1. Sigaradzo muni esi sithumi sa Jehovha si tshanganago naso?

INA u ngu tshangana ni gigaradzo nyo khaguri? Si nga gira nu gandridwe ginyalana khu ndriyathu nyo khaguri libandlani. (Jak. 3:2) Mwendro si nga gira nu hegwa khu dzikolega dza xikwatunu mwendro thumotunu kholu u gu Fakazi ya Jehovha. (1 Ped. 4:3, 4) Mwendro si nga gira gambe valongo na va zama gu gu digisa gu hongola mitshanganoni mwendro gu tshumayela mahungu nya yadi. (Mat. 10:35, 36) Gigaradzo gyo ba giri gikhongolo, adzina gi nga gu gira u pimisa gu ema gu thumeya Jehovha. Ganiolu, tiyisega gu khuwe ambari go dugeleya ni gevbini gigaradzo, Jehovha a na gu ninga guti ni tshivba nyo timiseye gigaradzo gyogyo.

2. Khu guya khu Varoma 15:4, gu leri Lito la Nungungulu si nga hi phasa kharini?

² Omu nya Lito laye, Jehovha patide matimo nya edzi sithumi saye si timisedego khidzo sigaradzo. Khu ginani a giridego isoso? Girede gu hi hevbula khu giyeyedzo gyawe. Khiso si giridego Jehovha a kutsa mupostoli Pawulo gu lova malito ma gomogo omu ga Varoma 15:4. (Leri) Ho leri matimu yaya nya Bhibhiliya, ma na hi thaveleya ma bwe ma hi ninga gutumba. Ganiolu, gasi gu hi phasega khu lisine, gu vbwetega hi gira nya singi guvbindra gu leri basi. Gu vbwetega hi dzumeleya Milowo yi vbindrugedza mapimiselo yathu yi bwe yi kuha myonyo yathu. Khu giyeyedzo, hi nga gira kharini ho ba hi vbweta wusingalagadzi maningano ni gigaradzo nyo khaguri hi tshanganago nagyo? Hi nga gira silo sesi nya 4 si landreyago: 1) Gu gombeya, 2) Gu pimisa, 3) Gu dundrugeya ni 4) Gu si thumisa.  Hongoleni hi bhulani khu gimwegyo ni gimwegyo. * Hi na thumisa dzindziya dzedzi nya 4 gasi gu hevbula khesi si dugeledego Pfhumu Dhavhidhe ni mupostoli Pawulo.

3. Nu si pheyi gu leri Bhibhiliya, ginani u yedego gu gira nigu khu ginani?

³ (1) Gu gombeya. Nu nga si pheyi gu leri Bhibhiliya, lomba Jehovha a gu phasa gu wona edzi u nga phasegago khidzo khesi u lerigo. Khu giyeyedzo, wo ba u vbweta wusingalagadzi wu ganeyago khedzi u nga emisanago khidzo ni gigaradzo nyo khaguri, gombeya ga Jehovha gasi a gu phasa gu mana matshina nya milayo nya Bhibhiliya ma na gu phasago guti egi u yedego gu gira. — Filp. 4:6, 7; Jak. 1:5.

4. Ginani u yedego gu gira gasi gu matimu nya Bhibhiliya u lerigo ma tsakisa gwadi?

⁴ (2) Gu pimisa. Jehovha a hi ningide makodzelo nyo samadzise ngudzu nya gu pimise khu silo. Gasi gu matimu u lerigo ma tsakisa gwadi, zama gu pimisa khesi si dugeleyago u bwe u dzi vega wulangani wa muthu yoyo u hevbulago khuye. Zama gu wona esi a si wonidego u bwe upwa edzi a dzipwidego khidzo.

5. So thula ginani gu dundrugeya nigu u nga dundrugeya kharini khesi u si hevbulago?

⁵ (3) Gu dundrugeya. Gu dundrugeya so thula gu pimisa gwadi khesi u lerigo ni edzi si na gu phasago khidzo. Gu dundrugeya si ngu phasa gu pwananisa mahungu nyo khaguri u bwe u pwisisa gwadi esi u lerigo. Wo leri Bhibhiliya nya mba dundrugeya khesi u si lerigo, so fana ni gu hodza guhodza nya lidume. Gasi u si kodza gu dundrugeya khesi u lerigo, dzi wudzise gu khuwe: ‘Oyu nyi hevbulago khuye ginani a giridego gasi gu lulamisa gigaradzo gyaye? Jehovha mu phaside kharini? Esi nyi hevbudego si nga nyi phasa kharini gu timiseya?’

6. Khu ginani hi yedego gu thumisa esi hi si hevbulago?

⁶ (4) Gu si thumisa. Jesu a di khuye oyu a gu mba thumisa esi a si hevbulago a gu fana ni mwama a vbahago nyumba yaye mulipfuleni. Satshavbo a girago a gu thumeya giburwana. Khu ginani? Khu gu gyo veta gingulu ni talo nya mati, nyumba yi na thega. (Mat. 7:24-27) Khu ndziya nyo fane, ha gu gombeya, hi pimisa, ni gu dundrugeya khesi hi si hevbulago, ganiolu hi si thumisi esi hi si hevbulago, hi na ba hi thumeya giburwana. Khu kharato, tepo hi emisanago ni sigaradzo mwendro guwugedwa, gukhodwa gwathu kha gu na nga tiya. Ganiolu, ha gu thumisa esi hi si hevbulago, hi na kodza gu hunga gu gira silo nya sadi, hi mana gurula nigu gukhodwa gwathu gu na engedzeya gu tiya. (Isa. 48:17, 18) Olu hi na wona edzi hi nga thumisago khidzo dzindziya dzedzi nya 4 tepo hi hevbulago esi si dugeledego Pfhumu Dhavhidhe.

7. Khu yavbini matimu nya Bhibhiliya hi na bhulago khayo olu?

⁷ Ina yomo pari nyo khaguri mwendro givbango nya ndranga gi gu pwisidego guvbisa? Abari gu gyomo, egi gi na gu phasago gu dundruga esi a giridego Pfhumu Dhavhidhe tepo gyanana gyaye Abhisalamo gi nga mu wugeya gi bwe gi zama gu mu dzegeya wufumu.— 2 Sam. 15:5-14, 31; 18:6-14.

8. Ginani u nga girago gasi u phaswa khu Jehovha?

⁸ (1) Gu gombeya. Na wu dundrugeya khu matimu ya omu nya Bhibhiliya, embeya Jehovha edzi u dzi pwago khidzo khu gu ba va gu goroside. (Ndzi. 6:6-9) U nga dzi hodzedzeyi, dzegeya gu mu embeya edzi u dzi pwago  khidzo. Mu lombe Jehovha a gu phasa gu mana matshina nya milayo nya Bhibhiliya ma na gu yeyedzago egi u yedego gu gira.

9. Ginani gi dugeledego avba ga Dhavhidhe ni Abhisalamo?

⁹ (2) Gu pimisa. Dundrugeya khu satshavbo si nga girega ni edzi si mu khuhidego khidzo Pfhumu Dhavhidhe. Abhisalamo gyanana gya Dhavhidhe vbedzide myaga nya yingi na zama gu gira gu vathu va mu tumba. (2 Sam. 15:7) Tepo Abhisalamo a nga wona gu khuye a si kodzide, a di rumeya dzixipiyawu Israyeli gwatshavbo gasi dzi ya gira gu vathu va mu dzumeya kha nga pfhumu. Uye a si kodzide ni gu sengedzeya pari nya yikhongolo ni lisingalagadzi la Dhavhidhe, Ayitofeli, gasi a dzi pata naye. Abhisalamo a di dzi gira pfhumu a bwe a zama gu songa Dhavhidhe oyu adzina a nga ba a dwala ngudzu ga tepo yoyo. (Ndzi. 41:1-9) Dhavhidhe a di tugula makungo ya Abhisalamo, khavbovbo a tutuma khu Jerusalema. Khu guhegisa, masotshwa ya Abhisalamo ma di dwana ni masotshwa ya Dhavhidhe. Ganiolu, Abhisalamo a di padwa a bwe a songwa.

10. Ginani egi adzina Pfhumu Dhavhidhe a nga hadzi gira?

¹⁰ Khu gu landreya, dundrugeya khedzi Dhavhidhe a dzipwidego khidzo khesi si nga dugeleya. Uye a di gu gi gola gyanana gyaye Abhisalamo nigu a di gu mu tumba ngudzu Ayitofeli. Ganiolu, vathu vava va vavili va mu wugede. Va mu pwiside guvbisa va bwe va zama gu mu songa. Adzina Dhavhidhe na digide gutumba dzimbe dzipari dzaye, khu gu pimisa gu khuye adzina anidzo dzi dzi patide ni Abhisalamo. Uye adzina na phede gu vega gupima avbo gwaye basi a bwe a zama gu tutuma enga. Mwendro kamo gu vbeya tshivba. Ganiolu, Dhavhidhe kha gira isoso. Uye a si kodzide gu emisana ni giemo gegi nyo garadze. Ginani gi mu phasidego?

11. Ginani egi Dhavhidhe a giridego ga giemo gegi nyo garadze?

¹¹ (3) Gu dundrugeya. Ginani u nga gi hevbulago khu matimu ya Dhavhidhe? Hlamula giwudziso gi gu khigyo: “Ginani a giridego Dhavhidhe gasi gu lulamisa gigaradzo gyaye?” Dhavhidhe thumiside wugengeyi gasi gu lulamisa gigaradzo. Kha gira makolo nigu kha vbeya tshivba. Wulangani nya isoso, a di gombeya ga Jehovha a lomba giphaso. Uye gambe lombide giphaso ga dzipari dzaye. Nigu a di dzegeya gu gira esi a nga ba a hungide gu gira. Ambari olu a nga pwiswa gu vbisa, Dhavhidhe kha nyenya muthu nigu kha diga gu va tumba. Uye a di simama gu tumba Jehovha ni dzipari dzaye.

12. Ginani a giridego Jehovha gasi gu phasa Dhavhidhe?

¹² Jehovha phaside kharini Dhavhidhe? Wa gu gira dzipeskiza, u na tugula gu khuwe Jehovha ningide tshivba Dhavhidhe gasi gu timiseya. (Ndzi. 3:1-8) Jehovha kategiside esi Dhavhidhe a si hungidego. Uye gambe phaside dzipari nyo tumbege dza Dhavhidhe, tepo dzi nga dwana gasi gu vhikeya pfhumu yawe.

13. A gu tshuka muthu nyo khaguri a gu gorosa, u nga pimedzeya kharini giyeyedzo gya Dhavhidhe? (Matewu 18:15-17)

¹³ (4) Gu si thumisa. Dzi wudzise gu khuwe: ‘Nyi nga mu pimedzeya kharini Dhavhidhe?’ U nga khali mihuni gu lulamisa gigaradzo gyago. Ni ga gevbini giemo, thumisa wusingalagadzi wa Jesu wu gomogo omu ga Matewu 18. (Leri Matewu 18:15-17.) U nga hungi gu gira gilo nyo khaguri na wu gorogide. Gombeya ga Jehovha gasi a gu phasa gu rudzisa monyo wago a bwe a gu ninga guti gasi u emisana ni gigaradzo gyogyo. U nga digi gu tumba dzipari dzago. Wulangani nya isoso, dzumeya giphaso gyawe. (Mav. 17:17) Nigu nya lisima ga satshavbo, thumisa wusingalagadzi  wa Jehovha wu gomogo omu nya Bhibhiliya.— Mav. 3:5, 6.

14. Ga siemo muni 2 Thimoti 1:12-16; 4:6-11, 17-22, a nga gu tiyisago?

¹⁴ Ina u ngu wugedwa khu valongo kholu u thumeyago Jehovha? Mwendro wa gu vbanya ga litigo omu thumo wathu wu himbedzedwago? Abari kharato, u nga tiyiswa khu gu leri 2 Thimoti 1:12-16 ni 4:6-11, 17-22. * Pawulo, lovide mavhesi yaya nari pasoni.

15. U nga mu lomba ginani Jehovha?

¹⁵ (1) Gu gombeya. Na wu si leri matimu yaya, embeya Jehovha gigaradzo gyago u bwe u mu embeya edzi u dzipwago khidzo. Khavbovbo, lomba Jehovha a gu phasa gu mana matshina nya milayo avba nya matimu ya Pawulo ma na gu phasago guti egi u yedego gu gira.

16. Ginani gi dugeledego Pawulo?

¹⁶ (2) Gu pimisa. Zama gu dzi vega wulangani wa Pawulo. Uye khotedwe Roma nigu hungeledwe khu dzikorenti. Uye a di khotedwe gitepwana hwane, ganiolu, ga tepo yeyi kha kanakani gu khuye a na songwa. Dzimbe dzipari dzaye dzi di mu digide nigu a di garade.— 2 Thim. 1:15.

17. Ginani egi Pawulo adzina a nga hadzi gira?

¹⁷ Pawulo, adzina na vegide gupima avba nya esi si mu dugeledego, a pimisa khuye nari khatshi nyi di giride silo khu yimbe ndziya adzina na nya sa khotedwa. Uye adzina na gorogede vama va Ásia va nga mu diga nigu adzina na digide gu tumba dzimbe dzipari dzaye. Ganiolu, Pawulo kha gira isoso. Ginani gi mu phasidego gu simama gu tumba dzipari dzaye ni giphaso gya Jehovha?

18. Ginani a giridego Pawulo gasi gu timiseya sigaradzo saye?

¹⁸ (3) Gu dundrugeya. Dzi wudzise gu khuwe: “Ginani a giridego Pawulo gasi gu lulamisa sigaradzo saye?” Ambari olu Pawulo a nga ba a dziti gu khuye nasiri gale a nafa, uye kha divala gilo nya lisima ngudzu a gu gu ninga wuzundzu Jehovha. Nigu a di gu simama gu pimisa khedzi a nga tiyisago khidzo vambe. Uye yeyedzide gu khuye a di gu tumba Jehovha khu gu gombeya gwaye tepo yatshavbo. (2 Thim. 1:3) Pawulo kha khaleya gu pimisa khu vandriyaye va nga ba va mu digide. Wulangani nya isoso, ganede gu khuye a di gu bonga khu ndziya nya lihaladzo eyi dzipari dzaye dzi mu phasidego khiyo. Gu diga isoso, Pawulo simamide gu hevbula Lito la Nungungulu. (2 Thim. 3:16, 17; 4:13) Nya lisima ngudzu, a di gu tiyisega gu khuye Jehovha ni Jesu va di gu mu haladza. Nigu a di gu tumba gu khuye va na mu tshatshazeya khu thumo waye nyo tumbege.

19. Jehovha phaside kharini Pawulo?

¹⁹ Jehovha a di embede Pawulo gu khuye khu kotani nya olu a gu Mukristo a di hadzi wugedwa. (Mith. 21:11-13) Ganiolu, Jehovha phaside kharini Pawulo? Jehovha hlamude milombelo ya Pawulo nigu tepo yatshavbo mu ningide tshivba. (2 Thim. 4:17) Pawulo embedwe gupwani a di hadzi tshatshazedwa khu thumo waye watshavbo a wu girago. Jehovha thumiside gambe dzimbe dzipari nyo tumbege dza Pawulo gasi gu mu phasa.

20. Hi nga pimedzeya kharini gukhodwa ga Pawulo kha nga si yeyedzwago omu ga Varoma 8:38, 39?

²⁰ (4) Si thumise. Dzi wudzise gu khuwe: ‘Nyi nga pimedzeya kharini giyeyedzo gya Pawulo?’ Gufana ni Pawulo, anethu hi na tshaniswa kholu hi thumeyago Jehovha. (Marko 10:29, 30) Gasi gu hi simama gu tumbega ga Jehovha  ambari ha gu tshangana ni sigaradzo, hi yede gu simama gu gombeya gwaye ni gu leri Bhibhiliya tshigu ni tshigu. Nigu kha hi yeli gu divala gu khethu gilo nya lisima ngudzu gu ninga wuzundzu Jehovha. Hi nga tiyisega gu khethu Jehovha gima kha na nga hi diga. Nigu mwalo muthu a na si kodzago gu hi hambanisa ni lihaladzo la Jehovha. — Leri Varoma 8:38, 39; Hebh. 13:5, 6.

21. Ginani gi phasidego Aya ni Hector gu pala sigaradzo va tshanganidego naso?

²¹ Ambari ha gu tshangana ni gevbini gigaradzo, siyeyedzo sa omu nya Bhibhiliya si nga hi tiyisa. Khu giyeyedzo, Aya, a gu piyonero Japawu wari khuye matimu ya Jona ma mu phaside gu pala hwanga nyo ningeye wufakazi wa guagani. Lidzaha limwedo nyo pwani khu Hector la Indonésia, vavelegi valo va gu siri Dzifakazi dza Jehovha, lari khilo giyeyedzo gya Rute gi ngu mu phasa gu hevbula khu Jehovha ni gu mu thumeya.

22. U nga phasega kharini khu gu leri nya Bhibhiliya kha nga drama ni gipandre gi gu khigyo, “Imite a sua fé”?

²² U nga si mana hayi siyeyedzo sa omu nya Bhibhiliya si na tiyisago gukhodwa gwago? Gu leri nya Bhibhiliya kha nga drama, dzivhidhiyu ni gipandre gi gu khigyo: “Imite a sua fé” si ngu gira matimu nya Bhibhiliya ma tsakisa. * Na wu ngasi thumisi dziferameta dzedzi avba nya gihevbulo gyago nya muthu enga, gombeya ga Jehovha gasi a gu phasa gu mana dzipontu nya lisima u nga dzi thumisago. Zama gu dzi vega wulangani ga muthu u hevbulago khuye. Dundrugeya khesi si giridwego khu sithumi sesi nyo tumbege sa Jehovha ni edzi Jehovha a si phasidego khidzo gu pala sigaradzo. Khavbovbo u thumisa esi u si hevbudego. Mu bonge Jehovha khu giphaso a gu ningago. U bwe u yeyedza gu khuwe u ngu ninga lisima giphaso a gu ningago khu gu vbwetedzeya dzindziya nyo tiyise ni gu phasa vambe.

23. Guya khu Isaya 41:10, 13, ginani egi Jehovha a hi tumbisago?

²³ Womi kha wu vbevbugi ndrani nya litigo leli la Sathane, dzimbe dzitepo hi ngu hamuga ni gilo nyo gire. (2 Thim. 3:1) Ganiolu kha hi yeli gu garadzega mwendro gu thava. Jehovha a ngu siti sigaradzo hi tshangano naso. Ha gu thega, Jehovha a gu hi tumbisa gu hi phara khu libogo laye la nyamudye nya gutumbege. (Leri Isaya 41:10, 13.) Hi ngu tiyisega gu khethu Jehovha a na hi phasa nigu Bhibhiliya yi ngu hi ninga tshivba hi yi vbwetago gasi gu timiseya ni gevbini gigaradzo.