GIWUDZISO gegi gi ngu ndrindra gupima ga vathu nya vangi. Bhibhiliya ya gu yeyedza gu khiyo Jehovha a ngu engiseya milombelo yathu muhuno. Ganiolu, gasi uye a engiseya milombelo yathu hi yede gu gira gilogyo.

Jesu vegide guagani gu khuye vathangeyi nya dzitshetshe va teponi yile va di gu gombeya khu ndziya nya mba yadi; avo va di gu dzi garadza basi khu gu vbweta ndruma. Uye ganede gu khuye ‘va na hakha tshatshazelo wawe watshavbo,’ iso si thulago gu khiso va na hakha esi va si vbwetago, a gu gu wonwa kha nga vathu nya ndruma nasiri gu Nungungulu a va engiseya. (Matewu 6:5) Khu ndziya nya gu fane vathu nya vangi muhuno, va gu gombeya mayelano ni gu gola gwawe nasiri gu gola ga Nungungulu. Nya mba theya kota khu matshina nya milayo nya Bhibhiliya, khiso si girago gu Nungungulu a si engiseyi milombelo yawe.

Ahati uwe ke? Ina Nungungulu a ngu engiseya ni gu hlamula milombelo yago? Hlamulo nya giwudziso gegi kha wuyi khu tshonge yago, litigo mwendro giemo gyago. Bhibhiliya yi ngu yi tiyisegisa gu khiyo: “Nungungulu mwalo gihatheya, ganiolu ga mafumbo yatshavbo uye a ngu hakha wule a mu ningago githawo a bwe a gira esi nya sadi.” (Mithumo 10:34, 35) Ina livhesi leli li ngu gu kuha? Gu thava Nungungulu sa gu thula gu mu ninga githawo ni gu thava gu mu khunguvanyisa. Gu gira silo nya sadi sa gu thula gu vbweta gu gira esi Nungungulu a ganeyago gu khuye khyadi nasiri esi u si golago mwendro si godwago khu vambe. Ina kamo uwe u ngu dzina gu khuwe Nungungulu a engiseya milombelo yago? Bhibhiliya yi ngu gu embeya dzindziya edzi u yedego gu gombeya khidzo gasi Nungungulu a engiseya milombelo yago. a

Lisine gu vathu nya vangi va gu vbweta gu Nungungulu a hlamula milombelo yawe khu gilewugiso. Dziteponi nya Bhibhiliya, Nungungulu a di gu si khaleyi gu gira silewugiso. Ga dzimbe dzitepo a di gu gira gilewugiso nyo khaguri hwane nya mazanazana nya myaga nigu gambe Bhibhiliya yo hevbudza gu khiyo silewugiso si emide gu girwa tepo va ngafa vapostoli. (1 Vakorinto 13:8-10) Ina esi sa gu thula gu khiso Nungungulu kha hlamuli milombelo yathu muhuno? Ne vbadugwana! Wona milombelo nyo khaguri eyi uye a hlamulago.

Nungungulu a ngu hi ninga wugengeyi. Jehovha gifefe nya wugengeyi watshavbo. A ngu ninga wugengeyi vale va vbwetago gu thangedwa khuye nigu vbanya guya khu sileletelo saye. — Jakobe 1:5.

Nungungulu a ngu hi ninga liphuvbo laye nya guage a bwe a hi kategisa. Liphuvbo nya guage tshivba ya Nungungulu. Tshivba yoyo kha yi faniniswi ni gimbe gilo. Iyo yi nga hi phasa gu timiseya sigaradzo, yi hi ninga gurula ho ba hi garadzegide nigu yi nga hi phasa gu haguleya makhalelo nya gu mbure ma nga hi phasago.(Vagalatiya 5:22, 23) Jesu tiyisegiside valandreyi vaye gu khuye Jehovha a gu ningeya liphuvbo laye nya gu age khu monyo waye watshavbo. — Luka 11:13.

Nungungulu a ngu ninga guti vale va mu vbwetedzeyago khu monyo wawe watshavbo. (Mithumo 17:26, 27) Mafuni gwatshavbo, gu na ni vathu va vbwetedzeyago lisine. Avo va gu vbweta gu hevbula khu Nungungulu — lina laye, makungo yaye khu mafu ni vathu nigu va nga hidzimeya kharini ga Nungungulu.(Jakobe 4:8) Gu tala nya dzitepo Dzifakazi dza Jehovha dzi ngu mana vathu vava nigu idzo dzi ngu tsakeya gu va phasa gu mana mihlamulo nya Bhibhiliya nya siwudziso sawe.

Ina aya khayo mahungu u nga u ma vbweta tepo u nga hakha revhista yeyi? u ngu vbweta guti nya singi khu Nungungulu? si nga gira Nungungulu na gu hlamude nombelo wago khu gu gu ninga makodzelo nyo mane revhista yeyi.