Vbavbandze nya gu kanakani, uwe u ngu oloveya gu wona gu khuwe dzitshetshe nya dzingi dzi ngu ninga lisima dzi tempele mwendro malanga nya gu khozeye umo nya gu khadzisege nigu va na ni tepo yi vegidwego gasi gu gira nombelo. Ina Bhibhiliya yi ngu ganeya khu malanga mwendro dzi ora hi yedego gu khozeya khidzo ndrani nya litshigu?

Khu lisine, Bhibhiliya yo ganeya gu khiyo gu na ni tepo yi vegidwego gu bonga. Khu giyeyedzo, na gu si hodzi ni vapizani vaye Jesu a di pheya khu gu bonga Nungungulu khu nombelo. (Luka 22:17) Nigu tepo vapizani vaye va nga ba va tshangana va di gu gombeya gumogo. Avo va di gu simama ni giolovedzo gi nga ba gi girwa gale omu nya dzi sinagoga ni tempeleni eyi Jerusalema. Nungungulu a di gu vbweta gu khuye tempele yi khala ‘Nyumba nya nombelo nya vathu vatshavbo.’ — Marko 11:17

Tepo sithumi sa Nungungulu si tshanganago gasi gu gombeya gumogo, silombo sawe si nga manega ni tshivba ngudzu. Tepo muthu nyo khaguri a gombeyago a gu emeya vathu vatshavbo nigu nombelo wowu wa gu gimbileyana ni matshina nya Bhibhiliya Jehovha a ngu tsaka ngudzu. Nombelo wu nga gira Nungungulu a hi ninga silo nya gu vbindri esi hi mu lombidego. (Vahebheru 13:18, 19) Dzifakazi dza Jehovha dzi ngu gombeya omu nya mitshangano yadzo. Hi ngu gu kovhidhar gasi uta Salawuni nya mufumo yi gomogo vbafuvbi ni ndranga yago gasi uya engiseya milombelo yoyo khu wabune.

Ganiolu, Bhibhiliya kha yi ganeyi ora ni wulanga gasi hi gombeya. Ha gu leri matimu hi ngu mana matshangu nya sithumi sa Nungungulu si nga ba si gombeya ga ora ni wulanga nyo hambane. Jesu ganede gu khuye: “wa gu gombeya, beya nyumbani gwago u sega lidimba, u gombeya ga Papayi wago. Khu kharato, Papayi wago a wonago iso si sihadego a na gu tshatshazeya.” — Matewu 6:6.

Ina mahungu yaya kha ma tangadzisi? Khu lisine uwe u nga hidzimeya ga Muvangi nya silo satshavbo ni ga yevbini ora na wu gu tumba gu khuwe a na gu engiseya. Kha si hlamadzisi gu Jesu ga dzimbe dzitepo na gu vbwetide gu khala enga gasi a gombeya. Dzimbe dzitepo a di gu gombeya wutshigu watshavbo, gu dzina saye na gu lomba guti gasi a hunga makungo nya lisima. — Luka 6:12, 13

Vambe vama ni vanyamayi va khumbugwago omu nya Bhibhiliya va gombede ga dzitepo va nga emisana ni sigaradzo . dzimbe dzitepo va di gu gombeya khu lito nyo khugege nigu dzimbe dzitepo na va si pwadzi lito, khu tsawa mwendro na vari vonga. gilo nya lisima khu gu avo va di gu gombeya nigu Nungungulu a gu kutsa sithumi saye gu gombeya ‘tepo yatshavbo’(1 Vatesalonika 5:17) Uye tepo yatshavbo dzi emisede gu engiseya vathu va girago gu gola gwaye. Ina egi khandri giyeyedzo nya lihaladzo laye?

Vathu nya vangi muhuno kha va khodwi gu khavo nombelo wu na ni lisima. Uwe gu dzina saye u nga dzi wudzisa gu khuwe: ‘Ina kamo nombelo wu nga nyi phasa?’