1. Khu ginani Jesu a nga lomba Jehovha gu khuye a vbulugisa vapizane vaye?

GA WUTSHIGU waye nyo hegise mafuni, Jesu a di gu dundrugeya khu sigaradzo esi vapizane vaye va nga hadzi tshangana naso. Lihaladzo eli Jesu a nga ba ari nalo khu dzipari dzaye, li mu kutside gu lomba Papayi waye khuye: “Va vbulugise guvivbani.” (Joh. 17:14, 15) Jesu a di gu dziti gu khuye hwane nyo bweleye ndzadzini, Sathane Dhiyabhulosi a di hadzi simama gu wugeya ava va vbwetago gu thumeya Jehovha. Khu kharato, vathu va Jehovha va di hadzi vbweta gu vhikedwa.

2. Khu ginani hi tiyisegago gu khethu Jehovha a na hlamula milombelo yathu?

² Jehovha hlamude nombelo wa Jesu kholu a haladzago Gyanana gyaye. Ha gu dzi garadzeya gu engisa Jehovha uye a na hi haladza. Nigu ha gu gombeya gwaye hi lomba gu khethu a hi phasa ni gu hi vhikeya uye a na hi hlamula. Kha nga olu Jehovha a gu Papayi nya lihaladzo, uye a na simama gu khathaleya sanana saye khu lihaladzo. Kholu a gu mba gira isoso, lina laye li na wonwa khu ndziya nya mba yadi.

3. Khu ginani hi vbwetago gu vhikedwa khu Jehovha muhuno?

³ Muhuno ethu hi ngu vbweta ngudzu gu vhikedwa khu Jehovha gu vbindra gale. Sathane tutumisidwe ndzadzini nigu tshigide mafuni “na tade khu likhulo.” (Gutu. 12:12) Uye giride vathu nyo khaguri va pimisa khavo gu hi wugeya ndziya nya gu ‘thumeye Nungungulu.’ (Joh. 16:2) Vambe va gu mba khodwa ga Nungungulu va gu hi wugeya kholu mavbanyelo yathu ma hambanide ni mavbanyelo nya litigo leli. Ni ga gevbini gighelo gi va girago va hi wugeya ethu kha hi yeli gu thava. Khu ginani? Kholu Lito la Nungungulu lari khilo: “Gasi, Pfhumu khwadi. Uye a na mi ningani  tshivba, a mi vbulugisani muguvivbani.” (2 Tes. 3:3) Jehovha a gu hi vhikeya khu ndziya muni? Hi na wona dzindziya dzimbili.

4. Guya khu Vaefeso 6:13-17, ginani egi Jehovha a hi ningidego gasi gi hi vhikeya?

⁴ Jehovha hi ningide matshari ma nga hi vhikeyago ga Sathane. (Leri Vaefeso 6:13-17.) Matshari ya Nungungulu ma tiyide nigu ma ngu thuma gwadi. Ganiolu, ha gu vbweta gu khethu ma hi vhikeya hi yede gu ma thumisa yatshavbo. Litshari ni litshari la gu emeya ginani? Hongoleni hi si wona.

5. Ginani libhandri nigu khu ginani hi yedego gu li ambala?

⁵ Libhandri la gu emeya lisine li gomogo omu nya Lito la Nungungulu. Khu ginani hi yedego gu ambala libhandri? Khu gu Sathane “babe nya malipha.” (Joh. 8:44) Uye na ni myaga nya yingi na gu lipheya ni gu kanganyisa “litigo latshavbo.” (Gutu. 12:9) Ganiolu lisine li gomogo omu nya Bhibhiliya, li ngu hi phasa gasi hi si kanganyiswi khuye. Hi nga li ambala kharini libhandri leli? Khu gu hi hevbula lisine maningano ni Jehovha, hi mu khozeya khu liphuvbo ni lisine hi bwe hi tumbega ga silo satshavbo.— Joh. 4:24; Efes. 4:25; Hebh. 13:18.

6. Ginani givhikelo nya khana nigu khu ginani hi yedego gu gi ambala?

⁶ Givhikelo nya khana gya gu emeya milayo nyo lulame ya Jehovha. Khu ginani hi yedego gu gi ambala? Gale givhikelo nya khana gi di gu vhikeya monyo nya lisotshwa gasi wu si paywi khu litshari. Khu ndziya nyo fane, givhikelo nya khana gya gu vhikeya monyo wathu mwendro edzi hi gu idzo khu ndrani. Givhikelo gegi gi ngu hi vhikeya ga mikutsedzelo nyo vivbe nya litigo leli. (Mav. 4:23) Jehovha o vbweta gu khuye hi mu haladza hi bwe hi mu thumeya khu monyo wathu watshavbo. (Mat. 22:36, 37) Khu kharato, Sathane a gu zama gu hi gira hi ema gu thumeya Jehovha khu monyo wathu watshavbo khu hi gira hi gola silo nya litigo leli esi Jehovha a si nyenyago. (Jak. 4:4; 1 Joh. 2:15, 16) A gu wona gu khuye tandregide, a gu zama gu hi wugeya gasi hi diga gu engisa milayo ya Jehovha.

7. Hi nga ambala kharini givhikelo nya khana?

⁷ Ethu ha gu ambala givhikelo nya khana khu gu engisa milayo ya Jehovha maningano ni silo nya sadi ni esi nyo vivbe hi bwe hi vbanya khiso. (Ndzi. 97:10) Vambe va gu pimisa gu khavo milayo ya Jehovha kha yi va ningi gutshulega. Ganiolu, githumi gya Jehovha gi digago gu thumisa matshina nya milayo nya Bhibhiliya womini wagyo, gya gu fana ni lisotshwa li tshulago givhikelo nya khana nyimbitunu khu gu pimisa gu khilo gi ngu lemeya. Khu lisine gu gira isoso, wupumbu nya wukhongolo. Oyu a haladzago Jehovha kha woni milayo yaye na yi gu garadza. Ganiolu, a gu yi wona kha nga gilo gi vbulugisago womi waye. — 1 Joh. 5:3.

8. Malito ma gu khayo, gu tivisa mahungu nya yadi nya gu rule gu na khale silato migondroni gwathu, ma gu thula ginani?

⁸ Pawulo hi kutside gambe khuye gu tivisa mahungu nya yadi nya gu rule gu na khale silato migondroni yathu. Isoso so thula gu khiso tepo yatshavbo hi yede gu tshumayela mahungu nya Mufumo. Ha gu bhuleya vambe mahungu ma gomogo omu nya Bhibhiliya, gukhodwa gwathu ga gu engedzeya gu tiya. Si ngu tsakisa gu wona edzi vathu va Nungungulu mafuni gwatshavbo va vbwetedzeyago khidzo dzindziya gasi gu tshumayela mahungu nya yadi, gani i thumotunu, xikwatunu, merkadhu, gu tshumayela khu ndranga ni ndranga, va gu ba va rengarenga silo, va gu wuseya valongo va gu siri Dzifakazi, va gu ba va bhula ni muthu va si mutigo ambari kamo va gu ba va tandrega gu duga khu ndrangani. Ha gupwa hwanga hi diga  gu tshumayela, hi na fana ni lisotshwa li tshulago silato nyimbitunu. Lisotshwa la gu gira isoso, li di hadzi gu dzi bayisa migondro. Kha nga handro wakona si di hadzi li garadzeya gu dzi vhikeya ga valala. Nigu si di hadzi li garadzeya gu engisa milayo ya muthangeyi walo.

9. Khu ginani hi yedego gu thumisa gitshangu nya gu khodwe?

⁹ Gitshangu nya gukhodwe gya gu emeya gukhodwa hi gu nago khu Jehovha. Ethu hi ngu khodwa gu khethu Jehovha a na tadzisa esi a si tumbisago. Gukhodwa gogo, gu ngu hi vhikeya ga “matshari yatshavbo nya nilo wa Sathane.” Khu ginani hi yedego gu thumisa gitshangu? Khu gu igyo gi ngu hi phasa gasi hi si kanganyiswi khu sihevbudzo sa va wugeyi hi bwe hi si vbeyi tshivba vambe va gu wugeya gukhodwa gwathu. Ha gu ba hiri mwalo gukhodwa kha hi na nga si kodza gu engisa Jehovha vambe va gu hi kutsedzeya gu ndraga milayo yaye. Ganiolu, tepo yatshavbo hi bombago gu gira gilo gi nyenywago khu Jehovha, gani i thumotunu mwendro xikwatunu, gukhodwa gwathu ga gu hi vhikeya. (1 Ped. 3:15) Tepo yatshavbo hi bombago thumo wu na hi ningago dzitsapawu nya dzingi kholu wu na hi beyago tepo nyo thumeye Jehovha, gukhodwa gwathu ga gu hi vhikeya. (Hebh. 13:5, 6) Nigu tepo yatshavbo hi simamago  gu thumeya Jehovha ambari na hi gu wugedwa, gukhodwa gwathu ga gu hi vhikeya.— 1 Tes. 2:2.

10. Ginani gihugu nya gu vbanyiswe nigu khu ginani hi yedego gu gi thumisa?

¹⁰ Gihugu nya gu vbanyiswe gya gu emeya gutumba ogu Jehovha a hi ningago, a gu gutumba nya gu khethu uye a na hi duseya gufa nigu a na tshatshazeya vatshavbo vale va girago gu gola gwaye. (1 Tes. 5:8; 1 Thim. 4:10; Tit. 1:1, 2) Gufana ni gihugu gi nga ba gi vhikeya hungo nya lisotshwa, gihugu nya gu vbanyiswe, gya gu vhikeya mapimo yathu. Khu ndziya muni? Gutumba ogu Jehovha a hi ningago, ga gu hi gira hi vega gupima avba nya situmbiso nigu gu ngu hi phasa gu timiseya sigaradzo. Hi nga gi thumisa kharini gihugu gyathu? Khu gu hi tiyisega gu khethu hi ngu wona silo khedzi Jehovha a si wonago khidzo gani. Khu giyeyedzo, ethu kha hi vegi gutumba gwathu avba nya dzithomba nya mba tiya. Ganiolu, ha gu gu vega avba ga Nungungulu. — Ndzi. 26:2; 104:34; 1 Thim. 6:17.

11. Ginani litshari hi ningwago khu liphuvbo nya guage nigu khu ginani hi yedego gu li thumisa?

¹¹ Litshari hi ningwago khu liphuvbo nya guage Lito la Nungungulu a gu Bhibhiliya. Litshari lolo li na ni tshivba nya gu tivegise yatshavbo malipha li bwe li tshula vathu avba nya sihevbudzo nya malipha ni mavbanyelo nyo nyenyeze. (2 Kor. 10:4, 5; 2 Thim. 3:16, 17; Hebh. 4:12) Ethu ha gu hevbuleya edzi hi nga li thumisago khidzo avba nya gihevbulo nya muthu enga ni trenamento hi ningwago khu hengeledzano ya Nungungulu. (2 Thim. 2:15) Gu diga matshari yatshavbo aya Jehovha a hi ningago, uye a ngu hi ninga gambe gimbe gilo gasi gu hi vhikeya. Khu gevbini gilo gyogyo?

12. Ginani gambe hi gi vbwetago nigu khu ginani?

¹² Lisotshwa li kodzago gu dwana gwadi li ngu dziti gu khilo kha li na nga si kodza gu pala masotshwa nya mangi longa. Li ngu vbweta giphaso nya mambe masotshwa. Khu ndziya nya gufane, kha hi na nga si kodza gu pala Sathane ni vaphasedzeyi vaye ha gu dwana honga. Hi ngu vbweta giphaso gya vandriyathu. Khu kharato, Jehovha hi ningide vandriyathu ava va dziemisedego gu hi phasa. — 1 Ped. 2:17.

13. Guya khu Vahebheru 10:24, 25, mitshangano yi nga hi phasa kharini?

¹³ Mweyo nya dzindziya hi phaswago khiyo gu manega mitshanganoni. (Leri Vahebheru 10:24, 25.) Hatshavbo dzimbe dzitepo hi ngu tshuka hi vbeya tshivba. Khu kharato, mitshangano yi nga hi tiyisa. Mihlamulo ya vandriyathu yi ngu hi tiyisa. Dziganelo dzi seketedwago omu nya Bhibhiliya ni sipandre si girwago mitshanganoni si ngu hi kutsa gu simama hi thumeya Jehovha. Gu bhula ni vandriyathu na yi si pheyi mitshangano ni tepo yi vbeyago si ngu hi tsakisa ngudzu. (1 Tes. 5:14) Gu diga isoso, mitshanganoni hi ngu tsaka khu gu phasa vambe. (Mith. 20:35; Rom. 1:11, 12) Mitshangano gambe yi ngu hi phasa khu dzimbe dzindziya. Iyo yi ngu phasa gu tshukwadzisa matshumayelelo yathu ni mahevbudzelo yathu. Khu giyeyedzo, iyo yi ngu hi phasa gu thumisa gwadi mabhuku ma gomogo omu nya Dziferameta hi hevbudzago khidzo. Khu kharato, dzi dongiseye na wu si hongoli mitshanganoni. Tepo yi gimbiyago mitshangano vega gwadi gu pima. Hwane nya mitshangano thumisa esi u hevbudego. Wa gu gira isoso, u na khala “musotshwa wa Kristo Jesu.”— 2 Thim. 2:3.

14. Khu gevbini gimbe giphaso hi gu nagyo?

¹⁴ Ethu gambe hi ngu phaswa khu dzingilozi nya dzingi ngudzu nya tshivba. Nga dundrugeya khesi ngilozi mweyo basi yi nga girago. (Isa. 37:36) Olu dundrugeya khesi dzimiliyoni nya dzingilozi dzi nga girago. Mwalo muthu mwendro lidhimoni a nga dzi fananisago ni libuthu nya dzingilozi nya tshivba dza Jehovha.  Jehovha khuye nya dzitshivba dzatshavbo. Khu kharato, ha gu ba hiri ni Jehovha, tepo yatshavbo hi na pala vawugeyi vathu ambari va gu ba vari vangivangi. (Val. 6:16) Hi nga tiyisega gu khethu isoso lisine. Khu kharato, ga gu tshuka dzikolega thumotunu ni xikwatunu mwendro nongo va ganeya ni gu gira silo si gu vbedzago tshivba, dundruga gu khuwe Jehovha na ni uwe. Dundruga gu khuwe u mwalo wenga avba nya litunga leli. Jehovha khuye a gu thangeyago.

15. Guya khu Isaya 54:15, 17, khu ginani a gu mwalo muthu a na si kodzago gu emisa vathu va Nungungulu gu tshumayela?

¹⁵ Litigo leli li fumedwago khu Sathane li na ni sighelo nya singi gasi gu hi nyenya. Ethu kha hi dzi bedzedzeyi omu nya politika nigu kha hi pategi omu nya dzinyimbi. Ethu ha gu tivisa lina la Nungungulu, hi tshumayela gu khethu Mufumo waye khuwo basi wu na resago gurula hi bwe hi engisa milayo yaye. Ethu ha gu phasa vathu gu wona gu khavo mufumeyi nya litigo leli muliphi nya khongolo ngudzu nigu uye gighevenga. Ethu ha gu huweleya gu khethu na siri gale, litigo leli la Sathane li na fuviswa. Ganiolu, Sathane ni vaphasedzeyi vaye kha va na nga si kodza gu hi himbedzeya. Wulangani nya isoso, hi na simama gu rungudza Jehovha khu dzindziya dzatshavbo. Ambari olu Sathane a gu na ni tshivba, uye mwalo makodzelo nyo tandregise mahungu nya yadi gu vboheya vathu vatshavbo. Isoso, sa gu kodzega kholu Jehovha a ngu hi vhikeya. — Leri Isaya 54:15, 17.

16. Jehovha a na vbulugisa kharini vathu vaye avba nya tshanisa nya yikhongolo?

¹⁶ Ginani gi na giregago nugunugu? Ndrani nya tshanisa nya yikhongolo Jehovha a na hi vbulugisa khu dzindziya dzimbili nyo samadzise ngudzu. Nyo pheye, uye a na vbulugisa sithumi saye nyo tumbege tepo a na kutsedzeyago dzipfhumu nya mafu gu fuvisa Bhabhiloni nya khongolo a gu tsindza nya wukhongeyi nya malipha. (Gutu. 17:16-18; 18:2, 4) Khu gu landreya, uye a na vbulugisa gambe vathu vaye tepo a na fuvisago litigo la Sathane avba nya Harmagedhoni. — Gutu. 7:9, 10; 16:14, 16.

17. Khu ginani hi yedego gu simama ni wupari nyo tiye ni Jehovha?

¹⁷ Ha gu simama ni wupari nyo tiye ni Jehovha, Sathane kha na nga hi gireya guvivba kala gupindruga. Lisine khu gu, uye khuye a na fuviswago kala gupindruga. (Rom. 16:20) Khu kharato, simama gu thumisa matshari yatshavbo u ningwago khu Nungungulu nigu u nga madigi. U nga zami gu dwana wenga, phasa vandriyago ni gu landra sileletelo sa Jehovha. Wa gu gira isoso, tiyisega gu khuwe Papayi wago nya lihaladzo wa ndzadzini, a na gu ninga tshivba ni gu gu vhikeya. — Isa. 41:10.