Paul wari khuye: “Tepo primo wangu a nga nyi khutedzeya, nyi di mu dzwinya ngolo nyo bwe a hamuga phuvbo. Nyi di gu vbweta gu mu songa.”

Marco wari khuye: “Nyo ba nyiri ndrangani khandri gya doni gi nga ba gi nyi gorosa. Nyi di gu pandreleya sombo, ambari ni gevbini nyi nga ba nyi gi mana.”

Gutala nya ethu hi mwalo maghilivindra nga vathu vava. Ambari ulolo, dzimbe dzitepo hatshavbo si ngu hi garadzeya gu dzi woneleya. Isoso so girega kholu hi na ni gighoho hi gi manidego ga muthu nyo pheye Adhamu. (Rom. 5:12) Vambe vathu si ngu va garadzeya gu woneleya zanga yawe nga Paul ni Marco. Vambe si ngu va garadzeya gu woneleya mapimo yawe. Khu giyeyedzo, va gu khala na va gu dundrugeya khu silo si va thavisago mwendro si va vbedzago tshivba. Vambe si ngu va garadzeya gu dzi phara gasi va si giri wubhayi, va si seyi wadwa guvbindra pimo mwendro gu thumisa sidahadaha.

Avo va dzumeleyago gu khavo mapimo yawe, gudogoreya gwawe ni sigiro sawe si woneleya guvbanya gwawe si nga gira va thegeya mhangoni. Ganiolu si ngu kodzega gu vhika isoso. Khu ndziya muni? Khu gu haguleya gudziphara. Gasi gu hi phasa gu haguleya gudziphara hongoleni hi ganeya khu siwudziso sesi nya siraru: 1) Ginani gudziphara? 2) Khu ginani gu vbwetegago? 3) Hi nga haguleya kharini likhalelo leli li gu moyo nya mihandro nya liphuvbo? (Gal. 5:22, 23) Khu gu landreya hi na ganeya khesi hi yedego gu gira ha gu tshuka hi tandrega gu dzi phara.

Muthu a kodzago gu dzi phara kha giri ni gevbini gi mu vboheyago mapimoni. Wulangani nya isoso, uye a gu dzi phara gasi a si ganeyi mwendro gu gira silo si na gu mba tsakisa Nungungulu.

Jesu hi yeyedzide gu khuye so thula ginani gudziphara. Bhibhiliya yari khiyo: “Gikhati a nga vadwago kha hakha khu guvala, gikhati a nga saniswa kha wugela muthu, aholu a di vega gutumba gwaye gwatshavbo ga Mulamuli wule nya lisine.” (1 Ped. 2:23) Jesu a dzi pharide tepo vawugeyi vaye va nga mu hega na gu khokhothedwe vbasimbotunu. (Mat. 27:39-44) A dzi pharide ngudzu tepo vathangeyi nya wukhongeyi va nga mu gira siwudziso nya singi na va gu zama gu khavo a hosisa. (Mat. 22:15-22) A dzi pharide gambe tepo a nga rinyedwa siwindri khu vaJudha nyo khaguri va nga ba va gorogide. Wulangani nyo phodze, “Jesu a di sihala, a gu duga Nyumbani ya Nungungulu.” — Joh. 8:57-59.

Ina hi nga si kodza gu pimedzeya giyeyedzo gya Jesu? Ina, kala avba si kodzegago. Mupostoli Pawulo lovide esi: “Kristo, wurumba waye, sanisekide kotani yanu, a hi ninga giwonelo gasi hi landra ndzila yaye.” (1 Ped. 2:21) Ambari olu hi nga mba vbeleya, hi nga si kodza gu pimedzeya gwadi giyeyedzo gya Jesu nya gu dzi phare. Khu ginani si gu na ni lisima gu hi gira isoso?

Gasi hi tsakedwa khu Jehovha gu vbwetega hi dzi phara. Ambari ho ba hiri ni myaga nya yingi na  hi gu thumeya Jehovha, si nga gira hi vbeledwa khu wupari wathu naye ha gu mba kodza gu woneleya esi hi ganeyago.

Nga wona giyeyedzo gya Mosi, oyu a nga ba ari “muthu nya gurule ngudzu, guvbindra vathu vatshavbo va mafuni” khu tepo yile. (Mite. 12:3) Mosi timisede siganegane sa vaIsrayeli khu myaga nya yingi ganiolu litshigu limwedo a di tandrega gu dzi phara. A di goroga tepo va nga ngurangura gambe khu gu hamuga mati. A di ganeya na gorogide a embeya vathu khuye: “Enu vawugeli nenu, olu yingisani. Ina hi ngu dzi kodza gu dusa mati giwindrini momu mu selani, gani?” — Mite. 20:2-11.

Mosi a di tandrega gu dzi phara. Uye kha ninga wuzundzo Jehovha khu gu ba a giride gilewugiso gasi va mana mati. (Ndzi. 106:32, 33) Kha nga handro wakone, Jehovha kha mu dzumeleya gu beya Tigoni nya Gitumbiso. (Mite. 20:12) Adzina Mosi a dzi layide womini waye watshavbo khu gu ba a tandregide gu dzi phara. — Dhet. 3:23-27.

Ginani hi gi hevbulago? Ambari ha gu ba hi thumeya Jehovha khu myaga nya yingi, gima kha hi yeli gu ganeya khu ndziya nyo vivbe ni vale va hi gorosidego mwendro va vbwetago gu kawukwa. (Efes. 4:32; Kol. 3:12) Tepo hi yago hi dandra khu tanga sa guya si hi garadzeya gu dzi phara. Ganiolu u nga divali esi si nga giregeya Mosi. Ethu kha hi vbweti gu dzi ghoheya lina nya ladi hi gu nalo mahoni ga Jehovha khu kotani nyo tandrege gu dzi phara. Ganiolu, ginani hi nga girago gasi gu haguleya likhalelo leli nya lisima?

Gombeya u lomba liphuvbo nya guage. Khu ginani? Kholu gudziphara limwedo nya mihandro nya liphuvbo la Nungungulu nigu Jehovha a gu ninga liphuvbo laye vale va mu lombago. (Luka 11:13) Khu gu thumisa liphuvbo nya guage, Jehovha a na hi ninga tshivba yi vbwetegago gasi gu dzi phara. (Filp. 4:13) Uye a nga hi phasa gambe gu haguleya mambe makhalelo nya mihandro nya liphuvbo nya guage nya nga lihaladzo, eli li hi phasago gu tiyisa gudziphara gwathu. — 1 Kor. 13:5.

U nga gimbileyi vbafuvbi ni gevbini u dzitigo gu khuwe gi na linga gudziphara gwago. Khu giyeyedzo, gimbileya hwindzo ni dzisayiti ni mihagano yi yeyedzago mavbanyelo nyo vivbe. (Efes. 5:3, 4) Khu lisine, gu vbwetega hi potsa satshavbo si na hi lingago gu gira silo nyo vivbe. (Mav. 22:3; 1 Kor. 6:12) Khu giyeyedzo, muthu a gu na ni guwegeleya nyo thegeye muwubhayini gu vbwetega a gimbileya hwindzo ni mabhuku mwendro dzifilimi dzi ganeyago khu lihaladzo.

 Dzimbe dzitepo si nga hi garadzeya gu landreya wusingalagadzi wowu. Ganiolu, ha gu dzi garadza, Jehovha a na hi ninga tshivba yi vbwetegago gasi hi kodza gu dzi phara. (2 Ped. 1:5-8) A na hi phasa gu woneleya mapimo yathu, malito ni sigiro. Giyeyedzo nya isoso khu Marco ni Paul hi ganedego khavo gupheyani. Moyo ni moyo wawe a hevbude gu dzi phara a si manegi ni maghilivindra. Nga dundrugeya gambe khu ndriyathu oyu gutala nya dzitepo a nga ba a oloveya gu ganedzisana ni vambe vagimbidzisi nya dzimovha. Ginani egi a giridego khu kotani nya isoso? Wari khuye: “Nyi di gu gombeya tshigu ni tshigu. Nyi di gu hevbula dzindrima dzi nga ba dzi ganeya khu gu dzi phara nyi bwe nyi zama gu vegedza milowo nyo khaguri nya Bhibhiliya hungoni. Ambari olu nyi gu na ni myaga nya yingi na nyi gu gira thumo wowu, tshigu ni tshigu nyo dzi dundrugisa gu kheni gu vbwetega nyi simama na nyi rude. Nigu nyo heguleya gu khuga gasi nyi si gimbiyi khu mazambo.”

Dzimbe dzitepo, hi nga tshuka hi tandrega gu dzi phara. So tshuka isoso si dugeleya, hi nga dzipwa dzitshoni gu hidzimeleya Jehovha khu nombelo. Ganiolu, khiyo yi gu tepo kamo hi yedego gu gira nombelo. Khu kharato, dzegeya gu gombeya ga Jehovha. Mu lombe a gu divaleya, u lomba giphaso gyaye u bwe u dzi emiseya gu mba gira gihoso gyagimwegyo. (Ndzi. 51:9-11) Jehovha a na engisa nombelo wago wu khugeyago monyoni. (Ndzi. 102:17) Mupostoli Johane a hi dundrugiside gu khuye novba wa Gyanana gya Nungungulu “wu ngu handza sighoho sathu satshavbo.” (1 Joh. 1:7; 2:1; Ndzi. 86:5) Dundruga gu khuwe Jehovha a gu laya sanana saye gu khuye si divaleyana tepo yatshavbo. Khu kharato, hi nga tiyisega gu khethu anuye a na hi gireya sasimweso. — Mat. 18:21, 22; Kol. 3:13.

Jehovha kha tsaka tepo Mosi a nga tandrega gu dzi phara khu gitepwana nyo khaguri giwulani. Ambari ulolo, Jehovha mu divalede. Nigu Lito la Nungungulu lo ganeya gu khilo Mosi a diri muthu nyo tumbege ngudzu hi yedego gu mu pimedzeya. (Dhet. 34:10; Hebh. 11:24-28) Jehovha kha dzumeleya gu khuye Mosi a beya Tigoni nya Gitumbiso, ambari ulolo A na mu dzumeleya gu beya Paradhesini mafuni a bwe a mu ninga lithomo nyo vbanye kala gupindruga. Anethu hi nga li mana lithomo lolo ha gu simama gu haguleya likhalelo leli nya lisima ngudzu, gudziphara. — 1 Kor. 9:25.