Hwane nyo ba gu vbindride tepo nyo khaguri Pfhumu Nabhukodhonosiri na loride, a di gira gifananiso nya gikhongolo nya ouro. A di gi emisa omu nya gitsongwana gya Dhura khavbovbo a rana vathu nya lisima va tigoni, gupata Sadraki, Misaki ni Abhedhi-Negho gu khuye va tshangana mbeli gwagyo. Pfhumu yi di laya gu khiyo: ‘Tepo mu na pwago mipundru, sitendre ni dzingoma, khidzimeyani gifananiso! Ni wevbini a na bombago gu gi khidzimeya, a na rinywa phalani nya nilo.’ Ina Vahebheru vale nya vararu va di hadzi gi khidzimeya gifananiso gyogyo, mwendro va di hadzi khozeya Jehovha basi?

Tepo va nga tshangana, pfhumu yi di ruma gu khiyo va womba wutsendze. Vatshavbo va di khidzimeya gifananiso gyogyo. Ganiolu, Sadraki, Misaki ni Abhedhi-Negho kha va gi khidzimeya. Vama nyo khaguri va di va wona, va ya embeya pfhumu khavo: ‘Vahebheru vale nya vararu va ngu bomba gu khidzimeya gifananiso gyago.’ Nabhukodhonozori a di va ruma gu ya va embeya gu khavo: ‘Nyi ngu mi ningani limbe lithomo nya gu mu khozeya gifananiso. Mo mba gi khozeya, nyi na mi rinya phalani nya nilo. Mwalo Nungungulu a na si kodzago gu mi vbulugisa gwangu.’ Avo va di hlamula khavo: ‘U nga vidzwi khu gu hi ninga limbe lithomo. Nungungulu wathu a na hi vbulugisa. Ambari a gu mba hi vbulugisa, ethu kha hi na nga gi khozeya gifananiso gegi.’

Nabhukodhonozori a di zangari ngudzu, a embeya masotshwa yaye khuye: ‘Endzedzeyani nilo phalani wu vbisa 7 dzitepo guvbindra edzi wu oloveyago guvbisa khidzo!’ Khavbovbo, a di embeya masotshwa khuye: ‘Va hungeleyeni mu va rinya umo!’ Liphala nya nilo li di gu  vbisa ngudzu nyo bwe masotshwa ma dzegeya gufa tepo ma nga hidzimeya vbafuvbi. Vahebheru vale nya vararu va di thega phalani nya nilo. Ganiolu, tepo Nabhukodhonozori a nga holeya phalani nya nilo, a di wona vama na va gimbiyagimbiya. Kha va nga ba vari vararu basi. Gu diri 4 nya avo! A di thava ngudzu khavbovbo a wudzisa masotshwa yaye khuye: ‘Gasi khandri vama vararu hi nga va rinya niloni? Nyo wona 4 nya avo. Oyu mumbe o fana ni ngilozi!’

Nabhukodhonozori a di hidzimeya vbafuvbi, a rana khuye: ‘Sithumi sa Nungungulu a Khugegidego Ngudzu, dugani!’ Vatshavbo va di hlamala khu gu wona Sadraki, Misaki ni Abhedhi-Negho na va duga khu niloni nya mbavbya. Sivili sawe, ndzudzu wawe ni sombo sawe kha savbya nigu ne kha sa nga ba si nunga wutshi.

Nabhukodhonozori khuye: ‘Nungungulu wa Sadraki, Misaki ni Abhedhi-Negho khongolo. Rumede ngilozi yaye yi ta va vbulugisa. Mwalo mumbe nungungulu a fanago ni oyu wawe.’

Gu fana ni Vahebheru vava nya vararu, u dzi emisede gu tumbega ga Jehovha ambari go dugeleya ni gevbi?