1. Khu ginani Jehovha a dzi fananisidego ni mamayi a mamisago?

MATSHIGUNI ya muprofeti Isaya, Jehovha giride giwudziso gegi: “Ina womo nyamayi a divalago gyanana gyaye gi nga gu mama?” A vbedza a embeya vathu vaye khuye: “Ambari uye a gu divaledwa, eni gima kha nyi na nga divaledwa khuwe.” (Isa. 49:15) Jehovha kha oloveyi gu dzi fananisa ni mamayi, ganiolu, ga tepo yeyi uye giride isoso. Jehovha thumiside gupwanana gu gomogo ga mamayi ni gyanana gyaye gasi gu yeyedza edzi a haladzago khidzo sithumi saye. Vamamayi nya vangi va ngu ema ni esi si ganedwego khu moyo nya ndriyathu nyo pwani khu Jasmin, a nga khuye: “Tepo u mamisago gyanana gyago wa gu wumba nagyo wupari nya wukhongolo nya gu gima kha wu na nga vbeya.”

2. Jehovha a gu dzipwa kharini tepo gimwegyo nya sanana saye gi hungago gu mu diga?

² Jehovha a ngu si wona tepo gimwegyo nya sanana saye gi emago gu dzi tshanganisa ni libandla nya wuKristo ni gu tshumayela. Khu kharato, a ngupwa ngudzu guvbisa khu dzimiliyoni nya sithumi saye si vbolago * khu liphuvboni mwaga ni mwaga.

3. Ginani egi Jehovha a gi vbwetago?

³ Gutala nya vandriyathu vovo nyo golege va vbodego khu liphuvboni va ngu hegisa khu gu wuya libandlani nigu hi ngu va hakha khu mandza mavili. Jehovha o vbweta gu khuye va wuya nigu anethu. (1 Ped. 2:25) Hi nga va phasa kharini gu wuya? Na hi si gu hlamuli giwudziso gegi gwadi ngudzu gu hi pheya khu guti sighelo si girago vambe va ema guta mitshanganoni ni gu hongola thumoni nya gutshumayele.

4. Ginani gi dugeleyago vathu nyo khaguri khu kotani nya thumo wawe nya gudzivbanyise?

⁴ Vambe va gu gamwa khu thumo wawe nya gudzivbanyise. Moyo nya ndriyathu wa marandzi ga Ásia, nyo pwani khu Hung; * wari khuye: “Nyi di gu vbedza tepo nya yingi ni tshivba thumoni gwangu nya gudzivbanyise. Nyi di gu dzi senga khu gu kheni nyo manega ni dzithomba nya dzingi nyi na si kodza gwadi gu thumeya Jehovha, khu kharato, nyi di gu thuma nya mba tshaya. Nyi di pheya gu kala ngudzu mitshanganoni, khu gu hegisa nyi ema gu dzi tshanganisa ni libandla. Sathane a gu thumisa litigo leli gasi gu gira vathu va diga gu thumeya Nungungulu.”

5. Ginani a giridego ndriyathu nyo khaguri nya nyamayi tepo a nga emisana ni sigaradzo nya singi?

⁵ Vambe vandriyathu va gu gamwa khu sigaradzo. Anne wa Grã-Bretanha, mamayi a gu na ni 5 sanana, wari khuye: “Gimwegyo nya sanana sangu gi di velegwa ni sigaradzo nya sikhongolo. Khu gu gimbiya nya tepo, gimwegyo nya sanana sangu nya gyagadzyana gi di duswa libandlani gimbe nya gikhwathana gi di beledwa khu madwali nya mapimo. Nyi di vbeya ngudzu tshivba nyo bwe nyi ema ni gu hongola mitshanganoni ni thumoni nya gutshumayele. Nyi hegisa khu gu vbola khu liphuvboni.” Hi ngu mu pweya wusiwana Anne ni ndranga yaye gumogo ni vambe va emisanago ni sigaradzo nya nga isoso.

6. Gu mba thumisa lowo wa Vakolosi 3:13, si nga gira kharini muthu a diga gu dzi tshanganisa ni libandla?

⁶ Leri Vakolosi 3:13, khavba nya tshamuselo wa vbavbatshi *. Simbe sithumi sa Jehovha si ngu tshuka si khunguvanyiswa khu ndriyathu nyo khaguri. Mupostoli Pawulo dzumede gu khuye dzimbe dzitepo hi na manega ni gighelo nyo goroge khu kotani nya esi si giridwego khu ndriyathu nyo khaguri. Si nga gira na hi pharidwe khu ndziya nya mba lulama. Ha gu mba dzi woneya hi na vega likhulo. Khu gu hegisa, likhulo li nga hi gira hi ema gu dzi tshanganisa ni libandla. Nga wona giyeyedzo gya Pablo wa América do Sul. Uye a di singedzwa gupwani giride gighoho, khu kotani nya isoso, a di dusedwa malungelo yaye ndrani nya libandla. Si mu pharide kharini? Pablo wari khuye: “Nyi di goroga nigu vbadugwanavbadugwana nyi di ema gu dzi tshanganisa ni libandla.”

7. Ginani gi nga dugeleyago muthu a dzipwago nandru khesi a giridego?

⁷ Muthu nyo khaguri a gu ba a giride gighoho nya gikhongolo gale yoyo, si nga gira a simama gu dzipwa nandru khu tepo nyo laphe. Adzina a nga pimisa gu khuye Nungungulu kha ngo mu haladza gambe. Ambari a gu ba a dzi layide a bwe a divaledwa, si nga gira a dzipwa na si ninganedwi gambe khu gu khala gimwegyo nya sithumi sa Nungungulu. Ndriyathu moyo nyo pwani khu Francisco dzipwide khu ndziya yeyi. Uye wari khuye: “Nyi di lamudwa khu gu ba nyi giride wubhayi. Ambari olu gupheyani nyi nga ba nyi simama gu hongola mitshanganoni, nyi di vbeya tshivba nyo bwe nyi dzipwa na nyi si ninganedwi khu gu manega vbakari nya vathu va Jehovha. Nyi di gu simama gu dzipwa nandru nigu nyi di gu pimisa gu kheni Jehovha kha nyi divaleya. Khu gu gimbiya nya tepo, nyi di ema gu dzi tshanganisa ni libandla.” Wa gu va wona kharini vandriyathu va emisanago ni sigaradzo nya nga esi hi si khumbugidego? Ina u ngu va pweya wusiwana? Nigu nya lisima ngudzu, ahati Jehovha ke, a gu va wona kharini?

8. Ina Jehovha a ngu divala sithumi saye si mu thumedego gale, ganiolu, si emidego? Tshamuseya.

⁸ Jehovha kha si divali sithumi saye si mu thumedego tepo yoyo ganiolu si emidego gu mu thumeya. Ambari thumo va wu giridego kha wu  divali. (Hebh. 6:10) Muprofeti Isaya lovide gipimaniso nyo mbure gasi gu yeyedza edzi Jehovha a khathalago khidzo khu vathu vaye. Lovide esi: “Kha nga muhavisi a havisago tshambi waye, khu mawogoni gwaye a na wugarela sinvutana a si vega vbakhanatunu.” (Isa. 40:11) Muhavisi nya Khongolo, Jehovha, a gu dzipwa kharini tepo mweyo nya dzinvuta dzaye yi emago gu mu thumeya? Jesu yeyedzide edzi Jehovha a dzipwago khidzo tepo a nga embeya esi vapizane vaye: “Nga nyi embelani: Ina muthu a gu ni lizana [100] dzinvuta, a gu dzimeledwa khu mweyo, kha ngu diga idzo nya livbandre na mana magumi ni livbandre na dzina [99] mugigomoni a gimbila a vbweta iyo yi nga dzimela, gani? Na yi mane, khu lisine nyi ngu mi embelani, kheni a ngu tsakiswa khiyo guvbindra dzile nya livbandre na mana magumi ni livbandre na dzina dzi ngamba dzimela.” — Mat. 18:12, 13.

9. Muhavisi nya wadi dziteponi nya gulowe nya Bhibhiliya a di gu phara kharini dzinvuta dzaye? (Wona foto yi gomogo avba nya kapa.)

⁹ Khu ginani si gu na ni lisima gu fananisa Jehovha ni muhavisi? Kholu vahavisi nya vadi va dziteponi nya gulowe nya Bhibhiliya va di gu khathala ngudzu khu dzinvuta dzawe. Khu giyeyedzo, Dhavhidhe dwanide ni nghala gasi gu vhikeya tshambi waye. (1 Sam. 17:34, 35) Muhavisi nya wadi a ngu si tugula ambari go tshuka gu hamugega nvuta mweyo. (Joh. 10:3, 14) Muhavisi nya nga yoyo a di hadzi gu diga edzi nya 99 liphandroni mwendro wulangani nyo vhikelege mwendro gu dzi tshiyedza ni mumbe muhavisi a vbedza a ya vbwetedzeya eyi nya mweyo yi dzimedego. Jesu thumiside gipimaniso gegi gasi gu hevbudza lisine limwedo nya lisima: “Babe wanu a guromo Ndzadzini kha vbweti gukhuye ni gimwegyo nya sanana sesi gi dzimele.” — Mat. 18:14.

10. Guya khu Ezekiyeli 34:11-16, ginani egi Jehovha a tumbisidego gu gireya dzinvuta dzaye?

¹⁰ Jehovha a ngu hi haladza hatshavbo gupata ni “sanana” si dugidego khu tshambini waye. Khu gu thumisa muprofeti Ezekiyeli, Nungungulu a tumbiside gu khuye a na vbwetedzeya dzinvuta dzi dzimedego a bwe a dzi phasa gu wusedza wupari wadzo naye. Uye a di bwe a sasamedza  silo nya lisima a nga hadzi gira gasi gu dzi wuyisa. Isoso khiso si nga ba si girwa khu vahavisi va Israyeli yo tshuka nvuta nyo khaguri yi dzimeya. (Leri Ezekiyeli 34:11-16.) Nyo pheye, muhavisi a di gu thumisa tshivba yaye ni tepo yaye gasi gu vbwetedzeya nvuta yaye kala a yi mana. Khavbovbo, tepo a yi manago muhavisi a di gu yi dzega a wuya nayo tshambini. Gimbe gambe, abari gu nvuta yoyo yi bayisidwe mwendro yi ni ndzala, muhavisi nya lihaladzo a di gu yi phasa, a bhandritsha silondra sayo, a yi vega mawogoni gwaye a bwe a yi ninga gilo nyo hodze. Madhota khayo vahavisi nya tshambi wa Nungungulu. Khu kharato, gu vbwetega ma gira sasimweso gasi gu phasa ni wevbini a dzi hambanisidego ni libandla. (1 Ped. 5:2, 3) Madhota ma gu vbwetedzeya dzinvuta dzodzo gasi ma dzi phasa gu wuya tshambini ma bwe ma dzi yeyedza lihaladzo khu gu dzi ninga giphaso gi vbwetegago khu liphuvboni. *

11. Ginani egi muhavisi nya wadi a gi pwisisago?

¹¹ Muhavisi nya wadi a ngu pwisisa gu khuye nvuta yi nga tshuka yi dzimeya. Yo tshuka nvuta nyo khaguri yi dzimeya muhavisi kha nga ba a yi tshanisa mwendro gu yi veta. Hongoleni hi wona giyeyedzo hi vegedwego khu Nungungulu tepo a phasidego sithumi saye nyo khaguri si nga ba si mu digide khu tepo nyo khaguri.

12. Jehovha a mu pharide kharini Jona?

¹² Muprofeti Jona, tutumide thumo a nga ba a ningidwe khu Jehovha. Ambari ulolo, Jehovha kha vbiredzeya gu mu tsukula. Gufana ni muhavisi nya wadi, Jehovha mu divalede a bwe a mu phasa gu manega ni tshivba yi nga ba yi vbwetega gasi gu gira thumo a nga ba a mu rumide. (Jona 2:7; 3:1, 2) Khu gu gimbiya nya tepo, Nungungulu thumiside tshafura gasi gu phasa Jona gu pwisisa lisima nya womi nya muthu ni muthu. (Jona 4:10, 11) Ginani hi gi hevbulago? Madhota gu vbwetega ma si vbiredzeyi gu tsukula vale va vbodego khu liphuvboni. Madhota gu vbwetega ma zama gu pwisisa sighelo si giridego nvuta yi dzi hambanisa ni tshambi. Nigu tepo nvuta yeyi yi wuyago ga Jehovha madhota ma yede gu simama gu yi yeyedza gukhathala ni lihaladzo.

13. Ginani hi nga gi hevbulago ga edzi Jehovha a pharidego khidzo mulovi nya Ndzimo 73?

 ¹³ Mulovi nya ndzimo 73 vbede tshivba tepo a nga ba a wona vathu nya guvivbe na si gu va gimbileya gwadi. A di gu dzi wudzisa khuye, ina kamo a na wuyedwa khu gu gira gugola ga Nungungulu? (Ndzi. 73:12, 13, 16) Jehovha a mu pharide kharini? Uye kha mu ninga nandru. Khu lisine, Nungungulu lovide malito ya mulovi yoyu nya dzindzimo omu nya Bhibhiliya. Khu gu hegisa, mulovi ya dzindzimo a di si tugula gu khuye wupari nya wadi ni Jehovha khuwo wu gu na ni lisima guvbindra satshavbo. (Ndzi. 73:23, 24, 26, 28) Ginani hi gi hevbulago? Madhota kha ma yeli gu vbiredzeya gu lamula vale va pheyago gu kanakaneya makategwa hi na ma manago khu gu thumeya Jehovha. Wulangani nyo va ninge nandru, madhota gu vbwetega ma zama gu pwisisa sighelo si va girago va kanakana. Khavbovbo, madhota khavbo ma na si kodzago gu thumisa Bhibhiliya gasi gu va tiyisa.

14. Khu ginani Eliya a nga ba a vbweta giphaso nigu Jehovha a mu phaside kharini?

¹⁴ Tepo muprofeti Eliya a nga ba a tutuma Jezabheli a di gu pimisa gu khuye gu diri mwalo mumbe muthu a nga ba a thuma kha nga muprofeti wa Jehovha. (1 Dzipf. 19:1-3) A di gu dzipwa nga khatshi thumo waye wu diri wa mahala. Eliya a di vbeya ngudzu tshivba nyo bwe a lomba ni gufa. (1 Dzipf. 19:4, 10) Wulangani nyo ninge nandru Eliya, Jehovha a di mu tiyisegisa gu khuye mwalo enga. A di mu embeya khuye a yede gu tumba tshivba ya Nungungulu a bwe khuye gu di ngari ni thumo nya wungi gasi a wu gira. Jehovha engisede sigaradzo sa Eliya khu gwadi a bwe a mu ninga wumbe thumo. (1 Dzipf. 19:11-16, 18)  Ginani hi gi hevbulago? Hatshavbo, ngudzungudzu madhota, gu vbwetega hi khathaleya gwadi dzinvuta dza Jehovha. Ambari muthu a gu ganeya gu khuye gorogide mwendro o dzipwa khatshi Jehovha gima kha na nga mu divaleya, madhota ma yede gu mu engiseya gwadi tepo a tshamuseyago edzi a dzipwago khidzo. Khavbovbo, ayo ma na zama gu mu yeyedza gu khayo Jehovha a ngu mu haladza ngudzu.

15. Guya khu Johane 6:39, Jesu a di gu dzi wona kharini dzinvuta dza Papayi waye?

¹⁵ Jehovha a gu vbweta gu khuye hi dzi wona kharini dzinvuta dzaye dzi dzimedego? Jesu hi ningide giyeyedzo nya gyadi. A di gu dziti gu khuye dzatshavbo dzinvuta dza Jehovha dzi na ni lisima mahoni ga Nungungulu. Khu kharato, Jesu giride satshavbo a nga ba a si kodza gasi gu phasa “dzinvuta dzi dzimedego dza Israyeli” gu bweleya ga Jehovha. (Mat. 15:24; Luka 19:9, 10) Kha nga muhavisi nya wadi, Jesu a di gu gira satshavbo a si kodzago gasi a si dzimeledwi ne khu nvuta mweyo ya Jehovha. — Leri Johane 6:39.

16-17. Madhota ma yede gu dzipwa kharini khu gu phasa vale va digidego Jehovha? (Wona kwadru “ Nvuta yi dzimedego yi nga dzipwa kharini?”)

¹⁶ Mupostoli Pawulo kutside madhota ya libandla la Efeso gu pimedzeya giyeyedzo gya Jesu. A di khuye: ‘Phasedzelani vale va keneledwago mwendro va vbedego tshivba. Dundrugani magana ya Pfhumu Jesu a gukhuye: “Kategide ngudzu oyu a ningago guvbindra oyu a hakhago.”’ (Mith. 20:17, 35) Lowo wowu wo yeyedza gu khuwo madhota ma na ni thumo nya wukhongolo ngudzu nyo khathaleye vathu va Nungungulu muhuno. Salvador, lidhota limwedo la Espanha wari khuye: “Tepo nyi dundrugeyago khedzi Jehovha a khathaleyago khidzo dzinvuta dzaye dzi dzimedego, nyo kutsega gu gira satshavbo nyi si kodzago gasi gu dzi phasa. Kha nga muhavisi nya tshambi wa Nungungulu nyi ngu tiyisega gu kheni Jehovha o vbweta gu khuye nyi wu khathaleya gwadi.”

¹⁷ Vatshavbo va nga ba va digide Jehovha hi ganedego khavo avba nya ndrima yeyi va phasidwe gu bweleya ga Jehovha. Ambari olu kamo, nya vangi va digidego Jehovha gu vbwetega va phaswa gu gira sasimweso. Avba nya ndrima yi landreyago hi na ganeya khesi hi yedego gu gira gasi gu va phasa gu wuya ga Jehovha.