Mabandla ma nga ba mari ni interneti ma giride Gidundrugiso khu gu thumisa videoconferência. Ganiolu, ahati dzimbe Dzifakazi dzi nga ba dziri mwalo interneti ke? Ga mayigo nyo khaguri, dzibheteli dzi giride malulamiselo nya gu vathu va wona Gidundrugiso khomu nya televhizawu ni gu engiseya khomu nya radhiyu. Vbavbandze nya isoso, bheteli yi giride dzigravhasawu nya dziganelo  khu gipimo nya 500 malimi gasi ni vale va gomogo malangani ya hwindzo va si kodza gu engiseya Gidundrugiso, nigu vandriyathu va dzi ningedzide gasi gu vbohisa dzigravhasawu dzodzo malangani yoyo.

15. Ginani u gi hevbulago khu giyeyedzo gya Sue?

¹⁵ Gu wugedwa khu valongo. Gigaradzo nya gikhongolo egi vambe va emisanidego nagyo gasi gu wona Gidundrugiso, gu wugedwa khu valongo. Wona giyeyedzo nya gihevbuli gimwegyo nya Bhibhiliya nyo pwane khu Sue. Khu 2021, na gu keneleya litshigu limwedo gasi gu gira Gidundrugiso, Sue a di embeya muhevbudzi waye nya Bhibhiliya gu khuye kha na nga si kodza gu manega Gidundrugisotunu khu kotani nya valongo vaye. Muhevbudzi waye nya Bhibhiliya a di mu lereya Luka 22:44. A di bwe a mu tshamuseya gu khuye tepo ethu hi tshanganago ni sigaradzo, hi yede gu landreya giyeyedzo gya Jesu khu gu gombeya ga Jehovha ni gu tumbega khu guvbeleya. Ga litshigu li nga landreya Sue a di dongiseya pawu ni vhinyu. Nigu ni dzimindru wu nga landreya, uye a di wona wukhozeyi wa vbadzimindrutunu. Ni wutshigu tepo a nga ba ari enga omu nya kwartu yaye, uye a di wona Gidundrugiso khomu nya telefoni. Hwane nya isoso, Sue a di loveya muhevbudzi waye nya Bhibhiliya gu khuye: “Uwe u nyi tiyiside ngudzu vbonova. Eni nyi giride satshavbo nyi nga si kodza gasi gu wona Gidundrugiso nigu Jehovha a nyi phaside. Kha nyi kodzi ni gu tshamuseya edzi nyi bongago khidzo.” Wo ba u emisana ni gigaradzo nyo fane, wo si wona kharini, ina Jehovha a nga gu phasa?

16. Khu ginani hi nga tiyisegago gu khethu Jehovha a na kategisa gudzigaradza hi gu girago gasi gu manega Gidundrugisotunu? (Varoma 8:31, 32)

¹⁶ Jehovha a ngu bonga ngudzu khu gudzigaradza hi gu girago gasi gu dundruga gufa ga Jesu. Hongoleni hi tiyisegani gu khethu uye a na hi kategisa tepo hi yeyedzago gubonga khesi a hi giredego. (Leri Varoma 8:31, 32.) Hongoleni hi dzi emiseya gu manega Gidundrugisotunu mwaga wowu, nigu ndrani nya dzisemana nyo khaguri na gi si vbohi Gidundrugiso ni hwane nya gu ba gi giregide, ethu ho vbweta gu thumeya Jehovha khu dzitshivba dzathu dzatshavbo.