GIHEVBULO 66
Ezra a hevbudza Nayo wa Nungungulu
Gu di gu vbindra 70 myaga Vaisrayeli na va bwelede Jerusalema. Ganiolu, vambe va di gu vbanya malangani nyo hambanehambane nya Mufumo wa Persiya. Moyo nya avo gu diri Ezra, oyu a nga hevbudza Nayo wa Jehovha. Ezra a dipwa gu pwani vathu Jerusalema kha va nga ba va engisa Nayo wa Jehovha. Aritasesi, Pfhumu ya Persiya, a di mu embeya khuye: ‘Nungungulu gu ningide wugengeyi nyo hevudze Nayo waye. Dzega ni wevbini u mu vbwetago u hongola naye.’ Ezra a di tshanganisa vatshavbo va nga ba va vbweta gu bweleya Jerusalema. Va di gombeya ga Jehovha gasi a va vhikeya lipfhumbani gwawe. Tepo va nga vbedza, va di beya ndziyani.
Hwane nyo ba gu vbindride 4 migima, va di vboha Jerusalema. Vathangeyi va mule va di embeya Ezra khavo: ‘Vaisrayeli va digide gu engisa Jehovha va bwe va dzega vanyamayi va khozeyago sifananiso.’ Ginani egi Ezra a nga gira? Ezra a di khidzima mbeli ga vathu a gombeya khuye: ‘Jehovha, u hi girede silo nya singi ngudzu. Ganiolu, ethu hi gu ghohede.’ Vathu va di dzipwa nandru, va di nga gu vbweta gu phaswa gasi va diga gu gira silo nyo vivbe. Ezra a di hatha madhota ni valamuli gasi va khathaleya mahungu yoyo. Ga migima miraru yi nga landreya, ava va nga ba va si khozeyi Jehovha va di tutumiswa.
Gu di vbindra 12 myaga. Ndrani nya tepo yoyo, va di vbahedza muru wa Jerusalema. Ezra a di tshanganisa vathu gasi va leri Nayo wa Nungungulu. Tepo Ezra a nga tula libhuku, vathu va di khuga va ema. A di dhumisa Jehovha, khavbovbo vathu va khusedza mawogo va mu dhumisa navo. Ezra a di vbedza a leri Nayo a bwe a wu tshamuseya. Vathu va degula havo kape va engiseya gwadi. Va di dzumeya gu khavo va di digide gu engisa Jehovha gambe, khavbovbo va liya. Ga litshigu li nga landreya, Ezra a di va lereya gambe Nayo. Va diti gu khavo gu vbwetega va gira Buzo nya Mitshatsha nya mba hweya. Va di dzegeya gu pheya gu dongiseya festa yoyo.
Ndrani nya 7 matshigu yoyo, vathu va di tsaka ngudzu va bwe va bonga Jehovha kholu va nga ba va fumide. Gukhugeya matshigu ya Josuwa, gu di nga si girwi Buzo nya Mitshatsha
nya nga uwowo. Hwane nyo ba festa yoyo na yi vbede, vathu va di tshangana va gombeya, khavo: ‘Jehovha, u hi tshudziside wugumbini, u hi sayisa giwulani u bwe u hi ninga litigo leli nyo mbure. Ganiolu, ethu ho khaleya gu diga gu gu engisa. U rumede vaprofeti va ta hi phasa, ganiolu kha ha gu engisa. Ambari ulolo, u simamide u hi laphiseya monyo. U giride esi u nga tumbisa ga Abrahama. Olu hi ngu gu tumbisa gu khethu hi na gu engisa.’ Va di lova esi va nga tumbisa, khavbovbo vathangeyi, ni vaLevhi ni vapristi va vega gifungo.“Va ngu tsaka vale va pwago lito la Nungungulu va li landrisa!” — Luka 11:28