INA gu gombeya si ngu phasa? Ina, Bhibhiliya yo yeyedza gu khiyo nombelo nya sithumi nyo tumbege sa Jehovha khu lisine wu ngu phasa. (Luka 22:40; Jakobe 5:13) khu lisine, gu gombeya gu nga hi phasa ngudzu khu liphuvboni ni nyamani. So girega kharini isoso?

Khu giyeyedzo, nga dzi dundrugeya na wuri ni gyanana gi ningidwego giningwa nyo khaguri, ina u di hadzi gu gi hevbudza lisima nya gu bonge, mwendro u di hadzi gu gi hevbudza edzi gi yedego gu yeyedza khidzo gubonga? Ha gu ganeya edzi hi dzi pwago khidzo, si na phasa vambe gu pwisisa gu hi na ni liphuvbo nya gu bonge nigu hi na va tiyisa. Ina hi yede gu gira sasimweso tepo hi ganeyago ni Nungungulu? Ina. wona simbe siyeyedzo.

Milombelo yi yeyedzago gu bonga. Ha gu yeyedza gu bonga papayi wathu khu silo satshavbo nya sadi a hi gireyago, hi na vega gupima avba nya makategwa a hi ningago. Kha nga handro wa kona, hi na yeyedza gu khethu hi ngu bonga nigu hi ngu tsaka hi bwe hi dzipwa gwadi. — Vafilipi 4:6

Giyeyedzo: Jesu a yeyedzide gu bonga khu ndziya eyi papayi waye a mu engisidego khiyo ni edzi a nga hlamula khidzo milombelo yaye. — Johane 11:41

Milombelo nyo lombe divalelo. Ha gu lomba gu Nungungulu a hi divaleya hi na tiyisa gukhodwa gwathu, hi na yeyedza gu khethu hi ngu dziti gu hi ghohide khu lisine nigu hi dzi layide, isoso si na hi phasa gu hi si lemedwi khu gighoho gyathu.

Giyeyedzo: Dhavhidhe a gombede gasi a yeyedza gu a dzi layide a bwe a dzi sola. — Ndzimo 51.

Milombelo nyo lombe wuthangeyi ni guti. Ha gu lomba gu Jehovha a hi thangeya mwendro a hi ninga guti gasi hi gira makungo nya yadi si na hi phasa gu hi khala vathu nya gu dzi nogise. Isoso si na hi gira hi dundruga gu khethu hi ngu hegedwa nigu si na hi phasa gu hi tumba papayi wathu wa ndzadzini. — Mavingu 3:5, 6.

Giyeyedzo: Solomoni khu gu dzinogisa a di lomba wuthangeyi ni guti gasi a si kodza gu fuma Israyeli — 1 Dzipfhumu 3:5-12.

Milombelo nyo lombe giphaso gasi hi emisana ni sigaradzo. Ha gu tuleya monyo wathu Nungungulu tepo hi tshanganago ni sigaradzo, hi na dzipwa na hi tshulegide nigu vbavbandzi nya gu hi dzi tumba hi na tumba Jehovha. — Ndzimo 62:8.

Giyeyedzo: Pfhumu Asa khu gu dzi nogisa a di lomba wuthangeyi tepo a nga wugedwa khu valala vaye. — 2 Dzikoronika 14:11

Gu gombeleya vathu vale va tshanisekago. Milombelo nya nga eyi yi ngu hi phasa gu hi si khali va magundrele nigu yi nga hi phasa gambe gu hi yeyedza pweya wusiwana.

Giyeyedzo: Jesu a gombelede valandreyi vaye. — Johane 17:9-17

Milombelo nya gu dhumise.Tepo hi dhumisago Jehovha khu kotani nya mithumo yaye ni makhalelo yaye nyo hlamadzisi, si ngu hi gira hi mu ninga githawo ni gu bwe hi mu zundza. Milombelo nya nga eyi yi ngu hi phasa gu hidzimeya ga Nungungulu, papayi wathu.

Giyeyedzo: Dhavhidhe a dhumiside Jehovha khu kotani nya esi a si vangidego. — Ndzimo 8.

Mambe makategwa ma gimbileyanago ni nombelo khaya: “Gurula ga Nungungulu, gu vbindrago gupwisisa gwatshavbo.” (Vafilipi 4:7) Gu mana gurula mafuni momu gu tadego khu wuvivbi, makategwa nya makhongolo. Isoso si ngu hi phasa gambe khu nyamani. (Mavingu 14:30) Ganiolu, ina gurula gogu ho gu mana khu kotani nya gudzigaradza gwathu? Mwendro gu na ni gimbe gilo gambe nya lisima gi pategago?