Gu leri Bhibhiliya si ngu tsakisa mwendro si ngu gorosa? Hlamulo wo guya khedzi uwe u yi hevbulago khidzo Bhibhiliya. Hi na wona esi si na gu phasago gasi u tsakiswa khu gu leri Bhibhiliya.

Hatha Bhibhiliya yi lovidwego khu lidimi u li pwisisago. Gasi gu ganeya lisine mwalo a si tsakeyago gu leri ndrima yi tadego khu malito nyo garadzi mwendro a si ma tigo gwadi. Khu kharato, tepo u lerigo Bhibhiliya vbwetedzeya lidimi u na li pwisisago gwadi, yi na khuhago monyo wago. Yi yede gu ba na yi ri Bhibhiliya yi nga vbindrugedzedwa gwadi khu wukheta nigu yi tumbegago. a

Thumisa tekinolojiya. Muhuno Bhibhiliya u nga yi mana omu nya mitshini mwendro nyo ghandlwe. U nga yi leri omu nya interneti mwendro gu yi tshisa gasi u yi leri omu nya komputadhori, telefoni, mwendro omu nya tablet. Wuvbindrugedzeyi nya Bhibhiliya wu gumogo omu nya mitshini wu na ni Dziferameta dzi hi phasago gu gira wugevisisi nya lisima. Mweyo nya dziferameta dzedzi yi nga hi phasa gu leri mavhesi nya mangi nya Bhibhiliya ma ganeyago khu mahungu ya ma mowo. Yimbe ferameta yi ngu fananisa livhesi la limwedo ni wumbe wuvbindrugedzeyi nyo hambane nya Bhibhiliya. Wa gu vbweta gu engiseya, vbavbandzi nya gu leri u nga si kodza gu mana Bhibhiliya khu audhyu. Vathu nya vangi va ngu si tsakeya gu engiseya gravhasawu nya Bhibhiliya omu nya dzimovha dzawe ni tepo va girago mithumo yawe ya tshigu ni tshigu. Wo si wona kharini, ina u nga hatha mweyo nya dzindziya gasi gu yi thumisa?

Gira wugevisisi.Gu na ni silo nya singi si nga gu phasago gasi u tsakiswa khu gu leri Bhibhiliya. Khu giyeyedzo, Bhibhiliya yi na ni dzi mapa dzi nga hi phasago gu wona omu si giregidego esi hi lerigo. Isoso si ngu phasa gu hi tsakiswa khu gu leri. Simbe silo si nga hi phasago, dzindrima nya Bhibhiliya dzi gumogo omu nya Revhista yeyi mwendro omu nya gipandre “sihevbudzo nya Bhibhiliya” yi gomogo omu nya saite jw.org.

Thumisa dzindziya nya gu hambane-hambane. Ina si ngu gu garadzeya gu leri Bhibhiliya gu khugeya ga pajina nya gu pheya kala mahegiso? Kha si hungi gu pheya khu Genesisi. U nga hatha gu pheya khu gipandre gi gu tsakisago omu nya Bhibhiliya. Khu giyeyedzo, wo si wona kharini, ina u nga pheya gu leri khu vathu va tidwago ngudzu va lovidwego omu nya Bhibhiliya? Gasi gu gira isoso wona kwadru yi gu khiyo “ Guti vathu va tidwago ngudzu omu nya Bhibhiliya.” U na mana mahungu ma tsakisago. Yimbe ndziya gu leri khu esi si nga girega, khedzi silo si sasamedzidwego khidzo omu nya Bhibhiliya. Wo si wona kharini, ina u nga hatha mweyo nya dzindziya gasi u yi thumisa?