HATSHAVBO hi ngu khodwa gu khethu Jehovha a ngu thangeya vathu vaye ni gu va ninga esi va si vbwetago gasi gu tiyisa wupari wawe naye matshiguni yaya nya guhegise. (2 Thim. 3:1) Ganiolu, hatshavbo gu vbwetega hi engisa Jehovha. Hi nga fananisa esi si hi dugeleyago ni esi si dugeledego vaIsrayeli giwulani. Avo va di yede gu gira gilogyo tepo pundru wu nga ba wu wombwa.

Jehovha a di ruma Mosi gu gira mipundru mivili nya parata gasi gu “tombanisa khiyo mitshangano ni gu tivisa gukhuga nya mazumbo.” (Mite. 10:2) Vaphasi nya mhamba va di yede gu womba pundru khu dzindziya nyo hambanehambane gasi vaIsrayeli vati esi va nga ba va yede gu gira khu tepo yoyo. (Mite. 10:3-8) Muhuno, vathu va Nungungulu va ngu ningwa sileletelo khu dzindziya nyo hambanehambane. Hongoleni hi wona dziraru nya dzindziya dzodzo dzi hi dundrugisago mipundru yi nga ba yi wombwa teponi ya vaIsrayeli. Dzindziya dzodzo khedzi: Tepo hi ranedwago gu patega omu nya mitshangano nya yikhongolo, tepo madhota ma hevbudzwago gu gira gwadi thumo wawe ni tepo mabandla ma hakhago sileletelo nya siphya mwendro si tshukwadzisidwego.

Tepo Jehovha a nga ba a vbweta gu khuye “tshangano watshavbo” wu ya tshangana vbamwanya ga khuga--dambo nya tabherinakeli, vaphasi nya mhamba va di gu womba mipundru yamivili. (Mite. 10:3) Mahundzo yatshavbo ma nga ba ma zumbide dzibambe nya tabherinakeli ma nga ba ma kabanisidwe khu sikwata sina ma di gupwa guranwa gogo. Ava va nga ba va zumbide vbafuvbi ni mwanya nya tabherinakeli va di gu vbiredzeya gu vboha ndrani nya dzimenetinyana. Vambe va di gu zumbide hwindzo, khu kharato, si di gu lomba gu va dzi garadza ni gu bwe va dzega tepo nya yingi gasi gu vboha. Gani va di gu zumbide vbafuvbi mwendro hwindzo, Jehovha a di gu vbweta gu khuye vatshavbo va yapwa sileletelo saye.

Muhuno, kha hi tshangani tabherinakelini ganiolu hi ngu ranedwa mitshangano nya vathu va Nungungulu. Isoso so pata mitshangano nya mughanga ni mitshangano nya guhathege omu hi ningwago mahungu ni sileletelo si gu na ni lisima. Mafuni gwatshavbo, vathu va Jehovha va ngu mana mitshangano nyo fane. Khu kharato, vatshavbo vale va dzumeyago gu hongola mitshanganoni yoyo va gu gira gipandre nya tsawa nya vathu nya vangi ngudzu va tsakidego. Vambe gu vbwetega va endra mipfhuka nyo laphe guvbindra vambe. Ganiolu, vatshavbo va pategago mitshanganoni yeyi gima kha va dzi layi khu gudzigaradza va gu giridego.

Ahati ava va gomogo omu nya mitsawa yi gomogo hwindzo ngudzu va gu mba kodza gu manega omu nya mitshangano yoyo nya yikhongolo, ina va ngu phasega navo? Khu kotani nya tekinolojiya ya matshigwanaya nya vangi va gomogo omu nya mitsawa yoyo si ngu kodzega gu va patega omu nya mitshangano yoyo ambari gudzipwa na va romo navo kamo vbale. Khu giyeyedzo, tepo Bheteli ya Benin yi nga endredwa khu muemeyi wa tsindza gwathu, vandriyathu va giride malulamiselo gasi longoloko wule wu wonwa khu vandriyathu va Arlit wa Niger, gidhoropana gi manegago Deserto do Saara. Gu manegide 21 vandriyathu ni vambe vatsakeyi. Ambari olu va nga ba va romo hwindzo, avo va dzipwide na vari gumogo ni tsawa nya wukhongolo nya 44 131  nya vathu. Ndriyathu moyo lovide esi: “Hi ngu mi bonga ngudzu, ngudzu kamo khu gu ba mu giride malulamiselo gasi longoloko wu vboha kala eno. Isoso si hi yeyedzide gambe edzi mu hi haladzago khidzo.”

Tepo vaphasi nya mhamba nya vaIsrayeli va nga ba va womba pundru moyo basi si di gu thula gu khiso “dzipfhumwana mwendro vathangeli vatshavbo nya sikwata nya likhumi mazana” va di yede gu tshangana tshatshatuno nya tshangano. (Mite. 10:4) Iyoyo va di guya ningwa sileletelo ni gu hevbudzwa khu Mosi. Isoso si di hadzi gu va phasa gu khathaleya gwadi mithumo yawe. Nari khatshi u diri moyo nya dzipfhumwana dzodzo, ina na wa sa dzi garadza gasi gu manega ni gu phasega tshanganoni wowo?

Muhuno, madhota nya libandla khandri dzipfhumwana dzathu ne khandri vafumeyi nya tshambi wa Nungungulu va wu khathaleyago. (1 Ped. 5:1-3) Ganiolu avo vo gira satshavbo va si kodzago gasi gu sayisa ni gu khathaleya tshambi. Khu kharato, avo vo khala na va dzi emisede gu ningwa simbe sileletelo maningano ni magirelo nya thumo wawe tepo va ranedwago gu hongola Xikwatunu nya wuthumeli nya Mufumo. Xikwatuno yoyo, madhota ma guya hevbudzwa edzi ma nga khathaleyago khidzo gwadi silo si gimbileyanago ni libandla. Khu kotani nya sihevbudzo soso, madhota gumogo ni vatshavbo libandlani va nga si kodza gu tiyisa wupari wawe ni Jehovha. Ambari wa gu ba wa sa hevbula mweyo nya dzixikola dzodzo u nga wuyedwa nuwe kholu ava va hevbudego va nata thumisa esi va si hevbudego gasi gu phasa libandla.

Vaphasi nya mhamba nya vaIsrayeli dzimbe dzitepo va di gu womba pundru khu ndziya nyo khatshi wo ndrendremeya. Pundru wowo wu di gu yeyedza gu khuwo Jehovha a di gu vbweta gu khuye vaIsrayeli vatshavbo va khuga khavba va zumbidego avbo. (Mite. 10:5, 6) Tepo vaIsrayeli va nga ba va khuga khavba va nga ba va zumbide, va di gu khuga khu ndziya yi sasamedzidwego gwadi. Ganiolu, isoso si di gu vbweta gu vatshavbo va dzi garadza. Dzimbe dzitepo vambe vaIsrayeli va di gu kanakana gu khuga va hongola wumbe wulanga. Khu ginani?

Adzina vambe va di gu pimisa gu khavo pundru wu wombidwe khavba ni avba. ‘Ga dzimbe dzinyondro lipfhi li di gu khala gukhugela gupfolani nya lidambo kala vbadzimindrutunu.’ Dzimbe dzitepo ‘lipfhi li di gu fenengedza vbatshani nya Tshatsha, matshigu mavili, ngima moyo mwendro gikhati nya gulaphe ngudzu.’ (Mite. 9:21, 22) Ganiolu, malanga mangani vaIsrayeli va nga zumba? Mitengo gipimo 33 o ganeya khu tanga nya 40 malanga aya vaIsrayeli va zumbidego avbo.

Dzimbe dzitepo vaIsrayeli va di gu zumba malangani gu nga ba guri ni mutsa. Gu zumba wulangani gu nga ba guri ni mutsa si di gu tsakisa khu kotani nya “giwula gile nya gikhongolo nya guthise.” (Dhet. 1:19) Isoso si di gu va linga gu pimisa gu khavo va gu fuluga vbale va na hongola wulanga nya mba tsakisa nga wule.

Tepo gitshungu gi nga ba gi khuga, si nga gira vambe na si va garadzede gu laphisa monyo va vireya kala yi vboha tepo yawe navo nyo khuge. Vatshavbo va di gu gupwa guwombwa nya pundru, ganiolu, va di si yeli gu khuga vatshavbo khu gumogo. Pundru wowo nyo khatshi wo ndrendremeya wu di gu yeyedza gu khuwo mahundzo ya khuga-dambo, nya nga Judha, Isakari ni Zabhuloni ma di yede gu khuga. (Mite. 2:3-7; 10:5, 6) Hwane nyo ba va khugide, vaphasi nya mhamba va di gu womba pundru wawumowo khu tepo nya wuvili gasi gu yeyedza gu khavo mahundzo nya mararu ya marandzi anayo gu vbwetega ma khuga. Vaphasi nya mhamba va di gu gira sasimweso kala gitshungu gyatshavbo gi khuga.

Adzina u di nga kanakaneya guvbindrugedzwa nya mapwisiselo mwendro magirelo nya silo nyo khaguri ndrani nya hengeledzano. Si nga gira na wu pimiside gu khuwe silo sakona si nga vbindrugedza khavba ni avba singi ngudzu. Adzina u di gu tsakiswa khedzi silo si nga ba si girwa khidzo gale yoyo khu kharato kha wa nga ba u vbweta gu khuwe si vbindrugedzwa. Khu kotani nya isoso, adzina si gu garadzede gu laphisa monyo kala u si oloveya. Kha si kanakanisi gu khiso, khu guhegisa hi na si kodza gu wona gu khethu guvbindrugedza gogo gu di gu vbwetega nigu makategwa ma tago khiyo ga Jehovha.

Matshiguni ya Mosi, Jehovha thangede dzimiliyoni nya vama, vanyamayi ni sanana giwulani. Nasiri khu gu phaswa khuye na va sa vbuluga. Muhuno, ethu ha gu si kodza gu simama ni wupari wathu ni Nungungulu kholu Jehovha a hi thangeyago. Uye a gu hi phasa gu khala dzipari dzaye ni gu tiyisa gukhodwa gwathu. Khu kharato, gu vbwetega hi gira satshavbo hi si kodzago gasi gu engisa ni gu tumbega nga vaIsrayeli va nga ba va dzi emisede gu engisa guwombwa nya mipundru nyo hambanehambane.