WUMWALO wumbe nombelo wu tidwago ngudzu khu Makristo gu fana ni nombelo wa Pfhumu! Na gu si khatadzisegi gu isoso lisine mwendro ne, vathu nya vangi kha va wu pwisisi nombelo wa Jesu owu wu ranwago gupwani nombelo wa Pfhumu. Dzimiliyoni nya vathu va ngu phindra-phindra malito nya nombelo wowu tshigu ni tshigu. Ganiolu Jesu kha wu gireya isoso nombelo wowu. Ho dziti kharini isoso?

Na si gu ganeyi khu nombelo wowu Jesu a di khuye: “Wa gu ba u gombeya, u nga phindra-phindri malito ya mamowo.”(Matewu 6:7) Ina Jesu tepo a nga ganeya khu nombelo wowu, a di gu ganeya gu hi di yede gu wu vega mapimoni hi bwe hi wu phindra-phindra tepo yatshavbo hi gombeyago? Khu lisine ne! Jesu a di gu hi hevbudza esi hi yedego gu si pata omu nya milombelo yathu ni esi nya lisima hi yedego gu si thangisa tepo hi gombeyago. Hi na wona esi a ganedego ga nombelo wu gumogo omu ga Matewu 6:9-13.

Khu malito yaya Jesu a di gu dundrugisa valandreyi vaye gu milombelo yatshavbo yi yede gu yiswa ga papayi waye Jehovha. Ganiolu, u ngu dziti gu khuwe khu ginani lina na Nungungulu li gu na ni lisima nigu khu ginani li yedwego gu agiswa?

Gukhugeya gupheyani nya matimu nya vathu, lina li agidego li ngu tsundziswa khu malipha. Nala wa Nungungulu Sathane, a ganede gu khuye Jehovha mufumeli nya malipha, kha theyi kota khu vathu nigu uye kha kodzi gu fumeya gwadi sivangwa saye. (Genesi 3:1-6) Vathu nya vangi va ngu fana ni Sathane kholu va gu hevbudza gu khavo Nungungulu kha theyi kota khu vathu, na ni dzihanyi, nigu vivbedwe khu monyo. Va bwe va ganeya gu khavo gu mwalo Muvangi. Vambe va duside lina la Nungungulu omu nya dzi Bhibhiliya gasi li si thumiswi.

Bhibhiliya yo yeyedza gu khiyo Nungungulu a na fuvisa guvivba nigu mba lulama gwatshavbo. (Ezekiyeli 39:7) khu gu gira isoso, uye a na tadzisa satshavbo esi hi si vbwetago nigu a na lulamisa sigaradzo sathu satshavbo. A na si gira kharini isoso? Malito ma landreyago nya nombelo wa Jesu ma ngu hi ninga hlamulo.

Muhuno, vathangeyi nya vangi nya wukhongeyi kha va wu pwisisi Mufumo wa Nungungulu. Ganiolu, valandreyi va Jesu va ngu dziti gu khavo Nungungulu a profetide gu khuye Mesiya, muvbanyise a hathidwego khu Nungungulu a na ba ari Pfhumu nya Mufumo wu na vbindrugedzago mafu yatshavbo. (Isaya 9:6, 7; Dhaniyeli 2:44) Mufumo wu na agisa lina la Nungungulu khu gu vega guagani malipha yatshavbo ya Sathane. Khu hwane nya isoso, Mufumo wa Nungungulu wu na fuvisa dzinyimbi, madwali, ndzala ni gufa.(Ndzimo 46:9; 72:12-16; Isaya 25:8; 33:24) Ha gu gombeleya gu Mufumo wa Nungungulu wuta, ha gu lomba gu satshavbo situmbiso saye si tadzisega khu lisine.

Malito ya Jesu ma di gu yeyedza gu gugola ga Nungungulu gu na girega Mafuni kha nga edzi gu giregago khidzo ndzadzini omu Nungungulu a vbanyago umo. Gimwalo gi nga himbedzeyago gu, gugola ga Nungungulu gu girega ndzadzini, kholu khiyo eyi gyanana ga Nungungulu gi dwanidego nyimbi ni Sathane gumogo ni dzingilozi dzaye, khu mahegiso a va rinya mafuni. (Gutuledwa 12:9-12) Gilombo gegi nya wuraru nya nombelo nya giyeyedzo, gi ngu hi phasa gasi hi vega gu pima ga silo nya lisima a gu gira gugola ga Nungungulu, guvbindra gu gira gu gola gwathu. Gu gola gwaye gu sivangwa saye satshavbo si mana silo nya sadi. Khu kharato, ambari Jesu a nga ba a vbelede a embede Papayi waye gu khuye: “Gu nga giregi gugola gwangu, ganiolu gu na girege gugola gwago.” — Luka 22:42.

Jesu a yeyedzide gambe gu, kha sa vivba gu ganeya khesi ethu hi si vbwetago ga milombelo yathu ya tshigu ni tshigu. Khu lisine, ha gu gira isoso si na hi phasa gu dundruga gu khethu Jehovha khuye a “ningago womi vatshavbo, liphuvbo va hefemulago ni silo satshavbo.” ( Mithumo 17:25) Bhibhiliya yo yeyedza gu khiyo uye a ngu fana ni papayi nya lihaladzo a tsakago khu gu ninga sanana saye satshavbo esi va si vbwetago. Ganiolu, gu fana ni papayi nya wadi, Jehovha kha ninge sanana saye silo nya gu kha si phasi gilo.

Ina u mu girede gighoho nyo khaguri Nungungulu? Ina u ngu vbweta gu divaledwa? Vathu nya vangi muhuno kha va pwisisi gu gighoho ginani nigu kha va woni gighoho kha nga gilo nyo vivbe ngudzu. Khu kharato, Bhibhiliya yo hi hevbudza gu khiyo gighoho khigyo gi hi girago hi manega ni sigaradzo nya singi hi bwe hifa. Khu gu ba hi velegidwe na ha sa vbeleya, Dzitepo dzatshavbo hi ngu hosisa nigu gutumba gwathu nya womi nya ba vbeya wo dzi seketeya avba nya gu Nungungulu a hi divaleya.(Varoma 3:23; 5:12; 6:23) si ngu thaveleya Guti gu Bhibhiliya yari khiyo: “uwe Pfhumu, u wadi u ngu tsetselela” — Ndzimo 86:5.

Ina u ngu si pwisisa gu tepo yatshavbo hi ngu vbweta vhikedwa khu Jehovha? vathu nya vangi kha va khodwi gu oyu nya guvivbe a gu Sathane womo. Ganiolu Jesu a hi hevbudzide gu Sathane muthu nya nyama nigu a di bwe a mu rana kha nga“pfhumu nya litigo leli.” (Johane 12:31; 16:11)Sathane a pengiside litigo leli, kholu khuye a li thangeyago nigu uye dzi emisede gu gu pengisa gasi u si manegi ni wupari ni papayi wago Jehovha. (1 Pedro 5:8) ambari ulolo, Jehovha a na ni tshivba gu vbindra Sathane nigu a ngu vhikeya ava va mu golago.

Khu gu piya, dzipontu dzedzi dzi ganeyago khu nombelo nya litshina wa Jesu kha dzi ganeyi khu satshavbo hi yedego gu gombeya khiso. Dundruga esi si gumogo omu ga 1 Johane 5:14, livhesi leli lo hi embeya esi khu Nungungulu: “Hi ngu tumba gu khethu ni gevbini hi lombago gi gimbileyanago ni gugola ga Nungungulu, uye a ngu hipwa.” Khu kharato u nga dzi embeyi gu khuwe sigaradzo sago si dugwana avbo nya gu u si gombeye ga Nungungulu. — 1 Pedro 5:7.

Ganiolu go ganedwa ginani khu ora ni wulanga owu hi yedego gu gira avbo nombelo? Ina si na ni lisima ora ni wulanga tepo hi gombeyago?