Nyi velegidwe Paddington Inglaterra, omu gu nga ba gu vbanya vathu nya vangi, nyi di gu khala ni mamayi wangu ni vandriyangu vararu nya va koma. Papayi wangu kha nga ba a gola gu khala gaya kholu a nga ba ari gidhakwa.

Tepo nyi nga ba nyiri gyanana, mamayi wangu a di gu nyi hevbudza gu gombeya ni wutshigu. Nyi diri ni Bhibhiliya nya yidugwana yi nga ba yiri ni libhuku la dzindzimo, nigu nyi di gu yi thumisa gasi gu gira dzindzimo gasi nyi embeleya. Nyi ngu dundruga malito ma nga ba ma si dugi mapimoni gwangu, nyi nga ba nyi ma hevbula ga libhuku nyo khaguri ma gu khayo: “Litshigu limwedo hi na lala hi si wugi gambe.” Malito yaya ma di si nyi ningi ligovbe khu gu khaleya gu dundrugeya khesi si nga ha dzi girega mindru wa tshigu. ‘Nyi di ba nyi dzi wudzisa gu kheni’ Khu yavbini makungo nya womi? ‘Nyi bwe nyi dzi wudzisa gu kheni nya gu vbanyeya ginani?’ Nyi di si vbweti gufa!

Nyi di pheya gu beleya dzinyanga. Nyi di gu zama gu ganeya ni vafi, nyi hongola dzi simiteru nyi dzipari dzangu ni gu sistiri dzi filmi nya gu thise ngudzu. Ambari olu dzi nga ba dzi thisa dzi di gu nyi tsakisa.

Tepo nyi nga ba nyiri ni 10 myaga kha nya nga ba nyi vbweta gu engisa muthu. Nyi di pheya gu daha dzi sigaru nigu kha nya nga ba nyi si kodza gu si diga gambe. Khu gu gimbiya nya tepo nyi di pheya gu daha mbangi. Tepo nyi ga ba nyiri ni 11 myaga nyi di pheya gu seya wadwa. Ambari olu wu nga ba wu si tshambi, nyi di gu tsakiswa khesi wu nga ba wu nyi gira nigu nyi di gu gola gu engiseya dzindzimo ni gu hana. Nyi di gu hongola omu nya dzifesta ni dzidhiskoteka. Nyi di gu duga nyi hongola nyi wuya vbadzimindrutunu na gu si gugye nya mba wonwa khu muthu. Kha nga olu gu nga ba gugya na nyi garade dzitepo nya dzingi nyi di si hongoli xikwatuno nigu nya gu tshuka nyi hongola nyi di gu seya khu tepo nya intervhalu.

Ga mwaga wangu nya gu hegise xikwatuno nyi di xumbari. Mamayi wangu a di zangari ngudzu kholu kha ba a dziti gu khuye nyi na ni mavbanyelo nyo vivbe, hi di dwanisana nyo bwe nyi khuga khu gaya. Khu gu gimbiya nya tepo nyi diya khala nyi namoradhu yangu yi nga ba yiri murasita. Uye a di gu gira gipandre nya avo va nga ba vaba ni gu rengisa dzidroga nigu a di gu tidwa kha nga gighevenga. Tepo nyi nga ba nyiri ni 16 myaga nyi di mana mimba nyi bwe nyi velega gyanana nya gikhwathana.

Tepo nya pheye nyi nga ganeya nyi Dzifakazi dza Jehovha nyi di gu khala ga wulanga va nga ba va khala vamamayi va gu mwalo vama nigu wulanga wowo wu diri wa mufumo. Vanyamayi vavili va nga ba vari Dzifakazi dza Jehovha va di guta tepo yatshavbo gasi va ta wuseya vamamayi nyo khaguri. Litshigu limwedo nyi diya engiseya esi va nga ba na va ganeya na nyi vbweta gu va yeyedza gu kheni kha va hevbudze lisine. Ganiolu, va hlamude siwudziso sangu satshavbo khu gu thumisa Bhibhiliya nigu va di gu ganeya gwadi ni eni, isoso si nyi giride nyi vbweta gu hevbula Bhibhiliya.

Khu tepo nya yidugwana nyi hevbude silo nya singi omu nya Bhibhiliya si nga nyi gira nyi vbindrugedza womi wangu. Gu khugeya nyi ngari gyanana nyi di gu thava gufa. Ganiolu, muhuno nyi hevbudzidwe gu kheni avo va fudego va na wuswa! (Johane 5:28, 29) Nyi hevbude gambe gu kheni Nungungulu a ngu khatala kheni. (1 Pedro 5:7) Malito ma nyi khuhidego ngudzu khayo ma gu romo omu ga Jeremiya 29:11, ma gu khayo: “‘ Eni kheni nyi matigo gwadi makungo nyi gu navo khu enu, a ngu ganela Pfhumu Nungungulu; makungo yangu khya gu mi kategisa nasiri gu mi reselani dzimhango, makungo nya gu mi ningeni gitumbo ga matshigu ma nga gutago.’’’ Nyi phede gu khodwa gu kheni si nga kodzega gu vbanya womi nya mba vbeya paradhesini omu mafuni. — Ndzimo 37:29.

Dzifakazi dza Jehovha dzi nyi yeyedzide gu khidzo dzi ngu nyi haladza khu lisine. Litshigu nya gu pheye nyi nga hongola mitshanganoni, si nyi tsakiside ngudzu gu wona edzi va nyi hakhidego khidzo! (Johane 13:34, 35) Si di gu hambanide ngudzu ni edzi nyi hakhidwego khidzo ga tshetshe nyi nga tshuka nyi hongola. Dzifakazi dza Jehovha, dzi nyi hakhide gwadi ambari olu nyi nga ba nyiri ni sigaradzo, va yeyedzide gu khavo va ngu khathala kheni va bwe va nyi phasa gu pala sigaradzo sangu. Nyi dzipwide na nyi gira gipandre nya ndranga nya yikhongolo yi gu na ni lihaladzo.

Tepo nyi ngaya nyi hevbula Bhibhiliya nyi tugude gu kheni nyi yede gu vbindrugedza mavbanyelo yangu gasi gu tsakisa Nungungulu. Ganiolu, si nyi garadzede ngudzu gu diga gu daha nigu nyi tugude gu kheni dzindzimo nyi nga ba nyi engiseya dzi di gu nyi gira ni vbweta gu daha, khu kharato nyi di gu si wona nari tshukwana gu diga gu engiseya dzindzimo dzodzo. Gimbe gilo nyi nga ba nyi vbweta gu gi diga gu seya, nyi digide gu hongola dzifestatunu ni dzidhiskoteka dzi nga hadzi gu gira nyi dogoreya gu seya. Vbavbandze nya isoso nyi giride wupari ni vathu va nga hadzi gu nyi phasa gu vbindrugedza mavbanyelo yangu. — Mavingu 13:20.

Khu tepo yoyo Tony nuye a di gu hevbula Bhibhiliya ni Dzifakazi dza Jehovha. Kha nga olu va nga ba va hlamula siwudziso satshavbo a nga ba a si gira soso si mu giride a khodwa gu khuye esi a nga ba a si hevbula lisine. A vbindrugedzide silo nya singi womini gwaye nya nga: gu diga dzipari nya gu vivbe a ga ba ari nadzo, wughevenga ni gu daha mbangi. Eni ni Tony hi wonide gu khethu hi di yede gu vbindrugedza womi wathu gasi hi tsakisa Jehovha nigu hi dandrisa gyanana gyathu ga ndranga nya yadi. Khu kharato hi di tshadha khu 1982.

Olu nyi ngu mana ligovbe, kha nyi ngu khaleya gu pimisa khesi si na giregago mindru wa tshigu mwendro gu thava gufa, nyi ngu dundruga gu kheni nyi di gu gira wugevisisi omu nya Mukhedziseyi ni Khendzugani! a na nyi gu vbweta guti gu kheni vathu va gu si kodza kharini gu vbindrugedza womi wawe nga edzi nyi nga ba nyi si vbweta khidzo. Siyeyedzo sawe si nyi phaside ngudzu, si nyi giride nyi zama gudzigaradza gasi nyi vbindrugedza. Nyi di gombeya nyi lomba Jehovha gu a nyi phasa gu mba vbeya tshivba. Khu julho nya 1982 eni ni Tony hi di Bhabhatiswa kha nga Dzifakazi dza Jehovha

Gu khala pari ya Jehovha si vbulugiside womi wangu. Eni ni Tony hi wonide gu khethu Jehovha hi phaside ga tepo hi nga tshangana ni sigaradzo. Ambari olu, hi ga ba hiri ni sigaradzo hi hevbude gu tumba Jehovha nigu hi wonide gu khethu Jehovha a hi phaside a bwe a sayisa ndranga yathu. — Ndzimo 55:22.

Hi tsakide ngudzu khu gu phasa sanana sathu gu manega ni wupari ni Jehovha nigu hi ngu tsaka khu gu wona vatugulu vathu na va gu hevbula khu Jehovha. Olu nyi ngu mana ligovbe kha nyi ngu khaleya gu pimisa esi si na giregago mindru wa tshigu mwendro gu thava gufa.

Semana ni Semana eni ni Tony ha gu wuseya vandriyathu mabandlani gasi gu va tiyisa. Ethu ni vandriyathu ha gu hevbudza vathu gu khethu va gu khodwa ga Jesu va na mana womi nya mba vbeya.