MAFUNI gwatshavbo, vathu nya mafumbo yatshavbo ni watshavbo wukhongeyi va ngu gombeya vonga mwendro khu mitsawa. Avo va gu gombeya mudzitsetseni, dzitempeleni, dzisinaghogha, dzimeskita ni mambe malanga nya gu khozeye umo. Va gu thumisa litapeti nya milombelo, mabhuku, sifananiso ni simbe silo.

Nombelo wa gu gira gu vathu va hambana ni simbe sivangwa. Lisine gu, gu na ni silo nya singi si hi girago hi fana ni sirengo. Gufana ni sirengo hi ngu vbweta gu hodza, liphuvbo ni mati nigu hi ngufa. (Muhevbudzi 3:19) Ganiolu, vathu basi va gombeyago. Khu ginani?

Adzina saye kholu hi velegidwego na hiri ni gudogoreya nya gu gombeye. Nombelo khuwo wu hi phasago gu hidzimeya ga wulanga owu vathu va wu wonago na wu agide. Bhibhiliya yo yeyedza gu khiyo hi velegidwe ni gudogoreya gogu. (Muhevbudzi 3:11) Jesu Kristo ganede gu khuye: “Va ngu tsaka ava va dzitigo gu khavo va ngu vbweta gu thangedwa khu Nungungulu, kholu Mufumo wa ndzadzini kwawe.”  — Matewu 5:3.

Gu vbweta gu thangedwa khu “Nungungulu”, khiso si girago hi wona dzitshetshe nya dzingi ni gu gira vathu va vbedza dzitepo nya dzingi na va gu gombeya. Vathu nyo khaguri va gu tumba vambe vathu mwendro gu dzi tumba gasi va tadzisa gu dogoreya gwawe nya liphuvbo. Ganiolu, ina kha wu womi gu khuwe vathu va ngu hegedwa avba nya gu ninge giphaso egi vambe va gi vbwetago? Ethu kha ha vbeleya, ha gu vbanya tepo nya yidugwana nigu hi nga wona silo khu ndziya nya mba yadi. Gu na ni muthu moyo basi a gu na ni guti, tshivba, a vbanyago matshigu nya mangi a nga hi ningago esi hi si vbwetago. Khu sevbini silo si hi kutsago gu gombeya?

Nga dundrugeya esi: Ina u di nga vbweta gileletelo, guti mwendro hlamulo nya siwudziso nya gu mwalo a nga gu hlamulago? Ina u di nga vbweta gu thaveledwa tepo u nga tshangana ni gigaradzo nya gikhongolo, sileletelo tepo u nga vbweta gu hunga makungo nyo garadze mwendro gu divaledwa tepo u nga dzipwa ngudzu nandru?

Guya khu Bhibhiliya satshavbo sesi si nga gu kutsa gu gombeya. Bhibhiliya libhuku nya gu tumbege ngudzu ga mahungu yaya nigu li na ni sasamedzo nya milombelo ya sithumi nya singi nya gu tumbege. Iso si gombede si lomba gu thaveledwa,divalelo, gileletelo ni mihlamulo nya siwudziso nyo garadze womini gwaso.  — Ndzimo 23:3; 71:21; Dhaniyeli 9:4, 5, 19; Habhakuka 1:3.

Ambari olu milombelo yawe yi nga ba yi hambanide gu diri ni gilo gimwegyo nyo fani, vatshavbo va nga ba va gombeya va di gu dziti gu khavo ginani va yedego gu gira gasi milombelo yawe yi hakhwa nigu vathu nya vangi kha va theyi kota khu isoso. Avo va di gu dziti gu khavo va yede gu gombeya ga mani.