Ginani gi na gu phasago gasi u gola gu leri Bhibhiliya? U nga londrola kharini esi u si lerigo? Wona 5 dzindziya dzi phasago vathu nya vangi.

Vbweta wulanga nya gu khadzisege. Zama gu mana wulanga nya gurule gu gumwalo silo si na gu tsolopeteyago, wa gu vbweta wulanga gu wonegeyago gwadi gu vetago phuvbo nya yadi si na gu phasa gu u tsakeya gu leri.

Dongiseya mapimo yago. Bhibhiliya libhuku hi ningidwego khu papayi wathu wa ndzadzini. Khu kharato, tepo u lerigo Bhibhiliya u yede gu fana ni gyanana gi golago gupwa matimu ya papayi wagyo. Wa gu ba uri ni mawonelo nya gu hosege maningano khu Bhibhiliya zama gu vbindrugedza mawonelo yago. Ganiolu, u dzumeya gu hevbudzwa khu Nungungulu. — Ndzimo 25:4.

Na u nga si leri pheya khu gu gombeya. Omu nya Bhibhiliya hi ngu mana mapimo ya Nungungulu, Khu kharato hi ngu vbweta giphaso gyaye gasi hi pwisisa esi hi si lerigo. Jehovha o tumbisa gu “a na ninga liphuvbo nya guage vale va mu lombago.” (Luka 11:13) Khu gu landreya liphuvbo nya guage li na gu phasa gasi u pwisisa Bhibhiliya. Khu tepo yamweyo, yi na gu phasa gasi u pwisisa “silo si etidego ngudzu sa Nungungulu.” — 1 Vakorinto 2:10.

Leri na u gu zama gu pwisisa esi u si lerigo. U nga tutumeyi gu vbedza. Dundrugeya gwadi esi u si lerigo. Khu giyeyedzo dzi wudzise gu khuwe: ‘Makhalelo muni nyi nga ma dzegeleyago ga muthu yoyu nyi hevbudego khuye? Esi nyi si hevbudego nyi nga si thumisa kharini womini gwangu?’

Dzi vegeye misuwo. Gasi u phasega khesi u si lerigo omu nya Bhibhiliya dzi vegeye misuwo nyi na gu phasago womini gwago nya nga eyi yi landreyago: ‘Nyo vbweta hevbula nya singi maningano khu Nungungulu’. ‘Nyo vbweta gu tshukwadzisa mavbanyelo yangu gasi nyi kala nyamayi mwendro mwama nya wadi’. Khu kharato, hatha sipandre nyo khaguri si na gu phasago gu vboheya misuwo yago. a

Dzindziya dzedzi nya 5, dzi na gu phasa gu u si kodza gu pheya gu hevbula Bhibhiliya. Ginani, u nga girago gasi gu leri gwago nya Bhibhiliya gu tsakisa? Ndrima yi landreyago yi na gu phasa gu wona esi si nga gu phasago.