Yimbe pfhumu yi fumidego Bhabhiloni gu diri Dhariyo, Mumedhi. Dhariyo a di wona gu khuye Dhaniyeli a diri ni wugengeyi nya wungi guvbindra vambe. Khu kharato, a di hatha gu khala muthangeyi nya vama nya lisima ngudzu nya litigo. Vama vovo kha va nga ba va mu gola Dhaniyeli, nigu va di si vbweti ni gu mu wona. Va di gu dziti gu khavo Dhaniyeli a di gu gombeya guraru khu litshigu. Khu kharato, va di ya embeya Dhariyo khavo: ‘Pfhumu, gu vbwetega wu vegwa nayo nya gu vatshavbo gu vbwetega va gombeya ga uwe basi. Ni wevbini a na bombago gu engisa nayo wowu, gu vbwetega a rinywa phalani nya dzinghala.’ Dhariyo a di dzumeya mawonelo yoyo, a vbedza a sinari nayo wowo.

Tepo Dhaniyeli a ngapwa nayo wowo nya wuphya, a di dzi hongoleya gaya gwaye. A di ya khidzima khavba nya janela yaye, a gombeya ga Jehovha. Vama nyo khaguri nya wufu va di tutuma va hongola va ya mu mana na gombeya. Khu hwane, va di tutuma va ya embeya Dhariyo khavo: ‘Dhaniyeli kha gu engisi. A gu gombeya ga Nungungulu waye guraru khu litshigu.’ Dhariyo a di gu mu gola Dhaniyeli nigu kha nga ba a vbweta gu mu songa. A di khala litshigu latshavbo na gu vbwetedzeya ndziya nyo vbulugise Dhaniyeli. Ganiolu, ambari uye kha nga pfhumu a diri mwalo fanelo nyo vbindrugedze nayo wu sinaridwego. A di yede gu ruma sithumi saye si ya mola Dhaniyeli si mu rinya phalani nya dzinghala nyo havbe.

 Ni wutshigu wakone, Dhariyo a di gu garadzega khu kotani ya Dhaniyeli nyo bwe a si mani ni ligovbe. Ni dzimindru, a di tutuma a hongola phalani a ya rana Dhaniyeli khuye: ‘Dhaniyeli, Nungungulu wago gu vbulugiside?’

Dhariyo a dipwa lito nyo khaguri. Gu diri lito la Dhaniyeli! A di embeya Dhariyo khuye: ‘Ngilozi ya Jehovha yi di sega magana nya dzinghala. Ne kha dza nyi bayisa.’ Dhariyo a di tsaka, a di rumisa gu khuye va dusa Dhaniyeli khu phalani. Ne gu pfendreledwa kha pfendreledwa. Khavbovbo, pfhumu yi di khiyo: ‘Vama va nga singedza Dhaniyeli va rinyeni phalani nya dzinghala.’ Tepo vama vovo va nga rinywa phalani, dzingala dzi di va hagadza.

Dhariyo a di rumeya nayo wowu ga vathu vatshavbo: ‘Vathu vatshavbo gu vbwetega va thava Nungungulu wa Dhaniyeli. Vbulugiside Dhaniyeli phalani nya dzinghala.’

U ngu gombeya ga Jehovha tshigu ni tshigu kha nga Dhaniyeli?