Jehovha Nungungulu khuye Muvangi wathu. Khuye a giridego silo satshavbo esi hi kodzago gu si wona ni esi hi si si wonigo. Na a si gu giri silo sesi hi si wonago, phede khu gu gira dzingilozi nya dzingi-dzingi. U ngu dziti gu khuwe ginani dzingilozi? Dzingilozi vathu va giridwego khu Jehovha, va fanago naye. Kha hi si kodzi gu dzi wona kha nga olu si si kodzegigo gu wona Nungungulu. Ngilozi nyo pheye yi giridwego khu Jehovha yi di khala muphasedzeyi waye. Ngilozi yoyo yi phasedzede Jehovha tepo a nga gira dzinyeledzi, dziplaneta, ni satshavbo. Mweyo nya dziplaneta dzodzo, mafu, gaya gwathu nyo mbure.

Khavbovbo Jehovha a di dongiseya mafu gasi gu vbanya umo sirengo ni vathu. A di gira guwonegeya nya lidambo gu wenengedza mafuni. A bwe a gira sigomo, yiphwa ni mitsongo.

Ginani gi nga landreya? Jehovha a di khuye: ‘Nyi na gira mwasi ni misimbo.’ Gu pheya gu buga mafumbo ni mafumbo nya mihandro, mitongwe, ni sifilori. Khavbovbo, Jehovha, a di gira sirengo satshavbo — sirengo nyo vbuvbe, nyo hambeye, nyo khafule ni esi nyo gimbiye khu girumbu. A di gira nya sidugwana nya nga sihulo ni esi nya sikhongolo nya nga dzielefanti. Khu gevbi girengo u gi golago ngudzu?

Khavbovbo, Jehovha, a di embeya ngilozi nyo pheye, khuye: ‘Hongole hi gire muthu.’ Vathu va di girwa khu ndziya nyo hambane ni sirengo. Va di hadzi kodza gu dzi gireya silo. Va ganeya, va hega ni gu gombeya.  Va di hadzi sayisa mafu ni sirengo. U ngu muti muthu a nga pheya khuye a girwa? U na muti.