HA GUganeya khu nombelo, wukhongeyi nya wungi wu ngu garadzega khu gu vbweta guti edzi va nga emago khidzo tepo va gombeyago esi va na ganeyago ni simbe silo. Ganiolu, Bhibhiliya yi ngu hi phasa gu vega gupima ga silo nya lisima, nya nga avbo nya giwudziso gi gu khigyo, “Hi yede gu gombeya kharini?”

Bhibhiliya yi ngu ganeya khu sithumi nya gu tumbege sa Nungungulu na si gu gombeya malangani nya gu hambane na va emide khu dzindziya nya guhambane. Avo va di gombeya na si gu khugeya monyoni khu lito nyo khugege nigu milombelo yawe nyi di gu gimbileyana ni giemo gya moyo ni moyo wawe, vambe va di gu gombeya na va khedzide ndzadzini vambe na va khidzimide. vbavbandzi nya gu va thumisa sifananiso, gihambano mwendro mabhuku nya milombelo, avo va di gu gombeya na si gu khugeya monyoni, na va gu ganeya edzi va dzipwago khidzo. Khu ginani Jehovha a nga engisa milombelo yawe?

Kha nga olu siyeyedzidwego ga ndrima yi nga vbindra, avo va gombede ga Nungungulu moyo basi, a gu Jehovha. Gu na ni gimbe gilo nya lisima gi gumogo omu ga 1 Johane 5:14 lo ganeya esi: “Hi ngu tumba gu khethu ni gevbini hi lombago gi gimbileyanago ni gugola ga Nungungulu, uye a ngu hipwa.” Milombelo yathu yi yede gu gimbileyani ni gugola ga Nungungulu. Sa gu thula ginani isoso?

Gasi gu milombelo yathu yi gimbileyana ni gu gola ga Nungungulu, gu vbwetega hiti gu gola gwaye. Gu hevbula Bhibhiliya si na hi phasa gu gombeya khu ndziya nya yadi. Ina isoso so thula gu khiso Jehovha kha na nga engiseya milombelo yathu khu gu ba ha sa hevbula Bhibhiliya? Ne vbadugwana, Nungungulu o vbweta basi gu hiti gu gola gwaye, khu gu hi pwisisa mwendro gu vbanya khesi hi si hevbulago.(Matewu 7:21-23) Hi yede gu gombeya maningano ni esi hi si hevbulago.

Tepo hi yago hi hevbula khu Jehovha ni gu gola gwaye, gu khodwa gwathu gu na dandra, nigu isoso si na ba siri sa lisima ngudzu ngudzu tepo hi na gombeyago. Jesu a di khuye: “Nigu satshavbo mu si lombago khu nombelo na muri ni gukhodwa, mu na ningwa.”(Matewu 21:22) Gukhodwa kha si thuli gu dzumeleyana ni gevbini gilo. Ganiolu, so thula gu tumba gilo egi hi si gi wonigo na guri ni siyeyedzo nyo khaguri si hi phasago guti gu gyomo. (Vahebheru 11:1) Bhibhiliya yi na ni siyeyedzo nya singi esi si hi phasago gu wona gu Jehovha, oyu si gu ba kodzega gu mu wona, nya lisine, ni wule a tumbegago, a dzi emisede gu hlamula milombelo ya vale va khodwago gwaye. Vbavbandze nya isoso, tepo yatshavbo hi yede gu lomba gukhodwa nyo tiye, nigu hi yede gu tumba gu Jehovha a na hi ninga esi hi mu lombago. — Luka 17:5; Jakobe 1:17.

Gu na ni yimbe ndziya nya lisima hi nga gombeyago khiyo. Jesu a di khuye: ““Eni kheni ndziya ni lisine ni womi. Mwalo a hongolago ga Papayi nasiri khavbo gwangu.” (Johane 14:6) Jesu khuye ndziya hi nga yi thumisago gasi hi hidzimeya ga papayi waye Jehovha, Jesu a hevbudzide vapizane vaye gu va di yede gu gombeya khu gu thumisa lina laye. (Johane 14:13; 15:16) Isoso kha si thuli gu hi yede gu gombeya ga Jesu. Ganiolu, hi yede gu gombeya khu lina la Jesu na hi dundruga gu khethu uye o gira gu si kodzega gu hidzimeya ga babe wathu nya guvbeleye ni oyu a agidego.

Vapizane va di embeya Jesu gu khavo: “Pfhumu, hi hevbudze gu gombeya” (Luka 11:1) somo gu agani gu avo va di si lombi gu a va hevbudza esi hi si hevbudego avba nya ndrima yeyi. Ganiolu, avo va di gu vbweta guti esi va nga ba va yela gu si gombeleya, khu lisine avo va di gu ganeya gu khavo: ‘Ginani hi yedego gu gi pata omu nya milombelo yathu’?