Bhibhiliya yi hambanide ni mambe mabhuku kholu iyo yo guta khiyo ga Muvangi. (2 Thimoti 3:16) Khu gighelo gyogyo, iyo yi nga hi phasa ngudzu womini gwathu. Bhibhiliya ya gu ganeya gu khiyo: “lito la Nungungulu li ngu vbanya nigu li na ni tshivba.” (Vahebheru 4:12) Bhibhiliya yi na ni tshivba nya gu tshukwadzise womi wathu khu dzindziya dzimbili: Yi ngu hi thangeya tshigu ni tshigu nigu yi ngu hi phasa gasi hiti Nungungulu ni situmbiso saye — 1 Thimoti 4:8; Jakobe 4:8.

Bhibhiliya yi nga hi thangeya tshigu ni tshigu. Bhibhiliya yi na ni wusingalagadzi wu nga hi phasago womini gwathu. Khu giyeyedzo:

•   Gu tshukwadzisa gupwanana gwathu ni vambe. — Vaefeso 4:31, 32; 5:22, 25, 28, 33.

•   Gu manega ni womi nya wadi nya mili ni mapimoni. — Ndzimo 37:8; Mavingu 17:22.

•   Guti silo nya sadi ni esi nya guvivbe. — 1 Vakorinto 6:9, 10.

•   Gu dzi garadzeya gu thuma gasi hi dzi vbanyisa. —  Mavingu 10:4; 28:19 Vaefeso — 4:28. a

Wona giyeyedzo nya patwa nya vaphya wa Asia wu ningago lisima wusingalagadzi nya Bhibhiliya. Gufana ni vathu nya vangi va nga ri gu dzegana, avo si di gu va garadzeya gu oloveyana ni gu bhudzisana khu ndziya nya yadi. Ginani gi va phasidego? Avo va di pheya gu vbanya khesi va nga ba va si hevbula. “Mwama waye vicente wari khuye: Esi nyi nga ba nyi leri omu nya Bhibhiliya si nyi phaside gu emisana ni sigaradzo nya mutshadho wathu khu ndziya nya lihaladzo. Gu vbanya khesi hi sihevbulago omu nya Bhibhiliya si phaside gu mutshadho wathu wu tsakisa.” Mwangadzi waye Annalou, wari khuye: “Gu leri siyeyedzo nya vathu va omu nya Bhibhiliya si hi phaside. Olu nyo dzipwa na nyi tsakide ngudzu khu mutshadho wathu.”

Guti Nungungulu. Vbavbandze nya esi vicente a ganedego khu mutshadho, olu gambe wari khuye: “Tepo nyi lerigo Bhibhiliya nya gu dzipwa na nyi ri vbafuvbi ni Jehovha.” Vicente a ganede silo nya lisima, nya nga gu Bhibhiliya yi nga mu phasa gu manega ni wupari nyo tiye ni Nungungulu. Wa gu leri Bhibhiliya kha wu na nga wuyedwa basi khu wusingalagadzi wayo. Ganiolu, u na si kodza guti Nungungulu nigu u na khala pari yaye. U na hevbula gambe khu wumindru nya wadi, kholu Nungungulu a ngu tumbisa gu hi ninga “womi nya lisine” Kala gupindruga (1 Thimoti 6:19) Gumwalo limbe libhuku li tumbisago silo nya gu fani ni esi.

Wa gu simama gu leri Bhibhiliya, u na phasega ngudzu kholu u na si kodza gu tshukwadzisa womi wago ni gu bwe u muti gwadi Nungungulu. Ambari ulolo, wa gu ba na wu leri Bhibhiliya dzimbe dzitepo u na manega ni siwudziso nya singi. Sa gu girega isoso , dundruga khu thenwa nya Muetiyopi, oyu a vbanyidego 2 000 myaga yi vbidrindego. Uye a diri ni siwudziso nya singi maningano khu Bhibhiliya. Tepo a nga wudziswa gu a di gu si pwisisa esi a nga ba a leri uye a di hlamula gu khuye: “Nyi na si pwisisa kharini nya mba mana wangu nya gu nyi tshamuseye?” b Khavbovbo uye a di dzumeya giphaso gya Filipi, moyo nya valandreyi wa Jesu a nga ba a ri ni guti nya Bhibhiliya. (Mithumo 8:30, 31, 34) Gufana ni Muetiyopiya ina u ngu tsakeya guti nya singi khu Bhibhiliya? Lomba omu nya interneti khu gu thumisa saite nya www.pr418.com. U nga bhula gambe ni dzifakazi dza Jehovha mwendro gu hongola Salawuni nya mufumo yi gumogo gipandreni gwago. Pheya gu hevbula Bhibhiliya muhuno u bwe dzumeleya gu yi gu thangeya womini gwago.