Hi nga gombeya-ga-mani?
INA milombelo yatshavbo ya gu hongola wulanga wa wumowo na gu si khatadzisegi gu ho gombeya ga mani? Gu tala nya vathu muhuno va gu pimisa kharato. Nigu mapimiselo yoyo ma ngu gira vathu va khodwa gu wukhozeyi watshavbo wu ngu dzumeledwa, ambari olu, wu nga hambana. Ina si nga gira gu mapwisiselo yaya na ma hosegide?
Gasi gu ganeya lisine, Bhibhiliya yo hevbudza gu khiyo milombelo nya yingi kha yi yiswi ga Jehovha. Ga tepo yi nga lowa Bhibhiliya, gu diri giolovedzo gu vathu va khozeya sifananiso nyo vatwe. Ganiolu, Nungungulu va gengedzide khu gu phindra-phindra ga sigiro sesi. Khu giyeyedzo, Ndzimo 115:4-6 yo ganeya esi mayelano khu sifananiso: “Si na ni dzindzeve, aholu kha sipwi.” Giwudziso khegi: Khu ginani u nga gombeyago ga Nungungulu nya gu gima kha na nga gupwa?
Gu na ni matimo nyo khaguri omu nya Bhibhiliya ma tshamuseyago gwadi mahungu yaya. Muprofeti nya lisine Eliya a di embeya vaprofeti va Bhahali gu va gombeya ga Nungungulu wawe nigu uye a di hadzi gu gombeya ga Nungungulu waye. Eliya a di khuye Nungungulu waye nya lisine a di hadzi gu mu hlamula, ganiolu, wawe nya malipha ne. Na va dzumede mawonelo yaya, avo va di gombeya khu tshivba ni tshivba litshigu latshavbo khu malito nyo khugege, ganiolu, kha va mana phindrulo! Matimo mari khayo: ‘Kha va ngapwa lito mwendro gu wona gilo’. (1 Dzipfhumu 18:29) Ahati Eliya, ina dugelede?
Hwane nya gu Eliya na gombede, Nungungulu waye a di dzegeya gu mu hlamula, khu gu rumeya nilo khu ndzadzini gasi wu vbisa miphaso yaye. Khu gwevbini guhambana ga milombelo yeyi? Hlamulo hi nga wu mana omu nya nombelo wa Eliya, wu lovidwego omu ga 1 Dzipfhumu 18:36, 37. Nombelo nya gu role — wu gu na ni tanga nya 30 malito nya gihebheru nya gu pheye. Ambari olu, nombelo waye wu nga rola Eliya khumbugide guraru lina la Nungungulu, a gu Jehovha.
Bhahali si thulago “mune” a diri Nungungulu wa Vakhanani nigu gu diri ni vambe va Nungungulu va nga ba va ranwa khu lina nya gu fani gipandreni mule. Ganiolu, lina Jehovha la gu lumba muthu moyo basi a Khugegidego mafuni gwatshavbo. Nungungulu embede vathu vaye khuye: “Eni kheni PFHUMU Nungungulu. Eli khilo lina langu nyi ranwago khilo! Wudhumo wangu kha nyi na ningela mumbe muthu.” — Isaya 42:8.
Ina nombelo wa Eliya ni milombelo ya vaprofeti va Bhahali yi hongode wulanga wa wu mowo? Wukhozeyi wa Bhahali wu di si ningi lisima vathu, wu di gu seketeya wubhayi nigu wu di gu gira miphaso khu vathu. Gu hambana navo, wukhozeyi wa Jehovha wu hevbudzide Vaisrayeli ndziya eyi va nga ba va yede gu mu khozeya khiyo, na gu va tshudzisa ga sigiro sile nyo nyenyeze. Nga dundrugeya khesi: Wa gu vbweta gu rumeya lidangaliya ga pari yago yi ningwago ngudzu githawo, ina u di gu vireya gu khuwe li ningedwa ga mumbe muthu a gu na ni mavbanyelo nyo hambane ni ya pari yago? Ne vbadugwana!
Esi Eliya a nga embeya vaprofeti va Bhahali si vegide ma gu agani gu milombelo kha yi hongoli wulanga mowo
Wo ba u gombeya ga Jehovha, dziti gu khuwe wa gu gombeya ga Muvangi, papayi nya vathu vatshavbo. a Muprofeti Isaya ga nombelo waye a di khuye: “Uwe Pfhumu Nungungulu, khuwe Babe wathu” (Isaya 63:16) Oyu khuye Nungungulu a ganedego khuye Jesu tepo a nga embeya valandreyi vaye khuye: “Eni nya gu hongola ga Papayi wangu a gu Papayi wanu nenu, ga Nungungulu wangu a gu Nungungulu wanu nenu.’’ (Johane 20:17) Jehovha khuye Papayi wa Jesu. Oyu Jesu a nga gombeya gwaye a bwe a hevbudza valandreyi vaye gu mu khozeya. — Matewu 6:9.
Ina Bhibhiliya yo hi kutsa gu gombeya ga Jesu, Mariya, va nyo aga mwendro ga dzingilozi? Ne vbadugwana, iyo yari khiyo hi yede gu gombeya basi ga Jehovha. Wona sighelo sivili. Nyo pheye, nombelo wu ngu gira gipandre nya wukhozeyi wathu nigu Bhibhiliya ya gu ganeya gu khiyo hi yede gu khozeya Jehovha basi. (Ekisodha 20:5) Nya wuvili, Bhibhiliya yari khiyo Jehovha khuye a ‘Engisago milombelo.’ (Ndzimo 65:2) Ambari olu, Jehovha a ningidego vathu makodzelo nya gu gire silo nya singi, thumo nya gu engiseye milombelo kha wu ningeya ga vathu. Uye o hi tumbisa gu, khuye basi a na engiseyago milombelo yathu.
Ganiolu, wa gu vbweta gu khuwe Jehovha a engisa milombelo yago dundruga livhesi li gu khilo: “Nigu ni wevbini a ranago lina la Jehovha a na vbulugiswa.” (Mithumo 2:21) Ina Jehovha a ngu engiseya milombelo yatshavbo? Ina gyomo gimbe gilo hi yedego gu giti gasi gu uye a engiseya milombelo yathu?.
a Wumbe wukhongeyi wo seketeya gu si vivbide gu ganeya khu lina la Nungungulu ambari tepo hi gombeyago. Ganiolu, tepo Bhibhiliya yi nga lowa khiyo, lina la Nungungulu li di gu manega malangani ma ninganago 7 000 nigu dzitepo nya dzingi sithumi sa Jehovha sa gale si di gu thumisa lina laye umo nya milombelo ni omu nya dzindzimo dzawe.