Vathu va Judha va di gu khaleya gu pfhurareya Jehovha, va khozeya vanungungulu nya malipha. Jehovha zamide gu va phasa khu myaga nya yingi. A di rumeya vaprofeti ni vaprofeti gasi gu ya va gengedza, ganiolu kha va nga ba va engisa. Wulangani nya gu va engisa, va di gu poyileya. Ina ka, ginani a giridego Jehovha gasi gu fuvisa wukhozeyi nya sifananiso?

Nabhukodhonosori, pfhumu ya Bhabhiloni, a di gu pala mayigo nya mangi limwedo khu limwedo. Tepo nyo pheye a nga pala Jerusalema, a di mola Pfhumu Jowakimi, vathangeyi, masotshwa ni vakarpinteru a hongola navo Bhabhiloni. A di dzega sombo satshavbo si nga ba siri omu nya tempele. Khavbovbo, a di emisa Zedhekiya kha nga pfhumu ya Judha.

Gupheyani, Zedhekiya a di gu engisa Nabhukodhonosori. Ganiolu, vathu nya mayigo ya vbafuvbi ni vaprofeti nya malipha va di kutsedzeya Zedhekiya gu khavo a diga gu engisa pfhumu ya Bhabhiloni. Jeremiya a di gengedza Zedhekiya, khuye: ‘Wo diga gu engisa Vabhabhiloni, gu na songetedwa vathu omu Judha, gu manega ndzala ni madwali nya mangi.’

Hwane nyo ba gu vbindride 8 myaga na fuma, Zedhekiya a di diga gu engisa Vabhabhiloni. A di lomba masotshwa nya Vaegipto gu khuye ma mu phasa. Nabhukodhonozori a di rumeya masotshwa yaye ma ya dwana ni Jerusalema. Tepo ma nga vboha, ma di ghwimba matendra mudzibambe nya lidhoropa. Jeremiya a di embeya Zedhekiya, khuye: ‘Jehovha wari khuye wo dzi ningeya ga Vabhabhiloni, uwe ni lidhoropa mu na vbuluga. Ganiolu, wo mba dzi ningeya, Vabhabhiloni va na vbisa Jerusalema watshavbo huye bhi, va bwe va gu mola va ya gu khoteya.’ Zedhekiya khuye: ‘Kha nyi na nga dzi ningeya!’

 Gu di vbindra mwaga ni metadu, khavbovbo masotshwa nya Vabhabhiloni ma di khungumula dziparedhi nya lidhoropa la Jerusalema ma li vbisa khu nilo. Ma di vbisa tempele, ma songa vathu nya vangi, ma bwe ma mola vambe vathu nya vangi ngudzu ma ya va khoteya pasoni.

Zedhekiya a di duga khu Jerusalema a tutuma. Ganiolu, Vabhabhiloni va di mu landra. Va di ya mu moleya vbafuvbi ni Jeriko, va hongola naye ga Nabhukodhonozori. Nabhukodhonozori, pfhumu ya Bhabhiloni, a di ruma gu si songwa sanana sa Zedhekiya na gu si wona. Khavbovbo, Nabhukodhonozori a di mu pola maho a vbedza a mu khoteya pasoni kala a feya umo. Ganiolu, Jehovha a di tumbisa vathu va Judha, khuye: ‘Hwane nya 70 myaga, nyi na mi bweledza gaya gwanu Jerusalema.’

Ginani gi nga hadzi dugeleya vaphya va nga ba va modwe va yiswa Bhabhiloni? Ina va di hadzi simama gu tumbega ga Jehovha?