Gu khugeya wananani wangu nyi ngu gola ngudzu sivangwa. Ndranga yangu yi di gu oloveya gu pasiyari ga dziflorexta ni ga mitsongo nya gu mbure ngudzu yi nga ba yi romo dhoropani ga Finlândia Central. Nyi ngu gola ngudzu sirengo. Tepo nyi nga ba yiri gyanana, nyi di gu vbweta ngudzu gu wugareya siwonga ni dzatshavbo dzimbwa nyi nga ba nyi dzi mana. Tepo nyi ngaya nyi dandra nyi di gu garadzega khu gu wona vathu na va gu tshanisa sirengo.

Hi di gu gira dzikampanya nya dzingi gasi sirengo si vbanya na si tshulegide. Hi di gu huweleya mahungu yaya khu dzindziya nya gu hambane-hambane nigu hi di gu gira sitereka ga dziloja dzi nga ba dzi rengisa mabhadzi nya mawoya ni dzilabhoratoriyo dzi nga ba dzi gira dzitexti dzawe omu nya sirengo. Hi di gira hengeledzano yi nga ba yi vhikeya sirengo. Hi di gu vbisega ngudzu khu gu gira thumu wowu, khu kharato tepo yatshavbo hi di gu dwanisana ni mufumu nigu nyi khotedwe pasoni khu dzitepo nya dzingi.

Vbavbandze nya gu dwane khu kotani nya gu tshulege nya sirengo, hi di gu garadzega ngudzu khu simbe sigaradzo nya litigo leli. Khu gu gimbiya nya tepo nyi di gira gipandre nya dzihengeledzano nya gu hambane-hambane, nya nga Amnistia Internacional ni Greenpeace. Gu seketeya dzihengeledzano dzedzi gu diri gilo nya lisima ngudzu womini wangu. Nyi di gu phasa sisiwana, ava va hamugago gilo nya gu hodze ni vathu va tshanisekago.

Khu kharato, vbadugwana-vbadugwana, nyi pwisiside gu kheni kha nya nga ba nyi si kodza gu vbindrugedza mafu. Ambari olu dzihengeledzano dzedzi dzi nga ba dzi si kodza gu lulamisa sigaradzo nya sidugwana, esi nya si khongolo si di gu gira gu khatsi so engedzeya. Si di gu gira gu khatshi dzitshivba nya gu vivbe dzi di gu woneleya mafu nigu mwalo a nga ba a khatala khu gilo. Nyi di gu dzipwa na ni ri mwalo makodzelo nya gu lulamise litigo.

 Eni nyi di gu garadzega ngudzu, nyi di pheya gu dundrugeya khu Nungungulu ni Bhibhiliya. Nyi di gu hevbude Bhibhiliya ni dzifakazi dza Jehovha. Ambari olu nyi nga ba nyi hlamadziswa khu wuwadi ni edzi va nga ba va khatala khidzo kheni, kha nya nga ba nyi dzi emisede gu vbindrugedza mavbanyelo yangu, ganiolu olu silo si di gu hambanide.

Nyi di pheya gu hevbula Bhibhiliya nigu si nyi ningide gurula. Nyi manide mavhesi nya mangi ma nga ba ma ganeya khu gu hi yede gu phara sirengo khu ndziya nya yadi. Khu giyeyedzo, libhuku la Mavingu 12:10 lo ganeya khu khilo: “Muthu nya gululame a ngu sayisa gwadi sifuyo saye.” Nyi pwisiside gambe gu kheni Nungungulu khandri uye a vangago sigaradzo nya litigo leli. Vbavbandze nya isoso, sigaradzo sathu so engedzeya kholu vathu va si engisigo milayo ya Nungungulu. Nyi hlamade ngudzu tepo nyi nga hevbula khu lihaladzo ni gu laphisa monyo ga Jehovha. — Ndzimo 103:8-14.

Ga tepo yile nyi lombide libhuku O Que a Bíblia Realmente Ensina. Na gu vbindride tepo nya yidugwana, patwa nyo khaguri nya dzifakazi dza Jehovha wu di ta nyi wuseya nigu wu di nyi lomba gu hevbula ni eni Bhibhiliya, nyi di dzumeya. Ni gu gambe nyi di pheya gu wona mitshangano nya Wukristo Salawuni nya Mufumu. Lisine li di dzegeya gu tsitsa mikhamba monyoni gwangu.

Khu gu phaswa khu Bhibhiliya, nyi si kodzide gu vbindrugedza silo nya singi. Nyi di ema gu seya ngudzu ni gu daha. Makhalelo, maganelelo yangu ni edzi nyi nga ba nyi phara khidzo vathangeyi, si di vbendrugedza. (Varoma 13:1) Nyi di diga mavbanyelo yangu ya gale ma nga ba ma sa handzega.

Si di gu nyi garadzeya gu wona khu ndziya nya yadi dzihengeledzano dzi nga ba dzi emeya gu tshulega nya vathu ni sirengo. Guvbindrugedza gogu kha ga girega khu gu khwavbiha nya maho. Gupheyani, nyi di gu si wona na si gu vivbide gu diga dzihengeledzano dzedzi. Ambari ulolo, nyi pwisiside gu kheni Mufumu wa Nungungulu khuwo basi wu na vbindrugedzago litigo leli. Khu kharato, nyi hungide gu ninga lisima Mufumu wa Nungungulu ni gu phasa vathu gu hevbula khuwo. — Matewu 6:33.

 Kha nga ativista, nyi di gu oloveya gu kabanisa vathu khu mitsawa mivili, vale nya gu gire silo nya sadi ni ava nya gu gire silo nya gu vivbe. Nyi di gu dzi emisede gu fuvisa vatshavbo vathu va nga ba va gira silo nya gu vivbe. Ganiolu, khu gu phaswa khu Bhibhiliya, nyi di diga likhulo nyi nga ba nyi lipwa khu vathu vava. Vbavbandze nya isoso, nya gu zama gu yeyedza lihaladzo nya Wukristo ga vathu vatshavbo. (Matewu 5:44) Mwenyo nya dzindziya nya gu yeyedze lihaladzo leli, khu gu bhuleya vambe maningano khu mahungu nya yadi nya Mufumu wa Nungungulu. Nyi ngu tsaka khedzi thumo wowu wu andrisago khidzo gurula ni gu tsaka wu bwe wu ninga vathu gutumba nya lisine.

Nyi si kodzide gu mana gurula ga mapimoni khu gu vega gugaradzega gwangu madzani ga Jehovha. Nyi ngu tiyisega gu kheni Uye kha nga Muvangi, kha na nga dzumeleya gu khuye sirengo ni vathu va pharwa khu ndziya nya ba yadi kala gupindruga nigu kha na nga dzumeleya gu khuye mafu yathu nya gu mburi ma tshungunudwa.Vbavbandze nya isoso, nugunugu khu gu thumisa Mufumu Waye, a na lungisa satshavbo si nga gohetedwa. (Isaya 11:1-9) Kha nyi tsaki basi khu gu ba nyi tide lisine, ganiolu nya gu tsaka gambe khu gu phasa vambe gu khodwa gwalo. Muhuno, kha nyi ngu pimisa gambe gu kheni ni yede gu vbindrugedza litigo.